Mme Mbụme Ẹtode Mme Andikot
Mme Mbụme Ẹtode Mme Andikot
Ini ewe ke ẹkeyet “Ata Edisana” aran, nte ẹkebemde iso ẹtịn̄ ke Daniel 9:24?
Daniel 9:24-27 edi ntịn̄nnịm ikọ aban̄ade edidi “Messiah Ọbọn̄”—kpa Christ. Do, ediyet “Ata Edisana” aran oro ẹkebemde iso ẹtịn̄ iban̄ake ediyet Ata Edisana ke temple Jerusalem aran. Utu ke oro, ikọ oro “Ata Edisana” ada aban̄a edisana ebiet Abasi eke heaven—Ata Edisana eke heaven—ke akwa temple Jehovah eke spirit. *—Mme Hebrew 8:1-5; 9:2-10, 23.
Ini ewe ke ẹketọn̄ọ ndida temple Abasi eke spirit nnam n̄kpọ? Ọfọn, kere ban̄a se iketịbede ke ini Jesus ọkọnọde idemesie ndina baptism ke 29 E.N. Ọtọn̄ọde ke ini oro ke uwem esie ka iso, Jesus ama osu mme ikọ Psalm 40:6-8. Apostle Paul ama owụt ke ukperedem nte ke Jesus ama ọbọn̄ akam ọnọ Abasi ete: “Afo umaha uwa ye enọ, afo emeben̄e ikpọkidem ọnọ Mi.” (Mme Hebrew 10:5) Jesus ama ọfiọk ete ke Abasi ‘ikamaha’ ẹka iso ndiwa mme uwa unam ke temple Jerusalem. Utu ke oro, Jehovah ama etịm mfọnmma ikpọkidem eke owo ọnọ Jesus ndinọ nte uwa. Ke etịn̄de aban̄a udọn̄ ofụri esịt esie, Jesus ama aka iso ete: “Sese, mmedi (Ẹwet ẹban̄a Mi ke ikpan̄wed) ndinam uduak Fo, O Abasi.” (Mme Hebrew 10:7) Ndien nso ikedi ibọrọ Jehovah? Gospel Matthew ọdọhọ ete: “Ke ini Jesus akanade baptism ama, kpa idaha oro Enye ọwọrọ ke mmọn̄ ọdọk: ndien sese, enyọn̄ eberede ọnọ Enye, Enye onyụn̄ okụt Spirit Abasi osụhọrede nte ibiom edidoro Enye ke idem; ndien sese, uyo oto ke enyọn̄ ọdọhọ ete, Emi edi edima Eyen Mi, emi esịt enemde Mi eti-eti ye Enye.”—Matthew 3:16, 17.
Jehovah Abasi ndikenyịme ikpọkidem Jesus oro ẹkenọde nte uwa ọkọwọrọ ete ke itieuwa oro okponde akan ata ata itieuwa temple Jerusalem ama edidu. Emi ekedi itieuwa “uduak,” m̀mê ndutịm Abasi ndinyịme uwem eke owo Jesus nte uwa. (Mme Hebrew 10:10) Ndikeyet Jesus aran ke edisana spirit ọkọwọrọ ete ke Abasi ke emi ama ọtọn̄ọ ofụri ndutịm temple esie eke spirit. * Ntem, ke ini baptism Jesus, ẹma ẹyet ebietidụn̄ Abasi eke heaven aran, m̀mê ẹdianade ẹnịm san̄asan̄a, nte “Ata Edisana” ke ndutịm akwa temple eke spirit.
[Mme Ikọ idakisọn̄]
^ ikp. 3 Kaban̄a nneme ke nsio nsio ikpehe temple Abasi eke spirit, se page 14-19 ke Enyọn̄-Ukpeme eke July 1, 1996.
^ ikp. 5 Ẹma ẹtịn̄ ẹban̄a emi ke page 195 ke n̄wed Nọ Ntịn̄enyịn ke Prọfesi Daniel!
[Ndise ke page 27]
Ẹkeyet “Ata Edisana” aran ke ini Jesus akanade baptism