Buana ke Idatesịt Otode Edinọ Enọ!
Buana ke Idatesịt Otode Edinọ Enọ!
“Ekese inemesịt odu ke ndinọnọ akan nte odude ke ndibọbọ.”—UTOM 20:35, NW.
1. Didie ke Jehovah owụt idatesịt oro odude ke ndinọ enọ?
IDATESỊT edifiọk akpanikọ ye mme edidiọn̄ oro ẹsisụn̄ọde ẹto oro ẹdi mme ọsọn̄urua enọ ẹtode Abasi. Mbon oro ẹdide ẹdifiọk Jehovah ẹnyene ediwak ntak ndidat esịt. Edi ke adan̄aemi idatesịt odude ke ndibọ enọ, idatesịt odu n̄ko ke ndinọ enọ. Jehovah edi Andinọ “kpukpru eti edinọ ye kpukpru enọ eke ẹfọnde ẹma,” ndien enye edi “Abasi inemesịt.” (James 1:17; 1 Timothy 1:11, NW) Enye esinọ kpukpru mbon oro ẹkpan̄de utọn̄ eti ukpep, esinyụn̄ adat esịt ndikụt nte mbon oro enye ekpepde n̄kpọ ẹsụkde ibuot ẹnọ enye, kpa nte mme ete ye eka ẹsidatde esịt ke ini nditọ mmọ ẹnamde n̄kpọ ẹban̄a ima ima item mmọ.—Mme N̄ke 27:11.
2. (a) Nso ke Jesus eketịn̄ aban̄a edinọ enọ? (b) Nso inemesịt ke nnyịn inyene ke ini ikpepde mbon en̄wen akpanikọ Bible?
2 Ukem ntre, ke ini okodude ke isọn̄ Jesus ama okop inemesịt ndikụt mme owo ẹnamde n̄kpọ nte ọfọnde ẹban̄a ukpepn̄kpọ esie. Apostle Paul ama okot oto Jesus nte ọdọhọde ete: “Ekese inemesịt odu ke ndinọnọ akan nte odude ke ndibọbọ.” (Utom 20:35, NW) Inemesịt oro ikopde ke ini ikpepde mbon en̄wen akpanikọ Bible idịghe ikpîkpu edikop uyụhọ nte ke owo enyịme mme edinịm ke akpanikọ ido ukpono nnyịn. Ke akade anyan akan oro, enye edi idatesịt edifiọk nte ke nnyịn inọ owo eti n̄kpọ oro enyenede nsinsi ufọn. Ebede ke ndinọ enọ ke n̄kan̄ eke spirit, nnyịn imekeme ndin̄wam mme owo ẹbọ ufọn idahaemi ye ke nsinsi nsinsi.—1 Timothy 4:8.
Edinọ Enọ Ada Idatesịt Edi
3. (a) Didie ke apostle Paul ye John ẹketịn̄ ẹban̄a idatesịt mmọ ke ndin̄wam mbon en̄wen ke n̄kan̄ eke spirit? (b) Ntak emi edinọ nditọ nnyịn akpanikọ Bible edide edinam ediwụt ima?
3 Ih, kpa nte Jehovah ye Jesus ẹsidatde esịt ke ndinọ mme enọ eke spirit, mme Christian n̄ko ẹsidat esịt. Apostle Paul ama okop idatesịt ke ndifiọk nte ke imọ ima in̄wam mbon en̄wen ẹkpep akpanikọ Ikọ Abasi. Enye ekewet ọnọ ẹsọk esop ke Thessalonica ete: “Nso idi idotenyịn nnyịn, ye idatesịt nnyịn, ye anyanya eke idade ibụre mbụre? Nte idịghe mbufo ke nnyịn idida inam mbụre ke iso Ọbọn̄ nnyịn Jesus ke adan̄aemi Enye edidide? Koro mbufo ẹdi ubọn̄ nnyịn ye idatesịt nnyịn.” (1 Thessalonica 2:19, 20) Ke ukem usụn̄ oro apostle John, ke etịn̄de aban̄a nditọ esie eke spirit, ekewet ete: “Nnyeneke idatesịt eke okponde akan edikop eke n̄kopde nte nditọ mi ẹsasan̄a ke akpanikọ.” (3 John 4) Kere, n̄ko, ban̄a idatesịt oro odude ke ndin̄wam nditọ nnyịn ẹkabade ẹdi nditọ nnyịn eke spirit! Ndibọk nditọ ke “ntụnọ ye item Ọbọn̄” edi edinam ediwụt ima ke n̄kan̄ mme ete ye eka. (Ephesus 6:4) Mme ete ye eka ke ntre ẹwụt ke mmimọ imekere iban̄a nsinsi mfọnọn̄kpọ nditọ mmimọ. Ke ini mmọ emi ẹnamde n̄kpọ ẹban̄a item emi, mme ete ye eka ẹsikop akwa idatesịt ye uyụhọ.
4. Nso ifiọkutom iwụt idatesịt oro odude ke edinọ enọ ke n̄kan̄ eke spirit?
4 Dell edi asan̄autom uyọhọ ini ye eka oro enyenede nditọ ition. Enye ọdọhọ ete: “Mmetịm mfiọk ntak emi apostle John eketịn̄de mme ikọ oro koro mmenen̄ede n̄kop inemesịt nte ke inan̄ ke otu nditọ mi ‘ẹsasan̄a ke akpanikọ.’ Mmọfiọk nte ke ini ubon ẹdianade kiet ke utuakibuot akpanikọ ke emi esida ukpono ye ubọn̄ ọsọk Jehovah, ntem mmenen̄ede n̄kop uyụhọ ndikụt nte enye ọdiọn̄de ukeme oro nsịnde ndisịn akpanikọ ke esịt nditọ mi. Inem inem idotenyịn edidu anana-utịt uwem ke Paradise ye ubon mi anam mi nnyene ekese idotenyịn onyụn̄ onụk mi ndiyọ kpa ye mme mfịna ye mme n̄kpọ ubiọn̄ọ.” Ke mfụhọ, ẹma ẹsio kiet ke otu nditọiban Dell ẹfep ke esop ke ntak oro enye ekebịnede usụn̄ uwem oro mîdịghe eke Christian. Kpa ye oro, Dell anam utom ọkpọsọn̄ ndika iso nnyene in̄wan̄-in̄wan̄ edu. Enye ọdọhọ ete: “Mmodori enyịn nte ke usen kiet eyen mi ayafiak edi ebịne Jehovah ke nsụhọdeidem ye ke esịt akpanikọ. Edi mmọkọm Abasi nte ke ekese ke otu nditọ mi ẹka iso ndinam n̄kpọ esie ke edinam akpanikọ. Idatesịt oro n̄kopde enen̄ede anam mi n̄kop odudu.”—Nehemiah 8:10.
Ndinam Mme Ufan Oro Ẹbịghide
5. Nte nnyịn isịnde idem ke utom edinam mme mbet, ndifiọk nso edinam nnyịn ikop uyụhọ?
5 Jesus ama eteme mme anditiene enye ete ẹnam mme mbet ẹdide Christian ẹnyụn̄ ẹkpep mmọ ẹban̄a Jehovah ye se enye oyomde. (Matthew 28:19, 20) Ke unana ibụk, Jehovah ye Jesus ẹn̄wam mme owo ndikpep usụn̄ akpanikọ. Ntre nte nnyịn isịnde idem ke utom edinam mbet, nnyịn imokop uyụhọ ndifiọk nte ke nnyịn ikpebe uwụtn̄kpọ Jehovah ye eke Jesus, nte mme akpa Christian ẹkekpebede. (1 Corinth 11:1) Ke ini nnyịn idianade kiet ntem ye Ata Ọkpọsọn̄ Abasi ye edima Eyen esie, uwem nnyịn enen̄ede enyene se ọwọrọde. Nso edidiọn̄ ke edi ntem ndidi se ẹbatde ẹsịn ke otu “mme anam-utom” Abasi! (1 Corinth 3:9) Ndien nte idịghe n̄kpọ nduaidem nte ke idem mme angel ẹtiene ebuana ke utom edikwọrọ eti mbụk emi?—Ediyarade 14:6, 7.
6. Nte nnyịn ibuanade ke edinọ enọ ke n̄kan̄ eke spirit, mmanie ẹkabade ẹdi mme ufan nnyịn?
6 Ke akpanikọ, ebede ke ndibuana ke utom edinọ enọ ke n̄kan̄ eke spirit emi, nnyịn imekeme ndikabade ndi se ikande mme anamutom Abasi—nnyịn imekeme ndidụk nsinsi itie ufan ye enye. Ke ntak mbuọtidem esie, ẹkekot Abraham ufan Abasi. (James 2:23) Nte nnyịn idomode ndinam uduak Abasi, nnyịn n̄ko imekeme ndikabade ndi mme ufan Abasi. Edieke nnyịn inamde oro, nnyịn imekeme ndikabade ndi mme ufan Jesus n̄ko. Enye ọkọdọhọ mme mbet esie ete: “N̄kot mbufo mme ufan, koro mma mmen kpukpru se n̄kokopde ke inua Ete Mi nyarade nnọ mbufo.” (John 15:15) Ediwak owo ẹdat esịt ndidi se ẹbatde nte ufan mbon oro ẹnyenede odudu m̀mê ikpọ owo ukara, edi ẹkeme ndibat nnyịn nte mme ufan n̄kponn̄kan owo iba ke ofụri ekondo!
7. (a) Didie ke n̄wan kiet akanam ata ufan? (b) Nte afo emenyene ukem ifiọkutom oro?
7 Ke adianade do, ke ini nnyịn in̄wamde mme owo ẹdi ẹdifiọk Abasi, mmọ ẹkabade ẹdi mme ufan nnyịn n̄ko, anamde nnyịn inyene san̄asan̄a inemesịt. Joan, emi odụn̄de ke United States, ama ọtọn̄ọ ndikpep Bible ye n̄wan kiet emi ekerede Thelma. Okposụkedi Thelma okosobode ubiọn̄ọ otode ubon ke ukpepn̄kpọ esie, enye ama aka iso ndikpep n̄kpọ ndien isua kiet ke ukperedem enye ama ana baptism. Joan ekewet ete: “Ebuana nnyịn iketreke do; utu ke oro, enye ama ọkọri akabade edi itie ufan oro ebịghide ke n̄kpọ nte isua 35 idahaemi. Nnyịn imesiwak ndisan̄a kiet ke utom ukwọrọikọ inyụn̄ isan̄a kiet ika ikpọ mbono. Nte ini akakade, mma n̄wọrọ n̄ka obufa ebietidụn̄ emi oyomde usụn̄ ke kilomita 800. Edi Thelma aka iso ndisiwet ima ima ye inem inem leta nnọ ẹsọk mi, asiande mi ete ke imọ imama mi onyụn̄ ọkọmde mi ke ami ndidi ufan ye uwụtn̄kpọ imọ ye ke ndikekpep imọ akpanikọ Bible. Ndinyene utọ n̄kpet n̄kpet ye edima ufan oro edi utịbe utịbe utịp oro nnyenede nto ukeme oro n̄kesịnde ndin̄wam enye ekpep n̄kpọ aban̄a Jehovah.”
8. Nso in̄wan̄-in̄wan̄ edu idin̄wam nnyịn ke utom ukwọrọikọ?
8 Ndinyene idotenyịn nte ke iyokụt owo oro oyomde ndikpep akpanikọ ekeme ndin̄wam nnyịn ndiyọ idem ọkpọkọm ediwak owo oro nnyịn isobode iwụtke udọn̄ ke Ikọ Jehovah. Utọ unana udọn̄ oro ekeme ndidi n̄kpọ-ata nnọ mbuọtidem ye ime nnyịn. Edi, in̄wan̄-in̄wan̄ edu ayan̄wam nnyịn. Fausto, emi otode Guatemala, ọkọdọhọ ete: “Ke ini nnọde mbon en̄wen ikọ ntiense, mmesikere mban̄a nte ekpenemde edieke owo oro ntịn̄de ikọ nnọ akpakabarede edi eyenete eren m̀mê eyenete an̄wan eke spirit. Mmesikere nte ke nsụhọde n̄kaha owo kiet oro nditịn̄de ikọ nnọ eyenyịme akpanikọ Ikọ Abasi nte ini akade. Ekikere oro esin̄wam mi ndika iso nnọ ikọ ntiense esinyụn̄ anam mi nnen̄ede n̄kop idatesịt.”
Ndibon N̄kpọuto ke Heaven
9. Nso ke Jesus eketịn̄ aban̄a n̄kpọuto ke heaven, ndien nso ke nnyịn ikeme ndikpep nto emi?
9 Ndinam mme mbet, edide nditọ nnyịn m̀mê mbon en̄wen, isidịghe mmemmem n̄kpọ kpukpru ini. Enye ekeme ndiyom ini, ime, ye ifịk. Nte ededi, ti ete ke ediwak owo ẹnyịme ndinam utom ọkpọsọn̄ ndikọ akpakịp inyene obụkidem mbon, mme n̄kpọ oro mîsiwakke ndinọ mmọ idatesịt mîsinyụn̄ ibịghike ke nsinsi. Jesus ama ọdọhọ mme andikpan̄ utọn̄ nnọ enye ete ke etịm ọfọn ndikọ inyene eke spirit. Enye ọkọdọhọ ete: “Ẹkûbon n̄kpọ-uto ẹnịm ẹnọ idem ke isọn̄, ke ọtọ nte uta-n̄kpọ ye n̄karafan̄ ẹbiatde n̄kpọ, inọ ẹnyụn̄ ẹbụn̄de, ẹdụk, ẹyịp: edi ẹbon n̄kpọ-uto ẹnịm ẹnọ idem ke heaven, ke ọtọ nte uta-n̄kpọ ye n̄karafan̄ mîbiatke n̄kpọ, inọ mînyụn̄ ibụn̄ke, idụk, iyịp.” (Matthew 6:19, 20) Ebede ke ndibịne mme utịtmbuba eke spirit—emi esịnede ndibuana ke akpan utom edinam mbet—nnyịn imekeme ndikop uyụhọ ndifiọk nte ke nnyịn inam uduak Abasi ye nte ke enye ọyọnọ nnyịn utịp. Apostle Paul ekewet ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde.”—Mme Hebrew 6:10.
10. (a) Ntak emi Jesus ekenyenede n̄kpọuto eke spirit? (b) Didie ke Jesus ọkọnọ idemesie, ndien nso akwa ufọn ke emi akada ọsọk mbon en̄wen?
10 Edieke nnyịn inamde utom ifịk ifịk ndinam mme mbet, nnyịn ibon ‘n̄kpọuto ke heaven’ inọ idem nnyịn, nte ekemde ye se Jesus eketịn̄de. Emi anam nnyịn inyene idatesịt otode edibọbọ. Edieke nnyịn inọde ye unana ibụk, nnyịn ke idem nnyịn iyọbọ ufọn. Jesus ke idemesie ama anam n̄kpọ Jehovah ke edinam akpanikọ ke ediwak biliọn isua. Kere ban̄a mme n̄kpọuto oro enye ọkọkọde obon ke heaven! Kpa ye oro, Jesus ikoyomke mme ufọn idemesie. Apostle Paul ekewet ete: ‘Jesus ama ayak Idem Esie ọnọ kaban̄a mme idiọk-n̄kpọ nnyịn, man Enye akpanyan̄a nnyịn osio ke idiọk eyo emi odude ke emi, nte ekemde ye se Abasi ye Ete nnyịn aduakde.’ (Galatia 1:4) Jesus ikanamke utom ukwọrọikọ esie ke unana ibụk kpọt edi ama ọnọ ata uwem esie nte ufak man mbon en̄wen ẹkpenyene ifet ndibon mme n̄kpọuto ke heaven.
11. Ntak emi mme enọ n̄kpọ eke spirit ẹfọnde ẹkan mme enọ n̄kpọ obụkidem?
11 Ke ndikpep mme owo mban̄a Abasi, nnyịn in̄wam mmọ ndikụt nte mmọ n̄ko ẹkpekọde n̄kpọuto eke spirit oro mîkemeke ndibiara ẹbon. Ewe n̄kponn̄kan enọ ke afo ekeme ndinọ? Edieke afo ọnọde ufan fo ọsọn̄urua n̄kanika itọn̄ubọk, ubomisọn̄, m̀mê idem ufọk, eyedi ufan oro oyowụt esịtekọm onyụn̄ okop inemesịt, ndien afo eyenyene idatesịt otode edinọnọ. Edi enọ oro editie didie ke isua 20 ke iso? Ke isua 200 ke iso? Ke isua 2,000 ke iso? Ke n̄kan̄ eken, edieke afo esịnde idem ndin̄wam owo anam n̄kpọ Jehovah, owo oro ekeme ndibọ ufọn nto enọ oro ke nsinsi.
Ndiyom Mbon Oro Ẹyomde Akpanikọ
12. Didie ke ediwak owo ẹnọ idemmọ ndin̄wam mbon en̄wen ke n̄kan̄ eke spirit?
12 Man ẹbuana ke idatesịt otode edinọ enọ ke n̄kan̄ eke spirit, ikọt Jehovah ẹmesịm utịt isọn̄. Ediwak tọsịn owo ẹmekpọn̄ ufọk ye ubon man ẹkenam utom isụn̄utom ke mme idụt oro mmọ ẹnyenede ndikpụhọde nda ekekem ye mbufa usem ye ido. Mbon en̄wen ẹmewọrọ ẹka mme ikpehe oro udọn̄ kaban̄a mme anditan̄a Obio Ubọn̄ okponde akan. Mbon en̄wen n̄ko ẹmekpep esen usem, ẹbererede mbufa ifet ndikwọrọ ikọ nnọ mme ọwọrọidụn̄ oro ẹdụn̄ọde ke n̄kann̄kụk mmọ. Ke uwụtn̄kpọ, ke ẹma ẹkebọk nditọ iba oro idahaemi ẹnamde utom ke ibuot itieutom ofụri ererimbot eke Mme Ntiense Jehovah, ebe ye n̄wan kiet ke New Jersey, U.S.A., ẹma ẹtọn̄ọ ndinam utom usiakusụn̄ ẹnyụn̄ ẹkpep usem Chinese. Ke ufan̄ isua ita, mmọ ẹma ẹnịm ukpepn̄kpọ Bible ye owo 74 oro ẹsemde usem Chinese emi ẹkedude ke akamba ufọkn̄wed oro okodude ekpere. Nte afo emekeme nditat utom ukwọrọikọ fo ke ndusụk usụn̄ man enyene idatesịt efen efen ke utom edinam mbet?
13. Nso ke afo akpanam edieke afo oyomde utom ukwọrọikọ fo enen̄ede on̄wụm mfri?
13 Eyedi ọdọn̄ fi ndinịm ukpepn̄kpọ Bible edi afo ukemeke ndinam ntre. Ke ndusụk idụt edi ọkpọsọn̄ n̄kpọ ndikụt mbon oro ẹnyenede udọn̄. Ekeme ndidi mbon oro afo osobode iwụtke udọn̄ ke Bible. Ke edide ntre, afo emekeme nditịn̄ mban̄a udọn̄ fo ediwak ini ke akam, ọfiọkde ete ke Jehovah ye Jesus Christ ẹnyene ọkpọsọn̄ udọn̄ ke utom oro ẹnyụn̄ ẹkeme ndida fi usụn̄ n̄kowụt owo mbieterọn̄. Yom ekikere to mbon oro ẹdude ke esop mbufo oro ẹnen̄erede ẹnyene mbufiọk m̀mê oro utom ukwọrọikọ mmọ enen̄erede on̄wụm mfri. Bọ ufọn to ukpep ye mme ekikere oro ẹsinọde ke mme mbono esop Christian. Bọ ufọn to item mme esenyịn oro ẹsan̄ade-san̄a ye iban mmọ. Ke akande kpukpru, kûkpa mba. Enyene-ọniọn̄ owo ekewet ete: “Suan n̄kpasịp fo ke usenubọk; kûnyụn̄ ufara ubọk fo ke mbubịteyo: koro afo mûfiọkke ubak eke ẹdiwọrọde usụn̄.” (Ecclesiastes 11:6) Kan̄a ke emi, ti mme utọ anam-akpanikọ iren nte Noah ye Jeremiah. Okposụkedi edide ibat ibat owo ẹkenam n̄kpọ nte ọfọnde ẹban̄a ukwọrọikọ mmọ, utom ukwọrọikọ mmọ ama okụt unen. Ke akande kpukpru, enye ama enem Jehovah esịt.
Ndinam Ofụri Ukeme Fo
14. Didie ke Jehovah ese mbon oro ẹkọride ẹsọn̄ ke utom esie?
14 Ekeme ndidi idaha fo iyakke fi anam ekese nte afo akpamade ndinam ke utom ukwọrọikọ. Ke uwụtn̄kpọ, usọn̄ ekeme ndisụhọde se afo ekemede ndinam ke utom Jehovah. Edi, ti se enyene-ọniọn̄ owo oro ekewetde ete: “Iwat edi anyanya ubọn̄, ke usụn̄ eti ido ke ẹdikụt enye.” (Mme N̄ke 16:31) Uwem oro ẹsịnde ke utom Jehovah enen̄ede enem Enye esịt. Ke adianade do, N̄wed Abasi ọdọhọ ete: “Ndien tutu esịm usọn̄ ami [Jehovah] ndi enye; ami nyonyụn̄ mbiom enye tutu esịm iwat: edi ami n̄kanam, onyụn̄ edi ami ndimenede, ndinyụn̄ mbiom, nnyụn̄ nnam mbufo ẹbọhọ.” (Isaiah 46:4) Ima ima Ete nnyịn eke heaven ọn̄wọn̄ọ ndimụm mme anam-akpanikọ ikọt esie n̄kama nnyụn̄ n̄n̄wam mmọ.
15. Nte afo emenịm ke akpanikọ nte ke Jehovah ọfiọk mme idaha fo? Ntak-a?
15 Eyedi afo ke ọyọ udọn̄ọ, ubiọn̄ọ otode nsan̄a ndọ oro mînịmke ke akpanikọ, ndodobi mbiomo ubon, m̀mê ndusụk n̄kpọsọn̄ mfịna eken. Jehovah ọfiọk mme mmeme ye mme idaha nnyịn, ndien enye ama nnyịn ke ntak ukeme ofụri esịt oro nnyịn isịnde ndinam n̄kpọ esie. Oro edi ntre idem okposụkedi se nnyịn inamde ekemede ndikpri n̄kan se mbon efen ẹnamde. (Galatia 6:4) Jehovah ọfiọk ete ke nnyịn idi mme anana-mfọnmma owo, ndien enye owụt eti ibuot ke se enye oyomde oto nnyịn. (Psalm 147:11) Edieke nnyịn inamde ofụri ukeme nnyịn, nnyịn imekeme nditịm nnịm nte ke nnyịn imọsọn̄ urua ke enyịn Abasi ye nte ke enye idifreke mme utom mbuọtidem nnyịn.—Luke 21:1-4.
16. Ke nso usụn̄ ke ofụri esop ẹbuana ke ndinam mbet kiet?
16 Ti, n̄ko, ete ke utom edinam mbet edi utom otu. Owo kiet kpọt ikemeke ndinam mbet, kpa nte ntọi edịm kiet mîkemeke ndinam eto esehe. Edi akpanikọ, Ntiense kiet ekeme ndikụt owo oro enyenede udọn̄ onyụn̄ enịm ukpepn̄kpọ Bible. Edi ke ndondo oro obufa owo oro edide Ufọkmbono Obio Ubọn̄, ofụri esop ẹn̄wam enye ndifiọk akpanikọ. Ima itie nditọete owụt odudu edisana spirit Abasi. (1 Corinth 14:24, 25) Nditọwọn̄ ye mme uyen ẹnọ mme edemede-owo-udọn̄ ibọrọ, ẹwụtde obufa owo oro nte ke mme uyen nnyịn ẹdi isio ye mme uyen ererimbot. Mbon udọn̄ọ, mbon n̄kpọnnam, ye mbonusọn̄ ke esop ẹkpep mbufa owo se ime abuanade. Inamke n̄kpọ m̀mê nnyịn idi isua ifan̄ ke emana m̀mê mme ukeme nnyịn ẹtie didie, kpukpru nnyịn imenyene akpan udeme ke ndin̄wam mbufa owo nte ima oro mmọ ẹmade akpanikọ Bible otụn̄ọde mmọ ẹnyụn̄ ẹnamde n̄kọri ẹbịne ndina baptism. Ekeme nditie nte kpukpru hour oro nnyịn ibiatde ke utom ukwọrọikọ, mfiakn̄ka kiet kiet oro inamde, nneme kiet kiet oro inemede ye owo oro enyenede udọn̄ ke Ufọkmbono Obio Ubọn̄ inyeneke se ọwọrọde ke idem esie, edi enye edi ubak ọkpọsọn̄ utom oro Jehovah anamde.
17, 18. (a) Ke adianade ye edibuana ke utom edinam mbet, didie ke nnyịn ikeme ndibuana ke idatesịt otode edinọ enọ? (b) Ebede ke ndibuana ke idatesịt otode edinọ enọ, anie ke nnyịn ikpebe?
17 Nte ededi, ke ẹsiode edibuana ke akpan utom edinam mbet ẹfep, nnyịn nte mme Christian n̄ko imabuana ke idatesịt otode edinọ enọ ke mme usụn̄ en̄wen. Nnyịn imekeme ndisio okụk nnịm nditịp nsịn ke ndinọ edisana utuakibuot ibetedem ndinyụn̄ n̄n̄wam mbon oro ẹdude ke unana. (Luke 16:9; 1 Corinth 16:1, 2) Nnyịn imekeme ndiyom mme ifet ndiwụt mbon en̄wen ntatubọk. (Rome 12:13) Nnyịn imekeme ndidomo ‘ndifọn ido ye kpukpru owo, akpan-akpan ye mmọ emi ẹtode ke ufọk mme andinịm ke akpanikọ.’ (Galatia 6:10) Ndien ke mmemmem akpan usụn̄, nnyịn imekeme ndinọ mbon en̄wen enọ—leta, ikot ke urụk ukopikọ, enọ, un̄wam, ikọ nsịnudọn̄.
18 Ebede ke ndinọ enọ, nnyịn iwụt ke nnyịn ikpebe Ete nnyịn eke heaven. Nnyịn n̄ko iwụt ima nditọete nnyịn, kpa se ẹdade ẹdiọn̄ọ mme ata Christian. (John 13:35) Nditi mme n̄kpọ emi ekeme ndin̄wam nnyịn ndibuana ke idatesịt otode edinọ enọ.
Nte Afo Emekeme Ndinam An̄wan̄a?
• Didie ke Jehovah ye Jesus ẹnịm uwụtn̄kpọ ke ndinọ enọ ke n̄kan̄ eke spirit?
• Didie ke nnyịn ikeme ndinam mme nsinsi ufan?
• Mme usio-ukot ewe ke nnyịn ikeme ndinam man inam utom ukwọrọikọ nnyịn enen̄ede okụt unen?
• Didie ke kpukpru owo ke esop ẹkeme ndibuana ke idatesịt otode edinọ enọ?
[Mme Mbụme Ukpepn̄kpọ]
[Mme ndise ke page 13]
Ke ini nditọ ẹnamde n̄kpọ ẹban̄a ukpep oro mmọ ẹbọde, mme ete ye eka ẹsikop akwa idatesịt ye uyụhọ
[Ndise ke page 15]
Ke ndinam mme mbet, nnyịn imekeme ndinam mme ata ufan
[Ndise ke page 16]
Jehovah esimụm nnyịn akama ke ini usọn̄
[Mme ndise ke page 17]
Nnyịn imesikop idatesịt ke ndinọ enọ ke mmemmem akpan usụn̄