Ntọt Mme Anditan̄a Obio Ubọn̄

Abasi Ọmọkwọhọde Enye Mmọn̄eyet

ẸSIDIỌN̄ mbon oro ẹnamde uwem mmọ odu ke n̄kemuyo ye mbet ye edumbet Jehovah uwak uwak. Okposụkedi mîsidịghe mmemmem kpukpru ini ndinam mme ukpụhọde oro ẹyomde, un̄wam ye nsịnudọn̄ ẹdu. (Psalm 84:11) Ifiọkutom oro etienede mi, emi otode Ufọt Edem Usụk ye Edem Usiahautịn Asia anam emi an̄wan̄a.

Ke adan̄aemi okodude ke nduọkodudu, Ntiense kiet otode France ama enyene nneme ye enyene ufọkurua oro ekerede Kim * aban̄a uduak Jehovah kaban̄a isọn̄. Enye n̄ko ama ọnọ Kim n̄wed Afo Emekeme Ndidu Uwem ke Nsinsi ke Paradise ke Isọn̄. Ke odụn̄ọrede n̄wed oro, Kim ama okụt mme ikọ oro, “enye ọyọkwọhọde kpukpru mmọn̄eyet ke enyịn mmọ efep.” (Ediyarade 21:4) Kim eti ete: “Ufan̄ikọ emi ama enen̄ede otụk mi. Ke ẹkụtde nte ntuakde inua imam nnyụn̄ nnemede nneme kpukpru usen ke itieurua, anie ekeme ndifiọk nte ke ndondo oro nnyọn̄de nsịm ufọk ke mbubịteyo, nsitatua eyet ndụk idap?” Ke ayararede ntak mfụhọ esie, enye ọdọhọ ete: “N̄kodụn̄ ye eren kiet ke isua 18 ndien n̄kokopke inemesịt koro enye mîkenyịmeke ndidọ mi. Mma nyom nditre usụn̄ uwem emi, edi sia mma n̄kodụn̄ ye enye ke anyan ini ntre, n̄kekemeke nditre.”

Esisịt ini ke ukperedem, Kim ama enyịme ndikpep Bible ye kiet ke otu Mme Ntiense Jehovah oro ekerede Linh. Kim ọdọhọ ete: “Ama ọdọn̄ mi ndida se Bible ekpepde nsịn ke edinam. Ke uwụtn̄kpọ, mma ntre ndituak ibuot nnọ mme ete ete mi, idem okposụkedi emi okosụn̄ọde ke ubon mi ndibiọn̄ọ mi. Akan oro, mma ndomo ndisịn ndọ nnyịn ke n̄wed, edi nsan̄a mi ikenyịmeke ndinam ntre. Ke ọkpọsọn̄ ini emi, Ntiense oro otode France ama aka iso ndinọ mme n̄wed Bible ẹsọk mi, ndien Linh ama enen̄ede esịn udọn̄ ọnọ mi. Ime ye ima ima un̄wam nditọete iban emi ẹma ẹn̄wam mi ndiyọ tutu n̄keme ndikụt utọ owo emi nsan̄a mi ekenen̄erede edi. Mma ndifiọk nte ke enye ama enyenyene ‘iban’ 5 ye nditọ 25! Emi ama ọnọ mi odudu ndikpọn̄ enye.

“Ikedịghe mmemmem n̄kpọ ndikpọn̄ akamba eti ufọk n̄kodụn̄ ke ekpri ubet. Akan oro, akani nsan̄a mi ama enyịk mi ete mfiak ndidụn̄ ye imọ, idem edịghede ndida acid mbiomo mi ndo edieke mmenyịmeke. Ye un̄wam Jehovah, mma n̄keme ndinam se inende.” Kim ama aka iso ndinam n̄kọri ndien ke akpatre ama ana baptism ke April 1998. Adianade do, iba ke otu nditọeka esie iban ye eyeneren esie emi edide uyen ẹma ẹtọn̄ọ ndikpep Bible ye Mme Ntiense Jehovah.

Kim ọdọhọ ete: “N̄kesikere nte ke uwem mi idiwọrọke n̄kpọ. Nte ededi, mfịn mmokop inemesịt, nnyụn̄ ntuaha eyet aba ke okoneyo. Jehovah ọmọkwọhọde mi mmọn̄eyet.”

[Ikọ idakisọn̄]