Ẹkûkpa Mba ke Edinam Eti N̄kpọ
Ẹkûkpa Mba ke Edinam Eti N̄kpọ
“Ẹyak ikûkpa mba ke edinam eti n̄kpọ; koro ke edikem ini nnyịn iyọdọk mbun̄wụm, edieke nnyịn mîyakke idem emem nnyịn.”—GALATIA 6:9.
1, 2. (a) Ntak emi ndinam n̄kpọ Abasi oyomde ime? (b) Didie ke Abraham ekenyene ime, ndien nso ikan̄wam enye ndinam ntre?
NTE Mme Ntiense Jehovah, nnyịn imokop idatesịt ndinam uduak Abasi. Nnyịn n̄ko imokụt nduọkodudu ke ndikọn̄ọ “ọkpọnọ” edidi mbet. (Matthew 11:29) Nte ededi, ndinam n̄kpọ Jehovah ye Christ isidịghe mmemmem n̄kpọ kpukpru ini. Apostle Paul ama anam emi an̄wan̄a ke ini ekesịnde udọn̄ ọnọ mme ekemmọ Christian ete: “Ana nte mbufo ẹnyene ime man ẹbọ se Abasi ọkọn̄wọn̄ọde, ke ẹma ẹkenam se Enye amade.” (Mme Hebrew 10:36) Oyom ime koro ndinam n̄kpọ Abasi ekeme ndidi n̄kpọ-ata.
2 Uwem Abraham enen̄ede owụt nte ke oro edi akpanikọ. Ediwak ini enye ama osobo n̄kpọsọn̄ ubiere ye mme idaha oro ẹkamade mfịghe. Ndidọhọ enye ọkpọn̄ inem uwem ke Ur ekedi ntọn̄ọ kpọt. Ikebịghike-bịghi enye ama osobo akan̄, usua otode mbọhọidụn̄, akayak nsịn̄ enye nditaba n̄wan esie, osobo usua otode ndusụk iman, ye ibak otode ekọn̄. Ikpọ idomo ke ẹkedi ke iso. Edi Abraham ikedehede ikpa mba ke edinam eti n̄kpọ. Emi edi n̄wọrọnda ke ini afo etide ete ke enye ikenyeneke ofụri Ikọ Abasi, nte nnyịn inyenede mfịn. Edi, eyịghe idụhe nte ke enye ama enyene ifiọk aban̄a akpa ntịn̄nnịm ikọ, oro Abasi ọkọdọhọde ete: “Nyonyụn̄ nsịn usua ke ufọt fo ye n̄wan, ye ke ufọt ubon [“mfri,” NW] fo ye [“mfri,” NW] esie.” (Genesis 3:15) Nte enye emi Mfri ediwọrọde oto, Abraham nte ido edide edidi akpan asua Satan. Nte eyịghe mîdụhe, ndifiọk emi ama an̄wam Abraham ndiyọ mme idomo esie ke idatesịt.
3. (a) Ntak emi ikọt Jehovah mfịn ẹkpedoride enyịn ndikụt ukụt? (b) Nso nsịnudọn̄ ke Galatia 6:9 ọnọ nnyịn?
3 Ikọt Jehovah mfịn ẹkpenyene n̄ko ndidori enyịn ndikụk ukụt. (1 Peter 1:6, 7) Kamse, Ediyarade 12:17 ọtọt nnyịn ete ke Satan ke ‘an̄wana ekọn̄’ ye nsụhọ oro ẹyetde aran. Ke ntak n̄kpet n̄kpet itie ebuana mmọ ye mbon oro ẹyetde aran, “mme erọn̄ en̄wen” ẹdi iso en̄wan ẹnọ iyatesịt Satan kpasụk ntre. (John 10:16) Ke ẹsiode ubiọn̄ọ oro mme Christian ẹkemede ndisobo ke an̄wan̄wa utom ukwọrọikọ mmọ ẹfep, mmọ n̄ko ẹkeme ndisobo mme mfịghe oro ẹtiede idomo idomo ke ọkpọkpọ uwem mmọ. Paul eteme nnyịn ete: “Ẹyak ikûkpa mba ke edinam eti n̄kpọ; koro ke edikem ini nnyịn iyọdọk mbun̄wụm, edieke nnyịn mîyakke idem emem nnyịn.” (Galatia 6:9) Ih, okposụkedi Satan aduakde ndibiat mbuọtidem nnyịn, ana nnyịn in̄wana ye enye, isọn̄ọde ida ke mbuọtidem. (1 Peter 5:8, 9) Nso ikeme ndidi utịp usụn̄ uwem edinam akpanikọ nnyịn? James 1:2, 3 anam an̄wan̄a ete: “Ẹnịm ẹte edi n̄kpọ ọyọhọ idatesịt, nditọ-ete mi, ke ini nsio-nsio idomo ẹsịmde mbufo; ke ẹfiọkde ẹte mbuọtidem mbufo emi ẹma ẹdomo ẹwụt anam ime ọwọrọ.”
En̄wan Iso ye Iso
4. Didie ke Satan ada en̄wan iso ye iso anam n̄kpọ ke ukeme esie ndibiat nsọn̄ọnda ikọt Abasi?
4 Uwem Abraham enen̄ede owụt “nsio-nsio idomo” oro Christian ekemede ndisobo mfịn. Ke uwụtn̄kpọ, enye ekenyene ndin̄wana ye mbonekọn̄ Shinar. (Genesis 14:11-16) Idịghe n̄kpọ n̄kpaidem Satan akade iso ndida en̄wan iso ye iso nte ukọbọ. Toto ke utịt Ekọn̄ Ererimbot II, ukara omodori ukpan ke utom unọ ukpep Christian eke Mme Ntiense Jehovah ke ediwak idụt. Ẹtọt afai oro mme Christian ke Angola ẹkesobode ke ubọk mbon usua ke 2001 Yearbook of Jehovah’s Witnesses. Ke ẹkọn̄de mbuọtidem ke Jehovah, nditọete nnyịn ke mme utọ idụt oro ẹnen̄ede ẹsịn ndikpa mba! Mmọ ẹnam n̄kpọ ẹban̄a emi ke ndida mbufiọk n̄ka iso ke utom ukwọrọikọ, idịghe ke ndinam n̄kpọ afai afai m̀mê ndisọn̄ ibuot.—Matthew 24:14.
5. Didie ke ẹkeme ndikọbọ mme uyen Christian ke ufọkn̄wed?
5 Nte ededi, ukọbọ ekeme nditre ndibuana afai. Ke akpatre ẹma ẹnọ Abraham nditọiren iba—Ishmael ye Isaac. Genesis 21:8-12 asian nnyịn ete ke idaha kiet Ishmael ama ‘asak’ Isaac nsahi. Ke leta oro enye ekewetde ọnọ ẹsọk mbon Galatia, Paul owụt ete ke emi ama ebe mbre nditọwọn̄, koro enye etịn̄de aban̄a Ishmael nte ọkọkọbọde Isaac! (Galatia 4:29) Nte enende ẹkeme ndikot nsahi otode mme nsan̄a ufọkn̄wed ye mme uyat uyat ikọ ẹtode mme andibiọn̄ọ, ukọbọ. Uyen Christian oro ekerede Ryan eti ndutụhọ oro enye ọkọbọde ke ubọk mme nsan̄a ubet ukpepn̄kpọ ete: “Ndiwat minit 15 ke bọs n̄ka nnyụn̄ nnyọn̄ ufọkn̄wed eketie nte ediwak hour sia ẹkesitịn̄de uyat uyat ikọ ye ami. Mmọ ẹma ẹda ufatn̄kpọ oro mmọ ẹkedade ukwakikan̄ sika ẹfọp ẹdian mi ke idem.” Nso ikedi ntak ibak ibak edinam emi? “Ukpep ukara Abasi oro n̄kọbọde ama anam mi n̄kpụhọde ye mme uyen eken ke ufọkn̄wed.” Edi, ye un̄wam ete ye eka esie, Ryan ama ekeme ndiyọ ke edinam akpanikọ. Mme uyen, ndi nsahi ẹtode ubọkn̄ka mbufo anam mbufo ẹkop mmemidem? Ọfọn, ẹkûkpa mba! Ebede ke ndiyọ ke edinam akpanikọ, mbufo ẹyekụt nte mme ikọ Jesus ẹsude: “Ọfọfọn ọnọ mbufo ke adan̄aemi owo ẹdisụn̄ide mbufo, ẹnyụn̄ ẹnam mbufo isịn-enyịn, ẹnyụn̄ ẹtịn̄ kpukpru orụk idiọk-n̄kpọ ke nsu ẹdian mbufo kaban̄a Mi.”—Matthew 5:11.
Mme Editịmede Esịt eke Usen ke Usen
6. Mme n̄kpọ ewe ikeme ndibiat itie ebuana mme ekemmọ Christian mfịn?
6 Ata ediwak ke otu idomo oro nnyịn isobode mfịn ẹbuana mme ọsọ editịmede esịt eke usen ke usen. Abraham ke idemesie ekenyene ndiyọ nsịn̄ede oro okodude ke ufọt mme ekpeme ufene esie ye mme ekpeme ufene Lot, eyen eyeneka esie. (Genesis 13:5-7) Ke ukem usụn̄ oro mfịn, utọk ye n̄kpri ufụp ẹkeme ndibiat itie ebuana ndien ẹkam ẹkeme nditịmede emem ke esop. “Ọtọ nte idiọk ufụp ye ndomo-idem odude, do ke ndutịme ye kpukpru idiọk ido ẹdu.” (James 3:16) Edi akpan n̄kpọ didie ntem ete nnyịn ikûkpa mba edi inam emem ada itie ntan̄idem, nte Abraham akanamde, inyụn̄ iyom ufọn mbon efen!—1 Corinth 13:5; James 3:17.
7. (a) Nso ke owo akpanam edieke ekemmọ Christian eduede enye? (b) Didie ke Abraham ekenịm eti uwụtn̄kpọ ke ndika iso nnyene eti itie ebuana ye mbon en̄wen?
7 Nditie emem emem ekeme ndidi n̄kpọ-ata ke ini nnyịn ikerede ke ekemmọ andinịm ke akpanikọ anam n̄kpọ ye nnyịn idiọk idiọk. Mme N̄ke 12:18 ọdọhọ ete: “Enyene mmọ eke ẹken̄de inua nte ofụt ekịmde.” Mme ikọ oro owo mîtịmke ikere, idem ọkpọkọm ẹtịn̄ ke mbubru, ẹkeme ndinen̄ede mbiak. Ubiak oro esikam enen̄ede okpon edieke nnyịn ikerede ke ẹbiat nnyịn enyịn̄ m̀mê ẹtịn̄ idiọk ikọedem ẹban̄a nnyịn. (Psalm 6:6, 7) Edi Christian ikemeke ndiyak iyatesịt anam enye akpa mba! Edieke afo odude ke utọ idaha oro, nam usio-ukot ndinen̄ede se ikwan̄ade ebe ke ndineme nneme ke usụn̄ owụtde mfọnido ye owo oro eduede fi. (Matthew 5:23, 24; Ephesus 4:26) Nyịme ndifen nnọ owo oro. (Colossae 3:13) Ebede ke ndifre mban̄a utọk, nnyịn iyanam edi mmemmem ndikọk unan eke ntụk nnyịn nnyụn̄ nnen̄ede itie ebuana nnyịn ye eyenete nnyịn. Abraham ikesịnke utọk ekededi oro enye ọkọtọhọde ye Lot ke esịt. Kamse, Abraham ama efehe akanyan̄a Lot ye ufọk esie!—Genesis 14:12-16.
Mme Idomo Oro Enyene-Idem Edide Ntak
8. (a) Didie ke mme Christian ẹkeme ‘ndida ediwak mfụhọ nnọ idemmọ unan’? (b) Ntak emi Abraham ekekemede ndinyene ekikere adade ukem ukem mban̄a mme n̄kpọ obụkidem?
8 Nte ẹnyịmede, enyene-idem esidi ntak ndusụk idomo. Ke uwụtn̄kpọ, Jesus ama ọdọhọ mme anditiene enye ete: “Ẹkûbon n̄kpọ-uto ẹnịm ẹnọ idem ke isọn̄, ke ọtọ nte uta-n̄kpọ ye n̄karafan̄ ẹbiatde n̄kpọ, inọ ẹnyụn̄ ẹbụn̄de, ẹdụk, ẹyịp.” (Matthew 6:19) Edi, ndusụk nditọete “ẹda ediwak mfụhọ ẹnọ idem mmọ unan” ebe ke ndinam mme udọn̄ n̄kpọ obụkidem ẹbem mme udọn̄ n̄kpọ eke spirit iso. (1 Timothy 6:9, 10) Abraham ama enyịme ndiyak mme n̄kpọ obụkidem ẹtak man enem Abasi esịt. “Oto mbuọtidem enye akabade edi odudụn̄ ke isọn̄ emi Abasi ọkọn̄wọn̄ọde ọnọ enye, nte owo adan̄ ke isọn̄ eke mînyeneke enye; onyụn̄ odụn̄ ntre ke tent ye Isaac ye Jacob, emi ẹtienede enye ẹdi mme andinyene un̄wọn̄ọ oro: koro enye odoride enyịn ke obio eke enyenede nsọn̄ọnda, eke Andibọp ye Andinam Enye [edide] Abasi.” (Mme Hebrew 11:9, 10) Mbuọtidem Abraham ke “obio” ini iso, m̀mê ukara Abasi, ama an̄wam enye okûbuọt idem ke inyene. Nte ikpowụtke ifiọk nnyịn ndinam kpa ntre?
9, 10. (a) Didie ke udọn̄ uwọrọiso ekeme ndidi idomo? (b) Mfịn didie ke eyenete ekeme ndikama idem nte “enye emi ekpride akan”?
9 Kere ban̄a afan̄ efen. Bible ọnọ ọkpọsọn̄ item emi: “Edieke owo abatde idem ke n̄kpọ ke ini enye mîdịghe n̄kpọ, enye ababian̄a idem.” (Galatia 6:3) N̄ko-n̄ko, ẹteme nnyịn ẹte ‘ikûnam baba n̄kpọ kiet ke ndomo-idem m̀mê ke ntan̄-idem, edi inam ye nsụhọde-esịt.’ (Philippi 2:3) Ndusụk owo ẹsida idomo ẹsọk idemmọ ebe ke nditre ndinam item emi. Ke ẹdide se udọn̄ uwọrọiso utu ke udọn̄ edinam “eti utom” onụkde, mmọ ẹkabade ẹkop mmemidem ẹnyụn̄ ẹkop idiọkesịt ke ini owo mînọhọ mmọ ifetutom ke esop.—1 Timothy 3:1.
10 Abraham ama enịm eti uwụtn̄kpọ ke nditre ‘ndikere ete idi n̄kpọ akan nte ekpekerede.’ (Rome 12:3) Ke ini enye okosobode ye Melchizedek, Abraham ikanamke n̄kpọ nte n̄kpọ eke eti idaha esie ye Abasi akanamde enye ọfọn akan. Ke edide isio, enye ama enyịme akamba itie Melchizedek nte oku ebe ke ndinọ enye ọyọhọ mbak duop. (Mme Hebrew 7:4-7) Kpasụk ntre mme Christian mfịn ẹkpenyene ndinyịme ndikama idem nte ‘mbon emi ẹkpride ẹkan’ ikponyụn̄ iyomke uwọrọiso. (Luke 9:48) Edieke etiede nte ke mbon oro ẹdade usụn̄ ke esop inọhọ fi ndusụk ifetutom, dụn̄ọde idemfo ye esịt akpanikọ man ọfiọk m̀mê nso ukpụhọde ke afo ekeme ndinam ke uwem fo m̀mê ke usụn̄ nte afo esisede aban̄a mme n̄kpọ. Utu ke ndiyat esịt mban̄a mme ifetutom oro afo mûnyeneke, da ifetutom oro afo enyenede nam n̄kpọ ọyọhọ ọyọhọ—ifet edin̄wam mbon efen ẹdi ẹdifiọk Jehovah. Ih, “ẹsụhọde idem . . . ke idak ọkpọsọn̄ ubọk Abasi, man Enye ekpemenede mbufo enịm ke enyọn̄ ke edikem ini.”—1 Peter 5:6.
Ndibuọt Idem ke Se Enyịn Mîkwe
11, 12. (a) Ntak emi ndusụk owo ke esop ẹkemede ndifre nte ini edide usọp usọp? (b) Didie ke Abraham ekenịm eti uwụtn̄kpọ ke ndikọn̄ mbuọtidem ke mme un̄wọn̄ọ Abasi ke ofụri uwem esie?
11 Idomo efen ekeme ndibuana idiọk editịm n̄kpọ emi nditie nte ebịghi ndisịm utịt. Nte 2 Peter 3:12 ọdọhọde, mme Christian ẹnyene ‘nditie mbet nnyụn̄ nsọn̄ọ nyom edidi Usen Abasi.’ Nte ededi, ediwak owo ẹmetie ẹbet “Usen” emi ke ediwak isua, ndusụk owo ẹtie ẹbet ke ediwak iduọk isua. Nte utịp, ndusụk owo ẹkeme ndikop mmemidem ẹnyụn̄ ẹfre nte ini edide usọp usọp.
12 Ini kiet efen, kere ban̄a uwụtn̄kpọ Abraham. Ke ofụri uwem esie enye ọkọkọn̄ mbuọtidem ke mme un̄wọn̄ọ Abasi, idem okposụkedi mîketiehe nte ke kpukpru ẹyesu ke eyouwem esie. Edi akpanikọ, enye ama odu uwem ebịghi ekem ndikụt nte Isaac eyen esie ọkọride okpon. Edi ayada ediwak isua ikie mbemiso nditọ Abraham ẹkemede ndiwak nte “ntantafiọn̄ enyọn̄” m̀mê “ntan emi odude ke mben inyan̄.” (Genesis 22:17) Nte ededi, Abraham ikayatke esịt m̀mê ndikop mmemidem. Ntem apostle Paul ama etịn̄ aban̄a Abraham ye mme ete-ekpụk eken ete: “Mmọ emi kpukpru ẹkpan̄a ke mbuọtidem; mmọ ibọhọ se ẹken̄wọn̄ọde ẹnọ mmọ, edi ẹda nsan-nsan ẹkụt, ẹnyụn̄ ẹdara mme un̄wọn̄ọ oro, ẹnyụn̄ ẹnyịme ẹte mme imọ idi isen owo ye odudụn̄ ke isọn̄.”—Mme Hebrew 11:13.
13. (a) Didie ke mme Christian mfịn ẹbiet mme “odudụn̄”? (b) Ntak emi Jehovah edidade utịt ọsọk editịm n̄kpọ emi?
13 Edieke Abraham ekekemede ndikọn̄ uwem esie ke mme un̄wọn̄ọ oro edisu mmọ ekedide “nsan-nsan,” adan̄a didie akan oro ke nnyịn ikpanam oro mfịn, emi edisu mmọ enen̄erede ekpere! Ukem nte Abraham, ana nnyịn ibat idem nnyịn nte mme “odudụn̄” ke editịm n̄kpọ Satan, itrede ndisịn idem ke usụn̄ uwem nnam-se-mmade. Nte ido edide, nnyịn ikpama “utịt kpukpru n̄kpọ” emi edi, idịghe ndikpekpere kpọt. (1 Peter 4:7) Eyedi nnyịn imenyene ọkpọsọn̄ mfịna unana nsọn̄idem. Mîdịghe mfịghe ndutịm uforo ekeme ndinen̄ede mfịk nnyịn. Nte ededi, ana nnyịn iti ite ke Jehovah ididaha utịt idi man osio nnyịn ke mme mfụhọ mfụhọ idaha kpọt, edi edida idi man anam enyịn̄ esie asana. (Ezekiel 36:23; Matthew 6:9, 10) Utịt ididịghe ke ini oro nnyịn iyomde, edi edidi ke ini oro enen̄erede odot ye mme uduak Jehovah.
14. Didie ke anyanime Abasi enyene ufọn ọnọ mme Christian mfịn?
14 Ti, n̄ko, ete ke “Ọbọn̄ iduọnke ke edinam un̄wọn̄ọ Esie, ke ido nte ndusụk owo ẹkerede ẹte, Enye ọduọn; Enye akam enyene anyan ime ye mbufo, inyụn̄ iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Tịm fiọk, Abasi “enyene anyan ime ye mbufo”—mme andibuana ke esop Christian. (Sịghisịghi ubọkn̄wed edi eke nnyịn.) Etie nte ndusụk nnyịn imoyom ini efen efen ndinam mme ukpụhọde man ‘enye ekpesịm nnyịn nte itiede ke emem, inana ntọi, inyụn̄ inana ndo.’ (2 Peter 3:14) Do, nte nnyịn ikpowụtke esịtekọm nte ke Abasi enyene utọ anyanime oro?
Ndikop Idatesịt kpa ye Mme N̄kpọ Ubiọn̄ọ
15. Didie ke Jesus ekekeme ndika iso n̄kop idatesịt kpa ye mme idomo, ndien didie ke ndikpebe enye enyene ufọn ọnọ mme Christian mfịn?
15 Uwem Abraham ekpep mme Christian ediwak n̄kpọ mfịn. Enye ikenyeneke mbuọtidem kpọt, edi ama enyene ime, mbufiọk, uko, ye ima unana ibụk. Enye ekenịm utuakibuot Jehovah akpa ke uwem esie. Nte ededi, ana iti ite ke Jesus Christ ekenịm akakan uwụtn̄kpọ ọnọ nnyịn ndikpebe. Enye n̄ko ama osobo ata ediwak idomo, edi ke kpukpru idomo oro, enye ikọduọkke idatesịt esie. Ntak-a? Koro enye okowụkde ekikere esie ke idotenyịn oro okodude ke iso. (Mme Hebrew 12:2, 3) Ntem Paul ama ọbọn̄ akam ete: “Abasi emi ọnọde ime ye ndọn̄esịt akpakam anam mbufo ẹnyene ke otu idem mbufo ukem edu ukere n̄kpọ oro Christ Jesus ekenyenede.” (Rome 15:5, NW) Ye nnennen edu ukere n̄kpọ, nnyịn imekeme ndikop idatesịt kpa ye mme n̄kpọ ubiọn̄ọ oro Satan ekemede ndinịm nnyịn ke iso.
16. Nso ke nnyịn ikeme ndinam ke ini etiede nte mme mfịna nnyịn ẹmọn̄ ẹkan nnyịn ubọk?
16 Ke ini etiede nte ke mme mfịna ẹmọn̄ ẹkan fi ubọk, ti ete ke Jehovah ama fi kpa nte enye akamade Abraham. Enye oyom fi okụt unen. (Philippi 1:6) Nyene ọyọhọ mbuọtidem ke Jehovah, enịmde ke akpanikọ ete ke ‘enye idiyakke ẹdomo fi ẹbe se ukeme fo edide; edi Enye ayasiak usụn̄ ubọhọ ọnọ fi ke ufọt idomo, man afo ekeme ndibiom enye.’ (1 Corinth 10:13) Kọri edu edikot Ikọ Abasi ke usen ke usen. (Psalm 1:2) Kọbọ ke edibọn̄ akam, eben̄ede Jehovah ete an̄wam fi man ọyọ. (Philippi 4:6) Enye ‘ayayak Edisana Spirit ọnọ mmọ eke ẹben̄ede Enye.’ (Luke 11:13) Bọ ufọn to mme n̄kpọ oro Jehovah ọnọde ndibọk fi ke n̄kan̄ eke spirit, utọ nte mme n̄wed nnyịn oro ẹkọn̄ọde ke Bible. N̄ko, yom un̄wam to nditọete. (1 Peter 2:17) Dụk mme mbono esop Christian kpukpru ini, koro edi do ke afo edibọ nsịnudọn̄ oro afo oyomde man ọyọ. (Mme Hebrew 10:24, 25) Dat esịt ke ndifiọk nte ke ime ada esịm idaha oro Abasi enyịmede ye nte ke edinam akpanikọ fo adat enye esịt!—Mme N̄ke 27:11; Rome 5:3-5, NW.
17. Ntak emi mme Christian mîduọkke idotenyịn?
17 Abasi ama ama Abraham nte “ufan” esie. (James 2:23) Kpa ye oro, uwem Abraham ọkọyọhọ ye udịm udịm idomo ye ukụt oro ẹkamade mfịghe. Ke ntre mme Christian ẹkeme ndidori enyịn ndisobo ukem oro ke idiọk “ukperedem ini” emi. Ke akpanikọ, Bible ọtọt nnyịn ete ke “ndiọi owo ye mbon abian̄a ẹyedọdiọn̄ ẹdiọk ẹka iso.” (2 Timothy 3:1, 13) Utu ke ndiduọk idotenyịn, fiọk ete ke mme mfịghe oro nnyịn isobode ẹdi uyarade nte ke utịt idiọk editịm n̄kpọ Satan ekpere. Edi Jesus eti nnyịn ete ke “ẹyenyan̄a owo eke edimede ime tutu esịm akpatre.” (Matthew 24:13) Ntre, ‘kûkpa mba ke edinam eti n̄kpọ!’ Kpebe Abraham, ndien du ke otu mmọ emi “ẹkesan̄ade ke mbuọtidem ye ime ẹbọ mme un̄wọn̄ọ Abasi ẹnyene.”—Mme Hebrew 6:12.
Nte Afo Ama Etịm Ọfiọk?
• Ntak emi ikọt Jehovah mfịn ẹkpedoride enyịn ẹban̄a idomo ye ukụt?
• Ke mme usụn̄ ewe ke Satan ekeme ndida en̄wan iso ye iso nnam n̄kpọ?
• Didie ke ẹkpebiere utọk ke otu mme Christian?
• Didie ke ntan̄idem ye edida idem ke n̄kpọ n̄kaha ẹkeme ndidi idomo?
• Ke usụn̄ ewe ke Abraham ekenịm eti uwụtn̄kpọ ke nditie mbet mme un̄wọn̄ọ Abasi ndisu?
[Mme Mbụme Ukpepn̄kpọ]
[Ndise ke page 26]
Ediwak uyen Christian ẹsobo ukọbọ, ẹdide se mme ubọkn̄ka mmọ ẹsakde
[Ndise ke page 29]
Ke eyo Abraham edisu un̄wọn̄ọ Abasi ekedi “nsan-nsan,” edi enye ama ayak mmọ ẹkara uwem esie