Mme Mbụme Ẹtode Mme Andikot

Nso ke ndituak ibuot nnọ Jehovah “ke spirit” ọwọrọ?

Ke ini ọkọnọde n̄wan Samaria oro ekedide ndikoi mmọn̄ ke obube mmọn̄ Jacob oro okodude ekpere obio Sychar ikọ ntiense, Jesus Christ ama ọdọhọ ete: “Abasi edi spirit: ndien mme andituak ibuot nnọ Enye ẹnyene ndituak ibuot ke spirit ye ke akpanikọ.” (John 4:24) Ana ituak ibuot “ke akpanikọ” ke usụn̄ifiọk edinam utuakibuot nnyịn asan̄a ekekem ye se Jehovah Abasi ayararede ke Bible aban̄a idemesie ye mme uduak esie. Ana inam utom Abasi ke spirit ke usụn̄ifiọk eke edinam utom oro ifịk ifịk, idide se esịt oro ọyọhọde ye ima ye mbuọtidem onụkde. (Titus 2:14) Nte ededi, udọn̄ikọ oro owụt ete ke ikọ Jesus aban̄ade ‘ndituak ibuot nnọ Abasi ke spirit’ aka anyan akan idaha ekikere oro nnyịn idade inam n̄kpọ Jehovah.

Nneme oro Jesus ekenyenede ye n̄wan oro ke obube mmọn̄ ikaban̄ake edinyene m̀mê editre ndinyene ifịk ke utuakibuot. Ẹkam ẹkeme ndida ifịk ye ifiopesịt nnam nsunsu utuakibuot. Utu ke oro, ke ama eketịn̄ ete ke owo idituakke ibuot inọ Ete ke obot Samaria m̀mê ke temple Jerusalem—mme akpan ebiet—Jesus ama anyan ubọk owụt obufa usụn̄ utuakibuot oro ọkọn̄ọde ke se Abasi enen̄erede edi. (John 4:21) Enye ọkọdọhọ ete: “Abasi edi Owo eke spirit.” (John 4:24, Charles B. Williams) Ata Abasi inyeneke idem eke obụk, owo inyụn̄ ikemeke ndikụt m̀mê nditụk enye. Owo ituakke ibuot inọ enye ke temple oro ẹkụtde ke enyịn m̀mê ke obot. Ntem, Jesus eketịn̄ aban̄a orụk utuakibuot oro akande mme n̄kpọ oro ẹkemede ndikụt.

Ke adianade ye edituak ibuot ke akpanikọ, ana edisana spirit—anamutom odudu Abasi oro enyịn mîkwe—ọnọ utuakibuot oro ẹnyịmede ndausụn̄. Apostle Paul ekewet ete: “[Edisana] Spirit ododụn̄ọde kpukpru n̄kpọ, kpa nditụn̄ọ n̄kpọ Abasi.” Enye ama adian do ete: “Nnyịn ikọbọhọ spirit ererimbot emi, edi ikọbọ spirit emi otode Abasi, man otodo nnyịn ikpọfiọk mme n̄kpọ eke Abasi ọnọde nnyịn ke mfọn.” (1 Corinth 2:8-12) Man ituak ibuot inọ Abasi ke usụn̄ oro enye enyịmede, ana nnyịn inyene spirit esie inyụn̄ iyak enye ada nnyịn usụn̄. Akan oro, edi akpan n̄kpọ ete inam edu, m̀mê idaha ekikere, nnyịn odu ke n̄kemuyo ye spirit Abasi ebe ke ndikpep nnyụn̄ nda Ikọ esie nsịn ke edinam.

[Ndise ke page 28]

Tuak ibuot nọ Abasi “ke spirit ye ke akpanikọ”