Edidiọn̄ Jehovah Ofori Nnyịn
Edidiọn̄ Jehovah Ofori Nnyịn
“Ufọn [“edidiọn̄,” NW] Jehovah ofori owo, enye inyụn̄ idianke afanikọn̄ ke esịt.”—MME N̄KE 10:22.
1, 2. Ntak emi inyene obụkidem mîsinọhọ inemesịt?
EDU edibịne inyene obụkidem akara uwem ediwak miliọn owo mfịn. Edi nte mme n̄kpọ obụkidem ẹnam mmọ ẹkop inemesịt? The Australian Women’s Weekly ọdọhọ ete: “N̄kemeke nditi ini emi akanam mme owo ẹfụhọde ntem ẹban̄a idaha mmọ ke uwem.” Enye adian do ete: “Enye edi idaha oro odude ke ntuaha. Ẹsian nnyịn ẹte ke Australia odu ke ata eti idaha ndutịm uforo, nte ke akananam uwem ifọnke ntem. . . . Kpa ye oro idotenyịn ndiọhọn̄kpọ odu ke ofụri idụt oro. Iren ye iban ukem ukem ẹfiọk ẹte ke odu n̄kpọ oro ananade ke uwem mmimọ, edi mmọ ifiọkke se n̄kpọ oro edide.” N̄wed Abasi etịn̄ akpanikọ didie ntem ke ndidọhọ ke inemesịt m̀mê uwem isisụn̄ọke ito mme n̄kpọ oro nnyịn inyenede!—Ecclesiastes 5:10; Luke 12:15.
2 Bible ekpep ete ke n̄kponn̄kan inemesịt esito edidiọn̄ Abasi. Ke afan̄ emi, Mme N̄ke 10:22 ọdọhọ ete: “Ufọn [“edidiọn̄,” NW] Jehovah ofori owo, enye inyụn̄ idianke afanikọn̄ ke esịt.” Edibịne inyene obụkidem ke idiọkitọn̄ esiwak ndisụn̄ọ ke afanikọn̄. Nte odotde, apostle Paul ama ọtọt ete: “Mmọ eke ẹyomde ndidi mbon inyene ẹduọ ẹsịne ke idomo ye afia ye ediwak ndisịme ye idiọk udọn̄, eke ẹdụride owo ẹsụhọde ke nditaha ye nsobo. Koro itọn̄ inyene edi orụn̄ kpukpru orụk mme idiọk-n̄kpọ; ndien ke edinyanade mbịne enye, ndusụk owo ẹma ẹyo ẹkpọn̄ mbuọtidem, ẹnyụn̄ ẹda ediwak mfụhọ ẹnọ idem mmọ unan.”—1 Timothy 6:9, 10.
3. Ntak emi mme idomo ẹsisịmde mme asan̄autom Abasi?
3 Ke n̄kan̄ eken, mme edidiọn̄ oro mîsan̄ake ye afanikọn̄ ẹsisịm kpukpru mbon oro ẹkade iso ‘ndikop uyo Jehovah.’ (Deuteronomy 28:2) Edi, ndusụk owo ẹkeme ndibụp, ‘Edieke edide owo idianke afanikọn̄ ke edidiọn̄ Jehovah, ntak emi ediwak ke otu mme asan̄autom Abasi ẹsikụtde ukụt?’ Bible ayarade ete ke Abasi enyenyịme mme idomo ẹsịm nnyịn, edi mmọ ẹnen̄ede ẹto Satan, idiọk editịm n̄kpọ esie, ye unana mfọnmma nnyịn. (Genesis 6:5; Deuteronomy 32:4, 5; John 15:19; James 1:14, 15) “Kpukpru eti edinọ ye kpukpru enọ eke ẹfọnde ẹma” ẹto Jehovah. (James 1:17) Ntem, akananam mme edidiọn̄ esie ikamake afanikọn̄. Ke ntre ẹyak nnyịn ikere iban̄a ndusụk enọ Abasi oro ẹfọnde ẹma.
Ikọ Abasi—Ọsọn̄urua Enọ
4. Nso edidiọn̄ ye ọsọn̄urua enọ ke ẹnọ ikọt Jehovah ke “utịt ini” emi?
4 Kaban̄a “utịt ini,” ntịn̄nnịm ikọ Daniel ọdọhọ ete: “Ifiọk oyokpon aka iso.” Nte ededi, ẹma ẹda mme ikọ emi ẹwụt ukpụhọde: “Baba idiọk owo kiet idinyụn̄ idịghe asian, edi mmọ eke ẹnyenede eti ibuot ẹyedi asian.” (Daniel 12:4, 10) Kere ban̄a oro! Ẹda ọniọn̄ ẹwet Ikọ Abasi—akpan akpan mme ntịn̄nnịm ikọ—ke usụn̄ oro ndiọi owo mîkemeke nditịm mfiọk, okposụkedi ikọt Jehovah ẹfiọkde. Eyen Abasi ọkọbọn̄ akam ete: “Mmọkọm Fi, O Ete, Ọbọn̄ enyọn̄ ye isọn̄, koro afo ekedịpde mbon eti ibuot ye mme asian mme n̄kpọ emi, onyụn̄ ayararede mmọ ọnọ nsek-nditọ.” (Luke 10:21) Nso edidiọn̄ ke edi ntem ndinyene ọsọn̄urua ẹnọ edide Ikọ Abasi oro ẹwetde-wet, kpa Bible, ndinyụn̄ ndu ke otu mbon oro Jehovah ọnọde ikike eke spirit!—1 Corinth 1:21, 27, 28; 2:14, 15.
5. Nso idi eti ibuot, ndien didie ke nnyịn ikeme ndinyene enye?
5 Ke mîkpedịghe “eti ibuot emi otode ke enyọn̄” nnyịn ikpenyeneke ikike eke spirit ndomokiet. (James 3:17) Eti ibuot edi ukeme ndida ifiọk ye asian n̄kọk mme mfịna, mfep mme n̄kpọndịk, nsịm mme utịtmbuba, m̀mê ndinọ eti item. Didie ke nnyịn ikeme ndinyene eti ibuot otode Abasi? Mme N̄ke 2:6 ọdọhọ ete: “Jehovah enyene eti ibuot; ifiọk ye mbufiọk ẹto enye ke inua.” Ih, Jehovah ọyọnọ nnyịn eti ibuot edieke ikọbọde ke ndibọn̄ akam mben̄e enye, idem kpa nte enye ọkọnọde Edidem Solomon “esịt ifiọk ye ọniọn̄.” (1 Ndidem 3:11, 12; James 1:5-8) Man inyene eti ibuot, ana nnyịn ika iso ndikop uyo Jehovah ebe ke ndikpep nnyụn̄ nda Ikọ esie nsịn ke edinam kpukpru ini.
6. Ntak edide edinam owụtde eti ibuot ndida mme ibet ye mme edumbet Abasi nsịn ke edinam ke uwem nnyịn?
6 Ẹkụt mme akpan uwụtn̄kpọ eti ibuot otode Abasi ke mme ibet ye mme edumbet Bible. Mmọ emi ẹnọ nnyịn ufọn ke kpukpru usụn̄—ke n̄kan̄ eke ikpọkidem, ke n̄kan̄ eke ekikere, ke n̄kan̄ eke ntụk, ye ke n̄kan̄ eke spirit. Nte odotde, andiwet psalm ama ọkwọ ete: “Ido Jehovah ẹfọn ẹma, ẹdemede ukpọn̄; item Jehovah edi akpanikọ, asian mme ọkọi. Mme ewụhọ Jehovah ẹnen, ẹdat owo esịt; mbet Jehovah ẹyama, ẹn̄wan̄a owo enyịn. Uten̄e Jehovah asana, odu ke nsinsi: mme ikpe Jehovah ẹdi akpanikọ, kpukpru mmọ ẹnen. Mmọ ẹdi se owo ẹkpeyomde ẹkan gold ye ata ediwak eti gold.”—Psalm 19:7-10; 119:72.
7. Nso isidi utịp edifụmi ndinen idaha Abasi?
7 Ke n̄kan̄ eken, mbon oro ẹfụmide ndinen idaha Abasi ikwe inemesịt ye ifụre emi mmọ ẹyomde. Ebebịghi m̀mê awawara, mmọ ẹsifiọk ẹte ke owo ikemeke ndibian̄a Abasi, se owo ọtọde ke enye edinyụn̄ ọdọk. (Galatia 6:7) Ediwak miliọn owo oro ẹfụmide mme edumbet Bible ke ẹdọk mme utọ akama-mmọn̄eyet utịp nte uyomo idịbi oro owo mîyomke, mme odoro-owo-ndidien udọn̄ọ, m̀mê mbumehe oro abiatde nsọn̄idem. Ibọhọke mmọ ẹkabade esịt ẹnyụn̄ ẹkpụhọde usụn̄ uwem mmọ, usụn̄ mmọ ayada mmọ ke akpatre esịm n̄kpa onyụn̄ ekeme ndida nsịm nsobo otode Abasi.—Matthew 7:13, 14.
8. Ntak emi mme andima Ikọ Abasi ẹkopde inemesịt?
8 Nte ededi, mbon oro ẹmade Ikọ Abasi ẹnyụn̄ ẹdade enye ẹsịn ke edinam ẹyebọ akpakịp edidiọn̄ idahaemi ye ke ini iso. Nte odotde, ibet Abasi osio mmọ ke ufụn, mmọ ẹnen̄ede ẹkop inemesịt, ẹnyụn̄ ẹtie ye ọkpọsọn̄ udọn̄ ẹbet ini oro ẹdinamde mmọ ẹbọhọ ufụn idiọkn̄kpọ ye mme akama-n̄kpa utịp esie. (Rome 8:20, 21; James 1:25) Idotenyịn emi edi akpanikọ koro enye ọkọn̄ọde ke n̄kponn̄kan enọ ima oro Abasi ọnọde ubonowo—uwa ufak ikpọn̄-ikpọn̄ edibon Eyen esie, Jesus Christ. (Matthew 20:28; John 3:16; Rome 6:23) Utọ akakan enọ oro ọsọn̄ọ udomo ima emi Abasi amade ubonowo onyụn̄ ọnọ ubiọn̄ kaban̄a mme anana-utịt edidiọn̄ ẹnyenede kpukpru mbon oro ẹkade iso ndikop uyo Jehovah.—Rome 8:32.
Ndiwụt Esịtekọm Mban̄a Enọ Edisana Spirit
9, 10. Didie ke nnyịn ibọ ufọn ito edisana spirit oro Jehovah ọnọde? Nọ uwụtn̄kpọ.
9 Ima ima enọ Abasi efen oro nnyịn ikpowụtde esịtekọm iban̄a edi edisana spirit. Ke usen Pentecost 33 E.N., apostle Peter ama esịn udọn̄ ọnọ akwa udịmowo oro ẹkedude ke Jerusalem ete: “Mbufo ẹkabade esịt, ẹnyụn̄ ẹna baptism, kpukpru mbufo, ke enyịn̄ Jesus Christ, man ẹfen mme idiọk-n̄kpọ mbufo; ndien mbufo ẹyebọ Edisana Spirit nte enọ.” (Utom 2:38) Mfịn, Jehovah ọnọ mme asan̄autom esie oro ẹyakde idem ẹnọ edisana spirit esie koro mmọ ẹbọn̄de akam ẹyom enye ẹnyụn̄ ẹyomde ndinam uduak esie. (Luke 11:9-13) Ke eset, n̄kponn̄kan odudu emi ke ekondo—edisana spirit, m̀mê anamutom odudu Abasi—ama esinọ iren ye iban mbuọtidem, esịnede mme akpa Christian, odudu. (Zechariah 4:6; Utom 4:31) Enye ekeme ndinam ukem oro nnọ nnyịn, idem okposụkedi nnyịn ikemede ndisobo mme enyene-ndịk n̄kpọ ubiọn̄ọ m̀mê n̄kpọ-ata nte ikọt Jehovah.—Joel 2:28, 29.
10 Kere ban̄a uwụtn̄kpọ Laurel, oro ọkọdọn̄ọde mbụn̄ọ nseknditọ okonyụn̄ adade ukwak ukot ibifịk okot ibifịk ke isua 37. * Kpa ye mme ebeubọk idaha esie oro ẹketiede idomo idomo, enye ama anam n̄kpọ Abasi ifịk ifịk tutu esịm n̄kpa esie. Ke ediwak isua oro ẹkebede, akpakịp edidiọn̄ Jehovah ẹma ẹsịm Laurel. Ke uwụtn̄kpọ, enye ama ekeme ndin̄wam owo 17 ndinyene nnennen ifiọk akpanikọ Bible, idem okposụkedi enye ekesidade ukwak ukot ibifịk okot ibifịk kpukpru ini! Idaha esie anam nnyịn iti mme ikọ apostle Paul oro: “Ke adan̄aemi idem ememde mi, adan̄aoro ke ntịm nnyene nsọn̄idem.” (2 Corinth 12:10) Ih, unen ekededi oro nnyịn ikụtde ke ndikwọrọ eti mbụk itoho ukeme ye odudu nnyịn, edi oto un̄wam Abasi ebe ke edisana spirit, oro enye ọnọde mbon oro ẹkade iso ndikop uyo esie.—Isaiah 40:29-31.
11. Mme edu ewe ke spirit Abasi anam mbon oro ẹmende “obufa owo” ẹsịne ẹnyene?
11 Edieke nnyịn ikopde uyo Abasi, spirit esie ayanam nnyịn inyene ima, idatesịt, emem, ime, mfọnido, eti ido, edinam akpanikọ, ifụre ifụre ido, ye mfara ke idem. (Galatia 5:22, 23) “Mbun̄wụm spirit” emi edi ubak “obufa owo” oro mme Christian ẹmende ẹsịne ke itie nsọn̄ido ye edu ekededi ebietde eke unam oro mmọ ẹkenyenede ke mbemiso. (Ephesus 4:20-24; Isaiah 11:6-9) Se inen̄erede idi akpan n̄kpọ ke mbun̄wụm emi edi ima, kpa “se ibọpde uwem adiana inam ọfọn ama.”—Colossae 3:14.
Ima Christian —Enọ Oro Ẹkpedade ke Ọsọn̄urua
12. Didie ke Tabitha ye mme Christian eken ke akpa isua ikie ẹkewụt ima?
12 Ima Christian edi eti enọ efen oro Jehovah ọnọde nnyịn—enye oro nnyịn nte enende ikpadade ke ọsọn̄urua. Enye edi se edumbet akarade, edi enye enen̄ede ọyọhọ ye esịtmbọm tutu enye odụri mme andinịm ke akpanikọ adian ọtọkiet akan ima iman. (John 15:12, 13; 1 Peter 1:22) Ke uwụtn̄kpọ, kere ban̄a Tabitha, eti Christian an̄wan eke akpa isua ikie. “N̄wan emi ọyọhọ ye nti utom ye ntatubọk,” akpan akpan ke ufọn mme ebeakpa ke esop. (Utom 9:36) Ekeme ndidi mme ebeakpa emi ẹma ẹnyene mme iman, edi Tabitha okoyom ndinam se enye ekekemede man an̄wam onyụn̄ esịn udọn̄ ọnọ mmọ. (1 John 3:18) Nso eti uwụtn̄kpọ ke Tabitha ekenịm ntem! Ima itie nditọete ama onụk Prisca ye Aquila ‘ẹnyịme ndiduọk uwem mmọ’ kaban̄a Paul. Ima n̄ko ama onụk Epaphras, Luke, Onesiphorus, ye mbon en̄wen ndin̄wam apostle oro ke ini enye okodude ke ufọk n̄kpọkọbi ke Rome. (Rome 16:3, 4; 2 Timothy 1:16; 4:11; Philemon 23, 24) Ih, mme utọ Christian oro mfịn “ẹma kiet eken,” kpa eti enọ otode Abasi oro ẹdade ẹdiọn̄ọ mmọ nte mme ata mbet Jesus.—John 13:34, 35.
13. Didie ke nnyịn ikeme ndiwụt nte ke imenen̄ede iwụt esịtekọm iban̄a itie nditọete Christian nnyịn?
13 Nte afo amada ima oro ẹwụtde ke esop Christian ke ọsọn̄urua? Nte afo omowụt esịtekọm aban̄a itie nditọete nnyịn eke spirit, oro atarade ke ofụri ererimbot? Mmọ emi n̄ko ẹdi nti ẹnọ ẹtode enyọn̄ oro ẹnyụn̄ ẹforide owo. Didie ke nnyịn ikeme ndiwụt nte ke nnyịn imada mmọ ke ọsọn̄urua? Ebe ke ndinam edisana utom nnọ Abasi, ke ndibuana ke mme mbono esop Christian, ye ke ndiwụt ima ye mbun̄wụm spirit Abasi eken.—Philippi 1:9; Mme Hebrew 10:24, 25.
“Mme Enọ ke Owo”
14. Nso ke ẹyom ẹto Christian edieke enye oyomde ndinam utom nte ebiowo m̀mê asan̄autom unamutom?
14 Iren Christian oro ẹyomde ndinam n̄kpọ nnọ mme ekemmọ andituak ibuot nte mbiowo m̀mê mme asan̄autom unamutom ẹnyene eti utịtmbuba. (1 Timothy 3:1, 8) Man odot ndinyene mme ifetutom emi, eyenete enyene ndidi owo eke spirit, etịmde ọfiọk N̄wed Abasi onyụn̄ esịnde ifịk ke an̄wautom. (Utom 18:24; 1 Timothy 4:15; 2 Timothy 4:5) Ana enye enyene nsụhọdeidem ye ime, koro edidiọn̄ Abasi isisịmke mbon iseri, mbon ntan̄idem, ye mbon oro ẹyomde uwọrọiso. (Mme N̄ke 11:2; Mme Hebrew 6:15; 3 John 9, 10) Edieke ọdọde ndọ, enye enyene ndidi ibuot ufọk oro enyenede ima onyụn̄ ekemede nditịm n̄kara ofụri ufọk esie. (1 Timothy 3:4, 5, 12) Sia enye adade inyene eke spirit ke ọsọn̄urua, utọ eren oro ọyọbọ edidiọn̄ Jehovah.—Matthew 6:19-21.
15, 16. Mmanie ẹwụt ke mmimọ idi “mme enọ ke owo”? Nọ mme uwụtn̄kpọ.
15 Ke ini mbon oro ẹnamde utom nte mbiowo ke esop ẹsịn̄erede idemmọ nte mme ọkwọrọikọ, mme ekpemerọn̄, ye mme andikpep, mmọ ẹnọ nnyịn nti ntak ndiwụt esịtekọm mban̄a mme utọ “enọ ke owo” oro mmọ ẹdide. (Ephesus 4:8, 11, NW) Ekeme ndidi mbon oro ẹbọde ufọn ẹto ima ima utom mmọ iditịn̄ke emi kpukpru ini, edi Jehovah okụt kpukpru se mme anam-akpanikọ mbiowo ẹnamde. Enye idifreke ima enyịn̄ esie emi mmọ ẹwụtde ke ndinam n̄kpọ nnọ ikọt esie.—1 Timothy 5:17; Mme Hebrew 6:10.
16 Kere ban̄a uwụtn̄kpọ enyene-ifịk ebiowo kiet oro akakade ekese n̄kaiferi Christian oro ẹkeyomde ndisiak mfre. Ufan n̄kaiferi oro kiet ama ewet ete: Ebiowo oro “ama enen̄ede ọfọn ido, enen̄ede an̄wam, enen̄ede ekere aban̄a. Enye ama eben̄e ete yak imọ ida nnyịn usụn̄ ke akam inọ Jehovah. Nte enye ọkọbọn̄de akam, ete n̄kaiferi emi [idịghe kiet ke otu Mme Ntiense Jehovah] ama en̄wek eyet, ndien mmọn̄eyet ama asiaha kpukpru owo ke ubet ufọkibọk oro. Akam ebiowo oro okowụt edikere mban̄a didie ntem, Jehovah okonyụn̄ enyene ima didie ntem ke ndikọdọn̄ enye edi ke ata nnennen ini!” Owo udọn̄ọ efen edide Ntiense ama etịn̄ aban̄a mbiowo oro ẹkewahade ẹkese enye ete: “Ke ini mmọ ẹkesan̄ade ẹkpere bed mi ke ikpehe san̄asan̄a usọbọ, mma mfiọk nte ke inamke n̄kpọ m̀mê nso itịbe ọtọn̄ọde ke idaha oro ka iso, nyekeme ndiyọ. Mma n̄kop odudu nnyụn̄ nnyene ifụre.” Nte owo ekededi ekeme ndidep utọ ima ima edikere mban̄a oro? Ikemeke! Enye edi enọ Abasi, oro ẹnọde ẹbe ke esop Christian.—Isaiah 32:1, 2.
Enọ Utom Ukwọrọikọ
17, 18. (a) Nso utom ke Jehovah ọnọ kpukpru ikọt esie? (b) Nso un̄wam ke Abasi ọnọ man nnyịn ikeme ndinam utom nnyịn?
17 Idụhe ukpono oro ẹkpenọde owo ekededi oro okponde akan eke edinam n̄kpọ Jehovah, kpa Ata Edikon̄. (Isaiah 43:10; 2 Corinth 4:7; 1 Peter 2:9) Nte ededi, ifet edibuana ke an̄wan̄wa utom ukwọrọikọ eberede ọnọ kpukpru owo—n̄kpri ye ikpọ, iren ye iban—oro ẹnyenede ata udọn̄ ndinam n̄kpọ Abasi. Nte afo amada ọsọn̄urua enọ emi anam n̄kpọ? Ndusụk owo ẹkeme ndikop ndịk koro mmọ ẹkerede ke mmimọ idotke, edi ti ete ke Jehovah esinọ mbon oro ẹnamde n̄kpọ esie edisana spirit, ndien emi esinam nnyịn ikan mmeme ekededi oro nnyịn ikemede ndinyene.—Jeremiah 1:6-8; 20:11.
18 Jehovah ayak utom edikwọrọ Obio Ubọn̄ ọnọ mme asan̄autom esie emi ẹsụhọrede idem, iyakke inọ mbon ntan̄idem oro ẹberide edem ke mme ukeme mmọ. (1 Corinth 1:20, 26-29) Mbon nsụkidem ẹsinyịme mmeme mmọ ẹnyụn̄ ẹberi edem ke un̄wam Abasi nte mmọ ẹbuanade ke utom ukwọrọikọ. Mmọ n̄ko ẹsiwụt esịtekọm ẹban̄a un̄wam eke spirit oro enye ọnọde ebe ke “akama ukpọhọde, emi anamde akpanikọ.”—Luke 12:42-44; Mme N̄ke 22:4.
Inem Inem Uwem Ubon—Eti Enọ
19. Mme n̄kpọ ewe isida ikesịm edikụt unen ke edibọk nditọ?
19 Ndọ ye inem inem uwem ubon ẹdi enọ Abasi. (Ruth 1:9; Ephesus 3:14, 15) Nditọ n̄ko ẹdi ọsọn̄urua “udeme Jehovah,” oro ẹdade idatesịt ẹsọk mme ete ye eka oro ẹkụtde unen ke ndikpep mmọ mme edu Abasi. (Psalm 127:3) Edieke afo edide ete m̀mê eka, ka iso ndikop uyo Jehovah ebe ke ndinọ n̄kpri nditọ fo ukpep nte ekemde ye Ikọ esie. Mbon oro ẹnamde ntre iditreke ndinyene un̄wam ye akpakịp edidiọn̄ Jehovah.—Mme N̄ke 3:5, 6; 22:6; Ephesus 6:1-4.
20. Nso ikeme ndidi n̄kpọ un̄wam nnọ mme ete ye eka oro nditọ mmọ ẹwọn̄ọrede ẹkpọn̄ utuakibuot akpanikọ?
20 Kpa ye ukeme ofụri esịt mme ete ye eka oro ẹbakde Abasi, eyedi ndusụk nditọ mmọ ẹmek ndiwọn̄ọde n̄kpọn̄ utuakibuot akpanikọ ke ini mmọ ẹkọride ẹkponi. (Genesis 26:34, 35) Emi ekeme ndikama ubiak ke n̄kan̄ eke ntụk ọnọ mme ete ye eka. (Mme N̄ke 17:21, 25) Nte ededi, utu ke ndiduọk idotenyịn ofụri ofụri, mmọ nditi n̄ke Jesus aban̄ade idiọk udọ ekeme ndidi n̄kpọ un̄wam. Okposụkedi eyen oro ọkọkpọn̄de ufọk onyụn̄ etienede usụn̄ uwem ntụtutọn̄, ke ukperedem enye ama afiak ọnyọn̄ ufọk ete esie, oro akadarade enye ke ima ima usụn̄. (Luke 15:11-32) Se ededi oro ekemede nditịbe, mme anam-akpanikọ ete ye eka oro ẹdide Christian ẹkeme ndidori enyịn mban̄a mbọm Jehovah, ima ima edikere mban̄a esie, ye un̄wam esie oro mîkpụhu.—Psalm 145:14.
21. Nnyịn ikpokop uyo anie, ndien ntak-a?
21 Do, ẹyak nnyịn owo kiet kiet ibiere se inen̄erede idi akpan n̄kpọ ke uwem nnyịn. Nte nnyịn ye ọkpọsọn̄ udọn̄ ibịne akpakịp inyene obụkidem, emi ekemede ndida afanikọn̄ nsọk nnyịn ye ubon nnyịn? Mîdịghe nte nnyịn ibịne “eti edinọ ye kpukpru enọ eke ẹfọnde ẹma” oro ẹtode “Ete mme un̄wana”? (James 1:17) Satan, “ete nsu,” oyom nnyịn ikpa utom kaban̄a inyene obụkidem inyụn̄ itaba inemesịt ye uwem. (John 8:44; Luke 12:15) Nte ededi, Jehovah enyene mfọnọn̄kpọ nnyịn ke ekikere. (Isaiah 48:17, 18) Ntre, ndien, ẹyak nnyịn ika iso ndikop uyo ima ima Ete nnyịn eke heaven inyụn̄ ‘iyak enye adat nnyịn esịt’ kpukpru ini. (Psalm 37:4) Edieke nnyịn ibịnede utọ usụn̄ uwem oro, mme ọsọn̄urua enọ ye akpakịp edidiọn̄ Jehovah ẹyefori nnyịn—ndien ididianke afanikọn̄ ndomokiet.
[Ikọ idakisọn̄]
^ ikp. 10 Se Awake!, January 22, 1993, page 18-21.
Nte Afo Emeti?
• M̀mọ̀n̄ ke ẹkeme ndikụt n̄kponn̄kan inemesịt?
• Nso idi ndusụk enọ oro Jehovah ọnọde ikọt esie?
• Ntak emi utom ukwọrọikọ edide enọ?
• Nso ke mme ete ye eka ẹkeme ndinam man ẹbọ edidiọn̄ Abasi nte mmọ ẹbọkde nditọ mmọ?
[Mme Mbụme Ukpepn̄kpọ]
[Ndise ke page 16]
Nte afo omowụt esịtekọm aban̄a enọ Ikọ Abasi oro ẹwetde-wet?
[Ndise ke page 17]
Kpa ye ata n̄kpọsọn̄ idaha, Laurel Nisbet ama anam n̄kpọ Abasi ifịk ifịk
[Mme ndise ke page 18]
Ukem nte Tabitha, ẹtịm ẹdiọn̄ọ mme Christian eyomfịn ke ntak mme edinam ima mmọ
[Ndise ke page 19]
Mbiowo Christian ẹnyene ima ima edikere mban̄a ẹnọ mme ekemmọ andinịm ke akpanikọ