N̄wed Oro Ata Ediwak N̄kparawa Owo Mînyeneke Udọn̄ Iban̄a

“N̄KEME didie ndifiọk m̀mê Bible enen̄ede edi Ikọ Abasi? Ami nnyeneke udọn̄ mban̄a enye nte n̄wed,” ntem ke n̄kaiferi ekerede Beate ọkọdọhọ.

Ke Germany, ebiet emi Beate odụn̄de, ata ediwak n̄kparawa owo ẹnyene ukem ekikere esie; ntem, mmọ idaha edikot Bible ke akpan n̄kpọ. Ndụn̄ọde oro ẹkenamde do ke ndondo emi ama ayarade nte ke n̄kpọ nte mbahade 1 eke ikie ke otu n̄kparawa owo ẹsikot Bible kpukpru ini, mbahade 2 eke ikie ẹsikot ediwak ini, mbahade 19 eke ikie ẹsikot ntomo ntomo, se ikperede ndisịm mbahade 80 eke ikie isikam ikotke-kot. Eyedi ibat emi edi ukem ke mme idụt en̄wen, ekeme ndidi ntre n̄ko ke ebiet oro afo odụn̄de. Nte an̄wan̄ade, Bible edi n̄wed oro ata ediwak n̄kparawa owo mînyeneke udọn̄ iban̄a.

Do, eyịghe idụhe unana ifiọk Bible edide ọsọ n̄kpọ ke otu n̄kparawa owo! Ke ntọn̄ọ ntọn̄ọ isua 2000, n̄wedmbụk n̄kpọntịbe oro Lausitzer Rundschau ama ọtọt aban̄a ndụn̄ọde oro akayararede ibat owo oro ẹmehede ye Ibet Duop ẹnyụn̄ ẹdade mmọ nte ndausụn̄ ke uwem. Mbahade 67 eke ikie ke otu mbon oro ẹma ẹkebe isua 60 ke emana ẹma ẹfiọk ibet oro ẹkenyụn̄ ẹyak mmọ ẹda mmọ usụn̄; ke otu mbon oro mîsịmke kan̄a isua 30 ke emana, ibat oro ekedi n̄kpasịp mbahade 28 eke ikie. Ih, ye ediwak n̄kparawa owo, Ikọ Abasi edi afan̄ oro mmọ mîmeheke.

Ndusụk Mmọ Ẹnyene Isio Isio Ekikere

Ke n̄kan̄ eken, ke ofụri ererimbot, ediwak miliọn n̄kparawa owo ẹdu oro ẹdade Ikọ Abasi ke ata ọsọn̄urua n̄kpọ. Ke uwụtn̄kpọ, Alexander edi isua 19 ke emana, esinyụn̄ okot Bible kpukpru usenubọk mbemiso akade utom. Enye ọdọhọ ete: “N̄kwe usụn̄ oro ọfọnde akan emi ndida ntọn̄ọ usen.” Sandra anam edi ido ndikot itie kiet ke Bible kpukpru mbubịteyo. Enye anam an̄wan̄a ete: “Emi amakabade edi ubak edinam mi eke usen ke usen.” Ndien Julia, oro edide isua 13 ke emana, ama ọtọtọn̄ọ ido edikot ke nsụhọde n̄kaha ibuot Bible kiet mbemiso odụkde idap. “Mmenen̄ede n̄kop inem ndinam emi, ndien mmoyom ndika iso ke edinam oro.”

Ekikere ewe enen onyụn̄ owụt ifiọk? Nte Bible enen̄ede odot se ẹkpekotde? Ndi enye enyene ufọn ọnọ n̄kparawa owo? Afo ekere didie?