Ini Kiet Ko Nnyịn Ikedi Mme Ebuaikọt—Idahaemi Nnyịn Idi Mme Erọn̄!

Ke ini ami ye Sakina ikedide n̄kpri n̄kaiferi, nnyịn ikedi mbọhọidụn̄. Sakina ama okpon ubom onyụn̄ okop odudu, ke adan̄aemi ami n̄kedide ukpasi ukpasi. Nnyịn ima isiwak nditọhọ utọk, edi usen kiet nnyịn ima in̄wana ọkpọsọn̄ en̄wan. Ọtọn̄ọde ke usen oro ka iso, nnyịn ikosioroke kiet eken uyo m̀mê ndikọm kiet eken. Nte ini akakade, nnyịn mbiba ima iwọrọ idụn̄ inyụn̄ ikwe kiet eken aba.

Ke 1994, mma ntọn̄ọ ndikpep Bible ye Mme Ntiense Jehovah, ndien mma n̄kpụhọde edu mi sụn̄sụn̄. Isua inan̄ ke ukperedem ke adan̄aemi n̄kodụkde usen akpan mbono ke Bujumbura, Burundi, idem ama akpa mi ndisobo ye Sakina. Mma n̄kop inemesịt nte ke enye ama odu do, edi ekọm nnyịn eketie ndebe ndebe. Ekem ke usen oro, ama akpa mi idem ndikụt enye ke otu mbon oro ẹkeyomde ndina baptism! Enye n̄ko ama anam ukpụhọde akamba akamba. Enye ikedịghe aba owo en̄wan oro ikesiwakde nditọhọ. Ekedi utịbe utịbe didie ntem ndikụt enye anamde an̄wan̄wa uyarade uyakidem esie nnọ Abasi ebe ke ndina baptism mmọn̄!

Ke ini enye ọkọwọrọde ke mmọn̄ edi, mma mfehe n̄kafat enye nnyụn̄ ntịn̄ sụn̄sụn̄ nte: “Emeti nte nnyịn ikesin̄wanade en̄wan?” Enye ama ọbọrọ ete: “Ih, mmeti, edi oro ekedi ke ini edem. Ami ndi obufa owo idahaemi.”

Nnyịn mbiba imokop inemesịt ndikụt akpanikọ Bible oro adiande mme owo ọtọkiet, ndinyụn̄ n̄kpụhọde edu nnyịn oro ekebietde eke ebuaikọt n̄kabade nnyene edu ebietde eke erọn̄ oro ẹnyenede Akwa Ekpemerọn̄, Jehovah Abasi. Ke akpanikọ, akpanikọ Bible esikpụhọde uwem mme owo.