Mme Mbụme Ẹtode Mme Andikot

Colossae 1:16 etịn̄ aban̄a Eyen Abasi ete ke “ẹkebot kpukpru n̄kpọ oto ke Enye, ẹnyụn̄ ẹbot kpukpru n̄kpọ ẹnọ Enye.” Ke nso usụn̄ifiọk ke ẹkebot kpukpru n̄kpọ “ẹnọ” Jesus, Eyen Abasi?

Jehovah akada ikpọn̄-ikpọn̄ edibon Eyen esie nte etubom anamutom ke ndibot kpukpru n̄kpọ, oro edi, kpukpru n̄kpọ ke ẹsiode Jesus ke idemesie ẹfep. (Mme N̄ke 8:27-30; John 1:3) Nte odotde, Jesus okop inemesịt oto mme n̄kpọ emi, ndien ẹkebot mmọ “ẹnọ” enye ke usụn̄ifiọk emi.

Nnyịn imọfiọk ite ke mme ete ye eka ẹsidori enyịn ndikop ekese inemesịt, ẹsinyụn̄ ẹkop ekese inemesịt, otode se mmọ ẹnyenede—nditọ mmọ. Ntem, n̄ke Bible etịn̄ aban̄a “eyen eke enemde [ete esie] esịt.” (Mme N̄ke 3:12; 29:17) Kpasụk ntre, Jehovah Abasi ama okop inemesịt oto Israel ke ini ikọt esie ẹkenamde akpanikọ. (Psalm 44:3; 119:108; 147:11) Enye n̄ko okop idatesịt oto mbuọtidem mme anam-akpanikọ asan̄autom esie tutu esịm eyo nnyịn.—Mme N̄ke 12:22; Mme Hebrew 10:38.

Ntem, ama odot ete Abasi anam nsan̄autom esie, Jesus, okop inemesịt oto mme n̄kpọ oro enye okobotde. Ke akpanikọ, Mme N̄ke 8:31 ọdọhọ ete ke Eyen ‘ama adara aban̄a edem isọn̄ esie emi owo odụn̄de: ndien idatesịt esie okodu ke otu nditọ owo.’ Edi ke usụn̄ifiọk emi ke Colossae 1:16 ọdọhọ ete: “Ẹkebot kpukpru n̄kpọ oto ke Enye, ẹnyụn̄ ẹbot kpukpru n̄kpọ ẹnọ Enye.”—Sịghisịghi ubọkn̄wed edi eke nnyịn.