Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Ntak odotde ẹkere ẹban̄a mme mbụme oro ẹbụpde ke Job ibuot 38 mfịn?

Ediwak ke otu mme utịben̄kpọ oro Abasi okodụride ntịn̄enyịn owụt ikam itịmke in̄wan̄a ntaifiọk eyomfịn. Mmọ emi ẹsịne nte odudu emi odụride n̄kpọ aka isọn̄ anamde ererimbot nnyịn odu ke nnennen itie, se un̄wana enen̄erede edi, ntak emi anana-ibat orụk mbai snow ẹdude, nte edịm esibohode, ye nte odudu enyenede ebuana ke obuma nditop.—4/15, page 4-11.

• Mme ewe uwụtn̄kpọ Bible ẹkeme ndin̄wam nnyịn ndikan mfụhọ?

Asaph, Baruch, ye Naomi ẹma ẹkop mmemidem m̀mê mfụhọ, ndien n̄wetnnịm n̄kpọ N̄wed Abasi oro aban̄ade nte mmọ ẹkekande mme utọ idaha oro uforo uforo ekeme ndin̄wam nnyịn.—4/15, page 22-24.

• Nso idi ndusụk nti usụn̄ ndin̄wam mme ebeakpa Christian?

Mme ufan ẹkeme ndinọ un̄wam in̄wan̄-in̄wan̄ ye ke mfọnido. Mbonubon m̀mê mbon en̄wen ẹkeme ndidu ke idaha ndinọ un̄wam okụk m̀mê un̄wam n̄kpọ obụkidem, ke ebiet ẹnen̄erede ẹyom un̄wam. Mme ekemmọ Christian n̄ko ẹkeme ndin̄wam ebe ke ndinam ufan ye mmọ, ẹnọde un̄wam eke spirit ye ndọn̄esịt.—5/1, page 5-7.

• Ntak edide akpan n̄kpọ ndidọ “owo Abasi ikpọn̄-ikpọn̄,” nte 1 Corinth 7:39 etemede?

Ndidọ owo oro mînịmke ke akpanikọ esiwak ndikama afanikọn̄. Akan oro, nditiene item Abasi emi edi edinam akpanikọ nnọ Jehovah Abasi. Ke ini nnyịn inamde n̄kpọ ekekem ye Ikọ Abasi, esịt isibiomke nnyịn. (1 John 3:21, 22)—5/15, page 20-21.

• Sia Jehovah edide enye emi ekemede ndifen mme idiọkn̄kpọ nnyịn, ntak emi mme Christian ẹsiyararede ikpọ idiọkn̄kpọ ẹnọ mbiowo esop?

Ih, Christian okpoyom edifen otode Jehovah ke ikpọ idiọkn̄kpọ. (2 Samuel 12:13) Edi kpa nte prọfet Nathan ọkọnọde David un̄wam, mbiowo oro ẹkọride ẹsịm ọyọhọ idaha ke esop ẹkeme ndin̄wam mme anamidiọk oro ẹkabarede esịt. Ndika mbịne mbiowo odu ke n̄kemuyo ye ndausụn̄ ẹnọde ke James 5:14, 15.—6/1, page 31.

• Nso uyarade idu nte ke nnyịn ikpenyene ndise mban̄a nditọakpa ye mme ebeakpa oro ẹdude ke unana?

N̄wetnnịm n̄kpọ owụt nte ke utọ edise mban̄a oro akanam ẹdiọn̄ọ utuakibuot akpanikọ ke otu mme Hebrew eset ye mme akpa Christian. (Exodus 22:22, 23; Galatia 2:9, 10; James 1:27) Apostle Paul ama ọdọn̄ mme in̄wan̄-in̄wan̄ item ke N̄wed Abasi ete mme Christian ẹse ẹban̄a mme ebeakpa oro ẹdude ke unana. (1 Timothy 5:3-16)—6/15, page 9-11.

• Nso idi ukpọhọde inem inem uwem oro enyenede uduak?

Ana nnyịn ikọri inyụn̄ inyene nnennen itie ebuana ye Jehovah, Ete nnyịn eke heaven. Ndikpep Bible edi akpan un̄wam ke ndinam emi.—7/1, page 4-5.

• Ndi owo kiet kiet enyene spirit emi mîkemeke ndikpa oro esikade iso odu uwem ke owo ama akakpa?

Okposụkedi ndusụk owo ẹnịmde nte ke spirit—idịghe ukpọn̄—ikemeke ndikpa, Bible isọn̄ọke ekikere emi. Enye owụt ete ke ini owo akpade, enye afiak ke ntan inyụn̄ idụhe. Edi Abasi omụm ukeme edifiak nnọ owo oro uwem akama, ntre idotenyịn ekededi kaban̄a uwem ini iso, ebe ke ediset ke n̄kpa, esịne Abasi ke ubọk. (Ecclesiastes 12:7)—7/15, page 3-6.

• Daniel okodu m̀mọ̀n̄ ke ini ẹkedomode nditọ Hebrew ita ke unaisọn̄ Dura?

Bible itịn̄ke. Ekeme ndidi ikobiomoke Daniel ndidu do ke ntak idaha esie, mîdịghe ekeme ndidi enye ọkọwọrọ aka utom. Edi nnyịn imekeme ndinyene mbuọtidem nte ke enye ama aka iso anam akpanikọ ọnọ Jehovah.—8/1, page 31.