Ẹkûdi Mme Andikokop Emi Ẹfrede
Ẹkûdi Mme Andikokop Emi Ẹfrede
“Yak mbufo ẹdi mme anam-ikọ, ẹkûdi mme andikokop ikpọn̄, ẹbian̄a idem.”—JAMES 1:22.
1. Mme utịben̄kpọ ewe ke mbon Israel eset ẹkenyene ifet ndikụt?
“SE OWO mîkemeke ndifre” ẹdi ikọ ẹdotde ndida ntịn̄ mban̄a mme utịben̄kpọ oro Jehovah akanamde ke Egypt eset. Nte eyịghe mîdụhe, Ufen Duop oro ẹma ẹnyene uten̄e. Ke mme ufen oro ẹkụrede, ẹma ẹnyan̄a mbon Israel ke ndyọ ndyọ usụn̄ ẹsion̄o ke mmọn̄ Ididuot Inyan̄ oro akabaharede iba. (Deuteronomy 34:10-12) Edieke afo akpakadade enyịn fo okụt mme n̄kpọntịbe oro, anaedi afo ukpufreke Enye emi akanamde mmọ tutu amama. Edi, andiwet psalm ọkwọ ete: “Mmọ [nditọ Israel] ẹfre Abasi, andinyan̄a mmọ, emi akanamde ikpọ n̄kpọ ke Egypt; mme utịbe n̄kpọ ke isọn̄ Ham, ye n̄kpọ ndịk ke Ididuot Inyan̄.”—Psalm 106:21, 22.
2. Nso iwụt nte ke esịtekọm oro Israel ẹkewụtde ẹban̄a n̄kpọsọn̄ edinam Abasi ikebịghike?
2 Ke ẹma ẹkebe Ididuot Inyan̄, nditọ Israel ‘ẹma ẹtọn̄ọ ndibak Jehovah ndinyụn̄ nnịm uyo Jehovah ke akpanikọ.’ (Exodus 14:31) Iren Israel ẹma ẹdiana ye Moses ke ndikwọ ikwọ edikan nnọ Jehovah, ndien Miriam ye iban eken ẹma ẹbọrọ ke ndimia ekọmọ nnyụn̄ nnek unek. (Exodus 15:1, 20) Ih, n̄kpọsọn̄ edinam Jehovah ẹma ẹtụk ikọt Abasi. Edi esịtekọm oro mmọ ẹkewụtde ẹnọ Enye emi akanamde mme edinam oro ikebịghike. Esisịt ini ke oro ebede ediwak mmọ ẹma ẹnam n̄kpọ nte n̄kpọ eke mmọ ẹkedọn̄ọde mbeibuot. Mmọ ẹma ẹkụni ẹnyụn̄ ẹsụk Jehovah uyo. Ndusụk mmọ ẹma ẹsịn idem ke ukpono ndem ye oburobụt ido idan̄.—Numbers 14:27; 25:1-9.
Nso Ikeme Ndinam Nnyịn Ifre?
3. Ke ntak nnyịn idide mme anana-mfọnmma owo, nso ke nnyịn ikeme ndifre?
3 Unana esịtekọm Israel enen̄ede akpa owo idem. Edi, ukem n̄kpọ oro ekeme nditịbe nnọ nnyịn. Edi akpanikọ, nnyịn ikwe mme utọ utịben̄kpọ Abasi oro. Nte ededi, ke itie ebuana nnyịn ye Abasi mme idaha ẹsidu oro owo mîkpefreke. Ndusụk nnyịn imekeme nditi ini oro nnyịn ikenyịmede akpanikọ Bible. Mme ini idatesịt en̄wen ẹkeme ndisịne ini oro ikọbọn̄de akam ediyak idem nnyịn nnọ Jehovah ye ini oro ikanade baptism mmọn̄ nte mme ata Christian. Ediwak nnyịn imokụt un̄wam Jehovah ke mme idaha efen ke uwem nnyịn. (Psalm 118:15) Ke akande kpukpru, ebede ke n̄kpa uwa Eyen Abasi, Jesus Christ, nnyịn imenyene idotenyịn edinyan̄a. (John 3:16) Edi, ke ntak emi nnyịn idide mme anana-mfọnmma owo, nnyịn imekeme ndisọsọp mfre nti n̄kpọ oro Jehovah anamde ọnọ nnyịn ke ini inyenede ndiọi udọn̄ ye editịmede esịt eke uwem.
4, 5. (a) Didie ke James odụri owo utọn̄ aban̄a n̄kpọndịk edidi mme andikokop emi ẹfrede? (b) Didie ke nnyịn ikeme ndibuan uwụtn̄kpọ James aban̄ade owo ye ukụtiso?
4 Ke leta oro enye ekewetde ọnọ ẹsọk mme ekemmọ Christian, James eyeneka Jesus ama odụri owo utọn̄ aban̄a n̄kpọndịk edidi mme andikokop emi ẹfrede. Enye ekewet ete: “Yak mbufo ẹdi mme anam-ikọ, ẹkûdi mme andikokop ikpọn̄-ikpọn̄, ẹbian̄a idem. Koro owo ekededi eke okopde ikọ, edi mînamke-nam, ebiet owo eke esede obot iso esie ke ukụt-iso: koro enye esede idem esie, adaha, onyụn̄ efre orụk owo eke enye edide kpa idaha oro.” (James 1:22-24) Nso ke mme ikọ James oro ẹkewọrọ?
5 Ke ini idemerede ke usenubọk, nnyịn imesiwak ndise iso ke ukụtiso man inen̄ede ebiet oyomde. Nte nnyịn isịnde idem ke nsio nsio edinam, ekikere nnyịn onyụn̄ owụhọde ke mme n̄kpọ en̄wen, nnyịn imesitre ndikere mban̄a se nnyịn ikokụtde ke ukụtiso oro. Emi ekeme n̄ko nditịbe ke usụn̄ifiọk eke spirit. Nte nnyịn isede Ikọ Abasi, nnyịn imekeme ndimen se nnyịn idide ndomo ye se Jehovah oyomde nnyịn idi. Ntem, nnyịn imekeme ndikụt mme mmeme nnyịn nnennen nnennen. Ifiọk emi ekpenyene ndinụk nnyịn ndinam mme edinen̄ede ke edu nnyịn. Edi nte nnyịn inamde mme edinam nnyịn eke usen ke usen inyụn̄ in̄wanade ye mme mfịna nnyịn, nnyịn imekeme nditre ndikere mban̄a mme n̄kpọ eke spirit mmemmem mmemmem. (Matthew 5:3; Luke 21:34) Editie nte n̄kpọ eke nnyịn ifrede mme ima ima edinam Abasi ke ibuot nnyịn. Edieke emi ekpetịbede, nnyịn ikposio idem inyan inọ mme ntụhọ unam idiọkn̄kpọ.
6. Nso ndụn̄ọde N̄wed Abasi ikeme ndin̄wam nnyịn ikûfre ikọ Jehovah?
6 Ke akpa leta eke odudu spirit oro enye ọkọnọde ẹsọk mbon Corinth, apostle Paul etịn̄ aban̄a nditọ Israel oro ẹkedide mbon efre ke wilderness. Kpa nte mme Christian akpa isua ikie ẹkebọde ufọn ẹto mme ikọ Paul, ndidụn̄ọde se enye ekewetde ekeme ndin̄wam nnyịn ikûfre ikọ Jehovah. Ke ntre ẹyak nnyịn idụn̄ọde 1 Corinth 10:1-12.
Sịn Mme Udọn̄ Ererimbot
7. Nso in̄wan̄-in̄wan̄ uyarade ima Jehovah ke nditọ Israel ẹkekụt?
7 Se Paul etịn̄de aban̄a nditọ Israel edi ntọt ọnọ mme Christian. Ke ubak ubak, Paul ewet ete: “Mmaha mbufo ẹtre ndifiọk, nditọ-ete, ẹte kpukpru mme ete nnyịn ẹma ẹdu ke idak obubịt enyọn̄, mmọ kpukpru ẹnyụn̄ ẹsan̄a ke ufọt inyan̄ ẹbe; kpukpru mmọ ẹma ẹnyụn̄ ẹna baptism ẹdiere ye Moses ke obubịt enyọn̄ ye inyan̄ oro.” (1 Corinth 10:1-4) Mbon Israel ke eyo Moses ẹma ẹkụt ikpọ uyarade odudu Abasi, esịnede utịbe utịbe adaha obubịt enyọn̄ Abasi oro akadade mmọ usụn̄ ke uwemeyo oro okonyụn̄ an̄wamde mmọ ndisan̄a mbe Ididuot Inyan̄. (Exodus 13:21; 14:21, 22) Ih, nditọ Israel oro ẹma ẹkụt in̄wan̄-in̄wan̄ uyarade ima oro Jehovah akamade mmọ.
8. Nso ikedi mme utịp ke nditọ Israel ndikefre mme n̄kpọ eke spirit?
8 Paul aka iso ete: “Edi ediwak owo ke otu mmọ ikenemke Abasi esịt; koro Enye asuan mme okpo mmọ ọduọn̄ọ ke desert.” (1 Corinth 10:5) Emi ekedi n̄kpọ mfụhọ didie ntem! Ata ediwak ke otu nditọ Israel oro ẹkekpọn̄de Egypt ẹma ẹwụt ke mmimọ idotke ndidụk Isọn̄ Un̄wọn̄ọ. Sia mîkenyeneke unyịme Abasi ke ntak unana mbuọtidem mmọ, mmọ ẹma ẹkpan̄a ke wilderness. (Mme Hebrew 3:16-19) Nso ke nnyịn ikeme ndikpep nto emi? Paul ọdọhọ ete: “Mme n̄kpọ emi ẹdi uwụtn̄kpọ ẹnọ nnyịn, ndikpep nnyịn ẹte, ikûdiọk itọn̄ ibịne se idiọkde, nte mmọ ẹkenamde.”—1 Corinth 10:6.
9. Mme n̄kpọ ewe ke Jehovah ọkọnọ ikọt esie, ndien didie ke Israel ẹkenam n̄kpọ?
9 Nditọ Israel ẹma ẹnyene ekese n̄kpọ oro akpakanamde mmọ ẹwụk ekikere ke n̄kpọ eke spirit ke adan̄aemi ẹkedude ke wilderness. Mmọ ẹma ẹdụk ediomi ye Jehovah ẹnyụn̄ ẹkabade ẹdi idụt oro ẹyakde ẹnọ enye. Akan oro, ẹma ẹnọ mmọ itie oku, ataya nte iwụk ebiet utuakibuot, ye ndutịm ndiwa uwa nnọ Jehovah. Nte ededi, utu ke ndidat esịt mban̄a mme enọ eke spirit emi, mmọ ẹma ẹtre ndikop uyụhọ ke mme n̄kpọ obụkidem oro Abasi ọkọnọde mmọ.—Numbers 11:4-6.
10. Ntak emi nnyịn ikpenyenede nditi Abasi kpukpru ini?
10 Ke mîbietke nditọ Israel oro ke wilderness, ikọt Jehovah mfịn ẹnyene unyịme Abasi. Nte ededi, nte owo kiet kiet, edi akpan n̄kpọ nte nnyịn iti Abasi. Ndinam ntre ayan̄wam nnyịn ndisịn mme ibụk ibụk udọn̄ oro ẹkemede ndifụk ukeme ukụt usụn̄ eke spirit nnyịn. Nnyịn inyene ndibiere ‘ndidian̄ade n̄kpọn̄ idiọkido ye idiọk udọn̄ ererimbot, nnyụn̄ ndu uwem ke eti ibuot ye edinen ido ye ido Abasi ke eyo emi.’ (Titus 2:12) Ndusụk nnyịn oro ima ikabuana ye esop Christian toto ke uyen ikpedehede ikere nte ke imataba eti n̄kpọ. Edieke mme utọ n̄kpọ oro ẹdụkde nnyịn ekikere, nnyịn iyanam ọfọn nditi Jehovah ye mme utịbe utịbe edidiọn̄ oro enye enịmde ọnọ nnyịn.—Mme Hebrew 12:2, 3.
Ọyọhọ Nsụkibuot nnọ Jehovah
11, 12. Didie ke owo ekeme ndikabade nnyene ubiomikpe ukpono ndem kpa ye oro mîkponoke ndisọi mbiet?
11 Paul ọnọ nnyịn ikọ item efen ke ini enye ewetde ete: “Mbufo ẹkûnyụn̄ ẹdi mme okpono ndem, nte ndusụk mmọ ẹkedide; nte ẹwetde ẹte, Mbio oro ẹsụhọde ẹtetie ẹdia ẹnyụn̄ ẹn̄wọn̄, ẹnyụn̄ ẹdaha ke enyọn̄ ẹkebre mbre.” (1 Corinth 10:7) Paul etịn̄ aban̄a ini oro nditọ Israel ẹkenyịkde Aaron ndinam eyen enan̄ o-gold. (Exodus 32:1-4) Okposụkedi mîtiehe nte ke nnyịn iyọwọn̄ọde ibịne ukpono ndem nnennen nnennen, nnyịn imekeme ndikabade ndi mme okpono ndem ebe ke ndiyak mme ibụk ibụk udọn̄ idem nnyịn ẹwọn̄ọde nnyịn ẹkpọn̄ ndituak ibuot nnọ Jehovah ke ofụri ukpọn̄.—Colossae 3:5.
12 Ke idaha efen, Paul ama ewet aban̄a ndusụk mbon oro ẹkenyenede udọn̄ akpan akpan ke mme n̄kpọ obụkidem utu ke ndinyene udọn̄ ke mme n̄kpọ eke spirit. Kaban̄a mbon oro ẹdide “mme asua [eto ndutụhọ, NW] Christ,” enye ekewet ete: “Nsobo eyedi utịt mmọ, idịbi mmọ edi abasi mmọ.” (Philippi 3:18, 19) Se mmọ ẹkekponode ikedịghe edisọi mbiet. Enye ekedi udọn̄ mmọ kaban̄a n̄kpọ obụkidem. Edi akpanikọ, idịghe kpukpru udọn̄ ẹdiọk. Jehovah okobot nnyịn ye mme udọn̄ eke owo ye ukeme ndidara nsio nsio n̄kpọ oro ẹnọde inemesịt. Edi mbon oro ẹnamde edibịne inemesịt edi ebeiso n̄kpọ ọnọ itie ebuana mmọ ye Abasi, ke akpanikọ, ẹkabade ẹdi mme okpono ndem.—2 Timothy 3:1-5.
13. Nso ke nnyịn ikeme ndikpep nto mbụk aban̄ade eyen enan̄ o-gold?
13 Ke mmọ ẹma ẹkekpọn̄ Egypt, nditọ Israel ẹma ẹnam eyen enan̄ o-gold man ẹtuak ibuot ẹnọ. Ke adianade ye ntọt oro ẹnọde ẹbiọn̄ọ ukpono ndem, akpan ukpepn̄kpọ efen odu ke mbụk emi. Nditọ Israel ẹma ẹsịn nditiene in̄wan̄-in̄wan̄ ndausụn̄ oro Jehovah ọkọnọde. (Exodus 20:4-6) Edi, ikedịghe uduak mmọ ndisịn Jehovah nte Abasi mmọ. Mmọ ẹma ẹwa uwa ẹnọ editara mbiet eyen enan̄ oro ẹnyụn̄ ẹkot edinam oro “usọrọ Jehovah.” Nte ededi, mmọ ẹma ẹbian̄a idem ke ndikere nte ke Abasi oyofụmi nsọn̄ibuot mmimọ. Emi ekedi edimiom Jehovah, ndien oro ama ayat enye etieti.—Exodus 32:5, 7-10; Psalm 106:19, 20.
14, 15. (a) Ntak emi nditọ Israel mîkenyeneke ntak ndomokiet ndikabade ndi mme andikokop emi ẹfrede? (b) Edieke nnyịn ibierede nditre ndidi mme andikokop emi ẹfrede, nso ke nnyịn idinam ke ebuana ye mme ewụhọ Jehovah?
14 Ekpedi ata esen esen n̄kpọ kiet ke otu Mme Ntiense Jehovah ndidiana ye nsunsu ido ukpono. Nte ededi, ke adan̄aemi ẹdude ke esop, ndusụk owo ẹkeme ndisịn ndausụn̄ Jehovah ke mme usụn̄ en̄wen. Mbon Israel ikenyeneke ntak ndomokiet ndikabade ndi mme andikokop emi ẹfrede. Mmọ ẹma ẹkop Ibet Duop ẹnyụn̄ ẹdu ke ini Moses ọkọnọde mmọ ewụhọ Abasi ete: “Mbufo ẹkûda silver ẹnam abasi ẹdian ye ami, ẹkûnyụn̄ ẹda gold ẹnam abasi ẹnọ idem mbufo.” (Exodus 20:18, 19, 22, 23) Kpa ye oro, nditọ Israel ẹma ẹtuak ibuot ẹnọ eyen enan̄ o-gold.
15 Nnyịn n̄ko idinyeneke eti ntak ndomokiet ndinọ edieke nnyịn ikabarede idi mme andikokop emi ẹfrede. Ke N̄wed Abasi, nnyịn imenyene ndausụn̄ Abasi kaban̄a ediwak ikpehe uwem. Ke uwụtn̄kpọ, Ikọ Jehovah obiom edibọ ebuọt ye unana edikpe, nnennen nnennen. (Psalm 37:21) Ẹwụk nditọ ẹte ẹsụk ibuot ẹnọ mme ete ye eka mmọ, ndien ẹyom mme ete ẹkama nditọ mmọ ke “ntụnọ ye item Ọbọn̄.” (Ephesus 6:1-4) Ẹnọ mme Christian oro mîdọhọ ndọ item ẹte ẹdọ “owo Abasi ikpọn̄-ikpọn̄,” ndien ẹteme mme asan̄autom Abasi oro ẹdọde ndọ ẹte: “Yak kpukpru owo ẹbat ndọ ke n̄kpọ eke ẹkponode ẹkûnyụn̄ ẹsabade bed ndọ; koro Abasi eyekpe ikpe ye mbon use ye mme esịn-efịbe.” (1 Corinth 7:39; Mme Hebrew 13:4) Edieke nnyịn ibierede nditre ndidi mme andikokop emi ẹfrede, nnyịn iyada mme ndausụn̄ emi ye mme ndausụn̄ eken oro ẹtode Abasi ke ata akpan n̄kpọ, iyonyụn̄ itiene mmọ.
16. Nso ikedi mme utịp edituak ibuot nnọ eyen enan̄ o-gold?
16 Jehovah ikenyịmeke edidomo oro nditọ Israel ẹkedomode ndituak ibuot nnọ enye ke usụn̄ idemmọ. Utu ke oro, ẹma ẹwot owo 3,000, eyedi ke ntak akpan udeme oro mmọ ẹkenyenede ke edinam nsọn̄ibuot eke edituak ibuot nnọ eyen enan̄ o-gold. Jehovah ama ọnọ mme anamidiọk eken ufen. (Exodus 32:28, 35) Nso ukpepn̄kpọ ke emi edi ntem ọnọ owo ekededi oro okotde Ikọ Abasi edi oro emekde ke idemesie se enye amade ndisụk ibuot nnọ!
“Mbufo Ẹfehe Ẹbọhọ Use”
17. Ewe n̄kpọntịbe ke 1 Corinth 10:8 etịn̄ aban̄a?
17 Paul etịn̄ aban̄a ikpehe kiet oro mme udọn̄ obụkidem ẹkemede ndinam owo efre mme n̄kpọ eke spirit ke ini enye ọdọhọde ete: “Nnyịn ikûnyụn̄ inam use, nte ndusụk mmọ ẹkenamde, ẹnyụn̄ ẹkpan̄ade, thousand owo edịp ye ita ke usen kiet.” (1 Corinth 10:8) Mi Paul etịn̄ aban̄a n̄kpọntịbe oro ke Unaisọn̄ Moab ke utịt isan̄ isua 40 nditọ Israel ke wilderness. Ke ndondo emi Jehovah ama an̄wam nditọ Israel ndikan mme idụt edem usiahautịn Jordan, edi ediwak mmọ ẹma ẹwụt nte idide mbon efre ye mbon unana esịtekọm. Ke adan̄a Isọn̄ Un̄wọn̄ọ oro, ẹma ẹtap mmọ ẹsịn ke oburobụt ido idan̄ ye ndedehe utuakibuot nnọ Baal eke Peor. Ẹma ẹwot n̄kpọ nte owo 24,000, oro owo 1,000 ẹkedide mme adausụn̄.—Numbers 25:9.
18. Nso orụk edinam ekeme ndida n̄kosụn̄ọ ke oburobụt ido idan̄?
18 Ẹtịm ẹdiọn̄ọ ikọt Jehovah mfịn ke ntak n̄kokon̄ idaha ido uwem mmọ. Edi ke ini ẹsobode idomo oburobụt ido idan̄, ndusụk Christian ẹsitre ndikere mban̄a Abasi ye mme edumbet esie. Mmọ ẹsikabade ẹdi mme andikokop emi ẹfrede. Ke akpa, ekeme ndidi idomo oro idibuanake edinam use. Enye ekeme ndidi ntụhọ edise n̄wed ye ndise idan̄, ndisịn idem ke idiọk mbubru m̀mê mfụmmfụm ima, m̀mê ndidụk nsan̄a ye mme owo oro ẹmemde ke n̄kan̄ ido uwem. Kpukpru n̄kpọ emi ẹda mme Christian ẹkesụn̄ọ ke idiọk edinam.—1 Corinth 15:33; James 4:4.
19. Ewe item N̄wed Abasi an̄wam nnyịn ‘ndifehe mbọhọ use’?
19 Edieke ẹdomode nnyịn ndisịn idem ke oburobụt ido, inaha nnyịn itre nditi Jehovah. Utu ke oro, nnyịn inyene ndinam mme n̄kpọ editi oro ẹdude ke Ikọ esie. (Psalm 119:1, 2) Nte mme Christian, ata ediwak nnyịn imesinam ofụri ukeme nnyịn ndika iso nsana ke ido uwem, edi ndinam se inende ke enyịn Abasi oyom n̄kaiso ukeme. (1 Corinth 9:27) Paul ekewet ọnọ mme Christian ke Rome ete: “Kpukpru owo ẹma ẹkop etop nsụk-ibuot mbufo; emi esịn mi mbụre mbụre mban̄a mbufo. Edi mmoyom mbufo ẹdi mme ọfiọk-n̄kpọ ke edinam eti, ẹnyụn̄ ẹdi ọkọi ke edinam idiọk.” (Rome 16:19) Kpa nte ẹkewotde nditọ Israel 24,000 ke ntak mme idiọkn̄kpọ mmọ, ibịghike mbon use ye mme anamidiọk eken ẹyebọ ubiomikpe Jehovah. (Ephesus 5:3-6) Do, utu ke ndikabade ndi mme andikokop emi ẹfrede, ana nnyịn ika iso ‘ifehe ibọhọ use.’—1 Corinth 6:18.
Wụt Esịtekọm Ban̄a Mme Enọ Jehovah
20. Didie ke nditọ Israel ẹkedomo Jehovah, ndien nso ikedi utịp?
20 Ata ediwak mme Christian isiyakke idem inọ oburobụt ido idan̄. Edi, oyom nnyịn ikpeme mbak nnyịn iditiene usụn̄ uwem oro adade esịm orụk nsụkuyo oro ekemede ndisụn̄ọ ke unana edinyene unyịme Abasi. Paul ọnọ nnyịn item ete: “Nnyịn ikûnyụn̄ idomo Ọbọn̄, nte ndusụk [nditọ Israel] ẹkedomode Enye, ndien ẹda urụkikọt ẹsobo mmọ. Mbufo ẹkûnyụn̄ ẹsụk uyo, nte ndusụk mmọ ẹkesụkde, ẹnyụn̄ ẹtakde ke ubọk andisobo.” (1 Corinth 10:9, 10) Nditọ Israel ẹma ẹsụk Moses ye Aaron uyo—ih, idem ẹsụk Abasi ke idemesie uyo—ẹkụnide ẹban̄a manna oro ẹkenọde ke utịbe utịbe usụn̄. (Numbers 16:41; 21:5) Nte Jehovah ama ayat esịt aban̄a use oro mmọ ẹkenamde akan nte enye akayatde aban̄a nsụkuyo mmọ? Mbụk Bible owụt ete ke urụkikọt ama owot ediwak mbon nsụkuyo. (Numbers 21:6) Ke nsụkuyo oro ẹkebemde iso, ẹma ẹwot se iwakde ibe mme ọsọn̄ibuot mbon nsụkuyo 14,700. (Numbers 16:49) Ntre ẹyak nnyịn ikûsịn ime Jehovah ke udomo ebe ke ndise mme enọ esie ke usụhọde.
21. (a) Nso item ke ẹkenọ Paul odudu ndiwet? (b) Nte ekemde ye James1:25, didie ke nnyịn ikeme ndinen̄ede n̄kop inemesịt?
21 Ke ewetde n̄wed ọnọ ẹsọk mme ekemmọ Christian, Paul ama ada udịm udịm ntọt esie ekeberi ye item emi: “Mme n̄kpọ emi ẹkewọrọ mmọ, man ẹdi uwụt-n̄kpọ ẹnọ owo; ẹkenyụn̄ ẹwet mmọ ndida nteme nnyịn, emi utịt mme eyo ama esịm nnyịn. Mmọdo yak owo eke esede ete imọ imọsọn̄ọ ida ekpeme mbak enye ediduọ.” (1 Corinth 10:11, 12) Ukem nte nditọ Israel, nnyịn imọbọ ediwak edidiọn̄ ito Jehovah. Nte ededi, utu ke ndibiet mmọ, akpakam nnyịn idehede ifre inyụn̄ itre ndiwụt esịtekọm mban̄a nti n̄kpọ oro Abasi anamde ọnọ nnyịn. Ke ini mme ekikere uwem emi ẹfịghede nnyịn, ẹyak nnyịn ikere iban̄a mme utịbe utịbe un̄wọn̄ọ oro ẹdude ke Ikọ esie. Nnyịn ikpakam iti ọsọn̄urua itie ebuana nnyịn ye Jehovah inyụn̄ ika iso ndinam utom ukwọrọikọ Obio Ubọn̄ oro ẹnọde nnyịn. (Matthew 24:14; 28:19, 20) Utọ edinam oro iditreke-tre ndida ata inemesịt nsọk nnyịn, koro N̄wed Abasi ọn̄wọn̄ọ ete: “Edi owo eke owụkde enyịn ese ata edifọn ibet Abasi emi anamde owo ọwọrọ ufụn, onyụn̄ ọsọn̄ọde ada ke esịt, idịghe andikokop emi efrede, edi edi andinanam; owo emi [oyokop inemesịt, NW] ke edinam esie.”—James 1:25.
Didie ke Afo Ọkpọbọrọ?
• Nso ikeme ndinam nnyịn idi mme andikokop emi ẹfrede?
• Ntak emi ọyọhọ nsụkibuot nnọ Abasi edide akpan n̄kpọ?
• Didie ke nnyịn ikeme ‘ndifehe mbọhọ use’?
• Nso ikpedi edu nnyịn kaban̄a mme enọ Jehovah?
[Mme Mbụme Ukpepn̄kpọ]
[Ndise ke page 15]
Nditọ Israel ẹma ẹfre n̄kpọsọn̄ edinam oro Jehovah akanamde ke ibuot mmọ
[Ndise ke page 16]
Ikọt Jehovah ẹbiere ndimụm n̄kokon̄ idaha ido uwem n̄kama