Ntọt Mme Anditan̄a Obio Ubọn̄

Ẹma Ẹyụhọ Mme Udọn̄ eke Spirit Esie

CYPRUS edi isuo emi odude ke ufọt edem edere ye edem usiahautịn Inyan̄ Mediterranean. Ke mme ini Bible, Cyprus ama ọwọrọ etop ke ntak okpoho ye nti eto esie. Paul ye Barnabas ẹma ẹtan̄a eti mbụk Obio Ubọn̄ do ke akpa isan̄ isụn̄utom mmọ. (Utom 13:4-12) Mfịn, eti mbụk osụk enyenyene eti utịp ke uwem ediwak mbon Cyprus. Emi enen̄ede edi ntre ye Lucas, eren emi odude ke iduọk isua 40. Enye obụk ete:

“N̄kamana ndụk ubon oro esịnede nditọ itiaba ke in̄wan̄ ubọk enan̄. Toto ke ini eyenọwọn̄, mma nnyene udọn̄ edikot n̄wed. N̄wed oro n̄kesimade ndikot ekedi nsiondi N̄wed Abasi Christian Usem Greek eke udomo ekpatọfọn̄. Ke ini n̄kedide isua duop ke emana, ami ye ndusụk ufan mi ima itọn̄ọ ekpri otu ukpep Bible. Nte ededi, oro ikebịghike koro ndusụk ikpọ owo ke obio-in̄wan̄ oro ẹkekotde nnyịn mme ekpep isio ukpepn̄kpọ.

“Ke ukperedem, ke adan̄aemi n̄kakade ufọkn̄wed ke United States, mma nsobo mme owo ẹtode nsio nsio ido ukpono. Oro ama afiak edemede udọn̄ mi ke mme n̄kpọ eke spirit. Mma mbiat ediwak usen ke itie ubon n̄wed ufọkn̄wed ntaifiọk ndidụn̄ọde nsio nsio ido ukpono. Mma nnyụn̄ n̄ka ediwak ufọkabasi, edi kpa ye mme ukeme oro n̄kesịnde, n̄kosụk n̄kopke uyụhọ ke n̄kan̄ eke spirit.

“Ke mma n̄kokụre ukpep, mma mfiak nnyọn̄ Cyprus nnyụn̄ nnyịme ndinam utom nte esenyịn ubet ubuak mmọn̄ibọk. Akanieren kiet oro ekerede Antonis, kiet ke otu Mme Ntiense Jehovah, ama esidi itieutom mi edise mi. Nte ededi, mbon Ufọkabasi Greek Orthodox ẹma ẹsikụt nte enye edide edise mi.

“Ikebịghike, ekpep ukpepn̄kpọ ido ukpono kiet ama edi edise mi onyụn̄ akpan mi ndinyene nneme ye Mme Ntiense Jehovah. Sia ẹkekpepde mi toto ke uyen nte ke Ufọkabasi Greek Orthodox enyene akpanikọ, mma nnyịme nnyụn̄ ntre ndinyene nneme ye Antonis nnyụn̄ ntọn̄ọ ndineme Bible ye ekpep ukpepn̄kpọ ido ukpono oro. Mma n̄ka ediwak ufọkidụn̄ n̄ka mọn̄k n̄ko ke Cyprus. Mma n̄kam nnam isan̄ n̄ka edere edere Greece n̄kese Obot Athos, emi ẹdade nte obot oro asanade akan ke ofụri isọn̄ Christian Orthodox. Kpa ye oro, owo ikosụk ibọrọke mme mbụme Bible mi.

“Ekem mma mbọn̄ akam nnọ Abasi nte an̄wam mi ndikụt akpanikọ. Esisịt ini ke oro ebede, Antonis ama afiak edi itieutom mi edise mi, ndien mma n̄kere ke emi edi ibọrọ akam mi. Ntre mma ntre ndika mbịne ekpep ukpepn̄kpọ ido ukpono oro nnyụn̄ ntọn̄ọ ndikpep Bible ye Antonis. Mma n̄ka iso ndinam n̄kọri, ndien ke October 1997, mma nyarade uyakidem mi nnọ Jehovah ke baptism mmọn̄.

“N̄wan mi ye adiaha ye udun̄wan mi, oro ẹkedide isua 14 ye isua 10 ini oro, ẹma ẹbiọn̄ọ ke ntọn̄ọ ntọn̄ọ. Edi ke ntak eti edu uwem mi, n̄wan mi ama ebiere ndidụk mbono esop ke Ufọk Mbono Obio Ubọn̄. Mfọnido Mme Ntiense oro ye ọkpọkpọ udọn̄ oro mmọ ẹkewụtde ẹma ẹnen̄ede ẹtụk enye. Se ikotụkde enye akpan akpan ekedi nte mmọ ẹkedade Bible ẹnam n̄kpọ. Nte utịp, n̄wan mi ye adiaha ye udun̄wan nnyịn ẹma ẹnyịme ndikpep Bible ye Mme Ntiense Jehovah. Kere nte esịt akadatde mi ke ini mmọ mbita ẹkenade baptism ke Mbono District “Ntịn̄nnịm Ikọ Abasi” ke 1999!

“Ih, ẹma ẹyụhọ ediyom oro n̄koyomde akpanikọ. Idahaemi, ofụri ubon nnyịn, esịnede n̄wan mi ye nditọ nnyịn inan̄, ẹdiana kiet ke edisana utuakibuot Jehovah.”