Ẹtoro Jehovah Kabana Ikpọ Edinam Esie!
Ẹtoro Jehovah Kabana Ikpọ Edinam Esie!
“Ukpọn̄ mi ke okpono Jehovah . . . Koro Enye emi enyenede odudu ama anam ikpọ n̄kpọ ọnọ mi.”—LUKE 1:46-49.
1. Kaban̄a ikpọ edinam ewe ke nnyịn nte enende itoro Jehovah?
ODOT ẹtoro Jehovah kaban̄a ikpọ edinam esie. Ke ini prọfet Moses okobụkde nte ẹkenyan̄ade Israel ẹsio ke Egypt, enye ama ọdọhọ ete: “Enyịn mbufo ẹma ẹkụt kpukpru ikpọ n̄kpọ emi Jehovah akanamde.” (Deuteronomy 11:1-7) Ukem ntre, ke ini angel Gabriel ọkọtọtde Mary emi mîkọfiọkke erenowo aban̄a emana Jesus, enye ama ọdọhọ ete: “Ukpọn̄ mi ke okpono Jehovah . . . Koro Enye emi enyenede odudu ama anam ikpọ n̄kpọ ọnọ mi.” (Luke 1:46-49) Nte Mme Ntiense Jehovah, nnyịn imotoro enye kaban̄a utọ ikpọ edinam nte edisio Israel ke ufụn Egypt ye utịbe utịbe usụn̄ oro ẹkeyomode edima Eyen esie.
2. (a) Nso ke “nsinsi uduak” Abasi ọwọrọ ọnọ okopitem ubonowo? (b) Nso ke John okokụt onyụn̄ okop ke isuo Patmos?
2 Ediwak ke otu ikpọ edinam Jehovah ẹnyene ebuana ye “nsinsi uduak” esie ndida Messiah ye ukara Obio Ubọn̄ esie ndiọn̄ okopitem ubonowo. (Ephesus 3:8-13) Uduak oro ọkọtọn̄ọ sụn̄sụn̄ ke ini ẹkeyakde akanieren apostle John ada okụt inuaotop heaven oro ẹkebererede ke n̄kukụt. Enye ama okop uyo oro ekebietde uyo ukotowo ọdọhọde ete: “Dọk di ken, ndien nyowụt fi se idisude ke ini emi edidide.” (Ediyarade 4:1) Ke adan̄aemi ukara Rome ekebịnde enye aka isuo Patmos “ke ntak ikọ Abasi, ye ikọ ntiense [aban̄ade] Jesus,” John ama ọbọ “ikọ ediyarade Jesus Christ.” Se apostle oro okokụtde onyụn̄ okopde ama ayarade ekese aban̄a nsinsi uduak Abasi, ke ntem ọnọde kpukpru ata Christian ifiọk eke spirit ye ekemini nsịnudọn̄.—Ediyarade 1:1, 9, 10.
3. Mmanie ke mbiowo 24 oro John okụtde ke n̄kukụt ẹda ẹban̄a?
3 Ke inuaotop heaven oro ẹkebererede, John ama okụt nte ẹdoride mbiowo 24 ke ebekpo ẹnyụn̄ ẹyaride mmọ anyanya nte ndidem. Mmọ ẹma ẹduọn̄ọ ke iso Abasi ẹnyụn̄ ẹdọhọ ẹte: “Ọbọn̄ ye Abasi nnyịn, Afo omodot ndibọ ubọn̄ ye ukpono ye odudu, koro Afo okobotde kpukpru n̄kpọ; ndien oto uduak Fo ke mmọ ẹdu, ẹkenyụn̄ ẹboro.” (Ediyarade 4:10b) Mbiowo oro ẹda ẹban̄a kpukpru mme Christian oro ẹyetde aran emi ẹnamde ẹset oro ẹdude ke akamba itie oro Abasi ọkọn̄wọn̄ọde ndinọ mmọ. Ikpọ edinam Jehovah oro ẹnyenede ebuana ye edibotn̄kpọ ẹnụk mmọ nditoro enye. Idem akpa nnyịn n̄ko kaban̄a uyarade ‘nsinsi odudu Jehovah ye idaha Esie nte Abasi.’ (Rome 1:20) Ndien adan̄a nte nnyịn ikpepde n̄kpọ iban̄a Jehovah, ntre ke nnyịn inyene mme ntak efen efen nditoro enye kaban̄a ikpọ edinam esie.
Ẹtan̄a Mme Edinam Jehovah Oro Ẹdotde Itoro!
4, 5. Nọ mme uwụtn̄kpọ ke nte David okotorode Jehovah.
4 David andiwet psalm ama otoro Abasi kaban̄a ikpọ edinam Esie. Ke uwụtn̄kpọ, David ama ọkwọ ete: “Mbufo ẹkwọ ẹnọ Jehovah emi odụn̄de ke Zion: ẹtan̄a [ase] esie ke otu mme idụt. Tua mi mbọm, O Jehovah; se ukụt mi eke otode ke mme asua mi, afo emi emende mi ke inua-otop n̄kpa efep: man ntan̄a ofụri itoro fo ke inua-otop adiaha Zion.” (Psalm 9:11, 13, 14) Ke ama akayak n̄wed ubọp temple ọnọ Solomon eyen esie, David ama ọkọm onyụn̄ otoro Abasi, ọdọhọde ete: “O Jehovah, ubom, ye odudu, ye ubọn̄, ye akakan, ye uten̄e ẹdi okuommọ . . . O Jehovah, itie edidem edi okuo, afo onyụn̄ okon̄ nte etubom kpukpru. . . . Nnyịn imọkọm fi, ndien, O Abasi nnyịn, inyụn̄ itoro enyịn̄ ubọn̄ fo.”—1 Chronicles 29:10-13.
5 N̄wed Abasi esịn udọn̄ ọnọ—ih, akpak—nnyịn ndien ndien ete itoro Abasi, nte David okotorode. N̄wed Psalm ọdọn̄ọ ediwak ikọ ndida ntoro Abasi, ndien ẹdọhọ ke David ekewet n̄kpọ nte mbahade iba ke otu ikwọ emi. Enye ama esitoro onyụn̄ ọkọm Jehovah kpukpru ini. (Psalm 69:30) Akan oro, toto ke eset, ẹma ẹsikama mme ikwọ oro David ye mbon efen ẹkedade odudu spirit Abasi ẹwet ẹtoro Jehovah.
6. Didie ke Psalm eke odudu spirit enyene ufọn ọnọ nnyịn?
6 Psalm enyene ufọn didie ntem ọnọ mme andituak ibuot nnọ Jehovah! Ke ini nnyịn iyomde ndikọm Jehovah kaban̄a kpukpru ikpọ edinam esie ke ibuot nnyịn, ekikere nnyịn ẹkeme ndika mbịne ndinem ikọ oro ẹdude ke Psalm. Ke uwụtn̄kpọ, ke ini idemerede ikụt obufa usen, ekeme ndinụk nnyịn nditịn̄ mme ikọ ẹbietde mmọ emi: “Ọfọn ndikọm Jehovah, nnyụn̄ n̄kwọ enyịn̄ fo, O Ata Edikọn̄: ndibụk ima fo ke usenubọk, ye akpanikọ fo ke okoneyo, . . . Koro afo, O Jehovah, amadat mi esịt ke utom fo: nyadara ke se ubọk fo anamde.” (Psalm 92:1-4) Ke ini nnyịn ikande n̄kpọ oro ọbiọn̄ọde n̄kọri eke spirit nnyịn, ekeme ndinụk nnyịn ndiwụt idatesịt ye esịtekọm ke akam, idem kpa nte andiwet psalm okowụtde ke ini enye ọkọkwọde ete: “Mbufo ẹdi, nnyịn ikwọ inọ Jehovah; isio n̄kpo idara inọ akwa itiat edinyan̄a nnyịn. Yak nnyịn ida ekọm idi enye ke iso, ida ikwọ isio n̄kpo idara inọ enye.”—Psalm 95:1, 2.
7. (a) Nso ke odot ẹtịm ẹfiọk ẹban̄a ediwak ikwọ oro mme Christian ẹsikwọde? (b) Nso idi ntak kiet ndibak n̄ka mme mbono esop nnyụn̄ ndu tutu esịm utịt?
7 Nnyịn imesiwak ndimenede uyo nnyịn n̄kwọ ikwọ itoro nnọ Jehovah ke mme mbono esop, n̄kpri mbono, ye ikpọ mbono. Odot ẹtịm ẹfiọk nte ke ediwak ke otu ikwọ emi ẹkọn̄ọ ke mme inem inem ikọ eke odudu spirit ẹtode n̄wed Psalm. Nnyịn ikop inemesịt didie ntem ndinyene ntan̄ndian inem inem ikwọ itoro Jehovah ke eyomfịn! Ndikwọ itoro nnọ Abasi edi ata eti ntak kiet ndibak n̄ka mme mbono esop nnyịn ndinyụn̄ ndu tutu esịm utịt, ke ntem ibuanade ye mme ekemmọ andituak ibuot ke nditoro Jehovah ke ikwọ ye akam.
“Mbufo Ẹtoro Jehovah”!
8. Nso isịne ke ikọ oro “Hallelujah,” ndien enye ọwọrọ nso?
8 Nditoro Jehovah esịne ke ikọ oro “Hallelujah,” kpa ediwọn̄ọde ikọ Hebrew oro ọwọrọde “Mbufo ẹtoro Jehovah” n̄wet nte ẹkotde ke Ikọmbakara. Ke uwụtn̄kpọ, ke Psalm 135:1-3, nnyịn imokụt ufiop ufiop, ọkpọsọn̄ ikot emi: “Mbufo ẹtoro Jehovah. Mbufo ẹtoro enyịn̄ Jehovah; mbufo ikọt Jehovah ẹtoro enye; emi ẹdade ke ufọk Jehovah, ke okụre ufọk Abasi nnyịn. Mbufo ẹtoro Jehovah; koro Jehovah ọfọnde: ẹkwọ ẹnọ enyịn̄ esie: koro eyede.”
9. Nso isinụk nnyịn nditoro Jehovah?
9 Nte nnyịn ikerede iban̄a mme utịbe utịbe utom obot Abasi ye kpukpru edinam esie ke ibuot nnyịn, ntotụn̄ọ esịtekọm esinụk nnyịn nditoro enye. Ke ini nnyịn itiede ikere mme utịben̄kpọ oro Jehovah akanamde ọnọ ikọt esie ke eset, esịt esinụk nnyịn nditoro enye. Ndien nte nnyịn itiede ikere mme un̄wọn̄ọ ẹban̄ade ikpọ n̄kpọ oro Jehovah edinamde ke ini iso, nnyịn imesiyom mme usụn̄ ndiwụt itoro ye esịtekọm.
10, 11. Didie ke nnyịn ndidu uwem ọnọ nnyịn ntak nditoro Abasi?
10 Nnyịn ndidu uwem ọnọ nnyịn eti ntak nditoro Jah. David ama ọkwọ ete: “Nyọkọm fi [Jehovah], koro nnyenede ndyọ ye ndịk; se afo anamde edi utịbe; ukpọn̄ mi onyụn̄ ọfiọk enene.” (Psalm 139:14) Ih, ẹnam nnyịn ke ‘ndyọ ndyọ usụn̄,’ imonyụn̄ inyene mme utọ ọsọn̄urua enọ nte ukeme ndikụt usụn̄, ndikop n̄kpọ, ye ukeme ukere n̄kpọ. Ke ntre, nte nnyịn ikpadaha uwem nnyịn inam n̄kpọ ke usụn̄ oro otorode Andinam nnyịn? Paul eketịn̄ ntre ke ini enye ekewetde ete: “Mmọdo m̀mê mbufo ẹdiade, m̀mê ẹn̄wọn̄de, m̀mê ẹnamde n̄kpọ ekededi, ẹnam kpukpru ẹnọ Abasi ubọn̄.”—1 Corinth 10:31.
11 Nnyịn idinam kpukpru n̄kpọ inọ Jehovah ubọn̄ edieke nnyịn inen̄erede ima enye. Jesus ọkọdọhọ ke akpa ibet edi: “Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.” (Mark 12:30; Deuteronomy 6:5) Nnyịn ke akpanikọ ikpenyene ndima Jehovah nnyụn̄ ntoro enye nte Andinam nnyịn ye Andinọ “kpukpru eti edinọ ye kpukpru enọ eke ẹfọnde ẹma.” (James 1:17; Isaiah 51:13; Utom 17:28) Kamse, ukeme ukere n̄kpọ nnyịn, udọn̄ n̄kpọ eke spirit nnyịn, ye odudu ikpọkidem nnyịn—kpukpru edu ye ukeme nnyịn—ẹto Jehovah. Nte Andibot nnyịn, odot nnyịn ima inyụn̄ itoro enye.
12. Afo ekere didie aban̄a ikpọ edinam Jehovah ye mme ikọ Psalm 40:5?
12 Ikpọ edinam Jehovah ẹnọ nnyịn anana-ibat ntak ndima nnyụn̄ ntoro enye! David ama ọkwọ ete: “Afo, O Jehovah Abasi mi, amanam utịbe ido fo, ye ekikere fo eke ekerede nnyịn, ẹwak: idịghe nte ẹtịn̄de mmọ ẹnọ fi: mmoyom ndisiak nnyụn̄ mbụk mmọ, edi mmọ ẹkan nte ẹbatde.” (Psalm 40:5) David ikekemeke ndibat kpukpru utịben̄kpọ Jehovah, nnyịn inyụn̄ ikemeke ndibat. Edi ẹyak nnyịn itoro Abasi kpukpru ini ke ini ẹdụride ntịn̄enyịn nnyịn ẹwụt ikpọ edinam esie ekededi.
Mme Edinam Ẹnyenede Ebuana ye Nsinsi Uduak Abasi
13. Didie ke idotenyịn nnyịn enyene ntotụn̄ọ ebuana ye ikpọ edinam Abasi?
13 Idotenyịn nnyịn kaban̄a ini iso enyene ntotụn̄ọ ebuana ye ikpọ edinam oro ẹdotde itoro oro ẹnyenede ebuana ye nsinsi uduak Abasi. Ke etienede nsọn̄ibuot oro ke Eden, Jehovah ama ọnọ akpa ntịn̄nnịm ikọ oro ọkọyọhọde ye idotenyịn. Ke atan̄ade ubiereikpe ọnọ urụkikọt, Abasi ọkọdọhọ ete: “Nyonyụn̄ nsịn usua ke ufọt fo ye n̄wan, ye ke ufọt [mfri fo ye mfri, NW] esie: enye ayanuak fi ibuot, afo oyonyụn̄ anuak enye nditịn̄-ikpat.” (Genesis 3:15) Idotenyịn ke Mfri an̄wan oro ẹken̄wọn̄ọde ama aka iso ndidu ke esịt mbon oro ẹnamde akpanikọ ke Jehovah ama akanam akamba edinam ke ndinyan̄a Noah ye ubon esie nsio ke Ukwọ ofụri ekondo oro ọkọsọhide idiọk ererimbot efep. (2 Peter 2:5) Mme ntịn̄nnịm un̄wọn̄ọ oro ẹkenọde iren mbuọtidem nte Abraham ye David ẹma ẹnọ n̄kaiso ikike ẹban̄a se Jehovah edinamde ebe ke Mfri oro.—Genesis 22:15-18; 2 Samuel 7:12.
14. Nso idi akakan uwụtn̄kpọ ikpọ edinam Jehovah ke ufọn ubonowo?
14 Akakan edinam Jehovah nte andinam ikpọ n̄kpọ ke ibuot ubonowo eketịbe ke ini enye ọkọnọde ikpọn̄-ikpọn̄ edibon Eyen esie—Mfri oro ẹken̄wọn̄ọde, Jesus Christ—nte uwa ufak. (John 3:16; Utom 2:29-36) Ufak oro ama ọnọ isọn̄ kaban̄a edifiak nnam emem ye Abasi. (Matthew 20:28; Rome 5:11) Jehovah ama atan̄ akpa mbon oro ẹkenamde emem obok ke esop Christian, oro ẹketọn̄ọde ke Pentecost 33 E.N. Ye un̄wam edisana spirit, mmọ ẹma ẹkwọrọ eti mbụk ke kpukpru ebiet, ẹwụtde nte n̄kpa ye ediset ke n̄kpa Jesus ebererede usụn̄ ọnọ okopitem ubonowo ndinyene mme nsinsi edidiọn̄ ke idak ukara Obio Ubọn̄ Abasi eke heaven.
15. Didie ke Jehovah anam n̄kpọ ke utịbe utịbe usụn̄ ke eyo nnyịn?
15 Ke eyo nnyịn, Jehovah amanam n̄kpọ ke utịbe utịbe usụn̄ nditan̄ akpatre ke otu mme Christian oro ẹyetde aran mbok. Ẹmụm ofụm nsobo ẹkama man ayak ẹnịm nsụhọ ke otu 144,000, emi ẹdikarade ye Christ ke heaven, idiọn̄ọ. (Ediyarade 7:1-4; 20:6) Abasi ama okụt ete ke ẹnyan̄a mme Christian oro ẹyetde aran ẹsio ke ufụn eke spirit ke “Akwa Babylon,” kpa ukara ererimbot eke nsunsu ido ukpono. (Ediyarade 17:1-5) Edinyan̄a oro ke 1919 ye ukpeme Abasi oro mmọ ẹnyenede toto ke ini oro ẹyak nsụhọ oro ẹyetde aran ẹnam nso? Ẹyak mmọ ẹyama ke ndinọ akpatre ikọ ntiense mbemiso Jehovah adade utịt ọsọk idiọk editịm n̄kpọ Satan ke “akwa ukụt” oro asan̄ade ekpere usọp usọp.—Matthew 24:21; Daniel 12:3; Ediyarade 7:14.
16. Nso ida itie nte utịp utom ukwọrọikọ Obio Ubọn̄ ofụri ererimbot eke eyomfịn?
16 Mme Ntiense Jehovah oro ẹyetde aran ẹmeda usụn̄ ifịk ifịk ke utom ukwọrọikọ Obio Ubọn̄ eke ofụri ererimbot. Nte utịp, “mme erọn̄ en̄wen” oro ibat mmọ ọkọride-kọri ke ẹkabade ẹdi mme andituak ibuot nnọ Jehovah idahaemi. (John 10:16) Nnyịn imadat esịt nte ke ifet ke osụk ebeberede ọnọ sụn̄sụn̄ mbio isọn̄ ndidiana ye nnyịn ke nditoro Jehovah. Mbon oro ẹyerede ikot oro, “di,” ẹdu ke udịm edidi se ẹnyan̄ade ẹbe akwa ukụt, ye idotenyịn editoro Jehovah ke nsinsi nsinsi.—Ediyarade 22:17.
Ediwak Tọsịn Owo Ẹbụn̄ọ Ẹdụk Utuakibuot Akpanikọ
17. (a) Didie ke Jehovah anam ikpọ n̄kpọ ke ebuana ye utom ukwọrọikọ nnyịn? (b) Didie ke Zechariah 8:23 osu?
17 Idahaemi Jehovah ke anam ikpọ edinam oro ẹdotde itoro ke ebuana ye utom ukwọrọikọ nnyịn. (Mark 13:10) Ke mme isua ndondo emi, enye ‘eberede akamba usụn̄ ndinam utom.’ (1 Corinth 16:9) Emi anam ẹkeme nditan̄a eti mbụk ke ofụri ikpọ efakutom oro mme asua akpanikọ ẹkebiọn̄ọde ke mbemiso. Ediwak mbon oro ẹkedude ke ekịm eke spirit ini kiet ko ke ẹyere ikot ndituak ibuot nnọ Jehovah idahaemi. Mmọ ke ẹsu ntịn̄nnịm ikọ emi: “Ntem ke Jehovah mme udịm ọdọhọ ete, Ke mme usen oro ke owo duop eke ẹtode ke kpukpru usem mme idụt ẹdimụm, kpa mmọ ẹdimụm eyen Judah kiet utọn̄ ọfọn̄idem, ẹte, Ẹyak nnyịn ika ye mbufo: koro nnyịn imokop ite ke Abasi odu ye mbufo.” (Zechariah 8:23) “Mbufo” emi ẹtịn̄de ẹban̄a mi ẹdi mme Jew eke spirit, kpa nsụhọ Christian eyomfịn oro ẹyetde aran. Sia duop ekemede ndida nnọ ọyọhọ n̄kpọ ke isọn̄, “owo duop” oro ẹda ẹban̄a “akwa otuowo” oro ẹdade ẹdisịn ke itie ebuana ye “Israel Abasi,” emi mmọ ẹdianade ẹnam “otuerọn̄ kiet.” (Ediyarade 7:9, 10; Galatia 6:16) Nso idatesịt ke edi ntem ndikụt ata ediwak owo idahaemi ẹnamde edisana utom ọtọkiet nte mme andituak ibuot nnọ Jehovah Abasi!
18, 19. Nso uyarade idu nte ke Jehovah ke ọdiọn̄ utom ukwọrọikọ?
18 Nnyịn imokop nduaidem nte ke ediwak tọsịn owo ke mme itie duop—ke akpanikọ, ediwak tọsịn owo ke mme itie ikie—ke ẹdụk utuakibuot akpanikọ ke mme idụt oro nsunsu ido ukpono ẹkekarade tutu etie nte ke mme owo oro idinyịmeke eti mbụk tutu amama. Kụbọde Yearbook of Jehovah’s Witnesses eke ndondo emi, nyụn̄ se ibat idụt oro ẹtọtde ọtọn̄ọde ke n̄kpọ nte mme asuanetop Obio Ubọn̄ 100,000 tutu ekpere ndisịm 1,000,000 idahaemi. Emi edi okopodudu uyarade nte ke Jehovah ọdiọn̄ utom ukwọrọikọ Obio Ubọn̄.—Mme N̄ke 10:22.
19 Nte ikọt Jehovah, nnyịn imotoro inyụn̄ ikọm Ete nnyịn eke heaven ke ndinọ nnyịn ata uduak ke uwem, utom esie oro ọnọde utịp, ye nyayama idotenyịn ini iso. Nnyịn imenyene ọkpọsọn̄ udọn̄ ndikụt edisu kpukpru un̄wọn̄ọ Abasi imonyụn̄ ibiere ‘ndimụm idem nnyịn nnịm ke ima Abasi, ye nsinsi uwem ke ekikere.’ (Jude 20, 21) Nnyịn ikop idatesịt didie ntem ndikụt nte ke akwa otuowo oro ẹtorode Abasi ẹmewak idahaemi ẹsịm n̄kpọ nte 6,000,000! Ye uyarade edidiọn̄ Jehovah, ẹtịm nsụhọ oro ẹyetde aran ọkọrọ ye nsan̄a mmọ ẹdide mme erọn̄ en̄wen ẹdọn̄ ke n̄kpọ nte esop 91,000 ke idụt 235. Ẹnọ kpukpru nnyịn udia eke spirit iyụhọ ebe ke ọkpọsọn̄ ukeme oro “asan̄autom emi anamde akpanikọ, onyụn̄ enyenede ọniọn̄,” esịnde. (Matthew 24:45) Esop ukara Abasi oro asan̄ade-san̄a aka iso ye ima ima edise enyịn ke ese aban̄a utom Obio Ubọn̄ ebe ke ọfis n̄kọk itieutom Mme Ntiense Jehovah 110. Nnyịn imowụt esịtekọm nte ke Jehovah onụk esịt ikọt esie ‘ndikpono enye ke inyene mmọ.’ (Mme N̄ke 3:9, 10) Nte utịp, utom ukwọrọikọ ofụri ererimbot nnyịn aka iso, ẹbọpde mme itie umịn̄n̄wed, mme ufọkidụn̄ Bethel ye eke mme isụn̄utom, mme Ufọkmbono Obio Ubọn̄, ye mme Ufọk Mbono nte ẹyomde.
20. Didie ke nditie n̄kere ikpọ edinam Jehovah oro ẹdotde itoro ẹkpetụk nnyịn?
20 Nnyịn ikemeke ndisiak kpukpru ikpọ edinam Ete nnyịn eke heaven oro ẹdotde itoro. Edi ndi owo eti esịt ekededi ekeme nditre ndidiana ye akwa otu mme anditoro Jehovah? Ke akpanikọ, ikemeke! Ke ntre, yak kpukpru mme andima Abasi ẹfiori idara idara ẹte: “Mbufo ẹtoro Jehovah. Ẹtie ke heaven ẹtoro Jehovah; ẹtoro enye ke enyọn̄. Mbufo, kpukpru angel esie, ẹtoro enye. . . . N̄kparawa, ye nditọ-iban; n̄kani iren, ye nditọwọn̄: yak mmọ ẹtoro enyịn̄ Jehovah: koro enyịn̄ esie ikpọn̄-ikpọn̄ okon̄de; ubọn̄ esie emenede akan isọn̄ ye enyọn̄.” (Psalm 148:1, 2, 12, 13) Ih, ẹyak nnyịn itoro Jehovah kaban̄a ikpọ edinam esie, ke emi ye ke nsinsi!
Didie ke Afo Ọkpọbọrọ?
• Nso idi ndusụk ikpọ edinam Jehovah oro ẹdotde itoro?
• Ntak onụkde fi nditoro Jehovah?
• Didie ke idotenyịn nnyịn enyene ebuana ye ikpọ edinam Abasi?
• Didie ke Jehovah anam mme edinam oro ẹdotde itoro ke ebuana ye utom ukwọrọikọ Obio Ubọn̄?
[Mme Mbụme Ukpepn̄kpọ]
[Ndise ke page 10]
Ndi afo emesidian uyo ke ndikwọ ikwọ itoro nnọ Jehovah ke ofụri esịt?
[Mme ndise ke page 13]
Nnyịn imadat esịt nte ke ifet ke osụk eberede ọnọ mbon nsụkidem ndidiana ye nnyịn ke nditoro Jehovah