Dat Esịt ke Ifiọk Jehovah
Dat Esịt ke Ifiọk Jehovah
“[Idatesịt odu ọnọ, NW] mmọ emi ẹkopde ikọ Abasi, ẹnyụn̄ ẹkpemede ndinam.”—LUKE 11:28.
1. Ini ewe ke Jehovah ọkọtọn̄ọ ndinyene nneme ye mme owo?
JEHOVAH ama mme owo onyụn̄ enen̄ede ekere aban̄a mfọnọn̄kpọ mmọ. Ke ntre, idịghe n̄kpọ n̄kpaidem nte ke enye esinyene nneme ye mmọ. Nneme emi ọkọtọn̄ọ ke in̄wan̄ Eden. Nte Genesis 3:8 ọdọhọde, ke ini kiet “ke ofụm uwemeyo,” Adam ye Eve ẹma “ẹkop uyom Jehovah Abasi.” Ndusụk owo ẹnọ ekikere ẹte ke emi ọwọrọ nte ke ekedi ido Jehovah ndisinyene nneme ye Adam ke ini emi, eyedi kpukpru usen. Se ededi oro idaha ekedide, Bible anam an̄wan̄a nte ke Abasi ikesidaha ini ndinọ akpa eren oro item kpọt edi n̄ko ama esida ini ndikpep enye se okoyomde enye ọfiọk man ekeme ndinam se ẹkeyomde enye anam.—Genesis 1:28-30.
2. Didie ke akpa eren ye n̄wan ẹkedian̄ade ẹkpọn̄ ndausụn̄ Jehovah, ndien ye nso utịp?
2 Jehovah ama ọnọ Adam ye Eve uwem, odudu ndikara mme unam, ye odudu ndikara ofụri isọn̄. Ẹkenọ mmọ ukpan kiet kpọt—mmọ ikenyeneke ndidia mfri eto ifiọk eti ye idiọk. Ke Satan enyịkde, Adam ye Eve ikanamke ewụhọ Abasi. (Genesis 2:16, 17; 3:1-6) Mmọ ẹma ẹmek ndida ke idem, ẹbierede ẹnọ idemmọ se inende ye se ikwan̄ade. Ke ndinam ntre, mmọ ke ndisịme ẹma ẹdian̄ade ẹkpọn̄ ndausụn̄ ima ima Andibot mmọ. Utịp ama akama afanikọn̄ ọnọ mmọ ye nditọ mmọ oro mîkamanake kan̄a. Adam ye Eve ẹma ẹsọn̄ ndien ekem ẹkpan̄a, ye unana idotenyịn ediset ke n̄kpa. Nditọ mmọ ẹma ẹda idiọkn̄kpọ ye utịp esie, n̄kpa, ẹmana.—Rome 5:12.
3. Ntak emi Jehovah ekenyenede nneme ye Cain, ndien didie ke Cain akanam n̄kpọ?
3 Kpa ye nsọn̄ibuot oro ke Eden, Jehovah ama aka iso ndinyene nneme ye edibotn̄kpọ esie edide owo. Cain, akpan Adam ye Eve, okodu ke itiendịk ediyak idem nnọ idiọkn̄kpọ. Jehovah ama odụri enye utọn̄ ete ke enye akasan̄a ebịne afanikọn̄ onyụn̄ eteme enye ete ‘anam eti n̄kpọ.’ Cain ama esịn ima ima item emi onyụn̄ owot eyeneka esie. (Genesis 4:3-8) Ntem, akpa owo ita oro ẹkedude ke isọn̄ ẹma ẹsịn in̄wan̄-in̄wan̄ ndausụn̄ oro Enye emi ọkọnọde mmọ uwem, kpa Abasi emi ekpepde ikọt esie usụn̄ udori, ọkọnọde. (Isaiah 48:17) Anaedi emi okokpu Jehovah didie ntem!
Jehovah Ayarade Idemesie ọnọ Iren eke Eset
4. Kaban̄a nditọ Adam, nso mbuọtidem ke Jehovah ekenyene, ndien nso etop idotenyịn ke enye ọkọnọ ye oro ke ekikere?
4 Okposụkedi enye ekenyenede ofụri unen nditre nneme ye mme owo, Jehovah ikanamke ntre. Enye ama enyene mbuọtidem nte ke ndusụk nditọ Adam ẹyetiene ndausụn̄ Imọ ke eti ibuot. Ke uwụtn̄kpọ, ke ini ekebierede ikpe ọnọ Adam ye Eve, Jehovah ama ebem iso etịn̄ ke “mfri” eyedi oro edibiọn̄ọde Urụkikọt, Satan kpa Devil. Nte ini akade, ẹyenuak Satan ibuot idiọk idiọk. (Genesis 3:15, NW) Ntịn̄nnịm ikọ emi ekedi idara idara etop idotenyịn ọnọ “mmọ emi ẹkopde ikọ Abasi, ẹnyụn̄ ẹkpemede ndinam.”—Luke 11:28.
5, 6. Ke mme usụn̄ ewe ke Jehovah ekenyene nneme ye ikọt esie mbemiso akpa isua ikie E.N., ndien didie ke mmọ ẹkebọ ufọn ẹto emi?
5 Jehovah ama etịn̄ uduak esie ọnọ mme anam-akpanikọ ete-ekpụk eke eset, utọ nte Noah, Abraham, Isaac, Jacob, ye Job. (Genesis 6:13; Exodus 33:1; Job 38:1-3) Ke ukperedem, enye ama ọnọ idụt Israel ofụri ndutịm ibet ebe ke Moses. Mmọ ẹma ẹbọ ufọn ẹto Ibet Moses ke ediwak usụn̄. Ebede ke ndinịm Ibet, ẹma ẹdian̄ade Israel ẹkpọn̄ kpukpru idụt eken nte san̄asan̄a ikọt Abasi. Abasi ama ọn̄wọn̄ọ ọnọ nditọ Israel ete ke edieke mmọ ẹnịmde Ibet oro, imọ iyọdiọn̄ mmọ, idịghe ke n̄kan̄ eke obụk kpọt edi n̄ko ke n̄kan̄ eke spirit, inamde mmọ ẹkabade ẹdi obio oku ye edisana idụt. Ibet oro ama akam ọnọ mme edumbet udia ye usanaidem oro ẹkenamde owo enyene nsọn̄idem. Nte ededi, Jehovah n̄ko ama odụri mmọ utọn̄ aban̄a ndiọi utịp oro ẹdisụn̄ọde ito nsọn̄ibuot.—Exodus 19:5, 6; Deuteronomy 28:1-68.
6 Nte ini akakade, ẹma ẹdian mme n̄wed eke odudu spirit en̄wen ke uwetn̄kpọ Bible. Mme mbụk eset ẹma ẹtịn̄ ẹban̄a edinam Jehovah ye mme idụt ye mme owo. Mme n̄wed uto ẹma ẹtịn̄ inem inem ẹban̄a mme edu esie. Mme n̄wed ntịn̄nnịm ikọ ẹma ẹbem iso ẹtịn̄ nte ẹdinamde uduak Jehovah ke ini iso. Mme anam-akpanikọ iren eke eset ẹma ẹtịn̄ enyịn ẹkpep ẹnyụn̄ ẹda mme uwetn̄kpọ eke odudu spirit emi ẹsịn ke edinam. Kiet ama ewet ete: “Ikọ fo edi utuenikan̄ ukot mi, ye un̄wana usụn̄ mi.” (Psalm 119:105) Jehovah ama ọnọ mbon oro ẹkenyịmede ndikpan̄ utọn̄ ukpep ye un̄wana.
Un̄wana Enen̄ede Ayama
7. Okposụkedi Jesus akanamde mme utịben̄kpọ, ẹkenen̄ede ẹdiọn̄ọ enye didie, ndien ntak-a?
7 Etisịm akpa isua ikie, mme otu ido ukpono mme Jew ẹma ẹdian item owo ke Ibet. Ẹma ẹyụrọde Ibet, ndien utu ke enye ndidi se inọde un̄wana, enye ama akabade edi mbiomo ke ntak item owo. (Matthew 23:2-4) Nte ededi, ke 29 E.N., Jesus ama ọwọrọ owụt idem nte Messiah. Utom esie ikedịghe edinọ uwem esie ke ibuot ubonowo kpọt, edi n̄ko ‘edidi ntiense nnọ akpanikọ.’ Okposụkedi enye akanamde mme utịben̄kpọ, ẹkenen̄ede ẹdiọn̄ọ enye nte “Andikpep.” Ukpepn̄kpọ esie eketie nte un̄wana oro akayamade ke ekịm eke spirit oro okofụkde ekikere mme owo. Jesus ke idemesie ama etịn̄ nte enende ete: “Ami ndi un̄wana ererimbot.”—John 8:12; 11:28; 18:37.
8. Mme n̄wed ewe eke odudu spirit ke ẹkewet ke akpa isua ikie E.N., ndien didie ke mmọ ẹkenyene ufọn ẹnọ mme akpa Christian?
8 Ke ukperedem, ẹma ẹdian mme Gospel, uwetn̄kpọ inan̄ ẹban̄ade uwem Jesus, ye n̄wed Utom, kpa mbụk aban̄ade nte Ido Ukpono Christ akatarade ke Jesus ama akakpa. Mme leta eke odudu spirit oro mme mbet Jesus ẹkewetde ẹma ẹdu n̄ko, ọkọrọ ye n̄wed ntịn̄nnịm ikọ eke Ediyarade. Mme uwetn̄kpọ emi, adianade ye N̄wed Abasi Usem Hebrew, ẹma ẹnam uwetn̄kpọ Bible ekem ibat. Ye un̄wam mme n̄wed eke odudu spirit emi, mme Christian ẹkeme ‘nditiene kpukpru ikọt Abasi ntịm mfiọk se idide ubom ye uniọn̄ ye ukon̄ ye utụn̄ọ’ akpanikọ. (Ephesus 3:14-18) Mmọ ẹkeme ndinyene “ekikere Christ.” (1 Corinth 2:16) Nte ededi, mme akpa Christian oro iketịmke ifiọk kpukpru ikpehe uduak Jehovah. Apostle Paul ama ewet ọnọ ẹsọk mme ekemmọ andinịm ke akpanikọ ete: “Idahaemi nnyịn imokụt n̄kpọ ntre ntịmede-ntịmede, nte owo okụtde n̄kpọ ke ukụtiso.” (1 Corinth 13:12) Ẹkesikụt n̄kpọ ntre ntịmede-ntịmede, idịghe ọyọhọ ọyọhọ, ke utọ ukụtiso oro. Ọyọhọ ọyọhọ ifiọk Ikọ Abasi ke ekedi ke iso.
9. Nso ifiọk ke ẹnyene ke “ukperedem ini”?
9 Mfịn, nnyịn idu uwem ke ini oro ẹkotde “ukperedem ini,” kpa ini oro ẹdade “ndiọk eyo” ẹdiọn̄ọ. (2 Timothy 3:1) Prọfet Daniel ama ebem iso etịn̄ ete ke “ifiọk oyokpon aka iso” ke ini emi. (Daniel 12:4) Ntem, Jehovah, Akwa Eneme Nneme, aman̄wam mbon esịt akpanikọ nditịm mfiọk se Ikọ esie ọwọrọde. Ediwak owo ẹfiọk idahaemi ẹte ke ẹma ẹdori Christ Jesus ke ebekpo ke heaven emi enyịn owo mîkwe ke 1914. Mmọ n̄ko ẹfiọk ẹte ke enye ọyọsọp ada utịt ọsọk kpukpru idiọkido ke isọn̄ onyụn̄ anam isọn̄ akabade edi paradise. Ke ẹkwọrọ akpan ikpehe gospel Obio Ubọn̄ emi ke ofụri ekondo idahaemi.—Matthew 24:14.
10. Ke ediwak isua ikie, didie ke mme owo ẹnam n̄kpọ ẹban̄a item Jehovah?
10 Ih, ke ofụri mbụk Jehovah etịn̄ uduak esie ọnọ mme owo ke isọn̄. Bible etịn̄ aban̄a ediwak mbon oro ẹkekpan̄de utọn̄, ẹdade ọniọn̄ Abasi ẹsịn ke edinam, ẹkenyụn̄ ẹdiọn̄de mmọ ke ntak oro. Enye etịn̄ aban̄a mbon en̄wen oro ẹkesịnde ima ima item Abasi, ẹtienede idiọk usụn̄ Adam ye Eve. Jesus ama anam idaha emi an̄wan̄a ke ini enye eketịn̄de aban̄a ndamban̄a usụn̄ iba. Kiet ada aka nsobo. Sia atarade onyụn̄ an̄wan̄ade, ediwak mbon oro ẹsịnde Ikọ Abasi ẹsan̄a ke usụn̄ emi. Usụn̄ enye eken ada aka nsinsi uwem. Okposụkedi afahade, enye edi usụn̄ emi ibat ibat owo oro ẹnyịmede Bible nte Ikọ Abasi, ẹnyụn̄ ẹdude uwem ẹkekem ye enye, ẹsan̄ade.—Matthew 7:13, 14.
Ndiwụt Esịtekọm Mban̄a Se Nnyịn Inyenede
11. Nnyịn ndifiọk nnyụn̄ nnịm Bible ke akpanikọ edi uyarade nso?
11 Ndi afo odu ke otu mbon oro ẹmekde usụn̄ oro adade aka uwem? Ke edide ntre, afo nte eyịghe mîdụhe oyoyom ndika iso nsan̄a ke enye. Didie ke afo ekeme ndinam ntre? Kpukpru ini, tie kere ye esịtekọm ban̄a mme edidiọn̄ oro afo enyenede oto ndifiọk akpanikọ Bible. Akpanikọ oro nte ke afo amanam n̄kpọ aban̄a eti mbụk edi uyarade nte ke afo emenyene edidiọn̄ Abasi. Jesus ama owụt emi ke ini enye akadade mme ikọ emi ọbọn̄ akam ọnọ Ete esie: “Mmọkọm Fi, O Ete, Ọbọn̄ enyọn̄ ye isọn̄, koro Afo ekedịpde mbon eti ibuot ye mme asian mme n̄kpọ emi, onyụn̄ ayararede mmọ ọnọ nsek nditọ.” (Matthew 11:25) Mme ọkọiyak ye mme ọbọ a-tax ẹma ẹfiọk se mme ukpepn̄kpọ Jesus ẹkewọrọde, ke adan̄aemi mme adaiso ido ukpono oro ẹkedide mme ọfiọkn̄wed mîkọfiọkke. Jesus ama aka iso ọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi.” (John 6:44) Edieke edide afo ọmọfiọk Bible ndien enịm, onyụn̄ etiene mme ukpepn̄kpọ esie, emi edi uyarade nte ke Jehovah odụri fi ada. Emi edi ntak ndidat esịt.
12. Ke mme usụn̄ ewe ke Bible ọnọ un̄wana?
12 Ikọ Abasi ọdọn̄ọ mme akpanikọ Bible oro ẹsiode owo ke ufụn ẹnyụn̄ ẹnọde un̄wana. Mbon oro ẹdude uwem ẹkekem ye ifiọk Bible ẹbọhọ mme nsunsu ekikere, mme nsunsu ukpepn̄kpọ, ye unana ifiọk oro akarade uwem ediwak miliọn owo. Ke uwụtn̄kpọ, ndifiọk akpanikọ aban̄ade ukpọn̄ anam nnyịn ibọhọ ndịk ekededi nte ke mme akpan̄kpa ẹkeme ndinọ nnyịn unan m̀mê nte ke mbonima nnyịn oro ẹkekpan̄ade ke ẹbọ ndutụhọ. (Ezekiel 18:4) Ndifiọk akpanikọ aban̄ade ndiọi angel an̄wam nnyịn ndifep mme n̄kpọndịk ubụpekpo. Ukpepn̄kpọ ediset ke n̄kpa ọnọ mbon oro ẹtabade mbonima ke n̄kpa ndọn̄esịt. (John 11:25) Mme ntịn̄nnịm ikọ Bible ẹnam nnyịn ifiọk ini emi nnyịn idude ẹnyụn̄ ẹnam nnyịn inyene mbuọtidem ke un̄wọn̄ọ Abasi kaban̄a ini iso. Mmọ n̄ko ẹsọn̄ọ idotenyịn nnyịn ndidu uwem ke nsinsi.
13. Didie ke ndinam Ikọ Abasi enyene ufọn ọnọ nnyịn ke n̄kan̄ eke ikpọkidem?
13 Mme edumbet Abasi ke Bible ẹkpep nnyịn ndidu uwem ke usụn̄ oro adade mme ufọn eke ikpọkidem ọsọk nnyịn. Ke uwụtn̄kpọ, nnyịn imekpep ndifep mme edinam oro ẹsabarede ikpọkidem nnyịn, utọ nte edida un̄wọn̄ ye edida n̄kpọsọn̄ ibọk eken ke idiọk usụn̄. Nnyịn imetre ebeubọk edin̄wọn̄ ọkpọsọn̄ mmịn. (2 Corinth 7:1) Ndinịm mme ibet ido uwem Abasi ekpeme nnyịn ọbiọn̄ọ mme udọn̄ọ ẹmende ẹto idan̄. (1 Corinth 6:18) Ke ndinam item Abasi oro ọdọhọde ete ifep ima okụk, nnyịn ibiatke ifụre ekikere nnyịn, nte ediwak owo ẹnamde, ke ndibịne inyene. (1 Timothy 6:10) Mme ufọn ewe ke n̄kan̄ eke ikpọkidem ke afo enyene ke ntak edida Ikọ Abasi nsịn ke edinam?
14. Nso odudu ke edisana spirit enyene ke uwem nnyịn?
14 Edieke nnyịn idude uwem ekekem ye Ikọ Abasi, nnyịn iyọbọ edisana spirit Jehovah. Iyọkọri edu ebietde eke Christ, oro ẹdade utọ eti edu nte mbọm ẹdiọn̄ọ. (Ephesus 4:24, 32) Spirit Abasi n̄ko ayanam nnyịn ision̄o mme mbun̄wụm esie—ima, idatesịt, emem, ime, mfọnido, eti ido, edinam akpanikọ, ifụre ifụre ido, ye mfara ke idem. (Galatia 5:22, 23) Mme edu emi ẹyenam inyene eti itie ebuana ye mbon en̄wen, esịnede mbonubon. Nnyịn iyenyene odudu esịtidem oro edin̄wamde nnyịn ndiyọ n̄kpọsọn̄ idaha ye uko. Nte afo omokụt nte edisana spirit anamde uwem fo enyene se ọwọrọde?
15. Nte nnyịn idude uwem ke n̄kemuyo ye uduak Abasi, didie ke nnyịn ibọ ufọn?
15 Nte nnyịn idude uwem ke n̄kemuyo ye uduak Abasi, nnyịn imọsọn̄ọ itie ebuana nnyịn ye enye. Nnyịn imenen̄ede inịm ke akpanikọ ite ke enye ọfiọk onyụn̄ ama nnyịn. Nnyịn imekpep ito ifiọk n̄kpọntịbe nte ke enye esinọ nnyịn ibetedem ke n̄kpọsọn̄ ini. (Psalm 18:18) Nnyịn imokụt nte ke enye esinen̄ede akpan̄ utọn̄ ke mme akam nnyịn. (Psalm 65:2) Nnyịn imedi idiberi edem ke ndausụn̄ esie, inyenede mbuọtidem nte ke oro ọyọnọ nnyịn ufọn. Ndien nnyịn imenyene utịbe utịbe idotenyịn nte ke edikem ini Abasi ayada mme anam-akpanikọ ikọt esie esịm mfọnmma onyụn̄ ọnọ mmọ enọ esie edide nsinsi uwem. (Rome 6:23) Mbet oro James ekewet ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Ndi afo omokụt nte itie ebuana fo ye Jehovah ọsọn̄ọde nte afo asan̄ade ekpere enye?
N̄kpọuto Oro Mînyeneke Mbiet
16. Mme ukpụhọde ewe ke ndusụk mme Christian akpa isua ikie ẹkenam?
16 Paul ama eti mme Christian akpa isua ikie oro ẹkeyetde aran ke spirit ete ke ini kiet ko ndusụk mmọ ẹkedi mbon use, mme esịn efịbe, mme adan̄ ukemuduot, mme inọ, mme esịn esịt ke n̄kpọ owo, mme akpa mmịn, mbon idiọk inua, ye mme akan owo ubọk. (1 Corinth 6:9-11) Akpanikọ Bible ama an̄wam mmọ ẹnam mme akpan ukpụhọde; ẹma ‘ẹyet mmọ ẹsana.’ Domo ndikere nte uwem fo ekpetiede ke afo mûkpekpepke mme akpanikọ Bible emi ẹsiode owo ke ufụn. Ke akpanikọ, akpanikọ edi n̄kpọuto oro mînyeneke mbiet ndomokiet. Nnyịn ikop inemesịt didie ntem nte ke Jehovah esinyene nneme ye nnyịn!
17. Didie ke ẹbọk Mme Ntiense Jehovah ke n̄kan̄ eke spirit ke mme mbono esop Christian?
17 Ke adianade do, kere ban̄a edidiọn̄ oro nnyịn inyenede ke itie nditọete nnyịn oro ẹtode nsio nsio orụk. “Asan̄autom emi anamde akpanikọ, onyụn̄ enyenede ọniọn̄” ọnọ udia eke spirit ke edikem ini, esịnede Bible, mme magazine, ye mme n̄wed eken ke ediwak usem. (Matthew 24:45-47) Ke mme mbono esop ke isua 2000, Mme Ntiense Jehovah ke ediwak idụt ẹma ẹdụn̄ọde mme akpan n̄kpọ ẹtode akpan n̄wed itiaita ke N̄wed Abasi Usem Hebrew. Mmọ ẹma ẹtie ẹkere uwem owo 40 ke Bible oro ẹnemede ke Insight on the Scriptures. Mmọ ẹma ẹneme n̄wed Akakan Owo Oro Akanam Odude Uwem n̄kpọ nte mbahade kiet ke itie inan̄ ẹnyụn̄ ẹkpere ndikụre n̄wed Nọ Ntịn̄enyịn ke Prọfesi Daniel! Ẹma ẹneme mme udiana ibuotikọ 36 ke magazine Enyọn̄-Ukpeme ye ibuotikọ ukpepn̄kpọ 52. N̄ko-n̄ko, ẹma ẹda nsiondi Utom Obio Ubọn̄ Nnyịn 12 ye utịn̄ikọ an̄wa eke urua ke urua ke nsio nsio ibuot nneme Bible ẹbọk ikọt Jehovah. Nso akpakịp ifiọk eke spirit ke ẹkenam odu ntem!
18. Ke mme usụn̄ ewe ke ẹn̄wam nnyịn ke esịt esop Christian?
18 Ke ofụri ererimbot, se iwakde ibe esop 91,000 ẹnọ un̄wam ye nsịnudọn̄ ẹbe ke mme mbono esop. Nnyịn n̄ko imesidara un̄wam mme ekemmọ Christian oro ẹnyịmede ndin̄wam nnyịn ke n̄kan̄ eke spirit. (Ephesus 4:11-13) Ih, nnyịn imọbọ ufọn akamba akamba ke ndibọ ifiọk akpanikọ. Edi n̄kpọ idatesịt ndifiọk Jehovah nnyụn̄ nnam n̄kpọ esie. Mme ikọ andiwet psalm emi ẹdi akpanikọ didie ntem: “Ọfọfọn ọnọ mbon eke Jehovah edide Abasi mmọ”!—Psalm 144:15.
Nte Afo Emeti?
• Jehovah ekenyene nneme ye mmanie mbemiso eyo mme Christian?
• Didie ke un̄wana eke spirit ekenen̄ede ayama ke akpa isua ikie? ke eyomfịn?
• Mme edidiọn̄ ewe ẹsụn̄ọ ẹto edidu uwem ekekem ye ifiọk Jehovah?
• Ntak emi nnyịn idatde esịt ke ifiọk Abasi?
[Mme Mbụme Ukpepn̄kpọ]
[Mme ndise ke page 8, 9]
Jehovah ama etịn̄ uduak esie ọnọ Moses, Noah, ye Abraham
[Ndise ke page 9]
Ke eyo nnyịn, Jehovah esịn un̄wana ke Ikọ esie
[Mme ndise ke page 10]
Kere ban̄a edidiọn̄ oro nnyịn inyenede ke itie nditọete nnyịn oro ẹtode nsio nsio orụk!