Mme N̄kpọ Oro Owo Mîkemeke Ndifre

KPUKPRU isua, Mme Ntiense Jehovah ẹsisop idem ke n̄kpri ye ikpọ mbono Christian ke nsio nsio idụt emi mmọ ẹdude. Mmọ ẹsinam emi man ẹbọ item ẹnyụn̄ ẹdara itie ebuana oro ọbọpde-bọp ke n̄kan̄ eke spirit. Edi mme ikpehe efen ke mboho mmọ ẹkeme n̄ko ndinọ isenowo n̄kpọ oro mmọ mîkemeke ndifre.

Ke uwụtn̄kpọ, ke July 1999, ediwak tọsịn Mme Ntiense ke Mozambique ẹma ẹsop idem kaban̄a mme inem inem Mbono District “Ntịn̄nnịm Ikọ Abasi” ke usen ita. Akpa ini emi ediwak ke otu mme andidụk ẹkedụkde akamba mbono ekedi oro. Idịghe se mmọ ẹkekopde ẹto mbot utịn̄ikọ kpọt okotụk mmọ edi se mmọ ẹkekụtde ama otụk mmọ n̄ko.

N̄kpọ kiet emi ẹketịn̄de ke Ufọk Mbono Maputo ekedi: “Akananam n̄kwe utọ ediye itie ntem ke ofụri uwem mi! Suọp ye ukụtiso ẹma ẹdu ke mme itie uken̄idem, ndien mme itie uken̄idem ẹma ẹkam ẹsio ndinem ufuọn̄. N̄kann̄kụk ẹketie emem emem ye unana uyom nditọwọn̄ emi ẹn̄wanade en̄wan. Ndien owo ikonụkke owo! Mma n̄kụt mme okop-inemesịt n̄kparawa owo nte ẹnemede mme nneme oro ẹnọde nsịnudọn̄. Nte kpukpru owo ẹkesịnede n̄kpọ ediye ediye ama otụk mi n̄ko. Ini efen, nyada nditọ mi ndi nyonyụn̄ nnam ebe mi enyịme ke ana nnyịn idụk mbono emi.”

Ih, ẹdiọn̄ọ edinam akpanikọ, nsọn̄ọnda, ye usanaidem Mme Ntiense Jehovah. Ntak emi Mme Ntiense ẹdide isio? Koro mmọ ẹnen̄ede ẹdomo ndida se mmọ ẹkpepde ẹto Bible nsịn ke edinam. Ntak mûsopke idem ye mmọ isua emi ke ikpọ mbono m̀mê ke mme mbono esop mmọ eke urua ke urua ke Ufọkmbono Obio Ubọn̄ n̄kann̄kụk unyụn̄ ukụt ke idemfo?

[Ndise ke page 32]

ZAMBIA

[Ndise ke page 32]

KENYA

[Ndise ke page 32]

MOZAMBIQUE