Devil Idịghe Nsunsu Ekikere

“Ke ofụri Obufa Testament, akamba en̄wan odu ke ufọt odudu Abasi ye odudu eti ido ke n̄kan̄ kiet, ye odudu idiọkn̄kpọ oro Satan adade usụn̄, ke n̄kan̄ eken. Emi idịghe ekikere andiwet Bible kiet m̀mê iba, edi edi eke kpukpru andiwet. . . . Do uyarade oro odude ke Obufa Testament ana in̄wan̄-in̄wan̄. Satan edi ata idiọkowo, oro asuade Abasi ye ikọt Abasi kpukpru ini.”—“The New Bible Dictionary.”

DO, NTAK emi ediwak mbon oro ẹdọhọde nte ibuanade ke Ido Ukpono Christ—ẹnyụn̄ ẹdọhọde nte inịmde Bible ke akpanikọ—mînyịmeke nte ke ata Devil odu? Koro mmọ, ke nditịm ntịn̄, inyịmeke Bible nte Ikọ Abasi. (Jeremiah 8:9) Mmọ ẹdọhọ ẹte ke mme andiwet Bible ẹkewet mme ukpepn̄kpọ akwaifiọk eke mme idụt oro ẹkekande mmọ ẹkụk ke ikonyụn̄ iwetke nnennen akpanikọ otode Abasi. Ke uwụtn̄kpọ, ekpep ukpepn̄kpọ ido ukpono Catholic oro Hans Küng ewet ete: “Mme nsunsu ekikere ẹban̄ade Satan ye  udịm mme devil . . . ẹketo n̄ke mbon Babylon ẹbe ẹdụk akpa Ido Ukpono Mme Jew ẹnyụn̄ ẹto do ẹbe ẹdụk Obufa Testament.”—On Being a Christian.

Edi Bible idịghe ikpîkpu ikọ owo; enye enen̄ede edi Ikọ Abasi eke odudu spirit. Ke ntre, nnyịn idiwụt eti ibuot ke ndida se enye etịn̄de aban̄a Devil ke akpan n̄kpọ.—2 Timothy 3:14-17; 2 Peter 1:20, 21.

Nso Ikedi Ekikere Jesus?

Jesus Christ ama enịm ke akpanikọ ete ke Devil edi ata owo. Idịghe ndusụk idiọkn̄kpọ esịtidem ẹkedomo Jesus. Ata owo oro enye okokotde ke ukperedem “ọbọn̄ ererimbot emi,” okodomo enye. (John 14:30; Matthew 4:1-11) Enye n̄ko ama enịm ke akpanikọ ete ke mme edibotn̄kpọ eke spirit en̄wen ẹnọ Satan ibetedem ke idiọk uduak esie. Enye ama anam mme owo oro ‘ẹkenyenede demon’ ẹkop nsọn̄idem. (Matthew 12:22-28) Idem n̄wed mbon oro mînịmke ke Abasi odu, A Rationalist Encyclopædia etịn̄ aban̄a utịp oro emi enyenede ke ini ọdọhọde ete: “Jesus oro ẹtịn̄de ẹban̄a ke mme Gospel ndinịm ke akpanikọ nte mme devil ẹdu esidi n̄kpọ ubiọn̄ọ kpukpru ini ọnọ mme ekpep ukpepn̄kpọ ido ukpono.” Ke ini Jesus eketịn̄de aban̄a Devil ye mme demon esie, enye n̄kukụre iketịn̄ke iban̄a mme nsunsu ekikere oro ẹkedade ẹto n̄ke mbon Babylon. Enye ama ọfiọk ete ke mmọ ẹnen̄ede ẹdu.

Nnyịn iyekpep ekese iban̄a Devil ke ini nnyịn ikerede iban̄a mme ikọ oro Jesus eketịn̄de ọnọ mme andikpep ido ukpono eyo esie ete: “Mbufo ẹdi nditọ ete mbufo, kpa Satan, ẹnyụn̄ ẹyom ndinam obukpo udọn̄ ete mbufo. Enye edi owot-owo toto ke editọn̄ọ, ikonyụn̄ isọn̄ọke ida ke akpanikọ, koro enye mînyeneke akpanikọ ke esịt esie. Ke ini enye osude nsu, enye osio se idude ke esịt esie etịn̄: koro enye edi osu-nsu, ye ete nsu.”—John 8:44.

Nte asan̄ade ekekem ye ikọ emi, Devil, enyịn̄ oro ọwọrọde “ọdọk-edidọk,” ekedi “osu-nsu, ye ete nsu.” Enye ekedi akpa edibotn̄kpọ ndisu nsu ndian Abasi, ndien enye akanam oro ko ke edem ke in̄wan̄ Eden. Jehovah ọkọdọhọ ete ke akpa ete ye eka nnyịn “ẹyekpa n̄kpa” edieke mmọ ẹdiade eto ifiọk eti ye idiọk. Ebede ke urụkikọt, Satan ama ọdọhọ ete ke mme ikọ oro ẹkedi nsu. (Genesis 2:17; 3:4) Nte odotde, ẹkot enye “akani urụkikọt oro ẹkotde enye ẹte, [Devil, NW] ye Satan.”—Ediyarade 12:9.

Devil ama osu nsu aban̄a eto ifiọk eti ye idiọk. Enye ama eneni ete ke ndikpan edidia mfri eto oro ikenenke; ke enye ekedi edida odudu nnam n̄kpọ ke ukwan̄ usụn̄. Enye ama ọdọhọ ete ke Adam ye Eve ẹkeme ‘nditie nte Abasi’ ke ndibiere se ifọnde ye se idiọkde nnọ idemmọ. Ikọ Satan ọkọwọrọ nte ke akpana  mmọ ẹnam ubiere ọyọhọ ọyọhọ ke idemmọ nte mbon oro ẹnyenede ifụre uduak. (Genesis 3:1-5) Ediyịk emi mban̄a nte usụn̄ edikara Abasi enende ama edemede ikpọ eneni. Ntre Jehovah amayak ini odu man ẹbiere mme eneni emi. Emi ọwọrọ ete ke ẹyak Satan aka iso odu uwem ke ibio ini. Idahaemi ibio ini esie ọmọn̄ ọsọp ndikụre. (Ediyarade 12:12) Edi, enye ke aka iso ndida nsu ye abian̄a ndianade mme owo n̄kpọn̄ Abasi, adade mme owo oro ẹbietde mme scribe ye mme Pharisee eke eyo Jesus ndisuan mme ukpepn̄kpọ esie.—Matthew 23:13, 15.

Jesus ama ọdọhọ n̄ko ete ke Devil edi “owot-owo toto ke editọn̄ọ” ye nte ke enye ‘ikọsọn̄ọke ida ke akpanikọ.’ Emi iwọrọke ite ke Jehovah okobot Devil nte “owot-owo.” Bible ikpepke nte ke ẹkebot Devil ndidi enyene-ndịk unam oro esede aban̄a ebiet ikan̄ ye ndutụhọ owo ekededi oro ọbiọn̄ọde Abasi ndien, ke akande oro, enye ikpepke ite ke utọ itie oro akam ododu. Bible owụt nte ke mme akpan̄kpa ẹdu ke udi ofụri ubonowo, idụhe ke itie ikan̄ m̀mê ke ebietidụn̄ Satan.—Utom 2:25-27; Ediyarade 20:13, 14.

Ke editọn̄ọ Devil ‘okodu ke akpanikọ.’ Ini kiet ko enye okodu ke ubon Jehovah eke heaven nte mfọnmma eyen Abasi eke spirit. Edi enye ‘ikọsọn̄ọke ida ke akpanikọ.’ Enye ekemek nditiene usụn̄ idemesie ye mme edumbet esie oro ẹkọn̄ọde ke nsu. “Toto ke editọn̄ọ” idịghe ini emi ẹkebotde enye nte eyen Abasi edide angel, edi edi ini emi enye okokoide-koi ọsọn̄ ibuot ye Jehovah onyụn̄ osude nsu ọnọ Adam ye Eve. Devil etie nte mbon oro ẹkesọn̄de ibuot ye Jehovah ke eyo Moses. Nnyịn ikot iban̄a mmọ ite: “Enye (Israel) amakabade ọdiọk ye enye, ndo mmọ idịghe eke nditọ esie.” (Deuteronomy 32:5) Ẹkeme nditịn̄ ukem oro mban̄a Satan. Enye akakabade edi “owot-owo” ke ini enye ọkọsọn̄de ibuot onyụn̄ akabarede edi ntak n̄kpa Adam ye Eve ye, ke akpanikọ, ofụri ekpụk ubonowo.—Rome 5:12.

Mme Ọsọn̄ibuot Angel

Mme angel en̄wen ẹma ẹdiana ye Satan ke nsọn̄ibuot esie. (Luke 11:14, 15) Mme angel emi ẹma ‘ẹkpọn̄ ebiet idụn̄ idem mmọ’ ẹnyụn̄ ẹda idem eke obụk ẹsịne man ẹdinyene ebuana idan̄ ye “nditọ-iban owo” ke eyo Noah. (Jude 6; Genesis 6:1-4; 1 Peter 3:19, 20) “Ubak ntantafiọn̄ ikpa-enyọn̄ kiet ke itie ita,” m̀mê ibat ibat ke otu edibotn̄kpọ eke spirit, ẹmetiene usụn̄ edinam emi.—Ediyarade 12:4.

N̄wed Ediyarade oro ẹdade ata ndamban̄a usem ẹwet owụt Devil nte “akamba ididuot dragon.” (Ediyarade 12:3) Ntak-a? Idịghe koro enye ke ata ata usụn̄ enyenede ikọn̄wọ ikọn̄wọ idem. Ke akpanikọ, nnyịn idiọn̄ọke utọ idem oro mme edibotn̄kpọ eke spirit ẹnyenede, edi eyedi idem Satan ikpụhọkede ye eke mme edibotn̄kpọ eke spirit eken oro ẹdide mme angel. Nte ededi, “akamba ididuot dragon” edi usụn̄ oro odotde nditịn̄ mban̄a idiọkitọn̄, enyene-ndịk, okopodudu, ye ibak ibak edu Satan.

Ẹnen̄ede ẹbiọn̄ọ Satan ye mme demon esie idahaemi. Mmọ ikemeke aba ndimen idem eke obụk nsịne emi mmọ nte an̄wan̄ade ẹkesisịnede ini kiet ko. Esisịt ini ke ẹma ẹkewụk Obio Ubọn̄ Abasi ke ubọk Christ ke 1914, ẹma ẹsion̄o mmọ ẹduọn̄ọ ke ikpehe n̄kan̄ isọn̄.—Ediyarade 12:7-9.

Devil Edi Enyene-Ndịk Asua

Edi, Devil osụk edi enyene-ndịk asua. Enye ke ‘oyo nte lion eke okụnide, oyom se editade.’ (1 Peter 5:8) Enye idịghe ikpîkpu ekikere idiọkn̄kpọ oro odụn̄de ke anana-mfọnmma ikpọkidem nnyịn. Edi akpanikọ, nnyịn imesin̄wana ye ntụhọ unam idiọkn̄kpọ kpukpru usen. (Rome 7:18-20) Edi ata en̄wan nnyịn edi “ye mme andikara ekịm ererimbot, ye udịm  mme idiọk spirit eke ẹdude ke enyọn̄.”—Ephesus 6:12.

Odudu Devil atara adan̄a didie? Apostle John ọdọhọ ete: “Ofụri ererimbot onyụn̄ esịne ke ubọk andidiọk.” (1 John 5:19) Nte ededi, nnyịn iyomke ndiwụk ekikere ke Devil m̀mê ndiyak mme nsunsu ekikere ẹban̄ade enye ẹnam nnyịn ikop ndịk. Edi, oyowụt eti ibuot nnyịn ndidu ke edidemede mban̄a mme ukeme oro enye esịnde ndidịp nnyịn akpanikọ ndinyụn̄ mbiat nsọn̄ọnda nnyịn ye Abasi.—Job 2:3-5; 2 Corinth 4:3, 4.

Devil isinamke n̄kpọ ibak ibak kpukpru ini ye mbon oro ẹyomde ndinam uduak Abasi. Ke ndusụk idaha, enye esinam idemesie “angel un̄wana.” Apostle Paul ama ọtọt mme Christian aban̄a n̄kpọndịk emi ke ini enye ekewetde ete: “Mmefehe ndịk, mbak ke usụn̄ ekededi, nte urụkikọt akabian̄ade Eve ke n̄kari esie, edibiat ekikere mbufo, ẹnam mbufo ẹtre ndinyene esịt akpanikọ ye eti ido ye Christ.”—2 Corinth 11:3, 14.

Ke ntre oyom nnyịn ‘ifara ke idem, ikpeme, inyụn̄ isọn̄ọ ida ke mbuọtidem in̄wana ye enye.’ (1 Peter 5:8, 9; 2 Corinth 2:11) Fep ndisio idem nnyan nnọ Satan ebe ke ndisịn idem ke n̄kpọ ekededi oro enyenede ebuana ye ndedịbe odudu. (Deuteronomy 18:10-12) Di ifịk ifịk eyen ukpepn̄kpọ Ikọ Abasi, etide ete ke Jesus Christ ama okot oto Ikọ Abasi ndien ndien ke ini Devil okodomode enye. (Matthew 4:4, 7, 10) Bọn̄ akam ben̄e spirit Abasi. Mbun̄wụm esie ekeme ndin̄wam fi ndifep ubọkutom obụkidem, oro Satan esịnde udọn̄ ọnọ ata uforo uforo. (Galatia 5:16-24) N̄ko, bọn̄ akam ke ofụri esịt nọ Jehovah ke ini afo ke ndusụk usụn̄ odude ke mfịghe otode Devil ye mme demon esie.—Philippi 4:6, 7.

Ufọn idụhe ndikop ndịk mban̄a Devil. Jehovah ọn̄wọn̄ọ ndikpeme nnyịn nsio ke n̄kpọ ekededi oro Satan ekemede ndinam. (Psalm 91:1-4; Mme N̄ke 18:10; James 4:7, 8) Apostle Paul ọdọhọ ete: “Ẹsọn̄ọ idem ke Ọbọn̄ ye ke ọkpọsọn̄ odudu Esie.” Do afo ‘eyekeme ndin̄wana ye n̄kari Satan.’—Ephesus 6:10, 11.

[Ndise ke page 5]

Jesus ama ọfiọk ete ke Devil edi ata owo

[Ndise ke page 6]

“Ofụri ererimbot onyụn̄ esịne ke ubọk andidiọk”

[Ebiet Ẹdade N̄kpọ Ẹto]

NASA photo

[Mme ndise ke page 7]

N̄wana ye Devil ebe ke ndikpep Ikọ Abasi nnyụn̄ mbọn̄ akam kpukpru ini