Nso Idi N̄kpọ Oro Enyenede Ata Ufọn?

Ndinyene n̄kpọ oro enyenede ata ufọn ekeme ndidat owo esịt. Edi nso ikpedi oro? Ediwak okụk? Ọsọn̄urua m̀mê ediye n̄kpọmbana? Uwọrọetop ye uwọrọiso? Ediwak owo ẹnen̄ede ẹda mme n̄kpọ emi ke ọsọn̄urua. Ndinyene mmọ ekeme ndinam owo enyene se adade odu uwem, anam uwem enen̄ede enem, m̀mê oyụhọ udọn̄ edidi se ẹmade ye udọn̄ edikụt unen. Nte nnyịn ke idomo ndinyene mme utọ n̄kpọ oro, idoride enyịn ite ke mmọ ẹyenam nnyịn isịm mme utịtmbuba ye se nnyịn iyomde ke ini iso?

KE EDIWAK idaha, mme owo ẹsida n̄kpọ ke ọsọn̄urua ẹtiene nte n̄kpọ oro oyụhọde ọkpọkpọ udọn̄ mmọ m̀mê se mmọ ẹyomde. Nnyịn imesima mme n̄kpọ oro ẹnamde nnyịn ikop inemesịt ẹnyụn̄ ẹnọde nnyịn idotenyịn ini iso oro enyenede ifụre. Nnyịn imesima mme n̄kpọ oro ẹnọde usọp usọp un̄wam, uyụhọ, m̀mê ẹnamde ẹdiọn̄ọ nnyịn. Edi, ndida mme udọn̄ nnyịn oro ẹkade-ka iso ndikpụhọde mbiere se inyenede ufọn edi unana ifiọk ye unana edikụt n̄kpọ n̄ka anyan. Ke nditịm ntịn̄, se nnyịn ibatde nte akakan udọn̄ nnyịn ke ẹda ẹbiere n̄kpọ oro enen̄erede enyene ufọn.

Nso idi akakan udọn̄ nnyịn? N̄kpọ ndomokiet inyeneke ufọn edieke akpan n̄kpọ kiet—uwem—mîdụhe. Ke uwem mîdụhe, nnyịn idụhe. Edidem Solomon eke Israel eset ekewet ete: “Ama edi mme akpa-n̄kpa, mmọ ifiọkke baba n̄kpọ kiet . . . Baba edinam, baba uduak, baba ifiọk, baba mbufiọk [idụhe] ke [ikpîkpu udi ubonowo].” (Ecclesiastes 9:5, 10) Edieke nnyịn ikpade, nnyịn imasana kpukpru se inyenede iyak. Do, akakan udọn̄ nnyịn edi ndinyene n̄kpọ oro edinịmde nnyịn uwem. Nso idi oro?

Nso Idinịm Nnyịn Uwem?

Edidem Solomon ọkọdọhọ ete: “Inyene [“okụk,” NW] onyụn̄ edi se ikpemede.” (Ecclesiastes 7:12) Edieke inyenede okụk oro awakde ekem, nnyịn imekeme ndinyene udia ye eti ufọk. Okụk ekeme ndinam nnyịn ikop inem edinam isan̄ n̄ka mme ebiet oro ẹdude nsannsan. Enye ekeme ndinọ nnyịn mme n̄kpọ oro iyomde ke ini nnyịn  mîkemeke ndinam utom aba ke ntak usọn̄ m̀mê udọn̄ọ. Ndinyene okụk enyene ediwak ufọn. Edi, okụk ikemeke ndinịm nnyịn uwem. Apostle Paul ama ọnọ Timothy item ete: “Sọn̄ọ dọhọ mme enyene-n̄kpọ ke eyo emi, ete mmọ ẹkûmenede idem, ẹkûnyụn̄ ẹdori enyịn ke se iyan̄ade owo nte enyene, edi ẹdori enyịn ke Abasi, emi ọnọde nnyịn kpukpru n̄kpọ uwak-uwak, ete idara ke esịt.” (1 Timothy 6:17) Okụk ofụri ererimbot emi ikemeke ndidep uwem nnọ nnyịn.

Kere ban̄a se iketịbede inọ eren oro ekerede Hitoshi. Sia ẹkebọkde ke ubon emi ekedide ubuene, Hitoshi ama enyene ọkpọsọn̄ udọn̄ ndidi imọ. Enye ama enen̄ede eberi edem ke odudu oro okụk enyenede tutu enye ekere ke ẹkam ẹkeme ndida okụk ndep owo esịt. Ekem eren kiet ama awaha enyịnusụn̄ Hitoshi onyụn̄ obụp enye m̀mê enye ọdiọn̄ọ ete ke Jesus Christ akakpa ọnọ enye. Mbụme emi ama anam Hitoshi enyene ọkpọsọn̄ udọn̄ koro enye ekekerede ete ke owo ndomokiet ikpekemeke ndikpa nnọ owo nte imọ. Enye ama odụk an̄wan̄wa utịn̄ikọ Bible ndien idem ama akpa enye ndikop item oro ọkọdọhọde ‘ẹnam enyịn enen̄ede ese.’ Etịn̄ikọ ama anam an̄wan̄a ete ke enyịn oro “enen̄erede ese” edi enye oro okụtde n̄kpọ ke anyan usụn̄ onyụn̄ owụhọde ke mme n̄kpọ eke spirit. (Luke 11:34) Utu ke ndikpa utom nyom okụk, Hitoshi ama ọtọn̄ọ ndinịm mme n̄kpọ eke spirit akpa ke uwem esie.

Inyene obụkidem ekeme n̄ko ndinam nnyịn inyene iwụk ye ifụre ke ndusụk udomo. Ndinyene inyene obụkidem oro ekemde ekeme ndinam nnyịn ikûtịmede esịt iban̄a se nnyịn iyomde ke usen ke usen. Eti ufọk ke ediye n̄kann̄kụk ekeme ndinọ nnyịn inemesịt. N̄kon̄ine ọfọn̄ ye ediye ubomisọn̄ ẹkeme ndinam mbon en̄wen ẹma nnyịn.

‘Ndikụt eti n̄kpọ ke kpukpru ọkpọsọn̄ utom nnyịn’ edi edidiọn̄. (Ecclesiastes 3:13) Ndien ndinyene nyọhọ nsụhọ ekeme ndiyak mbonima nnyịn ‘ẹda nduọkodudu, ẹdia, ẹn̄wọn̄, ẹnyụn̄ ẹdat esịt.’ Nte ededi, mme n̄kpọ obụkidem ẹnyene ufọn ke ibio ini kpọt. Ke item ọkọnọde ọbiọn̄ọ edisịn esịt ke n̄kpọ owo, Jesus Christ ọkọdọhọ ete: “Owo enyene se enyenyene, uwem esie isịneke enye ke ubọk.” (Luke 12:15-21) Inamke n̄kpọ m̀mê awak onyụn̄ enyene ufọn didie, inyene ikemeke ndinọ uwem.

Ke uwụtn̄kpọ, Liz ọkọdọ eren oro ekenyenede okụk. Enye obụk ete: “Nnyịn ima inyene ediye ufọk ye ubomisọn̄ iba, ndien idaha okụk nnyịn ama ọnọ nnyịn ifụre ndinyene n̄kpọ obụkidem ekededi oro ererimbot ekenyenede ndinọ . . . Ke edide esen n̄kpọ, n̄kosụk ntetịmede esịt mban̄a okụk.” Enye anam an̄wan̄a ete: “Nnyịn ima itaba ata ediwak n̄kpọ. Etie nte adan̄a nte afo enyenede n̄kpọ, ntre ke afo anana ifụre.”

Ediwak owo ẹnen̄ede ẹda uwọrọetop ye uwọrọiso ke ọsọn̄urua koro mmọ ẹkemede ndinam ẹtoro ẹnyụn̄ ẹkpono mmimọ. Ke ererimbot mfịn, ubọkọkọ oro okụtde unen edi n̄kpọ oro ẹmade. Ndinyene n̄wọrọnda ukeme m̀mê usọ ekeme ndin̄wam nnyịn inam enyịn̄ inọ idem. Mbon en̄wen ẹkeme nditoro nnyịn, ẹnen̄ede ẹkpono mme ekikere nnyịn, ẹnyụn̄ ẹnyene ọkpọsọn̄ udọn̄ ndinyene uma nnyịn. Kpukpru emi ẹkeme ndinọ idatesịt ye uyụhọ. Nte ededi, enye esibe efep nte ini akade. Solomon ama enyene kpukpru ubọn̄ ye odudu oro edidem ekemede ndinyene, edi enye ama eseme ete: “Koro mîtịghi enyene-ibuot owo, kpa nte mîtịghi ndisịme owo . . . Koro ẹfrede kpukpru [owo].” (Ecclesiastes 2:16) Uwọrọetop m̀mê uwọrọiso inọhọ owo uwem.

Anamusọ oro ekerede Celo ama edifiọk n̄kpọ oro enen̄erede enyene ufọn akan uwọrọetop. Sia ekenyenede ndammana ukeme, enye ama odot ndika ufọkn̄wed oro ediforide usọ esie. Ikebịghike ufọkutom usuanmbụk n̄kpọntịbe ye mme odụn̄ọde utomusọ ẹma ẹtoro utom esie. Ẹma ẹnịm ediwak edibot n̄kpọ esie nte n̄kpọ ndise ke ikpọ obio Europe. Celo obụk ete: “Nnyene ndinyịme nte ke ini kiet ko, utomusọ ekedi ata akpan n̄kpọ ke uwem mi. Nte ededi, mma ndifiọk nte ke ami ndika iso mbịne ubọkọkọ emi editie nte edidomo ndisan̄a utom nnọ ete iba. (Matthew 6:24) Mma nnịm  ke akpanikọ nte ke ata akpan n̄kpọ oro n̄kemede ndinam edi ndikwọrọ eti mbụk Obio Ubọn̄ Abasi. Ntem mma nnam ọkpọkpọ ubiere ndisana utom mi nte anamusọ nyak.”

Nso Inyene N̄kponn̄kan Ufọn?

Sia n̄kpọ ndomokiet mînyeneke ufọn ke uwem mîdụhe, nso ke nnyịn ikeme ndinyene oro ekemede ndinọ nnyịn ubiọn̄ edika iso ndu uwem? Kpukpru uwem ẹto Jehovah Abasi. (Psalm 36:9) Ke akpanikọ, “nnyịn idodu ke Enye, inyụn̄ isan̄a ke Enye, inyụn̄ inyene uwem nnyịn ke Enye.” (Utom 17:28) Enye ọnọ mbon oro enye amade nsinsi uwem nte enọ. (Rome 6:23) Nso ke ana nnyịn inam man idot ndibọ enọ emi?

Ndibọ enọ nsinsi uwem ọkọn̄ọ ke nnyịn ndinyene n̄kpet n̄kpet itie ebuana ye Jehovah. Ke ntre, mfọn esie ọfọn akan n̄kpọ en̄wen ekededi oro nnyịn ikemede ndinyene. Ke ini nnyịn inyenede enye, nnyịn imenyene idotenyịn ata inemesịt oro ebịghide ke nsinsi. Nte ededi, edieke mînyeneke mfọn Abasi, nnyịn isak iso ise nsinsi nsobo. Nte an̄wan̄ade, ndien, n̄kpọ ekededi oro edin̄wamde nnyịn ndinyene eti itie ebuana ye Jehovah enyene akamba ufọn.

Se Anade Nnyịn Inam

Nnyịn ndikụt unen ọkọn̄ọ ke nnyịn ndinyene ifiọk. Itie emi nnennen ifiọk otode edi Ikọ Jehovah, kpa Bible. Enye kpọt asian nnyịn se anade nnyịn inam man inem Abasi esịt. Ke ntre oyom nnyịn itịn̄ enyịn ikpep N̄wed Abasi. Ifịk ifịk ukeme edikpep kpukpru se ikemede mban̄a Jehovah Abasi ye Jesus Christ osụn̄ọ ke ‘ifiọk oro ọnọde nsinsi uwem.’ (John 17:3) Utọ ifiọk oro edi n̄kpọuto oro ẹkpedade ke ọsọn̄urua!—Mme N̄ke 2:1-5.

Ifiọk oro nnyịn inyenede ito Ikọ Abasi etịm nnyịn idem ndinam usio-ukot efen—ndinyene mbuọtidem ke Jesus Christ. Jehovah owụk ete ke kpukpru mbon oro ẹtienede imọ ana ẹtiene imọ ebe ke Jesus. (John 14:6) Ke akpanikọ, “edinyan̄a inyụn̄ itoho ke baba owo kiet efen.” (Utom 4:12) Ke akpatre, ubọhọ nnyịn ikọn̄ọke ke ‘silver ye gold, edi ọkọn̄ọ ke ọsọn̄urua iyịp Christ.’ (1 Peter 1:18, 19) Nnyịn inyene ndinanam mbuọtidem nnyịn n̄wụt ebe ke ndinịm mme ukpepn̄kpọ Jesus ke akpanikọ nnyụn̄ ntiene uwụtn̄kpọ esie. (Mme Hebrew 12:1-3; 1 Peter 2:21) Ndien uwa esie enyene ufọn didie ntem! Edida mme ufọn esie nnam n̄kpọ ebiere nsinsi ini iso ofụri ubonowo. Ke ini ẹdade enye ẹnam n̄kpọ ọyọhọ ọyọhọ ke ufọn nnyịn, ẹnọ nnyịn enọ nsinsi uwem oro enen̄erede enyene ufọn.—John 3:16.

Jesus ọkọdọhọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo.” (Matthew 22:37) Ndima Jehovah ọwọrọ ete “nnyịn inịm mbet Esie.” (1 John 5:3) Mbet esie oyom ete nnyịn ida san̄asan̄a ikpọn̄ ererimbot, inyene edisana edu uwem, inyụn̄ inọ Obio Ubọn̄ esie ibetedem ke edinam akpanikọ. Oro edi usụn̄ nte nnyịn ‘imekde uwem’ utu ke n̄kpa. (Deuteronomy 30:19) Edieke nnyịn ‘isan̄ade ikpere Abasi, enye ayasan̄a ekpere nnyịn.’—James 4:8.

Ndinyene mfọn Abasi ọfọn akan kpukpru n̄kpọuto ererimbot. Mbon oro ẹnyenede enye ẹkop inemesịt ẹkan ke ererimbot! Do, nnyịn ikpakam idomo ndinyene n̄kpọuto oro enyenede ata ufọn—unyịme Jehovah. Adan̄a nte ikekeme, ẹyak nnyịn inam item Paul emi: “Bịne edinen ido, ye uten̄e Abasi, ye mbuọtidem, ye ima, ye ime, ye nsụhọde-esịt. N̄wana eti en̄wan mbuọtidem; sọn̄ọ mụm nsinsi uwem kama.”—1 Timothy 6:11, 12.

[Mme ndise ke page 21]

Nso ke afo ada ke ọsọn̄urua? Okụk, inyene obụkidem, uwọrọetop, m̀mê n̄kpọ en̄wen?

[Ndise ke page 23]

Oyom nnyịn itịn̄ enyịn ikpep N̄wed Abasi