Mme Mbụme Ẹtode Mme Andikot

Daniel okodu m̀mọ̀n̄ ke ini ẹkedomode nditọ Hebrew ita ke iso akwa mbiet oro Nebuchadnezzar okowụkde ke unaisọn̄ Dura?

Bible itịn̄ke, ntre mfịn owo ndomokiet ikemeke nditịn̄ ebiet emi Daniel okodude ke ini idomo oro.

Ndusụk owo ẹnọ ekikere ẹte ke idaha m̀mê ifetutom oro Nebuchadnezzar ọkọnọde Daniel ama okpon akan eke Shadrach, Meshach, ye Abednego ke ntre ke ikobiomoke Daniel ndika unaisọn̄ Dura. Daniel 2:49 owụt ete ke Daniel ama enyene idaha oro okokon̄de akan eke nsan̄a esie ita ke ndusụk ini. Edi nnyịn ikemeke ndisọn̄ọ nte ke emi akanam enye okûsop idem ye mbon eken ke iso mbiet oro.

Ke ẹdomode ndinam an̄wan̄a ntak emi Daniel mîkodụhe do, mbon efen ẹdọhọ ke ekeme ndidi enye ọkọwọrọ aka utom mîdịghe ọkọdọdọn̄ọ ke ntre ikekemeke ndidụk. Nte ededi, Bible itịn̄ke oro. Ke usụn̄ ekededi, anaedi edinam Daniel ikedemekede eneni, koro edieke ekpekedemerede eneni, eyịghe idụhe nte ke ikpọ owo ukara Babylon oro ẹkefụbede enye ufụp ẹkpekeda oro ẹdori enye ikọ. (Daniel 3:8) Mbemiso ye ke edinam emi ama ekebe, Daniel ama owụt ke imọ idi owo oro enyenede nsọn̄ọnda, anamde akpanikọ ọnọ Abasi inamke n̄kpọ m̀mê n̄kpọ-ata ewe ke enye okosobo. (Daniel 1:8; 5:17; 6:4, 10, 11) Ntre idem okposụkedi Bible mîtịn̄ke ntak emi Daniel mîkodụhe ke unaisọn̄ Dura, nnyịn imekeme ndinyene mbuọtidem nte ke enye ama anam akpanikọ ọnọ Jehovah Abasi ye unana edikan̄ mbuọtidem.—Ezekiel 14:14; Mme Hebrew 11:33.