Mme Mbụme Ẹtode Mme Andikot

Ntak emi New World Translation etịn̄de aban̄a “mbufa enyọn̄ [ediwak] ye obufa isọn̄” ke 2 Peter 3:13, ke adan̄aemi Ediyarade 21:1 ebemde iso etịn̄ aban̄a “obufa enyọn̄ [kiet] ye obufa isọn̄”?

Ke nditịm ntịn̄, emi edi ido ubon ikọ ke akpasarade usem. Etie nte enye inen̄ekede inyene se ọwọrọde.

Bem iso kere ban̄a N̄wed Abasi Usem Hebrew. Ke akpasarade uwetn̄kpọ, ikọ Hebrew oro sha·maʹyim, emi ẹkabarede “(mme) enyọn̄,” esiwak ndida mban̄a uwak n̄kpọ. Etie nte enye ndida mban̄a ediwak n̄kpọ iwụtke uwak ke edidi eti, edi ọnọ ekikere aban̄a “ediwak ke ubom,” m̀mê “n̄kpọ kiet oro enyenede anana-ibat nsio nsio ikpehe m̀mê n̄kpọ.” An̄wan̄a ntak edide ntre sia ata enyọn̄ okon̄de akan isọn̄ ke kpukpru ikpehe onyụn̄ esịnede ediwak biliọn ntantaọfiọn̄. Ke ini ikọ oro asiakde ata ata n̄kpọ ebemde sha·maʹyim iso, (ke ata ata usụn̄, “enyọn̄ oro”), New World Translation esikabade enye kpukpru ini nte “mme enyọn̄,” nte ke Isaiah 66:22. Ke ini sha·maʹyim mînyeneke ikọ oro asiakde ata ata n̄kpọ, ẹkeme ndida ikọ oro owụtde n̄kpọ kiet n̄kabade enye (“enyọn̄,” nte ke Genesis 1:8; 14:19, 22; Psalm 69:34) m̀mê ikọ oro owụtde ediwak (“mme enyọn̄,” nte ke Genesis 49:25; Judges 5:4; Job 9:8; Isaiah 65:17).

Ke Isaiah 65:17 ye 66:22, ikọ Hebrew oro adade ọnọ enyọn̄ edi orụk ikọ adade aban̄a ediwak n̄kpọ, ndien enyene-iwụk edikabade oro ẹmekde edi “mbufa enyọn̄ ye obufa isọn̄ [m̀mê, obufa isọn̄ oro].”

Ikọ Greek oro ou·ra·nosʹ ọwọrọ “enyọn̄,” ndien ikọ adade aban̄a ediwak ou·ra·noiʹ ọwọrọ “mme enyọn̄.” Nte enemde, mme andikabade Septuagint usem Greek ẹkeda orụk ikọ adade aban̄a n̄kpọ kiet ke Isaiah 65:17 ye 66:22.

Idahaemi nso kaban̄a itie iba emi ikọ oro “obufa enyọn̄ [m̀mê mbufa enyọn̄] ye obufa isọn̄” ẹdude ke N̄wed Abasi Christian Usem Greek?

Ke 2 Peter 3:13, apostle oro akada ikọ Greek oro adade aban̄a ediwak n̄kpọ. Mbemiso oro (2Pe 3 ufan̄ikọ 7, 10, 12), enye ama etịn̄ aban̄a ndiọi “enyọn̄” emi ẹdude ke emi, adade ikọ oro adade aban̄a ediwak n̄kpọ. Ntre enye ama enyene iwụk ke ndida ikọ oro adade aban̄a ediwak n̄kpọ ke 2Pe 3 ufan̄ikọ 13. Akan oro, etie nte enye okokot oto akpasarade uwetn̄kpọ Isaiah 65:17, ebiet emi ẹdade ikọ Hebrew adade aban̄a ediwak n̄kpọ, nte ke 2 Peter 2:22, enye okokot oto uwetn̄kpọ Hebrew ke Mme N̄ke 26:11. Ntem Peter okowụt nte ke “nnyịn itie ibet mbufa enyọn̄ [ediwak] ye obufa isọn̄, nte un̄wọn̄ọ esie edide.”

Ke okpụhọrede esisịt, ke Ediyarade 21:1, etie nte apostle John akada edikabade eke Isaiah 65:17 ke Septuagint, emi nte ima ikokụt, esịnede ikọ Greek oro ọwọrọde “enyọn̄,” emi adade aban̄a n̄kpọ kiet. Ntem, se John ekewetde ekedi: “N̄kụt obufa enyọn̄ [kiet] ye obufa isọn̄, koro akpa enyọn̄ ye akpa isọn̄ ẹma ẹbe ẹfep.”

Mmọ emi ẹdi mme ido ubon ikọ emi ẹnyenede n̄kpọ ndinam ye ido ukabade n̄wed. Edi se idotde ndifiak ntịn̄ nte ke etie nte ukpụhọde ndomokiet idụhe ke se enye ọwọrọde, edide owo okot m̀mê etịn̄ aban̄a “mbufa enyọn̄” m̀mê “obufa enyọn̄.” Mmọ ẹwọrọ ukem n̄kpọ.

Ebiet Ẹdade Ndise Ẹto ke page 31]

Ntantaọfiọn̄: Frank Zullo