‘Mme Edidiọn̄ Ẹdu Ẹnọ Edinen Owo’

“N̄KEDI eyenọwọn̄, ndien ndi ebiowo n̄ko; [akanam] n̄kwe nte ẹkpọn̄de [edinen] owo, nte ubon esie ẹnyụn̄ ẹsan̄ade inọk,” ntre ke David andiwet psalm ọkọdọhọ ke ini usọn̄ esie. (Psalm 37:25) Jehovah Abasi ama ndinen owo onyụn̄ enen̄ede ekere aban̄a mmọ. Ke Ikọ esie, kpa Bible, enye eteme mme ata andituak ibuot ete ẹyom edinen ido.—Zephaniah 2:3.

Ndidi edinen owo ọwọrọ ndinam n̄kpọ ekekem ye mme idaha Abasi kaban̄a eti ye idiọk. Ke esịnde udọn̄ ọnọ nnyịn ndidu uwem ekekem ye uduak Abasi, ọyọhọ ibuot 10 ke n̄wed Mme N̄ke eke Bible owụt akpakịp edidiọn̄ eke spirit oro mbon oro ẹdude uwem ekekem ye uduak Abasi ẹnyenede. Ndusụk ke otu emi ẹdi akpakịp udia oro ẹnọde nsọn̄idem ke n̄kan̄ eke spirit, utom oro ọnọde utịp ye uyụhọ, ye eti itie ebuana ye Abasi ye owo. Do, ẹyak nnyịn ikere iban̄a Mme N̄ke 10:1-14.

Eti N̄kpọ Nsịnudọn̄

Mme ntọn̄ọikọ ibuot n̄wed oro iyakke nnyịn iyịk m̀mê anie ekewet udiana ikpehe n̄wed Mme N̄ke. Mmọ ẹkot ẹte: “Mme N̄ke Solomon.” Ke ọnọde eti n̄kpọ nsịnudọn̄ nditiene nnennen usụn̄ uwem, Edidem Solomon eke Israel eset ọdọhọ ete: “Enyene-ibuot eyen adat ete esịt: edi ndisịme eyen edi mfụhọ eka esie.”—Mme N̄ke 10:1.

Mme ete ye eka ẹsikop mfụhọ didie ntem ke ini eyen mmọ kiet ọkpọn̄de utuakibuot odu-uwem ye ata Abasi! Enyene-ọniọn̄ edidem oro etịn̄ aban̄a mfụhọ eka, eyedi ndinọ ekikere nte ke eka esinen̄ede ofụhọ akan. Ke akpanikọ oro ekedi ntre ye Doris. * Enye obụk ete: “Ke ini eyeneren nnyịn isua 21 ọkọkpọn̄de akpanikọ, ami ye Frank ebe mi ima inen̄ede ifụhọ. Mma nnen̄ede n̄kop ubiak eke ntụk n̄kan nte Frank okokopde. Isua 12 ndibe ikọkke unan oro.”

Nditọ ẹkeme ndinam ete mmọ ofụhọ ẹnyụn̄ ẹkeme ndinam eka mmọ okop iduọesịt. Nnyịn ikpakam inyene ibuot inyụn̄ idat ete ye eka nnyịn esịt. Ndien nte ikekeme, ẹyak nnyịn inam esịt Ete nnyịn eke heaven, Jehovah, adat.

‘Ukpọn̄ Edinen Owo Oyụhọ’

Edidem oro ọdọhọ ete: “Inyene idiọk ido idoroke: edi edinen ido osio owo efep ke n̄kpa.” (Mme N̄ke 10:2) Ye mme ata Christian oro ẹdude uwem ke ata utịt ini, mme ikọ emi ẹnen̄ede ẹsọn̄ urua. (Daniel 12:4) Nsobo ererimbot unana uten̄e Abasi ekpere. N̄kpọ ukpeme ekededi oro owo enyenede—inyene obụkidem, okụk, m̀mê ekọn̄—idinọhọ ukpeme ke “akwa ukụt” oro edide. (Ediyarade 7:9, 10, 13, 14) ‘Mbon edinen ido kpọt ẹdidụn̄ ke obio, mmọ eke ẹfọnde ẹma ẹdinyụn̄ ẹbịghi ke esịt.’ (Mme N̄ke 2:21) Do, nnyịn ikpakam ika iso ‘ndibem iso nyom Obio Ubọn̄ Abasi ye edinen ido Esie.’—Matthew 6:33.

Iyomke mme asan̄autom Jehovah ẹbet tutu obufa ererimbot oro ẹken̄wọn̄ọde edi mbemiso mmọ ẹkụtde mme edidiọn̄ Abasi. “Jehovah idiyakke ukpọn̄ [edinen] owo etie biọn̄: edi eyesịn udọn̄ mme idiọk owo.” (Mme N̄ke 10:3) Jehovah ọmọnọ akpakịp udia eke spirit ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45) Ke akpanikọ, edinen owo enyene ediwak ntak ‘ndikwọ ke idatesịt.’ (Isaiah 65:14) Ifiọk enịn̄e  ukpọn̄ esie. Enye okop inemesịt ndiyom mme n̄kpọuto eke spirit. Idiọk owo ikopke utọ inemesịt oro.

‘Owo Nsịnifịk Ọkọ Inyene’

Ẹdiọn̄ edinen owo ke usụn̄ efen. “Owo eke ọnuọnde ubọk-utom ebuene: edi ubọk mbon ifịk ọkọ inyene. Owo eke ọkọde n̄kpọ ke nda-eyo edi enyene-ibuot eyen: edi okụni idap ke ini idọk edi oburobụt eyen.”—Mme N̄ke 10:4, 5.

Mme ikọ oro edidem etịn̄de ọnọ mme anamutom ke ini idọk ẹnen̄ede ẹnyene se ẹwọrọde. Ini idọk isidịghe ini ndide idap. Enye esidi ini ndisịn ifịk nnam utom ke ediwak hour. Ke akpanikọ, enye esidi ini ndinam n̄kpọ usọp usọp.

Ke enyenede idọk owo, utu ke idọk n̄kpasịp, ke ekikere, Jesus ama asian mme mbet esie ete: “Idọk okpon, edi mme anam-utom iwakke. Ẹben̄e ndien Enyene-idọk [Jehovah Abasi] ẹte, Enye osio mme anam-utom ọdọn̄ ẹdi ke idọk Esie.” (Matthew 9:35-38) Ke isua 2000, se ibede owo miliọn 14 ẹkedụk Editi n̄kpa Jesus—se iwakde utịm ikaba ikan ibat Mme Ntiense Jehovah. Anie, ndien, ekeme ndifan̄a nte ke ‘n̄kpọ idatke ke in̄wan̄ ikem ini ukpen̄e’? (John 4:35) Mme ata andituak ibuot ẹben̄e Enyene-idọk ẹte osio mme anamutom efen efen ọdọn̄ ke adan̄aemi mmọ ẹsịn̄erede idemmọ ke utom unam mbet ke n̄kemuyo ye akam mmọ. (Matthew 28:19, 20) Ndien Jehovah ọdiọn̄ ukeme mmọ didie ntem! Ke isua utom 2000, se ibede mbufa owo 280,000 ẹma ẹna baptism. Mmọ emi n̄ko ẹdomo ndikabade ndi mme andikpep Ikọ Abasi. Nnyịn ikpakam ikop idatesịt ye uyụhọ ke ini idọk emi ebe ke ndinyene ọyọhọ udeme ke utom unam mbet.

‘Ufọn Odoro Enye ke Ibuot’

Solomon aka iso ete: “Ufọn odoro [edinen] owo ke ibuot: edi inua mme idiọk owo ẹdịp afai.”—Mme N̄ke 10:6.

Owo oro esịt esie asanade onyụn̄ enende esinọ uyarade oro ekemde aban̄a edinen ido esie. Ikọ esie esiwụt mfọnido onyụn̄ edi se ibọpde-bọp, mme edinam esie ẹdi in̄wan̄-in̄wan̄ enye onyụn̄ atat ubọk. Mbon efen ẹsima enye. Utọ owo oro esibọ itoro—ufọn—oto mmọ koro mmọ ẹtịn̄de eti ikọ ẹban̄a enye.

Ke n̄kan̄ eken, idiọkowo etie usua usua m̀mê ubi ubi ndien akpan uduak esie edi ndinam mbon efen ibak. Ikọ esie ekeme ndinem, enye onyụn̄ ekeme ‘ndidịp afai’ esịt esie, edi nte ini akade enye ọtọn̄ọ en̄wan m̀mê utọk. (Matthew 12:34, 35) Mîdịghe ke usụn̄ efen, “afai eyekịbi mme idiọk owo inua.” (Mme N̄ke 10:6, ikọ idakisọn̄ NW) Emi owụt nte ke idiọkowo esiwak ndibọ mbon efen se enye ọnọde mmọ, oro edi usua. Emi esikịbi enye inua, yak idọhọ ntre. Nso edidiọn̄ ke utọ owo oro okpodori enyịn ndibọ nto mbon efen?

Edidem Israel oro ewet ete: “Ke ini ẹtide [edinen] owo, ẹyetoro enye: edi enyịn̄ mme idiọk owo oyobu.” (Mme N̄ke 10:7) Mbon efen ẹsiti  edinen owo, ke edide akpan n̄kpọ akan, Jehovah Abasi esiti enye. Ke enye ndinam akpanikọ tutu esịm n̄kpa, Jesus ‘ama ada enyịn̄ emi ọfọnde akan’ eke mme angel enyene. (Mme Hebrew 1:3, 4) Mfịn, mme ata Christian ẹti mme anam-akpanikọ iren ye iban oro ẹkedude uwem mbemiso eyo mme Christian nte mme uwụtn̄kpọ oro ẹdotde ẹkpebe. (Mme Hebrew 12:1, 2) Emi okpụhọde didie ntem ye enyịn̄ ndiọi owo, emi akabarede edi mbubiam ye mbumbu n̄kpọ! Ih, “ọfọn ndimek eti enyịn̄ n̄kan ediwak inyene: ima ye mfọn ẹkan silver ye gold.” (Mme N̄ke 22:1) Nnyịn ikpakam inam eti enyịn̄ ye Jehovah ye mme ekemmọ owo.

“Owo eke Enen̄erede Asan̄a Asan̄a ke Ifụre”

Ke owụtde ukpụhọde ke ufọt enyene-ibuot owo ye ndisịme owo, Solomon ọdọhọ ete: “Enyene-ibuot owo ebet mbet; edi ababara inua ọyọduọ ibuot ibuot.” (Mme N̄ke 10:8) Enyene-ibuot owo etịm ọfiọk ete ke ‘owo eke asan̄ade ikemeke ndinen̄ede ikpat esiemmọ.’ (Jeremiah 10:23) Enye ọfiọk ete ke oyom imọ iyom ndausụn̄ Jehovah, onyụn̄ ọsọsọp enyịme mme ibet Abasi. Ke n̄kan̄ eken, ababara inua ifiọkke akpanikọ emi. Enye nditịn̄ ikọ ndisịme ndisịme ada nsobo ọsọk enye.

Edinen owo n̄ko enyene orụk ifụre oro idiọkowo mînyeneke. “Owo eke enen̄erede asan̄a asan̄a ke ifụre: edi owo eke akwan̄ade ido esie ayayarade. Owo eke eyịpde enyịn esịn afanikọn̄: ndien ababara inua ọyọduọ ibuot-ibuot.”—Mme N̄ke 10:9, 10.

Owo eke enen̄erede asan̄a esinam akpanikọ ke mme edinam esie. Mbon efen ẹsikpono ẹnyụn̄ ẹbuọt idem ke enye. Owo oro anamde akpanikọ edi anamutom oro ẹmade ndien ẹsiwak ndinọ enye akamba mbiomo. Etop edinam akpanikọ esie ekeme ndinam enye aka iso enyene utom idem ke ini utom ananade. Akan oro, edinam akpanikọ esie etịp esịn ke ndinam ufọk enem onyụn̄ etie emem emem. (Psalm 34:13, 14) Enye enyene ifụre ke itie ebuana esie ye mbonubon esie. Ke akpanikọ ifụre edi mbun̄wụm edinen̄ede nsan̄a.

Idaha owo oro esịnde idem ke unana edinam akpanikọ ke ntak ibụk ibụk udori edi isio. Owo abian̄a ekeme ndidomo ndida ukwan̄ ikọ m̀mê idiọn̄ọ ndịp unana edinam akpanikọ esie. (Mme N̄ke 6:12-14) Enye ndiyịp enyịn ye ubi ubi m̀mê abian̄a abian̄a uduak ekeme ndida editịmede esịt nsọk mbon oro enye abian̄ade. Edi ebebịghi m̀mê awawara, ukwan̄ ido utọ owo oro ayayarade. Apostle Paul ekewet ete: “Idiọk-n̄kpọ ndusụk owo ẹyarade, ẹbem iso ẹwọrọ ubiere-ikpe; edi idiọk-n̄kpọ [ndusụk owo ayarade ke ukperedem, NW]. Kpa ntre n̄ko nti ido ẹdu eke ẹnade in̄wan̄-in̄wan̄; se mînyụn̄ inaha in̄wan̄ idikemeke ndidịbe.” (1 Timothy 5:24, 25) Inamke n̄kpọ m̀mê abuana anie—edide ete m̀mê eka, ufan, nsan̄a ndọ, m̀mê iman—unana edinam akpanikọ esiyarade ke akpatre. Anie ekeme ndibuọt idem ke owo oro ọwọrọde etop unana edinam akpanikọ?

‘Inua Esie Edi Idịm Uwem’

Solomon ọdọhọ ete: “Inua [edinen] owo edi idịm uwem: edi inua mme idiọk owo edịp afai.” (Mme N̄ke 10:11)  Ikọinua ekeme ndikọk unan mîdịghe ọnọ unan. Mmọ ẹkeme ndinam owo afiak okop nsọn̄idem, m̀mê ndinam enye okop mmemidem.

Ke owụtde odudu oro ikọinua enyenede, edidem Israel oro ọdọhọ ete: “Usua edemede utọk: edi ima ofụk kpukpru ndudue.” (Mme N̄ke 10:12) Usua esidemede utọk ke n̄kaowo, edemede en̄wan. Ana mme andima Jehovah ẹsio usua ẹfep ke uwem mmọ. Didie? Ebe ke ndida ima nsịn ke itie esie. “Ima [ofofụk] ekese idiọk-n̄kpọ.” (1 Peter 4:8) Ima “ememe kpukpru n̄kpọ,” oro edi “ofofụk kpukpru n̄kpọ.” (1 Corinth 13:7, Kingdom Interlinear) Ima Abasi iyomke mfọnmma ito mme anana-mfọnmma owo. Utu ke nditịn̄ mban̄a ndudue mbon efen, utọ ima oro an̄wam nnyịn ndifụmi ndudue mmọ, ibọhọke abuana akwa idiọkn̄kpọ. Ima akam ọyọyọ ke ini ẹnamde n̄kpọ ye nnyịn ke idiọk usụn̄ ke an̄wautom, ke itieutom, m̀mê ke ufọkn̄wed.

Enyene-ọniọn̄ edidem oro aka iso ete: “Ẹkụt mbufiọk ke inua asian: ndien eto enyene edem anana-ibuot.” (Mme N̄ke 10:13) Mbufiọk esikpeme asian ikpat isan̄. Mme ikọ oro ẹbọpde-bọp oro enye etịn̄de ẹsin̄wam mbon efen ndisan̄a ke usụn̄ oro enende. Owo idaha odudu—eto item—ikpak enye m̀mê mbon oro ẹkpan̄de utọn̄ ẹnọ enye ẹsan̄a ke nnennen usụn̄.

‘Bok Ifiọk’

Nso in̄wam mme ikọ nnyịn ndidi ‘idịm emi mbufiọk otopde ọwọrọ’ utu ke ndidi edịk emi mme ikpîkpu ikọ ẹtopde ẹwọrọ? (Mme N̄ke 18:4) Solomon ọbọrọ ete: “Mbon eti ibuot ẹbok ifiọk: edi inua mbon ndisịme edi nsobo eke ekperede.”—Mme N̄ke 10:14.

Akpa n̄kpọ oro ẹyomde edi nte ke ekikere nnyịn ekpenyene ndiyọhọ ye ifiọk Abasi oro ọbọpde-bọp. Ifiọk oro oto itie kiet kpọt. Apostle Paul ekewet ete: “Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.” (2 Timothy 3:16, 17) Nnyịn ikpenyene ndibok ifiọk nnyụn̄ ndụn̄ọde Ikọ Abasi nte n̄kpọ eke idụn̄ọrede iyom n̄kpọuto eke edịbede. Nso aduai-owo-idem ye akama-utịp ndụn̄ọde ke oro edi ntem!

Man mbufiọk odu ke n̄kpọkinua nnyịn, ana ifiọk N̄wed Abasi esịm nnyịn esịt n̄ko. Jesus ọkọdọhọ mme andikop ikọ esie ete: “Eti owo osion̄o se ifọnde ke nti n̄kpọ eke enye okobonde ke esịt esie, idiọk owo onyụn̄ osion̄o se idiọkde ke mme idiọk n̄kpọ eke enye okobonde ke esịt esie; koro oto ke uyọhọ esịt ndien inua etịn̄.” (Luke 6:45) Ke ntre, ana inam edi ido nnyịn nditie n̄kere se nnyịn ikpepde. Edi akpanikọ, ukpepn̄kpọ ye editie n̄kere ẹyom ukeme, edi utọ ukpepn̄kpọ oro enyene ufọn didie ntem ke n̄kan̄ eke spirit! Ntak ndomokiet idụhe owo ekededi nditiene usụn̄ uwem ababara inua oro adade esịm nsobo.

Ih, enyene-ibuot owo anam se inende ke enyịn Abasi onyụn̄ enyene eti odudu ke idem mbon efen. Enye adia akpakịp udia eke spirit onyụn̄ enyene ekese ndinam ke utom Ọbọn̄ oro ọnọde utịp. (1 Corinth 15:58) Sia edide owo oro enen̄erede asan̄a, enye asan̄a ke ifụre onyụn̄ enyene unyịme Abasi. Ke akpanikọ, ediwak edidiọn̄ ẹdu ẹnọ edinen owo. Nnyịn ikpakam iyom edinen ido ebe ke ndidu uwem ekekem ye mme idaha Abasi kaban̄a eti ye idiọk.

[Ikọ idakisọn̄]

[Ndise ke page 25]

Edinam akpanikọ esitịp esịn ke inemesịt uwem ufọk

[Ndise ke page 26]

“Mbon eti ibuot ẹbok ifiọk”