Unen Fo Ndinịm N̄kpọ ke Akpanikọ

Ekeme ndidi afo amama unen fo ndinịm se ededi oro afo amade ke akpanikọ. Ekpere ndidi kpukpru owo ẹma ukem ntre. Ke ẹdade unen emi ẹnam n̄kpọ, owo biliọn itiokiet oro ẹdụn̄de ke isọn̄ ẹnyene ata ediwak nsio nsio edinịm ke akpanikọ. Ukem nte mme n̄kpọ obot oro nnyịn ikụtde ẹnyenede nsio nsio uduot, mbiet, inem, utebe, ye uyom, nsio nsio edinịm ke akpanikọ ẹsiwak ndidemede owo udọn̄, ndiduai owo idem, ndinyụn̄ nnam owo okop inem uwem. Ke akpanikọ, utọ nsio nsio n̄kpọ oro ẹkeme ndinam uwem enem.—Psalm 104:24.

 EDI oyom ukpeme. Ndusụk edinịm ke akpanikọ idịghe isio kpọt edi ẹdi n̄kpọndịk n̄ko. Ke uwụtn̄kpọ, ke ntọn̄ọ ntọn̄ọ ọyọhọ isua ikie 20, ndusụk owo ẹkenịm ke akpanikọ ẹte ke mme Jew ye mbon Freemason ẹdiomi “ndibiat ntatenyịn mme Christian nnyụn̄ n̄wụk ukara ererimbot oro mmọ mbiba ẹdidianade kiet ẹkara.” Ebiet kiet oro edinịm ke akpanikọ emi okotode ekedi tract oro ọkọbiọn̄ọde mme Jew, oro ẹkotde Protocols of the Learned Elders of Zion (Ediomi Mme Ọfiọkn̄kpọ Mbiowo Zion). Tract oro ama etịn̄ ete ke ediomi oro ama esịne edisịn udọn̄ nnọ ebeubọk tax, edisịn udọn̄ nnọ edision̄o n̄kpọekọn̄ ndi, edisịn udọn̄ nnọ usiakifia kiet ndikara kpukpru mbubehe man ‘ẹsobo inyene mme Gentile usọp usọp.’ Ẹdọhọ n̄ko ẹte ke mmọ ẹkeyom ndikara ndutịm ukpep n̄wed man otodo ‘ẹnam mme Gentile ẹtie nte mme unam oro mîsikereke n̄kpọ,’ ye idem edibọp mme usụn̄ tren idakisọn̄ n̄kesịm mme ibuot obio man mbiowo Jew ẹkpekeme ‘ndikan mme andibiọn̄ọ ekededi ebe ke ndisobo mmọ mfep.’

Nte ededi, mme ikọ emi ẹkedi nsu—oro ẹkesude man ẹdemede usua ẹban̄a mme Jew. Mark Jones anamde utom ke Itie Ubon N̄kpọeset Britain ọdọhọ ete: ‘Esen esen nsu emi akasuana ọtọn̄ọde ke Russia,’ ebiet emi ẹkebemde iso ẹmịn̄ enye ke n̄wedmbụk n̄kpọntịbe ke 1903. Enye ama esịm The Times eke London ke May 8, 1920. Ke se ibede isua kiet ke ukperedem, The Times ama ayarade ete ke uwetn̄kpọ oro ekedi nsu. Kan̄a ke emi, ẹma ẹnanam ibak. Jones ọdọhọ ete: ‘Ọsọsọn̄ ndikpan mme utọ nsu emi ndisuana.’ Ndondo oro mme owo ẹnyịmede mmọ, mme nsu emi ẹsisụn̄ọ ke ata ndiọi edinịm ke akpanikọ—ediwak ini ẹsan̄ade ye ndiọi utịp, nte mbụk ọyọhọ isua ikie 20 owụtde.—Mme N̄ke 6:16-19.

Se Ẹnịmde ke Akpanikọ ye Se Idide Akpanikọ

Nte ededi, owo ekeme ndinyene mme ukwan̄ edinịm ke akpanikọ ye unana edidi se ẹbian̄ade-bian̄a. Ndusụk ini nnyịn imesikam ida n̄kpọ ke usụn̄ efen. Owo ifan̄ ikpa n̄kpa nsek ke ntak edinam se mmọ ẹkekerede ke enen? N̄ko, ediwak ini nnyịn isinịm n̄kpọ ke akpanikọ n̄kukụre koro iyomde ndinịm n̄kpọ oro ke akpanikọ.  Prọfesọ kiet ọdọhọ ke idem ntaifiọk “ẹsiwak ndima mme ekikere mmọ.” Mme edinịm ke akpanikọ mmọ ẹsinam mmọ ẹkûkeme ndibiere n̄kpọ ye unana edikụt ndudue. Ekem mmọ ẹkeme ndibiat ofụri ini uwem mmọ ke ikpîkpu ẹdomode ndisọn̄ọ mme ukwan̄ edinịm ke akpanikọ.—Jeremiah 17:9.

Ukem n̄kpọ oro etịbe ye mme edinịm ke akpanikọ eke ido ukpono—emi ẹnen̄erede ẹdu ke ntuaha. (1 Timothy 4:1; 2 Timothy 4:3, 4) Owo kiet enyene ọkpọsọn̄ mbuọtidem ke Abasi. Owo en̄wen ete ke owo oro n̄kukụre ọbuọt idem ke se mînyeneke nsọn̄ọ. Owo kiet enịm ke akpanikọ ke afo emenyene ukpọn̄ eke mîkemeke ndikpa. Owo en̄wen enịm ete ke ini afo akpade ke afo udụhe aba uwem. Nte an̄wan̄ade, kpukpru edinịm ke akpanikọ oro ẹdude ke ntuaha nte mmọ emi ikemeke ndidi akpanikọ. Do, nte idịghe edinam owụtde eti ibuot afo nditịm n̄kụt ke se imọ inịmde ke akpanikọ enen̄ede edi akpanikọ inyụn̄ idịghe sụk se imọ iyomde ndinịm ke akpanikọ? (Mme N̄ke 1:5) Didie ke afo ekeme ndinam oro? Ibuotikọ oro etienede oyodụn̄ọde ibuot nneme emi.

[Ndise ke page 3]

Ibuotikọ 1921 oro akayarade “Protocols of the Learned Elders of Zion”