Ẹfọn Ẹma, Ẹnyụn̄ Ẹtịm Ẹfiọk

‘Sese! Akwa Otuowo!’

ENYE ekedi mbụme oro akayan̄ade mme asan̄autom Jehovah ifiọk ke ediwak isua. Ẹma ẹsịn ukeme ke anyan ini ndibọrọ enye nte ekemde ye N̄wed Abasi. Mbụme oro ama osụn̄ọ ke ediwak nneme. Edi ẹma ẹkụt ibọrọ Bible ke akpatre, ndien enye ama enen̄ede aduai mme andidụk akamba mbono ke Washington, D.C., ke isua 1935, idem.

Ọsọ mbụme emi ekedide ntak kpukpru nneme emi ekedi: Mmanie ẹdi “akwa udịmowo” (King James Version), m̀mê “akwa otu owo,” oro ẹtịn̄de ẹban̄a ke Ediyarade 7:9? Nte otu mme andinịm ke akpanikọ emi ẹdidụn̄ ke heaven?

Mbụme Anyan Ini

Ọtọn̄ọde ke eyo apostle John tutu esịm eyo nnyịn, ikan̄wan̄ake mme Christian mbon emi “akwa udịmowo” ẹdide. Nditọ ukpepn̄kpọ Bible ẹkeda akwa otuowo nte udiana otu oro ẹdikade heaven, kpa otu oro ẹkenyenede ifiọk akpanikọ Bible edi emi mîkanamke n̄kpọ iban̄a edisuan enye.

Nte ededi, ndusụk nsan̄a mme Christian oro ẹyetde aran ẹma ẹdu emi ẹkenen̄erede ẹsịn ifịk ke utom ukwọrọikọ. Mmọ ikenyeneke udọn̄ edika heaven. Ke akpanikọ, idotenyịn mmọ okodu ke n̄kemuyo ye utịn̄ikọ an̄wa oro “Ediwak Miliọn Owo Emi Ẹdude Uwem Idahaemi Idikpaha Tutu Amama,” emi ikọt Jehovah ẹkenọde ọtọn̄ọde ke 1918 esịm 1922. Ẹdinọ utọ mbon oro nsinsi uwem ke isọn̄.

Enyọn̄-Ukpeme (Ikọmbakara) eke October 15, 1923, ama eneme n̄ke Jesus aban̄ade erọn̄ ye ebot onyụn̄ ọdọhọ ete: “Erọn̄ ẹda ẹban̄a kpukpru owo ke mme idụt, oro mîdịghe mbon oro ẹbonde ke spirit, edi ẹdide mme andima edinen ido, emi ẹnyịmede Jesus Christ ke ofụri esịt nte Ọbọn̄ ẹnyụn̄ ẹsakde iso ẹse ẹnyụn̄ ẹdoride enyịn ndidu ke mfọnn̄kan ini ke idak ukara esie.”—Matthew 25:31-46.

Un̄wana Efen Efen

Ke isua 1931, Vindication, Akpa Eboho, ama eneme Ezekiel ibuot 9 onyụn̄ anam ẹdiọn̄ọ mbon oro ẹnịmde idiọn̄ọ ke ọkpọiso ndibọhọ utịt ererimbot nte ẹdide mme erọn̄ eke n̄ke Jesus. Vindication, Ọyọhọ Eboho Ita (oro ẹkesiode ke 1932), ama etịn̄ aban̄a eti esịt oro Jehonadab oro mîkedịghe eyen Israel ekenyenede, emi eketienede Edidem Jehu eke Israel oro ẹkeyetde aran asan̄a ke chariot esie aka ndikụt ufụp Jehu ke ndiwot mme nsunsu andituak ibuot. (2 Ndidem 10:15-28) N̄wed oro ọkọdọhọ ete: “Jehonadab akada aban̄a otu mbon emi ẹdude ke isọn̄ idahaemi [emi] mînyeneke n̄kpọ ndinam ye esop Satan, oro ẹdade idaha mmọ ke n̄kan̄ edinen ido ẹnyụn̄ ẹdide mbon oro Ọbọn̄ edinịmde uwem ke ini Armageddon, onyụn̄ ada mmọ ebe afanikọn̄ oro, man ọnọ mmọ nsinsi uwem ke isọn̄. Mmọemi ẹdi otu ‘erọn̄’ oro.”

Ke 1934, Enyọn̄-Ukpeme (Ikọmbakara) ama anam an̄wan̄a ete ke mme Christian emi ẹnyenede idotenyịn eke isọn̄ ẹkpenyene ndiyak idemmọ nnọ Jehovah nnyụn̄ nna baptism. Ke akpanikọ, un̄wana aban̄ade otu eke isọn̄ emi ama ọdọdiọn̄ ayama.—Mme N̄ke 4:18.

Nyayama Un̄wana ke Ifiọk

Un̄wana ke nte ẹfiọkde Ediyarade ke okoyom ndisiaha ke ofụri uyama esie. (Psalm 97:11) Enyọn̄-Ukpeme (Ikọmbakara) ama ọnọ idotenyịn ete ke mbono oro ẹkediomide ndinịm ke May 30 esịm June 3, 1935, ke Washington, D.C., U.S.A., edidi “ata n̄kpọ ndọn̄esịt ye edidiọn̄” ọnọ mbon oro Jehonadab akadade aban̄a. Ntre ke okonyụn̄ edi!

 Ke inem inem utịn̄ikọ oro ibuotikọ ekedide “Akwa Udịmowo,” oro enye ọkọnọde mme andidụk mbono ẹkedide n̄kpọ nte owo 20,000, J. F. Rutherford ama ọnọ isọn̄ N̄wed Abasi nte ke “mme erọn̄ en̄wen” eke eyomfịn ẹdi ukem nte “akwa otu owo” eke Ediyarade 7:9. (John 10:16) Ke utịt utịn̄ikọ emi, etịn̄ikọ ama obụp ete: “Mbọk nte kpukpru mbon oro ẹnyenede idotenyịn ndidu uwem ke nsinsi ke isọn̄ ẹkeme ndidaha nda?” Nte akamba ubak otuowo oro ẹkedahade ẹda, Rutherford ama atan̄a ete: “Sese! Akwa udịmowo!” Ẹma ẹdobo, ekem akwa mfiori idara ama etiene. Ke ndan̄nsiere, mbufa Ntiense Jehovah 840 ẹma ẹna baptism, ata ediwak ke otu emi ẹdọhọde ke idi eke akwa otuowo.

N̄wọrọnda Udịmowo

Mbemiso 1935, ibat owo oro ọkọride-kọri ke otu mbon oro ẹkenyịmede etop Bible ẹnyụn̄ ẹnyenede ifịk ke ndikwọrọ eti mbụk ẹma ẹnyene udọn̄ ndidu nsinsi uwem ke Paradise isọn̄. Mmọ ikenyeneke udọn̄ ndika heaven, koro Abasi mîkọnọhọ mmọ idotenyịn uwem eke heaven. Mmọ ndinam ẹdiọn̄ọ mmọ nte akwa otuowo eke mme erọn̄ en̄wen ama owụt nte ke etisịm 1935 etie nte edikot mme Christian 144,000 oro ẹyetde aran ama esịm utịt.—Ediyarade 7:4.

Ke ini Ekọn̄ Ererimbot II akasiahade, Satan kpa Devil ama esịn ọkpọsọn̄ ukeme nditre editan̄ mbon oro ẹdinamde akwa otuowo mbok. Ẹma ẹkpan utom ukwọrọikọ Obio Ubọn̄ ke ediwak idụt. Ke eyo ekịm oro, ye ke ibio ini mbemiso n̄kpa esie ke January 1942, J. F. Rutherford ama ọdọhọ ete: “Etie nte ‘akwa udịmowo’ iditịmke iwak.”

Edi ke ntak edidiọn̄ Abasi, mme n̄kpọ ẹtịbe ke isio isio usụn̄. Ke ‘ẹsọn̄ọde ẹda ye ọkpọsọn̄ mbuọtidem,’ mbon oro ẹyetde aran ye mme nsan̄a mmọ, mme erọn̄ en̄wen, ẹmeyọhọ utom edinam mbet. (Colossae 4:12; Matthew 24:14; 28:19, 20) Etisịm 1946 ibat Mme Ntiense Jehovah oro ẹkekwọrọde ikọ ke ofụri ererimbot ekedi 176,456—ata ediwak ke otu mmọ ẹdide eke akwa otuowo. Ke 2000, se iwakde ibe Mme Ntiense 6,000,000 ẹkenam n̄kpọ Jehovah ke edinam akpanikọ ke idụt 235—akwa otuowo ke akpanikọ! Ndien ibat emi akaka iso ndikọri.