Didie ke Emem Christ Ekeme Ndikara ke Esịt Nnyịn?

“Ẹyak emem Christ akara ke esịt mbufo; ẹkekot mbufo ẹdụk ke idem kiet, man ẹnyene emem oro.”—COLOSSAE 3:15.

1, 2. Ke nso usụn̄ ke “emem Christ” akara ke esịt Christian?

 NDIKARA edi ikọ itekesịt ọnọ ediwak owo, sia enye ọnọde ekikere aban̄a edinyenyịk ye n̄kari. Ke ntre, ndusụk owo ẹkeme ndikere ke item oro Paul ọkọnọde mme ekemmọ Christian ke Colossae ete, “Ẹyak emem akara ke esịt mbufo,” iwụtke eti ibuot. (Colossae 3:15) Nte nnyịn idịghe mbon oro ẹnyenede ifụre uduak? Ntak emi nnyịn ikpayakde n̄kpọ ekededi m̀mê owo ekededi akara ke esịt nnyịn?

² Paul ikọdọhọke mbon Colossae ite ẹsana ifụre uduak mmọ ẹyak. Ikọ Greek oro ẹkabarede “akara” ke Colossae 3:15 enyene ebuana ye ikọ oro adade ọnọ andibiere mbuba oro ekesidide andinọ utịp ke mbre mbuba ini oro. Mme ebre mbre mbuba ẹma ẹsinyene ndusụk udomo ifụre ke idak mbet mbuba, edi ke utịt, andibiere mbuba esibiere owo oro akasan̄ade ke mbet ndien ke ntre akande ke mbuba oro. Ukem ntre, nnyịn imenyene ifụre ndinam ediwak ubiere ke uwem, edi nte nnyịn inamde ntre, emem Christ ekpenyene ndidi “andibiere mbuba”—m̀mê, nte akabade n̄wed oro Edgar J. Goodspeed esịnde enye, “edumbet oro akarade” ke esịt nnyịn kpukpru ini.

3. Nso idi “emem Christ”?

³ Nso idi “emem Christ”? Enye edi ifụre ekikere, kpa emem esịtidem, oro nnyịn inyenede ke ini nnyịn ikabarede idi mme mbet Jesus inyụn̄ ifiọkde ite ke Jehovah Abasi ye Eyen esie ẹma, ẹnyụn̄ ẹnyịme nnyịn. Ke ini Jesus okoyomde ndikpọn̄ mme mbet esie, enye ama ọdọhọ mmọ ete: “Nyak emem Mi nnọ mbufo . . . Ẹkûyak esịt etịmede mbufo, ẹkûnyụn̄ ẹyak esịt mbufo okop ndịk.” (John 14:27) Ke se ikperede ndisịm isua 2,000, mme anam-akpanikọ andibuana ke idem Christ oro ẹyetde aran ẹnyene emem oro, ndien mfịn mme nsan̄a mmọ, “mme erọn̄ en̄wen,” ẹtiene ẹnyene emem oro. (John 10:16) Emem oro ekpenyene ndidi odudu oro akarade ke esịt nnyịn. Ke ini nnyịn isobode ọkpọsọn̄ idomo, enye ekeme ndin̄wam nnyịn itre ndikop ọkpọsọn̄ ndịk m̀mê nditịmede esịt n̄kaha. Ẹyak nnyịn ise nte emi edide akpanikọ ke ini isobode ukwan̄ikpe, ke ini ikopde editịmede esịt, ye ke ini ikerede ke nnyịn idotke.

Ke Ini Nnyịn Isobode Ukwan̄ikpe

4. (a) Didie ke Jesus akakabade emehe ye ukwan̄ikpe? (b) Mme Christian ẹsinam n̄kpọ didie ke ini ẹsobode ukwan̄ikpe?

⁴ Edidem Solomon ọkọdọhọ ete: “Owo akara owo tutu ọnọ enye unan.” (Ecclesiastes 8:9, NW) Jesus ama ọfiọk nte mme ikọ oro ẹdide akpanikọ. Ke adan̄aemi okodude ke heaven, enye ama okụt ikpọ ukwan̄ikpe oro mme owo ẹkedade ẹnọmọ kiet eken. Ke isọn̄, enye ke idemesie ama osobo n̄kponn̄kan ukwan̄ikpe ke ini ẹkedoride enye, kpa anana-idiọkn̄kpọ, ikọ ẹte ke esuene Abasi ẹnyụn̄ ẹwotde enye nte abiatibet. (Matthew 26:63-66; Mark 15:27) Mfịn, ukwan̄ikpe osụk edi ọsọ n̄kpọ, ndien mme ata Christian ẹbọ ufen ẹkan nte ẹkpebọde, ẹdide se ‘kpukpru mme idụt ẹsuade.’ (Matthew  24:9) Edi, kpa ye enyene-ndịk ifiọk n̄kpọntịbe ke mme itienna n̄kpa Nazi ye ke Mme Itienna Utom Soviet, kpa ye ẹdide mbon unọmọ otu mbon ntịme ye eke nsunsu edori ikọ, emem Christ anam mmọ ẹsọn̄ọ ẹda. Mmọ ẹkpebe Jesus, emi nnyịn ikotde iban̄a ite: “Ke ini owo osụn̄ide Enye, Enye isụn̄ike mmọ usiene; ke ini Enye ebede ke ndutụhọ, Enye itịn̄ke ikọ ndịghe, edi ayak ikọ Esie esịn ke ubọk Andikpe edinen ikpe.”—1 Peter 2:23.

5. Ke ini ikopde se itiede nte ukwan̄ikpe ke esop, nso ke nnyịn ikpebem iso ikere iban̄a?

⁵ Ke ata esisịt udomo, nnyịn imekeme ndinịm nte ke ẹnam n̄kpọ ye owo ke ukwan̄ usụn̄ ke esịt esop Christian. Ke utọ idaha oro, ekeme nditie nnyịn ke idem nte eketiede Paul, emi ọkọdọhọde ete: “Anie ke owo anam enye atuak ukot ọduọ, ndien ami ntre ndiyat esịt?” (2 Corinth 11:29) Nso ke nnyịn ikeme ndinam? Nnyịn ikpenyene ndibụp idem nnyịn, ‘Nte oro enen̄ede edi ukwan̄ikpe?’ Ediwak ini, nnyịn isifiọkke ofụri akpanikọ. Nnyịn imekeme ndinam n̄kpọ ke ibụmede ke ima ikokop ito owo oro ọdọhọde nte inyenede ifiọk iban̄a se iketịbede. Ye eti ntak, Bible ọdọhọ ete: “Ọkọi ese kpukpru ikọ ke akpanikọ.” (Mme N̄ke 14:15) Ntre oyom nnyịn idu ke ukpeme.

6. Nnyịn ikpanam n̄kpọ didie iban̄a se ikerede ke edi ukwan̄ikpe ke esịt esop?

⁶ Nte ededi, yak idọhọ ke nnyịn ke idem nnyịn ikere ke idi mbon unọmọ ukwan̄ikpe. Didie ke owo oro emem Christ odude ke esịt esie akpanam n̄kpọ? Nnyịn imekeme ndikụt ke oyom inyene nneme ye owo oro nnyịn ikerede ke edue nnyịn. Ke oro ebede, utu ke ndineme n̄kpọ oro ye owo ekededi oro edikpan̄de utọn̄, ntak mûtịn̄ke mfịna oro unọ Jehovah ke akam unyụn̄ unyene mbuọtidem nte ke enye eyekpe unenikpe? (Psalm 9:10; Mme N̄ke 3:5) Ke ima ikanam oro, eyedi nnyịn iyenyịme ndikọk mfịna oro ke esịt nnyịn inyụn̄ ‘idop uyo.’ (Psalm 4:4) Ke ediwak idaha, item Paul emi eyenyene ebuana: “Ẹme ime ye kiet eken, ẹnyụn̄ ẹfen kiet eken, edieke owo mbufo ekededi enyenede ikọ ye owo; kpa nte Ọbọn̄ ekefende mbufo, ẹfen mmọ en̄wen kpasụk ntre.”—Colossae 3:13.

7. Nso ke nnyịn ikpenyene nditi kpukpru ini nte nnyịn inamde n̄kpọ ye nditọete nnyịn?

⁷ Nte ededi, se ededi oro inamde, oyom nnyịn iti ite ke adan̄aemi nnyịn mîkemeke ndikara se iketịbede, nnyịn imekeme ndikara edinam nnyịn. Edieke nnyịn inamde n̄kpọ etikwo etikwo iban̄a se nnyịn ikerede ke edi ukwan̄ikpe, oro ekeme ndinen̄ede ntịmede emem nnyịn akan nte ukwan̄ikpe oro ke idemesie etịmerede. (Mme N̄ke 18:14) Nnyịn imekeme ndikam ntuak ukot nduọ nnyụn̄ ntre ndibuana ye esop tutu nnyịn ikere ke ẹkpe unenikpe. Andiwet psalm ama ewet ete ke mbon oro ẹmade ido Jehovah “ikwe n̄kpọ iduọ baba kiet.” (Psalm 119:165) Akpanikọ edi, kpukpru owo ẹsisobo ukwan̄ikpe ke ini ke ini. Kûdede uyak utọ ndiọi ifiọk n̄kpọntịbe oro ẹbiọn̄ọ fi ndinam n̄kpọ Jehovah. Utu ke oro, yak emem Christ akara ke esịt fo.

Ke Ini Nnyịn Ikopde Editịmede Esịt

8. Nso idi ndusụk n̄kpọ oro ẹdide ntak editịmede esịt, ndien editịmede esịt ekeme ndisụn̄ọ ke nso?

⁸ Editịmede esịt ọyọyọhọ uwem ke “ukperedem ini” emi. (2 Timothy 3:1) Edi akpanikọ, Jesus ama ọdọhọ ete: “Ẹkûtịmede esịt ẹban̄a  uwem mbufo, ẹte, ididia nso? m̀mê ikpọkidem mbufo, ẹte, idisịne nso?” (Luke 12:22) Edi idịghe kpukpru editịmede esịt ẹsito edikere mban̄a mme n̄kpọ obụkidem. Lot ama enen̄ede ‘ofụhọ’ ke ntak oburobụt edinam mbon Sodom. (2 Peter 2:7) Paul ama enyene ‘ọkpọsọn̄ ekikere aban̄a kpukpru mme ufọk Abasi.’ (2 Corinth 11:28) Jesus ama okop editịmede esịt ke okoneyo oro ekebemde n̄kpa esie iso tutu “ibibiak Esie etie nte mme ntọi iyịp eke ẹtọide ke isọn̄.” (Luke 22:44) Nte an̄wan̄ade, idịghe kpukpru editịmede esịt ẹdi uyarade edimem ke mbuọtidem. Nte ededi, se ededi oro edide ntak esie, edieke editịmede esịt okponde onyụn̄ ebịghide, enye ekeme ndibiat emem nnyịn. Editịmede esịt amakan ndusụk owo ubọk, anamde mmọ ẹkere ke mmimọ ikemeke ndika iso mbiom mme mbiomo oro ẹsan̄ade ye edinam n̄kpọ Jehovah. Bible ọdọhọ ete: “Mfụhọ ke esịt owo oyonụk enye ọduọ.” (Mme N̄ke 12:25) Do, nso ke nnyịn ikeme ndinam edieke nnyịn ikopde editịmede esịt?

9. Nso idi ndusụk ata ata usio-ukot oro ẹkemede ndinam man ẹsụhọde editịmede esịt, edi mme ntak editịmede esịt ewe ke owo mîkemeke ndisio mfep?

⁹ Ke ndusụk idaha, nnyịn imekeme ndinam mme ata ata usio-ukot. Edieke udọn̄ọ edide ntak editịmede esịt nnyịn, oyowụt eti ibuot ndinọ enye ntịn̄enyịn, okposụkedi ẹnyenede ndinam ọkpọkpọ ubiere ke mme utọ n̄kpọ ntre. * (Matthew 9:12) Edieke ediwak mbiomo ẹfịghede nnyịn, ekeme ndidi mmemmem n̄kpọ ndiyak ndusụk mbiomo emi nnọ mbon en̄wen. (Exodus 18:13-23) Nte ededi, nso kaban̄a mme owo—nte mme ete ye eka—oro ẹnyenede ndodobi mbiomo oro owo mîkemeke ndiyak nnọ owo? Nso kaban̄a Christian oro odụn̄de ye nsan̄a ndọ oro ọbiọn̄ọde? Nso kaban̄a ubon oro odude ke idiọk idaha ndutịm uforo m̀mê oro odụn̄de ke ikpehe oro ekọn̄ an̄wanade? Nte an̄wan̄ade, nnyịn ikemeke ndisio kpukpru ntak editịmede esịt mfep ke editịm n̄kpọ emi. Kpa ye oro, nnyịn imekeme ndika iso nnyene emem Christ ke esịt nnyịn. Didie?

10. Nso idi usụn̄ iba oro Christian ekpetienede man osụhọde editịmede esịt?

 ¹⁰ Usụn̄ kiet edi ndiyom ndọn̄esịt ke Ikọ Abasi. Edidem David ekewet ete: “Ke uwak ekikere emi odude mi ke esịt ndọn̄esịt fo enem mi esịt.” (Psalm 94:19) Ẹkeme ndikụt “ndọn̄esịt” Jehovah ke Bible. Ndika mbịne N̄wed odudu spirit oro kpukpru ini ayan̄wam nnyịn ndika iso nnyene emem Christ ke esịt nnyịn. Bible ọdọhọ ete: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.” (Psalm 55:22) Kpasụk ntre, Paul ekewet ete: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpe-ubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:6, 7) Akam ofụri esịt oro ẹbọn̄de kpukpru ini ayan̄wam nnyịn ndika iso nnyene emem nnyịn.

11. (a) Didie ke Jesus ekedi eti uwụtn̄kpọ ke n̄kpọ aban̄ade akam? (b) Didie ke nnyịn ikpese akam?

¹¹ Jesus ekedi ata eti uwụtn̄kpọ ke afan̄ emi. Ini kiet, enye ama ada ediwak hour enyene nneme ye Ete esie eke heaven. (Matthew 14:23; Luke 6:12) Akam ama an̄wam enye ndiyọ ndiọkn̄kan idomo. Ke okoneyo oro ekebemde n̄kpa esie iso, enye ama enen̄ede okop mfụhọ. Didie ke enye akanam n̄kpọ? Enye ama “ọdọdiọn̄ ọsọn̄ọ” ọbọn̄ akam. (Luke 22:44) Ih, mfọnmma Eyen Abasi ekedi owo oro amade ndibọn̄ akam. Do, adan̄a didie akan oro ke nnyịn mme anana-mfọnmma anditiene enye ikpọkọri edu edibọn̄ akam! Jesus ama ekpep mme mbet esie ete “ẹkpebọn̄ akam kpukpru ini, ẹkûnyụn̄ ẹkpa mba.” (Luke 18:1) Akam edi ata akpan nneme oro inyenede ye Enye emi ọdiọn̄ọde nnyịn ọfọn akan nte nnyịn idiọn̄ọde idem nnyịn. (Psalm 103:14) Edieke anade nnyịn ika iso inyene emem Christ ke esịt nnyịn, inaha nnyịn ‘idop akam.’—1 Thessalonica 5:17.

Ndikan Mme Mmeme Nnyịn

12. Kaban̄a mme ntak ewe ke ndusụk owo ẹkeme ndikere ke utom mmimọ idotke?

¹² Jehovah ada mme asan̄autom esie kiet kiet ke ọsọn̄urua n̄kpọ. (Haggai 2:7, ikọ idakisọn̄ NW) Nte ededi, ediwak owo ẹkụt nte edide ọkpọsọn̄ n̄kpọ ndinyịme emi. Ndusụk owo ẹkeme ndikop mmemidem ke ntak usọn̄, mbiomo ubon oro ọkọride-kọri, m̀mê udọn̄ọ. Mbon en̄wen ẹkeme ndikere ke mmimọ inyeneke ufọn ke ntak oro ẹkebọkde mmimọ ke idiọk usụn̄. Mbon en̄wen n̄ko ẹkeme ndikop ọkpọsọn̄ editịmede esịt ẹban̄a ndudue oro mmọ ẹkenamde ke ini edem, ẹyịkde m̀mê Jehovah eyefen mmimọ tutu amama. (Psalm 51:3) Nso ke ẹkeme ndinam mban̄a mme utọ ekikere oro?

13. Nso ndọn̄esịt N̄wed Abasi idu inọ mbon oro ẹkerede ke mmimọ idotke?

¹³ Emem Christ ọyọnọ nnyịn nsọn̄ọ aban̄a ima Jehovah. Nnyịn imekeme ndifiak nnyene emem oro ke esịt nnyịn ebe ke nditie n̄kere nte ke akananam Jesus ikọdọhọke ite ke ẹbiere nte nnyịn isọn̄de urua ebe ke ndimen utom nnyịn ndomo ye utom mbon en̄wen. (Matthew 25:14, 15; Mark 12:41-44) Se enye ọkọsọn̄ọde etịn̄ ekedi edinam akpanikọ. Enye ọkọdọhọ mme mbet esie ete: “Ẹyenyan̄a owo eke edimede ime tutu esịm akpatre.” (Matthew 24:13) Mme owo ẹma ‘ẹse Jesus ke ndek,’ edi enye ikenyeneke eyịghe ndomokiet nte ke Ete imọ ama imọ. (Isaiah 53:3; John 10:17) Ndien enye ama asian mme mbet esie ete ke ẹma mmọ n̄ko. (John 14:21) Ke ndisọn̄ọ ntịn̄ emi, Jesus ọkọdọhọ ete: “Nte inyamke n̄kpri inuen iba ke obubịt okụk kiet? ndien baba mmọ kiet iduọhọ ke isọn̄ ke mîtoho Ete mbufo: edi ẹmebat kpa kpukpru idet ibuot mbufo. Ẹkûfehe ndien; mbufo ẹmesọn̄ urua ẹkan ediwak n̄kpri inuen.” (Matthew 10:29-31) Nso ufiop ufiop nsọn̄ọ kaban̄a ima Jehovah ke emi edi ntem!

14. Nso nsọn̄ọ ke nnyịn inyene nte ke Jehovah abat owo nnyịn kiet kiet ke ọsọn̄urua?

¹⁴ Jesus ama ọdọhọ n̄ko ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi.” (John 6:44) Sia Jehovah okodụride nnyịn etiene Jesus, anaedi Enye oyom nnyịn inyene edinyan̄a. Jesus ama asian mme mbet esie ete: “Idịghe uduak Ete mbufo ke heaven ete kiet ke otu n̄kpri nditọwọn̄ emi  akpatak.” (Matthew 18:14) Ke ntre, edieke edide afo ke anam utom ofụri esịt, afo emekeme ndidara mban̄a nti utom fo. (Galatia 6:4) Edieke afo okopde ọkpọsọn̄ editịmede esịt aban̄a mme ndudue oro akanamde ke ini edem, nịm ke akpanikọ ete ke Jehovah “ayawak” ndidahado nnọ mbon oro ẹnen̄erede ẹtua n̄kpọfiọk. (Isaiah 43:25; 55:7) Edieke afo okopde mmemidem ke ntak efen ekededi, ti ete ke “Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.”—Psalm 34:18.

15. (a) Didie ke Satan odomo ndibiat emem nnyịn? (b) Nso mbuọtidem ke nnyịn ikeme ndinyene ke Jehovah?

¹⁵ Satan ekpenen̄ede ama ndibiat emem fo. Enye edi ntak ndammana idiọkn̄kpọ oro kpukpru nnyịn in̄wanade ndibiọn̄ọ. (Rome 7:21-24) Ke akpanikọ enye akpama ndinam fi ekere ete ke unana mfọnmma imọ idiyakke Abasi enyịme utom imọ. Kûdede uyak Devil anam idem emem fi! Fiọk mme n̄kari ye n̄kukan esie, ndien yak ifiọk oro anam fi ebiere ndiyọ. (2 Corinth 2:11; Ephesus 6:11-13) Ti, ‘Abasi okpon akan esịt nnyịn, onyụn̄ ọfiọk kpukpru n̄kpọ.’ (1 John 3:20) Jehovah okụt se ikande mme ndudue nnyịn. Enye okụt n̄ko mme uduakesịt nnyịn. Do, bọ ndọn̄esịt to mme ikọ andiwet psalm emi: “Koro Jehovah mîdiduọkke ikọt esiemmọ, mîdinyụn̄ ikpọn̄ke udeme esie.”—Psalm 94:14.

Ẹdiana Kiet ke Emem Christ

16. Ke usụn̄ ewe ke nnyịn mîdụhe ikpọn̄ nte nnyịn idomode ndiyọ?

¹⁶ Paul ama ewet ete ke nnyịn ikpenyene ndiyak emem Christ akara ke esịt nnyịn koro ‘ẹkekot nnyịn idụk ke idem kiet.’ Ẹkekot mme Christian oro ẹyetde aran oro Paul ekewetde n̄wed ọnọ ẹte ẹdidi ubak idem Christ, kpa nte ẹkotde nsụhọ ke otu mbon oro ẹyetde aran mfịn. Nsan̄a mmọ ẹdide “mme erọn̄ en̄wen” ẹdiana kiet ye mmọ nte “otu-erọn̄ kiet” ke idak “Ekpeme-erọn̄ kiet,” Jesus Christ. (John 10:16) “Otu-erọn̄” ofụri ererimbot oro esịnede ediwak miliọn owo ke ẹdiana kiet ẹyak emem Christ akara ke esịt mmọ. Ndifiọk nte ke nnyịn idụhe ikpọn̄ an̄wam nnyịn ndiyọ. Peter ekewet ete: “Ẹsọn̄ọ ẹda ke mbuọtidem ẹn̄wana ye [Satan], ke ẹfiọkde ẹte kpa utọ ndutụhọ emi ke ọyọyọhọ ke otu nditọ-ete mbufo emi ẹdude ke ererimbot.”—1 Peter 5:9.

17. Nso ntak ke nnyịn inyene ndiyak emem Christ akara ke esịt nnyịn?

¹⁷ Do, kpukpru nnyịn ikpakam ika iso ndikọri emem, kpa akpan mbun̄wụm edisana spirit Abasi. (Galatia 5:22, 23) Mbon oro ẹtiede ke emem, ẹnanade ntọi, ẹnyụn̄ ẹnanade ndo ke enyịn Jehovah ẹdinyene nsinsi uwem ke paradise isọn̄, emi edinen ido edidụn̄de. (2 Peter 3:13, 14) Nnyịn imenyene kpukpru ntak ndiyak emem Christ akara ke esịt nnyịn.

[Ikọ idakisọn̄]

Nte Afo Emeti?

• Nso idi emem Christ?

• Didie ke emem Christ ekeme ndikara ke esịt nnyịn ke ini nnyịn isobode ukwan̄ikpe?

• Didie ke emem Christ an̄wam nnyịn ndise mban̄a editịmede esịt?

• Didie ke emem Christ ọdọn̄ nnyịn esịt ke ini nnyịn ikerede ke nnyịn idotke

[Mme Mbụme Ukpepn̄kpọ]

[Ndise ke page 15]

Ke iso mbon oro ẹkedoride enye ikọ, Jesus ama ayak uwem esie esịn Jehovah ke ubọk

[Ndise ke page 16]

Ukem nte inem inem mfari ima ima ete, ndọn̄esịt Jehovah ekeme ndisụhọde editịmede esịt nnyịn

[Ndise ke page 18]

Se Abasi adade ke akpan n̄kpọ akan edi edime ime