“Nte Abasi Enen̄ede Ebiere Nditụhọde Mme Owo ke Hell?”

“Nte mbufo ẹkpep ukpepn̄kpọ ido ikpono?”

Mbụme emi ama akpa Joel ye Carl idem. N̄kparawa iba oro—mme anamutom unyịmesịt ke ibuot itieutom Mme Ntiense Jehovah ke Brooklyn, New York—ẹkesụk ẹdụn̄ọde mme n̄wed ke ufọkurua unyamn̄wed oro okodude ekpere. Nte Joel okodụn̄ọrede mme n̄wed oro ẹdọn̄ọde mme ikọ Bible, Carl ama etịn̄ nneme oro enye ekenyenede ke utom ukwọrọikọ ọnọ enye. Ke okopde ndusụk ikpehe nneme emi, ama onụk eren oro akadade ekpere ndisan̄a mbịne mmọ.

Nte ededi, eren oro ama enyene ọkpọkpọ udọn̄ akan ediyom ndifiọk m̀mê n̄kparawa iba oro ẹkekpep ukpepn̄kpọ ido ukpono. Enye ama anam an̄wan̄a ete: “Ami ndi owo Jew, ndien ndusụk ke otu mme ufan mi oro ẹdide mme Christian ẹsian mi ẹte ke ẹyetụhọde mi ke hell koro mme Jew ẹkesịnde Jesus. Emi enen̄ede afịna mi. Etie nte idotke utọ ufen oro ndito ima ima Abasi. Nte Abasi enen̄ede ebiere nditụhọde mme owo ke hell?”

Joel ye Carl ẹma ẹsian eren oro ekenyenede esịt akpanikọ mi ẹte ke mmimọ idi ifịk ifịk nditọ ukpepn̄kpọ Bible. Mmọ ẹma ẹda N̄wed Abasi ẹwụt enye nte ke mme akpan̄kpa ifiọkke n̄kpọ ye nte ke mmọ n̄kukụre ẹdede, ẹbetde ediset ke n̄kpa. Ntem, mmọ ikopke ndutụhọ m̀mê ubiak hell ikan̄. (Psalm 146:3, 4; Ecclesiastes 9:5, 10; Daniel 12:13; John 11:11-14, 23-26) Ke utịt nneme mmọ oro ekebịghide ke minit 45, eren oro ama ọnọ Joel ye Carl adres esie onyụn̄ eben̄e mme ntọt efen efen ke ibuot nneme oro.

Edieke hell ekpedide ebiet ikan̄ ikan̄ ndutụhọ, ndi owo ndomokiet ekpeben̄e ete ẹnọ imọ ikodu do? Edi, ete-ekpụk oro Job, ke oyomde ndibọhọ nnanenyịn esie, ama anam eben̄e emi: “Anie edinam emi ọnọ mi, afo akpakam ekpeme mi ke hell, onyụn̄ edịp mi tutu iyatesịt fo ebe?” (Job 14:13, Douay Version) Nte an̄wan̄ade, Job ikenịmke ite ke hell edi ebiet ndutụhọ. Utu ke oro, enye okoyom ukpeme do. N̄kpa edi idaha unana edidu, ndien hell eke Bible edi ikpîkpu udi ubonowo.

Edieke afo edimade ndinyene n̄kaiso ntọt kaban̄a se itịbede inọ nnyịn ke ini nnyịn ikpade ye idotenyịn oro odude ke oro ebede, ẹnọ fi ufiop ufiop ikot ndinam n̄kpọ mban̄a ntọt oro etienede mi.