Ẹka Iso ke Utom Idọk!
Ẹka Iso ke Utom Idọk!
“Mmọ eke ẹtọde n̄kpọ ke mmọn̄eyet ẹyekpen̄e ke idara.”—PSALM 126:5.
1. Ntak ‘ẹben̄ede Enyene-idọk ẹte, Enye osio mme anam-utom ọdọn̄’ mfịn?
KE Jesus Christ ama ọkọnyọn̄ ọyọhọ isan̄ ukwọrọikọ ita ke Galilee, enye ama asian mme mbet esie ete: “Idọk okpon, edi mme anam-utom iwakke.” (Matthew 9:37) Ukem idaha oro okodu ke Judea. (Luke 10:2) Sia oro ekedide ntre ke se ikperede ndisịm isua 2,000 emi ẹkebede, idaha etie didie mfịn? Ọfọn, ke isua utom emi ekebede, se ibede Mme Ntiense Jehovah 6,000,000 ẹma ẹka iso ke utom ndamban̄a idọk ke otu owo 6,000,000,000 oro ẹdude ke ererimbot, oro ediwak ke otu mmọ “ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme.” Ntre item Jesus oro “ẹben̄e ndien Enyene-idọk ẹte, Enye osio mme anam-utom ọdọn̄ ẹdi ke idọk Esie” enyene odudu mfịn nte ekenyenede ediwak isua ikie emi ẹkebede.—Matthew 9:36, 38.
2. Nso inam mme owo ẹdiọn̄ọ nnyịn?
2 Jehovah Abasi, kpa Enyene-idọk, ọmọbọrọ eben̄e ndisio mme anamutom efen efen ndọn̄. Ndien nso idatesịt ke edi ntem ndibuana ke utom idọk emi Abasi ọnọde ndausụn̄ mi! Okposụkedi nnyịn idide esisịt ke ibat ke ẹmende ẹdomo ye mme idụt, ererimbot ẹdiọn̄ọ nnyịn ke ntak edibuana nnyịn ifịk ifịk ke utom ukwọrọikọ Obio Ubọn̄ ye edinam mbet. Ke ediwak idụt ẹsiwak nditịn̄ mban̄a nnyịn ke ndutịm usuanetop. Edimia n̄kanika enyịnusụn̄ ke drama ekebe ndise ekeme ndinam ẹdọhọ ke Mme Ntiense Jehovah ẹdi oro. Ih, ẹtịm ẹdiọn̄ọ utom Christian nnyịn nte mme anamutom ndamban̄a idọk ke ọyọhọ isua ikie 21.
3. (a) Nnyịn isan̄a didie ifiọk ite ke ẹma ẹkụt utom ukwọrọikọ Obio Ubọn̄ akpa isua ikie? (b) Ntak emi nnyịn ikemede ndidọhọ nte ke mme angel ẹnọ nnyịn ibetedem ke utom ukwọrọikọ nnyịn?
3 Ererimbot ama okụt n̄ko utom ukwọrọikọ Obio Ubọn̄ akpa isua ikie onyụn̄ ọkọbọ mme anditan̄a eti mbụk. Ntem, apostle Paul ama ewet ete: “Osụk etie mi nte Abasi [okosio] nnyịn, mme apostle, enịm nte ukperedem ndise nte owo n̄kpa. Koro ẹma ẹnam nnyịn [mme apostle] ikabade idi n̄kpọ ndise inọ ererimbot ye mme angel ye owo.” (1 Corinth 4:9) Ukem ntre, nnyịn ndika iso nte mme anditan̄a Obio Ubọn̄ kpa ye ukọbọ anam ererimbot ẹdiọn̄ọ nnyịn onyụn̄ edi akpan n̄kpọ ọnọ mme angel. Ediyarade 14:6 ọdọhọ ete: “[Ami apostle John] n̄kụt angel en̄wen efefe ke ufọt enyọn̄, emi enyenede nsinsi gospel ete ikwọrọ inọ mmọ emi ẹdụn̄de ke isọn̄, ye kpukpru idụt ye esien ye usem ye obio.” Ih, mme angel ẹnọ nnyịn ibetedem ke utom ukwọrọikọ nnyịn—utom idọk nnyịn!—Mme Hebrew 1:13, 14.
“Ẹyesua Mbufo”
4, 5. (a) Nso item ke Jesus ọkọnọ mme mbet esie? (b) Ntak emi ‘ẹsuade’ mme asan̄autom Abasi mfịn?
4 Ke ini ẹkesiode mme apostle Jesus ẹdọn̄ nte mme anamutom idọk, mmọ ẹma ẹnam item oro enye ọkọnọde mmọ ete “ẹnyene ibuot nte urụkikọt, ẹnyụn̄ ẹfụre nte ibiom.” Jesus ama adian do ete: “Edi ẹkpeme idem ye owo; koro mmọ ẹyeyak mbufo ẹsịn ke ubọk mme esop, ndien ẹyemia mbufo ke mme synagogue mmọ; ẹyenyụn̄ ẹda mbufo ẹwọrọ ke iso mme andikara ye ndidem kaban̄a Mi, kpan̄ mbufo ẹdi ntiense ẹnọ mmọ ye mme Gentile. . . . Ndien kpukpru owo ẹyesua mbufo ke aban̄a enyịn̄ Mi: edi ẹyenyan̄a owo eke edimede ime tutu esịm akpatre.”—Matthew 10:16-22.
5 ‘Ẹsua nnyịn’ mfịn koro ‘ofụri ererimbot esịnede ke ubọk andidiọk,’ Satan kpa Devil, emi edide akwa asua Abasi ye ikọt Esie. (1 John 5:19) Mme asua nnyịn ẹkụt uforo eke spirit nnyịn edi ẹsịn ndinyịme nte ke Jehovah edi ntak. Mme andibiọn̄ọ ẹsikụt idara idara iso nnyịn oro etiede imam imam ke ini nnyịn ibuanade ke utom idọk ke idatesịt. Idem esikpa mmọ aban̄a edidianakiet nnyịn! Ke akpanikọ, mmọ ẹkeme ndinyịme emi mmen̄e mmen̄e ke ini mmọ ẹkade idụt efen ẹnyụn̄ ẹkụtde nte ke Mme Ntiense Jehovah do ẹnam ukem utom emi mmimọ ikokụtde ke obio emana mmimọ. Nte ededi, nnyịn imọfiọk ite ke edikem ini ẹyenam idem mme asua nnyịn ẹfiọk Jehovah, kpa andinọ nnyịn ibetedem ye edidianakiet.—Ezekiel 38:10-12, 23.
6. Nso nsọn̄ọ ke nnyịn inyene nte nnyịn ibuanade ke utom idọk, edi nso mbụme idemede?
6 Enyene-idọk ọmọnọ Eyen esie, Jesus Christ, “ofụri odudu ke heaven ye ke isọn̄.” (Matthew 28:18) Ke ntem Jehovah ada Jesus ndinọ ndausụn̄ ke utom idọk ebe ke mme angel eke heaven ye “asan̄autom emi anamde akpanikọ, onyụn̄ enyenede ọniọn̄” oro ẹyetde aran mi ke isọn̄. (Matthew 24:45-47; Ediyarade 14:6, 7) Edi didie ke nnyịn ikeme ndiyọ ubiọn̄ọ otode mme asua ndien ika iso ndikop idatesịt nte nnyịn ikade iso ke utom idọk?
7. Nso idaha ekikere ke nnyịn ikpodomo ndinyene ke ini ẹbiọn̄ọde m̀mê ẹkọbọde nnyịn?
7 Ke ini nnyịn isobode ubiọn̄ọ m̀mê idem ukọbọ, ẹyak nnyịn iyom un̄wam Abasi man ikeme ndika iso nnyene idaha ekikere ebietde eke Paul. Enye ekewet ete: “Ke ini owo ẹsụn̄ide nnyịn, nnyịn idiọn̄ mmọ; ke ini ẹkọbọde nnyịn, nnyịn ime ime; ke ini ẹbiatde nnyịn enyịn̄, nnyịn isụk ikpe ye owo.” (1 Corinth 4:12, 13) Ndusụk ini, idaha ekikere emi ke adianade ye mbufiọk nnyịn ke utom ukwọrọikọ, esikpụhọde edu mme andibiọn̄ọ nnyịn.
8. Nso nsịnudọn̄ ke nnyịn ibọ ito mme ikọ Jesus oro ẹwetde ke Matthew 10:28?
8 Idem ndịghe n̄kpa inamke ifịk nnyịn nte mme anamutom idọk etek. Nnyịn ke itan̄a etop Obio Ubọn̄ an̄wan̄wa nte ikekeme ye unana ndịk. Ndien nnyịn imọbọ nsịnudọn̄ ito mme ikọ Jesus: “Ẹkûnyụn̄ ẹfehe mmọ emi ẹwotde ikpọkidem, edi mîkemeke ndiwot ukpọn̄: edi ẹkam ẹfehe Enye emi ekemede ndisobo ukpọn̄ ye ikpọkidem ke [Gehenna, NW].” (Matthew 10:28) Nnyịn imọfiọk ite ke Ete nnyịn eke heaven edi Andinọ uwem. Enye esinọ mbon oro ẹmụmde nsọn̄ọnda ẹkama ke enye ẹnyụn̄ ẹkade iso ndinam utom idọk ke edinam akpanikọ, utịp.
Anyan̄a-Uwem Etop
9. Didie ke ndusụk owo ẹkenam n̄kpọ ẹban̄a mme ikọ Ezekiel, ndien didie ke ukem oro etịbe mfịn?
9 Ke ini prọfet Ezekiel akatan̄ade mme etop Jehovah uko uko ọnọ ‘mme idụt nsọn̄-ibuot’—obio ubọn̄ Israel ye Judah—ndusụk owo ẹma ẹnem esịt ndikop se enye ekenyenede nditịn̄. (Ezekiel 2:3) Jehovah ama ọdọhọ ete: “Ndien mmọ ẹse fi ke ikwọ mbon-ima, eke owo edinem uyo, ọfiọk nditịm mbre ndido.” (Ezekiel 33:32) Okposụkedi mmọ ẹkemade mme ikọ Ezekiel, mmọ ikadaha mmọ inam n̄kpọ. Nso itịbe mfịn? Ke ini nsụhọ oro ẹyetde aran ye mme nsan̄a mmọ ẹtan̄ade mme etop Jehovah uko uko, ndusụk owo ẹsima ndikop mban̄a mme edidiọn̄ Obio Ubọn̄, edi mmọ isinamke n̄kpọ ye esịtekọm iban̄a, ikabakede idi mme mbet, inyụn̄ ibuanake ke utom idọk.
10, 11. Ke akpa ubak ọyọhọ isua ikie 20, nso ke ẹkenam nditan̄a anyan̄a-uwem etop nnyịn, ndien ye mme utịp ewe?
10 Ke n̄kan̄ eken, ediwak owo ẹnam n̄kpọ nte ọfọnde ẹban̄a utom idọk ẹnyụn̄ ẹbuana ke nditan̄a mme etop Abasi. Ke uwụtn̄kpọ, ke udịm udịm ikpọ mbono Christian ọtọn̄ọde ke 1922 esịm 1928, ẹma ẹtan̄a mme etop ubiereikpe in̄wan̄-in̄wan̄ ẹdori idiọk editịm n̄kpọ Satan. Mme ufọkutom ekebe ukopikọ ẹma ẹtọt mme ubiereikpe oro ẹketan̄ade ke mme mbono oro. Ke oro ebede, ikọt Abasi ẹma ẹsuan ediwak miliọn n̄wed oro ẹdọn̄ọde mme ubiereikpe emi.
11 Ke utịt utịt iduọk isua 1930, ẹma ẹtọn̄ọ orụk utom unọ ikọ ntiense efen—mme isan̄ unọ ntọt. Ke akpa, ikọt Jehovah ẹma ẹsikọn̄ọ kad ntọt oro ọkọtọtde mme an̄wan̄wa utịn̄ikọ. Ke ukperedem, mmọ ẹma ẹsikama mme kad ntọt oro ẹkenyenede mme utọ ufiet nte “Ido Ukpono edi afia ye n̄kpọ etabi” ye “Nam N̄kpọ Abasi ye eke Christ kpa Edidem.” Ke ini mmọ ẹkenamde isan̄ ke efak, mmọ ẹma ẹsidemede ntịn̄enyịn mme andisan̄a mbe. Eyenete kiet emi ekesibuanade kpukpru ini ke utom oro ke mme efak London, England, emi mme owo ẹkesiwakde, ọkọdọhọ ete: ‘Emi ama anam ekese ke ndinam ẹdiọn̄ọ Mme Ntiense Jehovah ye ke ndinam mmọ ẹnyene uko.’
12. Ke adianade ye mme etop ubiereikpe Abasi, nso ke nnyịn isitịn̄ iban̄a ke utom ukwọrọikọ nnyịn, ndien mmanie ẹdiana kiet idahaemi ke ndikwọrọ eti mbụk?
12 Nte nnyịn itan̄ade mme etop ubiereikpe Abasi, nnyịn n̄ko imesitịn̄ iban̄a mme ikpehe oro ẹdide eti mbụk ke etop Obio Ubọn̄. Nnyịn ndinọ ikọ ntiense uko uko ke ererimbot an̄wam nnyịn ndikụt mbon oro ẹdotde. (Matthew 10:11) Ata ediwak ke otu mme akpatre andibuana ke otu oro ẹyetde aran ẹma ẹyere in̄wan̄-in̄wan̄ ikot ke utom idọk emi ke iduọk isua 1920 ye 1930. Ekem, ke akamba mbono ke 1935, ẹma ẹnọ utịbe utịbe mbụk aban̄ade ini iso oro ẹdiọn̄de oro enyenede “akwa otu owo” eke “mme erọn̄ en̄wen” ke paradise isọn̄. (Ediyarade 7:9; John 10:16) Mmọ ẹkop mme etop ubiereikpe Abasi ẹnyụn̄ ẹdiana kiet ye mbon oro ẹyetde aran ke ndikwọrọ anyan̄a-uwem eti mbụk.
13, 14. (a) Nso ndọn̄esịt ke nnyịn ikeme ndibọ nto Psalm 126:5, 6? (b) Edieke nnyịn ikade iso nditọ nnyụn̄ mbọk ke mmọn̄, nso iditịbe?
13 Mme ikọ Psalm 126:5, 6 ẹnen̄ede ẹdi n̄kpọ ndọn̄esịt ẹnọ mme anamutom idọk Abasi, akpan akpan mbon oro ẹkọbọde: “Mmọ eke ẹtọde n̄kpọ ke mmọn̄eyet ẹyekpen̄e ke idara. Owo eke obiomde akpan n̄kpasịp, aka atua eyet, aka atua eyet, iditreke ndibiom mme ebek esie nnyọn̄ ke idara.” Mme ikọ andiwet psalm ẹban̄ade editọ ye edikpen̄e ẹwụt nte Jehovah ekekerede aban̄a okonyụn̄ ọdiọn̄de nsụhọ oro ẹkenyọn̄de ntan̄mfep ke Babylon eset, ẹdi. Mmọ ẹma ẹnen̄ede ẹkop inemesịt ke ini ẹkesanade mmọ ẹyak, edi ekeme ndidi mmọ ẹma ẹtua eyet ke ini ẹketọde n̄kpasịp ke ndon oro owo mîkanamke utom ke esịt ke isua 70 oro mmọ ẹkedude ke ntan̄mfep. Nte ededi, mbon oro ẹkekade iso ke utom editọ ye edibọp ẹma ẹdọk mbun̄wụm ẹnyụn̄ ẹkop uyụhọ ẹto utom mmọ.
14 Nnyịn imekeme nditua eyet ke ini isobode idomo m̀mê ke ini nnyịn m̀mê mme ekemmọ andinịm ke akpanikọ okụtde ndutụhọ ke ntak edinen ido. (1 Peter 3:14) Ke utom idọk nnyịn, nnyịn ke akpa imekeme ndisobo n̄kpọsọn̄ idaha koro etiede nte ke mme ukeme nnyịn ke utom ukwọrọikọ in̄wụmke mfri. Edi edieke nnyịn ikade iso nditọ nnyụn̄ mbọk ke mmọn̄, Abasi ayanam mme n̄kpọ ẹkọri, ediwak ini akan nte nnyịn ikodoride enyịn. (1 Corinth 3:6) Mme utịp ẹtode nnyịn ndisuan Bible ye mme n̄wed ẹkọn̄ọde ke N̄wed Abasi ẹwụt emi edifọn edifọn.
15. Nọ uwụtn̄kpọ ke nte mme n̄wed Christian ẹnyenede ufọn ke utom idọk.
15 Kere ban̄a uwụtn̄kpọ eren oro ekerede Jim. Ke ini eka esie akakpade, enye ama ọfiọhọ n̄wed Life—How Did It Get Here? By Evolution or by Creation? * ke otu inyene esie. Enye ama okot n̄wed oro ye udọn̄. Ke nneme oro enye ekenyenede ye Ntiense oro okosobode ye enye ke efak, Jim ama enyịme enye edi edise imọ, ndien emi ama osụn̄ọ ke ukpepn̄kpọ Bible. Jim ama anam n̄kọri eke spirit usọp usọp, ayak idem ọnọ Jehovah, onyụn̄ ana baptism. Enye ama asian mbonubon esie aban̄a se enye ekekpepde. Nte utịp, eyeneka esie eren ye eyeneka esie an̄wan ẹma ẹkabade ẹdi Mme Ntiense Jehovah, ndien ke ukperedem Jim ama enyene ifet ndinam utom nte anamutom unyịmesịt uyọhọ ini ke Bethel ke London.
Ẹkop Idatesịt kpa ye Ẹkọbọde
16. (a) Ntak ẹkụtde unen ke utom idọk? (b) Nso ntọt ke Jesus ọkọnọ kaban̄a utịp eti mbụk, edi nso edu ke nnyịn isida ineme nneme ye mme owo?
16 Ntak emi ẹkụtde unen ntre ke utom idọk? Koro mme Christian oro ẹyetde aran ye nsan̄a mmọ ẹnam mme item Jesus: “Se ndọhọde mbufo ke ekịm, ẹmen ẹtịn̄ ke un̄wana; se mbufo ẹnyụn̄ ẹkopde ke utọn̄, ẹkwọrọ ke ọkọm ufọk.” (Matthew 10:27) Nte ededi, nnyịn imekeme ndidori enyịn mban̄a nsọn̄ọn̄kpọ, koro Jesus ama ọtọt ete: “Eyen-eka oyonyụn̄ ada eyen-eka ọnọ n̄kpa, ete oyonyụn̄ ọnọ eyen esie: nditọ ẹyenyụn̄ ẹdaha ẹn̄wana ye mme ete ye mme eka mmọ, ẹnyụn̄ ẹsịn ẹwot mmọ.” Jesus ama aka iso ete: “Ẹkûse ẹte n̄kedi ndisịn emem ke isọn̄: n̄kedịghe ndisịn emem, edi ofụt.” (Matthew 10:21, 34) Jesus ikaduakke ndikokoi mbahade mme ubon. Edi eti mbụk ama esinam oro ndusụk ini. Ukem oro ke edi ye mme asan̄autom Abasi mfịn. Ke ini ikade ikese mme ubon, uduak nnyịn isidịghe nditọ ubahade. Ọdọn̄ nnyịn nte kpukpru owo ẹnyịme eti mbụk. Ke ntre, nnyịn imesidomo ndineme nneme ye kpukpru mme andibuana ke ubon ke usụn̄ owụtde mfọnido ye edikere mban̄a oro edinamde etop nnyịn edemede udọn̄ “mmọ emi ẹkenịmde ẹnọ nsinsi uwem.”—Utom 13:48.
17. Didie ke mbon oro ẹdade ẹnọ itie edikara Abasi ẹda san̄asan̄a, ndien nso idi uwụtn̄kpọ kiet kaban̄a emi?
17 Etop Obio Ubọn̄ adian̄ade mbon oro ẹdade ẹnọ itie edikara Jehovah enịm san̄asan̄a. Ke uwụtn̄kpọ, kere nte mme ekemmọ andituak ibuot ẹkewọrọde ẹda san̄asan̄a koro mmọ ‘ẹkenọde Caesar se inyenede Caesar ẹnyụn̄ ẹnọde Abasi se inyenede Abasi’ ke eyo Ukara Nazi ke Germany. (Luke 20:25) Ke ẹdide isio ye mme adaiso ido ukpono ye mme inua-okot Christian oro ẹbuanade ye mme ufọkabasi Christendom, mme asan̄autom Jehovah ẹma ẹsọn̄ọ ẹda, ẹsịnde ndibiat mme edumbet Bible. (Isaiah 2:4; Matthew 4:10; John 17:16) Prọfesọ Christine King, andiwet n̄wed oro The Nazi State and the New Religions, ọkọdọhọ ete: “Mme Ntiense ikpọn̄îkpọn̄ ke ukara [Nazi] mîkakanke, koro okposụkedi mmọ ẹkewotde ediwak tọsịn, utom mmọ ama aka iso ndien ke May 1945 n̄ka Mme Ntiense Jehovah okosụk ododu, ke adan̄aemi Ukara Nazi mîkodụhe.”
18. Nso edu ke ikọt Jehovah ẹsinyene kpa ye ukọbọ?
18 Edu oro ikọt Jehovah ẹsinyenede ke ini ẹsobode ukọbọ enen̄ede edi n̄wọrọnda. Ke adan̄aemi mbuọtidem nnyịn ekemede nditụk ikpọ owo ukara, esikpa mmọ idem nte nnyịn mîsiwụtke idiọkesịt m̀mê usua. Ke uwụtn̄kpọ, Mme Ntiense oro ẹkebọhọde Nsobo eke Orụk ẹsiwak nditịn̄ mban̄a idatesịt ye uyụhọ oro mmọ ẹnyenede ke ini mmọ ẹtide ifiọk n̄kpọntịbe mmọ. Mmọ ẹfiọk ẹte ke Jehovah ọkọnọ mmimọ “akwa ubom odudu.” (2 Corinth 4:7) Mbon oro ẹyetde aran ke otu nnyịn ẹnyene mbuọtidem nte ke ‘ẹwet enyịn̄ mmimọ ke heaven.’ (Luke 10:20) Ime mmọ ọwọrọ idotenyịn oro mîdaha isịm edikpu, ndien mme anam-akpanikọ anamutom idọk oro ẹnyenede idotenyịn eke isọn̄ ẹsinyene ukem mbuọtidem oro.—Rome 5:4, 5.
Ẹka Iso ke Utom Idọk
19. Mme usụn̄ ewe oro ẹnyenede uforo ke ẹda ke utom ukwọrọikọ Christian?
19 Nnyịn ifiọkke m̀mê Jehovah ediyak nnyịn ibuana ke utom ndamban̄a idọk emi ibịghi adan̄a didie. Kan̄a ke emi, nnyịn ikpenyene nditi nte ke mme anamutom idọk ẹsinyene mme akpan usụn̄ ndida nnam utom mmọ. Kpasụk ntre, nnyịn imekeme nditịm nnịm nte ke nnyịn ndika iso ntiene mme usụn̄ ukwọrọikọ oro ẹma ẹkededomo ẹse ẹnyụn̄ ẹkụt nte ẹfọnde eyenyene ufọn. Paul ama asian mme ekemmọ Christian ete: “Mmekpe ye mbufo, . . . nte mbufo ẹdi mme andikpebe mi.” (1 Corinth 4:16) Ke ini Paul okosobode ye mbiowo Ephesus ke Miletus, enye ama eti mmọ ete ke imọ ikefeheke ndikpep mmọ n̄kpọ ‘an̄wa-an̄wa ye ke ufọk ke ufọk.’ (Utom 20:20, 21) Timothy nsan̄a Paul ama ekpebe mme usụn̄ unọ ukpep apostle oro ndien ke ntre ama ekeme ndida emi n̄kpep mbon Corinth. (1 Corinth 4:17) Abasi ama ọdiọn̄ mme usụn̄ unọ ukpep Paul, idem kpa nte enye ọdiọn̄de ifịk nnyịn ke ndikwọrọ eti mbụk an̄wan̄wa ye ke ufọk ke ufọk, ke mme mfiakn̄ka, ke mme ukpepn̄kpọ Bible, ye ke ebiet ekededi oro ẹkemede ndikụt mme owo.—Utom 17:17.
20. Didie ke Jesus okowụt nte ke akpakịp idọk eke spirit ama ekpere, ndien didie ke emi edi ntre ke mme isua ndondo emi?
20 Ke ama ọkọnọ n̄wan Samaria ikọ ntiense ekpere Sychar ke 30 E.N., Jesus ama etịn̄ aban̄a idọk eke spirit. Enye ama asian mme mbet esie ete: “Ẹmenede enyịn ẹse in̄wan̄ ẹte n̄kpọ adat ke esịt ama, ekem ini ukpen̄e. Kpa ke idaha emi andikpen̄e ukpen̄e ke ọbọ n̄kpọ-eyen-utom, onyụn̄ atan̄ mbun̄wụm ọnọ nsinsi uwem; man andisuan n̄kpasịp ye andikpen̄e ukpen̄e ẹkpedara ọtọkiet.” (John 4:34-36) Eyedi Jesus ama ebem iso okụt se ididide utịp nneme imọ ye n̄wan Samaria, koro ediwak owo ẹma ẹbuọt idem ye enye ke ntak ikọ ntiense n̄wan oro. (John 4:39) Ke mme isua ndondo emi, nsio nsio idụt ẹdorode mme ukpan oro ẹkedoride Mme Ntiense Jehovah m̀mê ẹnọ mmọ unyịme oro ekemde ye ibet, ke ntem ẹbererede mbufa efakutom ndinam utom idọk. Utịp edi nte ke akpakịp idọk eke spirit ke aka iso. Ke akpanikọ, ke ofụri ererimbot, ẹkụt akpakịp edidiọn̄ nte nnyịn ikade iso ndibuana idara idara ke idọk eke spirit.
21. Ntak emi nnyịn inyenede ntak ndika iso nte mme anamutom idọk oro ẹkopde idatesịt?
21 Ke ini mfri ẹdatde ẹkem se ẹkpen̄ede, ana mme anamutom ẹnam n̄kpọ usọp usọp. Ana mmọ ẹnam utom ye unana ubiatini. Mfịn, oyom nnyịn inam utom ifịk ifịk inyụn̄ inyene nte ini edide usọp usọp ke ekikere koro nnyịn idu uwem ke “utịt ini.” (Daniel 12:4) Ih, nnyịn imosobo mme idomo, edi idọk mme andituak ibuot nnọ Jehovah okpon akan nte akanam edide. Ke ntre emi edi usen idara. (Isaiah 9:3) Ntem, nte mme anamutom oro ẹkopde idatesịt, ẹyak nnyịn ika iso ke utom idọk!
[Ikọ idakisọn̄]
^ ikp. 15 Mme Ntiense Jehovah ẹsio ẹnyụn̄ ẹsuan.
Didie ke Afo Ọkpọbọrọ?
• Didie ke Enyene-idọk ọbọrọ eben̄e ndisio mme anamutom efen efen ndọn̄?
• Okposụkedi ‘ẹsuade’ nnyịn, nso idaha ekikere ke nnyịn ika iso ndinyene?
• Ntak emi nnyịn ikopde idatesịt idem okposụkedi ẹkọbọde nnyịn?
• Ntak emi nnyịn ikpakade iso ke utom idọk, inyenede nte ini edide usọp usọp ke ekikere?
[Mme Mbụme Ukpepn̄kpọ]
[Mme ndise ke page 16, 17]
Mme angel ẹnọ mbon oro ẹbuanade ke idọk eke spirit ibetedem
[Ndise ke page 18]
Mme isan̄ unọ ntọt ẹma ẹnam ediwak owo ẹkop etop Obio Ubọn̄
[Ndise ke page 18]
Nnyịn itọ inyụn̄ ibọk ke mmọn̄, edi Abasi anam enye ọkọri