Kan Mme N̄kpọ Oro Ẹbiọn̄ọde N̄kọri Fo!

KERE nte ubomisọn̄ fo ekpesịnede ke gear, engine ke onyụn̄ osioro uyo, edi enye inyịmeke ndidaha isan̄. Ndi enye ababiara? Baba, akwa itiat ọbiọn̄ọ kiet ke otu wheel esie. N̄kukụre se oyomde afo anam man ubomisọn̄ oro adaha isan̄ edi afo ndikpat itiat oro nsio.

Ke ukem usụn̄ oro, ndusụk mbon oro ẹkpepde Bible ye Mme Ntiense Jehovah ẹnyene mme n̄kpọ oro ẹkemede ndibiọn̄ọ n̄kọri eke spirit mmọ. Ke uwụtn̄kpọ, Jesus ama ọtọt ete ke mme utọ n̄kpọ nte “ekikere n̄kpọ eyo emi ye abian̄a inyene” ẹkeme ‘ndibaba ikọ’ akpanikọ nnyụn̄ mbiọn̄ọ n̄kọri.—Matthew 13:22.

Ye mbon efen, mme edu m̀mê mme mmeme oro ẹnen̄erede ẹdọn̄ n̄kam ẹsibiọn̄ọ n̄kọri mmọ. Eren Japan oro ekerede Yutaka ama esima etop Bible, edi enye ama enyene akamba mfịna edibre mbre mfọniso. Enye ama esidomo ediwak ini ndikan idiọk edu emi edi ama okpu. Mbumehe esie ama akpa enye ata ediwak okụk, ufọk ita, ukpono ubon esie, ye uku esie. Nte enye ekeme ndikan n̄kpọ ubiọn̄ọ emi nnyụn̄ n̄kabade ndi Christian?

Mîdịghe kere ban̄a n̄wan oro ekerede Keiko. Ye un̄wam Bible, enye  ama ekịbe ọbọhọ mme utọ ndiọi edinam nte ukpono ndem, oburobụt ido, ye editịn̄ ini iso. Nte ededi, Keiko enyịme ete: “N̄kponn̄kan n̄kpọ oro ọkọbiọn̄ọde mi ekedi edin̄wọn̄ sika. Mma ndomo ediwak ini nditre edi n̄kekemeke.”

Kpasụk ntre afo emekeme ndinyene se itiede nte n̄kpọ ubiọn̄ọ oro owo mîkemeke ndikan oro ọbiọn̄ọde n̄kọri fo. Se ekpededi, nịm ke akpanikọ ete ke imọ imekeme ndikan enye ye un̄wam Abasi.

Ti item oro Jesus ọkọnọde mme mbet esie ke mmọ ẹma ẹkekpu ndinam demon ọwọrọ owo udọn̄ọ ndisi ke idem. Ke Jesus ama akanam se mmọ mîkekemeke ndinam, enye ama asian mme mbet esie ete: “Edieke mbufo ẹkpenyenede mbuọtidem nte n̄kpasịp mustard, mbufo ẹkpedọhọ obot emi ẹte, daha kpọn̄ ọtọ emi, kọwụhọ ko, ndien enye ayadaha: baba n̄kpọ kiet idinyụn̄ isọn̄ke ikan mbufo.” (Matthew 17:14-20; Mark 9:17-29) Ih, mfịna oro ekemede nditie nnyịn nte obot edi ata ekpri ye ikpîkpu ọnọ Andibot nnyịn oro enyenede ofụri odudu.—Genesis 18:14; Mark 10:27.

Ndifiọk Mme N̄kpọ Oro Ẹbiọn̄ọde N̄kọri

Mbemiso afo ekemede ndikan mme n̄kpọ oro ẹbiọn̄ọde fi, ana afo enen̄ede ọfiọk se mme n̄kpọ ubiọn̄ọ oro ẹdide. Didie ke afo ekeme ndinam oro? Ndusụk ini andibuana ke esop, utọ nte ebiowo m̀mê owo oro ekpepde fi Bible, oyodụri ntịn̄enyịn fo owụt n̄kpọ. Utu ke ndiyat esịt mban̄a utọ ima ima item oro, afo ekpenyene ndisụhọde idem ‘n̄kop item, nnyụn̄ nnyene ibuot.’ (Mme N̄ke 8:33) Ke mme idaha efen, ukpepn̄kpọ Bible ekeme ndinam fi ọfiọk mme mmeme fo. Ih, Ikọ Abasi “enyene uwem, onyụn̄ ananam n̄kpọ.” (Mme Hebrew 4:12) Ndikot Bible ye mme n̄wed ẹkọn̄ọde ke Bible ẹkeme ndiyarade mme ntotụn̄ọ ekikere, ntụk, ye uduak fo. Enye an̄wam fi ndida ndikon̄ idaha Jehovah ndụn̄ọde idemfo. Enye ayarade onyụn̄ anam fi ọfiọk mme n̄kpọ oro ẹkemede ndibiọn̄ọ n̄kọri eke spirit fo.—James 1:23-25.

Ke uwụtn̄kpọ, yak idọhọ ke eyen ukpepn̄kpọ Bible enyene edu edisịn idem ke oburobụt mfụmmfụm ekikere. Ekeme ndidi enye ikwe n̄kpọ oro ọdiọkde ke edinam ntre, ekerede ke inen̄ekede inam idiọkn̄kpọ ndomokiet. Ke ukpepn̄kpọ esie, enye edikụt mme ikọ James 1:14, 15: “Idomo iduọ esịm kpukpru owo ke adan̄aemi idiọk udọn̄ atapde enye odụri. Ekem idiọk udọn̄ ama [oyomo], aman idiọk-n̄kpọ; idiọk-n̄kpọ ama ọkọkọri, osion̄o n̄kpa.” Idahaemi enye okụt nte ke imọ ndika iso ke usụn̄ edinam emi ekeme ndibiọn̄ọ n̄kọri imọ! Didie ke enye ekeme ndikan n̄kpọ ubiọn̄ọ emi?—Mark 7:21-23.

Ndikan Mme N̄kpọ Ubiọn̄ọ

Eyedi ye un̄wam Christian oro ọkọride esịm ọyọhọ idaha, eyen ukpepn̄kpọ oro ekeme ndinam mme ndụn̄ọde efen efen ke Ikọ Abasi, adade Watch Tower Publications Index. * Ke uwụtn̄kpọ, ibuotikọ oro “Thoughts (Ekikere),” ada andikot aka ediwak ibuotikọ oro ẹkemịn̄de oro ẹban̄ade nte ẹkemede ndikan mme mfụmmfụm ekikere oro ẹkemede ndinọ unan. Mme ibuotikọ emi ẹwụt mme itien̄wed Bible oro ẹkemede ndin̄wam, utọ nte Philippi 4:8, emi ọdọhọde ete: “N̄kpọ ekededi eke edide akpanikọ, ye n̄kpọ ekededi eke enyenede ukpono, ye n̄kpọ ekededi eke enende, ye n̄kpọ ekededi eke edide edisana, ye n̄kpọ ekededi eke odotde ete ẹma, ye n̄kpọ ekededi eke ọwọrọde eti etop; edieke eti ido odude ke n̄kpọ, edieke itoro onyụn̄ odude, ẹkere n̄kpọ oro.” Ih, ana ẹda nti ekikere oro ẹbọpde-bọp ẹsịn ke itie oburobụt ekikere!

Ke ndụn̄ọde esie, eyen ukpepn̄kpọ oro nte eyịghe mîdụhe eyedifiọk mme edumbet Bible efen oro ẹdin̄wamde enye efep ndinam mfịna esie ọdọdiọn̄ okpon. Ke uwụtn̄kpọ, Mme N̄ke 6:27 ye Matthew 5:28 ẹdụri owo utọn̄ ẹbiọn̄ọ edida mme n̄kpọ oro ẹdemerede udọn̄ idan̄ mbọk ekikere. Andiwet psalm ọkọbọn̄ akam ete: “Kabade mi enyịn fep n̄kûkụt nsu-nsu n̄kpọ.” (Psalm 119:37) Nte ededi, ikpîkpu edikot mme itien̄wed Bible emi ikemke. Owo ọniọn̄ oro ọdọhọ ete: “Esịt eti owo etịm ekere.” (Mme N̄ke 15:28) Ebede ke nditie n̄kere se Abasi ọdọhọde ẹnam ye ntak emi enye ọdọhọde ẹnam ntre, eyen ukpepn̄kpọ oro ekeme ndidi ndinyene ntotụn̄ọ ifiọk mban̄a ọniọn̄ ye eti ibuot oro ẹdude ke mme usụn̄ Jehovah.

 Ke akpatre, owo oro odomode ndikan n̄kpọ oro ọbiọn̄ọde n̄kọri esie ekpenyene ndiyom un̄wam Jehovah kpukpru ini. Kamse, Abasi etịm ọfiọk nte nnyịn itiede, ọfiọkde ete ke nnyịn idi mme anana-mfọnmma owo, oro ẹkedade ntan ẹbot. (Psalm 103:14) Edibọn̄ akam kpukpru ini nnọ Abasi nyom un̄wam, adianade ye ọkpọsọn̄ ukeme ndifep edinyene mfụmmfụm ekikere, eyenyene ata eti utịp ke akpatre—kpa edisana ubieresịt oro mîbiomke nnyịn.—Mme Hebrew 9:14.

Kûkpa Mba

Mfịna ekededi oro afo an̄wanade ndikan, fiọk ete ke ndusụk ini afo emekeme ndifiak nnam idiọkn̄kpọ oro. Ke ini oro etịbede, edi ndammana n̄kpọ ndikop mmemidem nnyụn̄ n̄kere ke imokpu. Nte ededi, ti mme ikọ Galatia 6:9: “Ẹyak ikûkpa mba ke edinam eti n̄kpọ; koro ke edikem ini nnyịn iyọdọk mbun̄wụm, edieke nnyịn mîyakke idem emem nnyịn.” Mme ifịk ifịk asan̄autom Abasi nte David ye Peter ẹma ẹkụt mme utọ esuene esuene edikpu oro. Edi mmọ ikakpaha mba. Mmọ ẹma ẹsụhọde idem ẹnyịme item, ẹnam mme ukpụhọde oro ẹkeyomde, ndien ẹka iso ẹwụt idemmọ nte idide mme n̄wọrọnda asan̄autom Abasi. (Mme N̄ke 24:16) Kpa ye mme ndudue David, Jehovah ama okot enye “owo emi ekemde esịt ye Ami, emi edinamde ofụri uduak Mi.” (Utom 13:22) Kpasụk ntre, Peter ama odu uwem oro akanamde ẹfre mme ndudue esie onyụn̄ akabade edi adaha ke esop Christian.

Ediwak owo mfịn ẹkụt unen ntre ke ndikan mme n̄kpọ ubiọn̄ọ. Yutaka, oro ẹketịn̄de ẹban̄a ke ntọn̄ọ, ama enyịme ẹkpep imọ Bible. Enye obụk ete: “Ndinyene ibetedem ye edidiọn̄ Jehovah ke kpukpru usio-ukot oro n̄kanamde ama an̄wam mi ndikan mfịna edibre mbre mfọniso. Mmokop ekese idatesịt ke ndikụt nte mme ikọ Jesus—nte ke edieke inyenede mbuọtidem, imekeme ndiwụhọde idem ‘ikpọ obot’—ẹdide akpanikọ.” Nte ini akakade, Yutaka ama akabade edi asan̄autom unamutom ke esop.

Nso kaban̄a Keiko, oro ekenyenede mbumehe edin̄wọn̄ sika? Eyenete an̄wan oro ekekpepde enye n̄kpọ ama ọnọ ekikere ete enye okot nsio nsio ibuotikọ Awake! oro ẹtịn̄de n̄kpọ ẹban̄a mbumehe edin̄wọn̄ sika. Keiko ama akam ewet mme ikọ 2 Corinth 7:1 ke ubomisọn̄ esie man eti enye ke usen ke usen ndisana ke enyịn Jehovah. Kpa ye oro, enye ikekemeke nditre. Keiko eti ete: “Mma nnen̄ede n̄kop mfụhọ. Ntre mma ntọn̄ọ ndibụp idemmi se n̄kenen̄erede nyom—ndi n̄koyom ndinam n̄kpọ Jehovah m̀mê eke Satan?” Ke ndondo oro enye ama ekebiere ete ke iyom ndinam n̄kpọ Jehovah, enye ama ọbọn̄ akam ifịk ifịk oyom un̄wam. Enye eti ete: “Ke n̄kpaidem, mma n̄keme nditre ndin̄wọn̄ sika ye unana edibọ ọkpọsọn̄ ufen. N̄kukụre se ntuade n̄kpọfiọk mban̄a edi nte ke n̄kọsọpke nnam oro.”

Afo n̄ko emekeme ndikụt unen ke ndikan mme n̄kpọ oro ẹbiọn̄ọde n̄kọri eke spirit fo. Adan̄a nte afo anamde ekikere, udọn̄, ikọ, ye edinam fo ẹkekem ye mme idaha Bible, ntre ke afo edinyene ukpono idemowo ye uko. Nditọete fo eke spirit, ọkọrọ ye mbonubon fo, ẹyekop inem ẹnyụn̄ ẹbọ nsịnudọn̄ ke ini ẹdude ye afo. Ke edide akpan n̄kpọ akan, afo ayanam itie ebuana fo ye Jehovah Abasi otụn̄ọ. Enye ama ọn̄wọn̄ọ ete ke imọ ‘iyemen n̄kpọ utuaha-nduọ ke usụn̄ ikọt imọ ifep’ man mmọ ẹfehe ẹbọhọ odudu Satan. (Isaiah 57:14) Ndien afo emekeme ndinịm ke akpanikọ nte ke edieke imọ isịnde ukeme ndikan mme n̄kpọ oro ẹbiọn̄ọde n̄kọri eke spirit imọ, Jehovah ọyọdiọn̄ imọ uwak uwak.

[Ikọ idakisọn̄]

[Ndise ke page 28]

Jesus ama ọn̄wọn̄ọ ete ke edieke inyenede mbuọtidem, iyakan mme n̄kpọ ubiọn̄ọ oro ẹbietde obot

[Ndise ke page 30]

Ndikot Bible ọyọsọn̄ọ ukeme oro isịnde ndikan mme mmeme eke spirit