Ndinyene Edikan ke Akwa Esop Ibet Ukara

MME NTIENSE JEHOVAH ke Germany ẹma ẹnyene n̄wọrọnda edikan ke Akwa Esop Ibet Ukara ke Karlsruhe. Ntem mmọ ẹma ẹnam akpan usio-ukot ke se iban̄ade edinam ẹnọ mmọ unyịme.

Mme Ntiense Jehovah ẹkwọrọ ikọ ke Germany ke se ibede isua 100. Mmọ ẹma ẹbọhọ ọkpọsọn̄ ukọbọ ke ubọk ukara ufịk iba ke ọyọhọ isua ikie 20—ukara Nazi ye ukara Communist. Toto ke 1990, Mme Ntiense ẹdomo ndibọ unyịme nte n̄ka oro ibet enyịmede. Ke etienede utebeikpe iba ye ukwan̄ikpe kiet, Mme Ntiense ẹma ẹsion̄o ikpe ẹka Akwa Esop Ibet Ukara, emi ọkọtọtde ubiereikpe esie ke December 19, 2000.

Ubiereikpe Uyo Kiet ke Ufọn Mme Ntiense Jehovah

Mme ebiereikpe mbitiaba ke esop oro ẹma ẹbiere ikpe oro ke ufọn Mme Ntiense. Mme ebiereikpe oro ẹma ẹbiat ubiereikpe Akwa Esop Ndutịm Ukara ẹnyụn̄ ẹteme esop oro ẹte afiak ekere aban̄a eben̄e Mme Ntiense.

Akwa Esop Ibet Ukara ama ada ifet oro ndinam akpan ebuana oro odude ke ufọt Ukara ye mme otu ido ukpono an̄wan̄a. Ke ofụri ofụri, “ẹda edinam, idịghe mme ukpepn̄kpọ, ẹbiere” idaha ido ukpono.

Esop oro n̄ko ama etịn̄ ete ke ini Mme Ntiense ẹnamde “edida san̄asan̄a Christian,” mmọ “isin̄wanake ye mme edumbet ukara mbio obio” isinyụn̄ “iyomke ndida orụk ukara efen n̄kpụhọ ye ukara mbio obio.” Ntem, nditre ndibuana ke umekowo ukaraidem ikpanamke ẹtre ndinọ Mme Ntiense unyịme nte ekemde ye ibet.—John 18:36; Rome 13:1.

Esop oro ama aka iso ndiwụt nte ke ndusụk ini andinịm ke akpanikọ—edide edi Ntiense m̀mê owo ido ukpono efen—ekeme ndikụt idemesie ke idaha oro mme n̄kpọ oro Ukara oyomde ẹtuahade ye mme n̄kpọ oro ido ukpono esie oyomde. Edieke owo oro etienede ubieresịt esie ebe ke “ndisụk ibuot nnọ mme ukpepn̄kpọ ido ukpono utu ke ibet ukara,” Ukara ekeme ndise emi nte nnennen n̄kpọ ye se ikemde ye ifụre ido ukpono.—Utom 5:29.

Ubiereikpe esop oro ekedi akpan ibuotikọ ke mme n̄wedmbụk n̄kpọntịbe. Idụhe n̄wedmbụk n̄kpọntịbe ndomokiet ke Germany oro owo mîkesịnke ntọt aban̄ade ubiereikpe oro. Kpukpru ikpọ ufọkutom usuanetop ekebe ndise ye ekebe ukopikọ ẹma ẹsuan etop emi mîdịghe ẹnam ndụn̄ọde ẹban̄a enye. Akananam owo itan̄ake enyịn̄ Jehovah ntatara ntatara ntem ke Germany.

[Ebiet Ẹdade Ndise Ẹto ke page 8]

AP Photo/Daniel Maurer