Ebịghi Akan Ata Eti Gold

ẸSINEN̄EDE ẹyom gold ke ntak emi enye eyede uyai esinyụn̄ ebịghide. Se inen̄erede inam ẹyom enye ntre edi koro enye esikade iso esem onyụn̄ etie nte se mîkemeke ndibiara ke nsinsi. Emi edi koro mmọn̄, oxygen, sulfur, ye ke ekperede ndidi n̄kpọ efen ekededi, isibiatke gold. Ediwak n̄kpọ ẹdade gold ẹnam oro ẹkefiọhọde ke mme nsụn̄ikan̄ oro ẹkesịpde ye ke mme itie en̄wen ẹsụk ẹsesem ke ediwak isua ikie ẹma ẹkebe.

Nte enemde, Bible ọdọhọ ete ke odu n̄kpọ oro ebịghide onyụn̄ “ọsọn̄de urua akan mbiara gold eke ẹdade ikan̄ ẹdomo.” (1 Peter 1:7) Gold oro ẹdade ikan̄ ye mme usụn̄ en̄wen “ẹdomo,” m̀mê ẹnam asana, ekeme ndisana nsịm mbahade 99.9 eke ikie. Edi, gold emi ẹnamde asana esikam abiara, m̀mê eyet, ke ini ẹsịnde ke mmọn̄ibọk ẹkotde aqua regia, kpa mbuaha mmọn̄ibọk oro mbahade ita edide hydrochloric acid ndien mbahade kiet edide nitric acid. Ntem, Bible enen ke n̄kan̄ eke ifiọk ntaifiọk ke ndidọhọ ke ‘gold esibiara.’

Ke edide isio, ata mbuọtidem Christian ‘anyan̄a ukpọn̄.’ (Mme Hebrew 10:39) Ẹkeme ndiwot owo oro enyenede ọkpọsọn̄ mbuọtidem nte ẹkewotde Jesus Christ. Edi ẹnọ mbon oro ẹnyenede ata mbuọtidem un̄wọn̄ọ emi: “Wụt idem nte anam-akpanikọ tutu esịm n̄kpa, ndien nyọnọ fi anyanya uwem.” (Ediyarade 2:10) Mbon oro ẹkpan̄ade ke mbuọtidem ẹdu ke ibuot uti n̄kpọ Abasi, ndien enye ayanam mmọ ẹset. (John 5:28, 29) Idụhe udomo gold oro ekemede ndinam oro. Ke afan̄ emi, mbuọtidem enen̄ede ọsọn̄ urua akan gold. Nte ededi, man mbuọtidem ọsọn̄ urua ntre, ana ẹdomo enye n̄ko. Ke akpanikọ, edi ‘mbuọtidem emi ẹdomode’ ke Peter ọkọdọhọ ke ọsọn̄ urua akan gold. Mme Ntiense Jehovah ẹyekop inemesịt ndin̄wam fi ekpep Bible man afo ọkọri onyụn̄ enyene ọkpọsọn̄ mbuọtidem ke ata Abasi, Jehovah, ye ke Eyen esie, Jesus Christ. Emi, nte Jesus ọkọdọhọde, ọwọrọ “nsinsi uwem.”—John 17:3.