Ẹdi Mme Anamutom Idọk Emi Ẹkopde Idatesịt!
Ẹdi Mme Anamutom Idọk Emi Ẹkopde Idatesịt!
“Idọk okpon, edi mme anam-utom iwakke. Ẹben̄e ndien Enyene-idọk ẹte, Enye osio mme anam-utom ọdọn̄ ẹdi ke idọk Esie.”—MATTHEW 9:37, 38.
1. Nso in̄wam nnyịn ndika iso nnam uduak Abasi?
KE INI nnyịn itide usen emi nnyịn ikanade baptism nte kiet ke otu mme asan̄autom Jehovah, edide oro eketịbe ke isua ifan̄ m̀mê ediwak isua emi ẹkebede, ekeme nditie nnyịn nte ekedi n̄kpọn̄. Nditoro Jehovah ama akabade edi akpan ubak uwem uyakidem nnyịn. Nte nnyịn ikedepde ifet ndin̄wam mbon efen ẹkop ndien eyedi ẹnyịme etop Obio Ubọn̄, ndinam utom ke idatesịt nnọ Jehovah ekedi akpan n̄kpọ oro ebehede nnyịn. (Ephesus 5:15, 16) Tutu esịm mfịn, nnyịn imokụt nte ke mme usen ẹsisọp ke ini ‘iyọhọde kpukpru ini ke utom Ọbọn̄.’ (1 Corinth 15:58) Okposụkedi nnyịn isisobode mme mfịna, idatesịt oro nnyịn inyenede ke ndinam uduak Jehovah ayan̄wam nnyịn ndika iso.—Nehemiah 8:10.
2. Nso itịp isịn ke idatesịt oro ikopde ke ndamban̄a utom idọk?
2 Nte mme Christian, nnyịn ibuana ke ndamban̄a utom idọk. Jesus Christ ekemen editan̄ mme owo mbok kaban̄a nsinsi uwem odomo ye utom idọk. (John 4:35-38) Sia nnyịn ibuanade ke utọ utom idọk oro, edidi n̄kpọ nsịnudọn̄ ndidụn̄ọde idatesịt oro mme akpa Christian oro ẹkedide mme anamutom idọk ẹkenyenede. Nnyịn iyodụn̄ọde n̄kpọ ita oro ẹtịpde ẹsịn ke nnyịn ndikop idatesịt ke utom idọk mfịn. Mmọ emi ẹdi (1) etop idotenyịn nnyịn, (2) unen oro ikụtde ke ediyom nnyịn, ye (3) emem emem edu nnyịn nte mme anamutom idọk.
Ẹsio Ẹdọn̄ nte Mme Anamutom Idọk
3. Mme akpa anditiene Jesus ẹkekop idatesịt ke nso?
3 Uwem mme akpa anamutom idọk—akpan akpan mme anam-akpanikọ apostle Jesus 11—okokpụhọde didie ntem usen oro ke 33 E.N. ke ini mmọ ẹkedọkde obot kiet ke Galilee ndikosobo ye Christ oro ẹkenamde eset ke n̄kpa! (Matthew 28:16) Ekeme ndidi “nditọ-ete emi ẹwakde ẹbe owo ikie ition” ẹma ẹdu do. (1 Corinth 15:6) Mmọ ẹma ẹti utom oro Jesus ọkọdọn̄de mmọ. Enye ọkọdọhọ mmọ ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Kpa ye ọkpọsọn̄ ukọbọ, mmọ ẹma ẹnen̄ede ẹkop idatesịt ke utom idọk oro nte mmọ ẹkekụtde nte ẹtọn̄ọde mme esop mme anditiene Christ ke nsio nsio itie. Nte ini akakade, ‘ẹma ẹkwọrọ gospel emi ẹnọ kpukpru owo ke idak ikpa-enyọn̄.’—Colossae 1:23; Utom 1:8; 16:5.
4. Ke mme idaha ewe ke ẹkesio mme mbet Christ ẹdọn̄?
4 Ke ntọn̄ọ ntọn̄ọ ini utom ukwọrọikọ esie ke Galilee, Jesus ama okot apostle 12 onyụn̄ osio mmọ ọdọn̄ ete ẹketan̄a akpan akpan ẹte: “Ubọn̄ Heaven ke ekpere.” (Matthew 10:1-7) Enye ke idemesie ama “asan̄a akanade kpukpru obio ye obio-in̄wan̄ [mbon Galilee], ekpep owo n̄kpọ ke mme synagogue mmọ, onyụn̄ ọkwọrọ gospel Ubọn̄ Heaven, onyụn̄ anam kpukpru orụk udọn̄ọ ye kpukpru orụk mmemidem ẹkụre.” Jesus ama atua otuowo mbọm “koro mmọ [ẹkedude] ke nnanenyịn ẹnyụn̄ ẹsuanade, nte erọn̄ eke mînyeneke andikpeme.” (Matthew 9:35, 36) Ke otụkde enye ntotụn̄ọ ntotụn̄ọ, enye ndien ama ọdọhọ mme mbet esie ete: “Ke akpanikọ idọk okpon, edi mme anam-utom iwakke. Ẹben̄e ndien Enyene-idọk [Jehovah Abasi] ẹte, Enye osio mme anam-utom ọdọn̄ ẹdi ke idọk Esie.” (Matthew 9:37, 38) Jesus ama okụt ke ẹyom mme anamutom idọk n̄ko ke Judea ke ini akayakde ọfiọn̄ itiokiet kpọt enye ndikụre utom esie eke isọn̄. (Luke 10:2) Ke idaha mbiba, enye ama osio mme anditiene enye ọdọn̄ nte mme anamutom idọk.—Matthew 10:5; Luke 10:3.
Etop Idotenyịn Nnyịn
5. Nso orụk etop ke nnyịn itan̄a?
5 Nte mme asan̄autom Jehovah eyomfịn, nnyịn ke idatesịt imeyere ikot oro ẹkotde mme anamutom idọk. N̄kpọ kiet oro enen̄erede etịp esịn ke idatesịt nnyịn edi nte ke imada etop idotenyịn isọk mbon iduọesịt ye mbon mfụhọ. Nte mme mbet Jesus akpa isua ikie, nso ifet ke nnyịn inyene ntem nditan̄a eti mbụk—ata etop idotenyịn—nnọ mbon oro “ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme”!
6. Mme apostle ẹkebuana ke nso utom ke akpa isua ikie?
6 Etisịm ufọt ufọt akpa isua ikie, apostle Paul ọkọyọhọ ye utom edikwọrọ eti mbụk. Ndien utom idọk esie ama enen̄ede enyene uforo, koro ke ewetde n̄wed ọnọ ẹsọk mme Christian ke Corinth ke n̄kpọ nte 55 E.N., enye ama ọdọhọ ete: “Nditọ-ete mi, mmanam mbufo ẹfiọk gospel oro n̄kọkwọrọde nnọ mbufo, emi mbufo ẹkenyụn̄ ẹbọde, ẹnyụn̄ ẹsọn̄ọde ẹda ke esịt.” (1 Corinth 15:1) Mme apostle ye mme akpa Christian eken ẹkedi ifịk ifịk mme anamutom idọk. Okposụkedi Bible mîsianke nnyịn m̀mê apostle ifan̄ ẹkebọhọ mme akpan n̄kpọntịbe oro ẹkedade ẹkesịm nsobo Jerusalem ke 70 E.N., nnyịn imọfiọk ite ke apostle John ke okosụk ọkwọrọ ikọ ke n̄kpọ nte isua 25 ke ukperedem.—Ediyarade 1:9.
7, 8. Ewe etop idotenyịn ke mme asan̄autom Jehovah ẹtan̄a usọp usọp idahaemi ẹkan nte akanam ẹtan̄ade?
7 Ekem mme ọkwọrọ ederi Christendom, kpa owo nsọn̄ibuot “eke edide ata abiat-ibet,” ẹma ẹkara ke ediwak isua ikie. (2 Thessalonica 2:3) Nte ededi, ke ekperede utịt ọyọhọ isua ikie 19, mbon oro ẹkeyomde ndidu uwem ekekem ye akani Ido Ukpono Christ ẹma ẹda etop idotenyịn ẹdi, ẹtan̄ade Obio Ubọn̄. Ke akpanikọ, ọtọn̄ọde ke akpa nsiondi esie (July 1879), ibuotikọ magazine emi esịne mme ikọ oro “Editan̄a Edidu Christ,” “Editan̄a Obio Ubọn̄ Christ,” m̀mê “Ọnọ Ntọt Obio Ubọn̄ Jehovah.”
8 Ẹma ẹwụk Obio Ubọn̄ Abasi eke heaven ke ubọk Jesus Christ ke 1914, ndien idahaemi nnyịn imatan̄a etop idotenyịn usọp usọp akan nte akanam ẹtan̄ade. Ntak-a? Koro idiọk editịm n̄kpọ emi odude ke emi ndisịm utịt usọp usọp odu ke otu mme edidiọn̄ ukara Obio Ubọn̄. (Daniel 2:44) Ewe etop ọkpọfọn akan oro? Ndien ewe n̄kponn̄kan idatesịt ke nnyịn ikeme ndinyene n̄kan ndibuana ke nditan̄a Obio Ubọn̄ mbemiso “akwa ukụt” ọtọn̄ọde?—Matthew 24:21; Mark 13:10.
Ediyom Oro Okụtde Unen
9. Nso item ke Jesus ọkọnọ mme mbet esie, ndien didie ke mme owo ẹkenam n̄kpọ ẹban̄a etop Obio Ubọn̄?
9 N̄kpọ efen oro etịpde esịn ke idatesịt nnyịn nte mme anamutom idọk edi unen oro nnyịn ikụtde ke ndiyom mbon oro ẹkabarede ẹdi mme mbet ẹnyụn̄ ẹdianade ye nnyịn ke utom idọk. Ko ke edem ke 31-32 E.N., Jesus ama eteme mme mbet esie ete: “Ndien obio ekededi m̀mê obio-in̄wan̄ ekededi eke mbufo ẹdidụkde, ẹyom owo eke odotde ke esịt.” (Matthew 10:11) Idịghe kpukpru owo ẹkedot, nte usụn̄ emi mmọ ẹkenamde n̄kpọ ẹban̄a etop Obio Ubọn̄ owụtde. Nte ededi, mme mbet Jesus ẹma ẹkwọrọ eti mbụk ifịk ifịk ke ebiet ekededi oro mme owo ẹkedude.
10. Didie ke Paul okoyom mbon oro ẹdotde?
10 Ke Jesus ama akakpa onyụn̄ eset ke n̄kpa, ediyom mbon oro ẹdotde ama aka iso ifịk ifịk. Paul ama ebuen ikọ ye mme Jew ke synagogue mmọ ọkọrọ ye mme owo oro ẹkedude ke an̄waurua ke Athens. Ke ini enye ọkọnọde ikọ ntiense ke Areopagus ke obio Greece oro, “ndusụk mmọ ẹyịre enye ẹnyụn̄ ẹnịm ke akpanikọ; Dionysius owo Areopagus, ye n̄wan emi ekerede Damaris, ye mmọ efen ẹtiene ẹdu ke otu mmọ oro.” Ebiet ekededi oro Paul akakade, enye ekedi uwụtn̄kpọ n̄ko ke ndikwọrọ ikọ ‘an̄wa-an̄wa ye ke ufọk ke ufọk.’—Utom 17:17, 34; 20:20.
11. Mme usụn̄ ukwọrọikọ ewe ke ẹkeda ke ediwak isua ko ke edem?
11 Ke akpatre iduọk isua ifan̄ eke ọyọhọ isua ikie 19, mme Christian oro ẹyetde aran ẹma ẹbuana uko uko ke ndiyom mbon oro ẹdotde. Ke ibuotikọ oro “Ẹyet Aran Man Ẹkwọrọ Ikọ,” Zion’s Watch Tower eke July/August 1881 ọkọdọhọ ete: “Ke ẹkwọrọ eti mbụk . . . ‘ẹnọ mbon nsụkidem’—mbon oro ẹnyịmede ẹnyụn̄ ẹkemede ndikop, man idem Christ, kpa nsan̄a mme ada udeme nnyene, okpoto ke mmọ.” Mme anamutom idọk Abasi ẹma ẹsiwak ndisobo ye mme owo nte ẹnyọn̄ọde ufọkabasi ẹnyụn̄ ẹnọ mmọ mme tract oro ẹdọn̄ọde mme etop N̄wed Abasi oro ẹketịmde man ẹdemede udọn̄ mbon oro ẹdotde. Ke ama eketịm odụn̄ọde nte usụn̄ unọ ikọ ntiense emi enyenede uforo, Enyọn̄-Ukpeme (Ikọmbakara) eke May 15, 1903, ama esịn udọn̄ ọnọ mme anamutom idọk ndisuan mme tract “ke ufọk ke ufọk, ke usenubọk Sunday.”
12. Didie ke nnyịn inam utom ukwọrọikọ nnyịn enen̄ede enyene uforo? Nam an̄wan̄a.
12 Ke mme isua ndondo emi, nnyịn imatat utom ukwọrọikọ nnyịn ebe ke ndika mbịne mme owo ke mme itie efen ke ẹsiode ufọk mmọ ẹfep. Emi enen̄ede enyene uforo ke mme idụt oro mme idaha ndutịm uforo ye edibịne unọ idem nduọkodudu ẹsinamde mme owo ẹkûdu ke ufọk mmọ ke ini emi nnyịn isiwakde ndiwaha. Ke ini Ntiense kiet ke England ye nsan̄a esie ẹkekụtde nte isenowo ẹsisan̄ade ke bọs kpukpru ini ẹnyọn̄ọ udia-uwem ke mbenesụk, mmọ ẹma ẹnyene uko ndidụk mme bọs oro nnyụn̄ nnọ mme akaisan̄ Enyọn̄-Ukpeme ye Awake! Ke ọfiọn̄ kiet, mmọ ẹma ẹsuan idem 229. Mmọ ẹtọt ẹte: “Nnyịn ikopke ndịk ndinọ ikọ ntiense ke mbenesụk, ke efakutom mbubehe, m̀mê ndikop ndịk mban̄a n̄kpọ-ata efen ekededi oro nnyịn ikemede ndisobo koro nnyịn imọfiọk ite ke Jehovah odu ye nnyịn kpukpru ini.” Mmọ ẹma ẹtọn̄ọ afan̄ magazine, ẹtọn̄ọ ukpepn̄kpọ Bible, ndien mmọ mbiba ẹbuana ke utom usiakusụn̄ unọ un̄wam.
13. Oyom inam nso ukpụhọde idahaemi ke utom ukwọrọikọ nnyịn ke ndusụk itie?
13 Nte ediyom mbon oro ẹdotde akade iso, ekeme ndiyom itịm idụn̄ọde utom ukwọrọikọ nnyịn ke ndusụk itie. Okposụkedi ediwak Ntiense nte ido edide ẹsibuanade ke ukwọrọikọ eke ufọk ke ufọk ke usenubọk Sunday, ke ndusụk itie mmọ ẹkụt nte ke ndibabak n̄ka ufọk owo itịmke inyene ufọn koro ekeme ndidi mme enyeneufọk isibakke idemede idap. Ebede ke ndinam ukpụhọde ke ndutịm mmọ, ediwak Ntiense ẹsika ke uwemeyo, eyedi ke mbono esop Christian ama akasuana. Ndien ediyom emi enen̄ede on̄wụm mfri. Isua oko ibat mme anditan̄a Obio Ubọn̄ ke ofụri ererimbot ama ọdọk ke mbahade 2.3 eke ikie. Emi ada ukpono ọsọk Enyene-idọk onyụn̄ ada idatesịt ọsọk nnyịn.
Ẹka Iso Nditie Emem Emem ke Utom Idọk
14. Nnyịn isida nso edu ikwọrọ etop nnyịn, ndien ntak-a?
14 Ntak efen kaban̄a idatesịt nnyịn enyene ebuana ye emem emem edu oro nnyịn inyenede ke utom idọk. Jesus ọkọdọhọ ete: “Ke ini mbufo ẹdụkde ke ufọk, ẹnọ ekọm. Ndien edieke ufọk oro odotde, yak emem mbufo odoro ke esịt.” (Matthew 10:12, 13) Ekọm usem Hebrew oro ye ikọ oro ebietde enye ke usem Greek eke Bible ẹnọ ekikere ẹban̄a ‘Ọfọn ọnọ fi.’ Edu emi esikara usụn̄ nte nnyịn inamde n̄kpọ ye mme owo ke ini ikwọrọde eti mbụk. Idotenyịn nnyịn edi nte ke mmọ ẹyenyịme etop Obio Ubọn̄. Mbon oro ẹnyịmede ẹnyene idotenyịn edifiak nnam emem ye Abasi nte mmọ ẹkabarede esịt ke mme idiọkn̄kpọ mmọ, ẹfiakde edem, ẹnyụn̄ ẹnamde uduak esie. Ekem, emem ye Abasi ayada esịm nsinsi uwem.—John 17:3; Utom 3:19; 13:38, 48; 2 Corinth 5:18-20.
15. Didie ke nnyịn ikeme ndika iso ntie emem emem ke ini ẹnamde n̄kpọ idiọk idiọk ye nnyịn ke utom ukwọrọikọ nnyịn?
15 Didie ke nnyịn ikeme ndika iso ntie emem emem ke ini isobode mbon oro ẹnamde n̄kpọ idiọk idiọk ye nnyịn? Jesus eketeme ete: “Edieke ufọk oro mîdotke, yak emem mbufo afiak etiene mbufo.” (Matthew 10:13) Mbụk Luke aban̄ade edisio mbet 70 ndọn̄ esịne ikọ Jesus emi: “Edieke eyen emem odude do, emem mbufo oyodoro enye ke idem: edi edieke eyen emem mîdụhe, emem mbufo ayafiak etiene mbufo.” (Luke 10:6) Ke ini nnyịn ikwọrọde eti mbụk inọ mme owo, nnyịn isinam ntre ke emem ye ke eti edu. Enyeneufọk ndibọrọ ke usụn̄ owụtde unana udọn̄, utọk, m̀mê nditịn̄ ikọ oro mîwụtke mfọnido n̄kukụre anam etop emem nnyịn ‘afiak etiene nnyịn.’ Edi ndomokiet ke otu emi ibiatke emem nnyịn, kpa mbun̄wụm edisana spirit Jehovah.—Galatia 5:22, 23.
Eti Utịtmbuba Mme Anamutom Idọk
16, 17. (a) Nso idi utịtmbuba nnyịn ke ini inamde mfiakn̄ka? (b) Didie ke nnyịn ikeme ndin̄wam mbon oro ẹnyenede mme mbụme Bible?
16 Nte mme anamutom idọk, nnyịn imokop idatesịt ndinyene udeme ke editan̄ mme owo mbok kaban̄a nsinsi uwem. Ndien nnyịn isikop idatesịt didie ntem ke ini owo emi nnyịn ikwọrọde ikọ inọ anamde n̄kpọ nte ọfọnde, oyomde ndikpep mme n̄kpọ efen efen, onyụn̄ owụtde idem nte idide “eyen emem”! Eyedi enye enyene ediwak mbụme Bible ndien nnyịn ikemeke ndibọrọ kpukpru ini kiet. Sia mîdotke nditie mbịghi ke akpa ediwaha, nso ke ikeme ndinam? Nnyịn imekeme ndinịm utọ utịtmbuba oro ẹkenọde ekikere ẹban̄a ke n̄kpọ nte isua 60 emi ẹkebede.
17 “Kpukpru Mme Ntiense Jehovah ẹkpenyene ndiben̄e idem ndida Bible nnịm ukpepn̄kpọ.” Ikọ oro okodu ke ọyọhọ eboho ita ke udịm udịm n̄kpri n̄weditem Model Study oro ẹkesion̄ode ọtọn̄ọde ke 1937 esịm 1941. Enye ama aka iso ọdọhọ ete: “Kpukpru mme asuanetop [Obio Ubọn̄] ẹkpenyene ndisịn ifịk ke kpukpru usụn̄ nte mmọ ẹkekeme ndin̄wam mbon oro ẹnyịmede oro ẹnyenede udọn̄ ke etop Obio Ubọn̄. Ẹkpenyene ndika uyereikot [mfiakn̄ka] nnọ mme owo emi, ẹbọrọde nsio nsio mbụme mmọ . . . , ndien ekem ẹtọn̄ọ ukpepn̄kpọ . . . usọp usọp nte mbufo ẹkekeme.” Ih, utịtmbuba nnyịn ke ini inamde mfiakn̄ka edi nditọn̄ọ ukpepn̄kpọ Bible nnyụn̄ nnịm enye kpukpru ini. * Ufan ufan edu ye ima ima edikere mban̄a owo oro enyenede udọn̄ oyonụk nnyịn nditịm idem mfọn mfọn nnyụn̄ nnịm ukpepn̄kpọ oro uforo uforo.
18. Didie ke nnyịn ikeme ndin̄wam mbufa owo ẹkabade ẹdi mme mbet Jesus Christ?
18 Ye un̄wam n̄wed Ifiọk Oro Adade Osịm Nsinsi Uwem ye utọ ndiye uduot n̄kpri n̄wed nte Nso ke Abasi Oyom Oto Nnyịn?, nnyịn imekeme ndinịm mme ukpepn̄kpọ Bible oro ẹnyenede uforo ndien ke ntre imekeme ndibuana ke ndin̄wam mbufa mbon oro ẹnyenede udọn̄ ẹkabade ẹdi mme mbet. Nte nnyịn idomode ndikpebe Akwa Andikpep, Jesus Christ, eyedi mme utọ nditọ ukpepn̄kpọ Bible oro n̄ko ẹyekpep n̄kpọ ẹto emem emem, idara idara edu nnyịn, ifịk nnyịn, ye ukpono oro nnyịn inyenede kaban̄a mme idaha ye ndausụn̄ Jehovah. Ke ini ibọrọde mbufa owo mme mbụme mmọ, ẹyak nnyịn n̄ko inam se ededi emi nnyịn ikemede ndikpep mmọ nte mmọ ẹkemede ndibọrọ mbon oro ẹbụpde mmọ mbụme. (2 Timothy 2:1, 2; 1 Peter 2:21) Nte mme anam ndamban̄a utom idọk, ke akpanikọ nnyịn imekeme ndikop idatesịt nte ke ẹma ẹnịm ukpepn̄kpọ Bible 4,766,631 ke ofụri ererimbot ke ẹbaharede ukem ukem ke isua utom emi ekebede. Nnyịn ikop idatesịt akpan akpan edieke nnyịn ke idem nnyịn isịnede ke otu mme anamutom idọk oro ẹbuanade ke edikpep owo Bible.
Ẹka Iso Ndikop Idatesịt ke Idọk
19. Ntak emi nti ntak ẹkedude ndikop idatesịt ke idọk ke ini utom ukwọrọikọ Jesus ye esisịt ini ke oro ebede?
19 Nti ntak ẹma ẹdu ndikop idatesịt ke idọk ke ini utom ukwọrọikọ Jesus ye esisịt ini ke oro ebede. Ediwak owo ẹma ẹnam n̄kpọ nte ọfọnde ẹban̄a eti mbụk ini oro. Idara ama enen̄ede okpon ke Pentecost 33 E.N., koro n̄kpọ nte owo 3,000 ẹma ẹnyịme ndausụn̄ Peter ini oro, ẹbọ edisana spirit Jehovah, ẹnyụn̄ ẹkabade ẹdi ubak idụt Abasi edide Israel eke spirit. Ke akpanikọ, ibat mmọ ama aka iso ndikọri, ndien idara ama okpon nte ‘Jehovah akadade mmọ emi ẹnyanyan̄a adian ye mmọ ke usen ke usen.’—Utom 2:37-41, 46, 47; Galatia 6:16; 1 Peter 2:9.
20. Nso inọ nnyịn akwa idatesịt ke utom idọk nnyịn?
20 Ke ini oro, ntịn̄nnịm ikọ Isaiah ama osu: “Afo [Jehovah] amanam idụt ọtọt, amanam idatesịt esie okpon: mmọ ẹdat esịt ke iso fo, kpa nte ẹdatde esịt ke ini ukpen̄e, kpa nte ẹbrede ke ini mmọ ẹdemede mbụme.” (Isaiah 9:3) Okposụkedi nnyịn idahaemi ikụtde ‘akamba idụt’ oro ẹyetde aran oro ekperede ndiyọhọ, idatesịt nnyịn okpon nte nnyịn ikụtde nte ibat mme anamutom idọk efen ọkọride ke isua ke isua.—Psalm 4:7; Zechariah 8:23; John 10:16.
21. Nso ke nnyịn idineme ke ibuotikọ oro etienede?
21 Ke akpanikọ nnyịn imenyene nti ntak ndika iso n̄kop idatesịt ke utom idọk. Etop idotenyịn nnyịn, nnyịn ndiyom mbon oro ẹdotde, ye emem emem edu nnyịn—kpukpru ẹda idatesịt ẹsọk nnyịn nte mme anamutom idọk. Edi, mmọ ẹnam ediwak owo ẹnam n̄kpọ idiọk idiọk ye nnyịn. Emi ama etịbe ọnọ Apostle John. Ẹma ẹkọbi enye ke isuo Patmos “ke ntak ikọ Abasi, ye [editie] ntiense mban̄a Jesus.” (Ediyarade 1:9) Didie, ndien, ke nnyịn ikeme ndika iso n̄kop idatesịt ke ini isobode ukọbọ ye ubiọn̄ọ? Nso idin̄wam nnyịn ndiyọ edu isọn̄esịt ediwak mbon oro nnyịn ikwọrọde ikọ inọ idahaemi? Udiana ibuotikọ nnyịn ọnọ un̄wam N̄wed Abasi ndida mbọrọ mme mbụme emi.
[Ikọ idakisọn̄]
^ ikp. 17 Ke akpa ẹkesinịm ukpepn̄kpọ ke mme itie emi mme otu oro ẹnyenede udọn̄ ẹkekemede ndisop idem. Nte ededi, ikebịghike ẹma ẹsinịm ukpepn̄kpọ n̄ko ẹnọ owo kiet kiet ye mme ubon.—Se Jehovah’s Witnesses—Proclaimers of God’s Kingdom, page 574, emi Mme Ntiense Jehovah ẹsiode.
Didie ke Afo Ọkpọbọrọ?
• Nso idi ndamban̄a utom idọk?
• Nso orụk etop ke nnyịn itan̄a?
• Ntak oro nnyịn ndiyom mme mbet okụtde unen?
• Didie ke nnyịn ikeme nditie emem emem ke utom idọk?
• Ntak emi nnyịn ikade iso ndikop idatesịt ke idọk?
[Mme Mbụme Ukpepn̄kpọ]
[Mme ndise ke page 12, 13]
Ndikwọrọ ikọ ke akpa isua ikie ye ke ọyọhọ isua ikie 20
[Mme ndise ke page 13]
Ukem nte Paul, mme anamutom idọk eyomfịn ẹdomo ndisịm mme owo ke kpukpru ebiet
[Ndise ke page 13]
Da eti edu kwọrọ eti mbụk