Afo Emekeme Ndinyene Ata Mbuọtidem

Ke ini Sarah Jayne ekedide isua 19 ke emana, enye ama ọfiọk ete ke imọ imenyene kansa ke itie eyen. Ke ama akanam usiakidem, ama ọnọ enye utan̄ifia ndien enye ama enyene idotenyịn ke udọn̄ọ oro oyokụre imọ ke ini iso. Ke akpanikọ, enye ama enen̄ede enyene idotenyịn tutu ke ini enye ekedide isua 20, enye odụk ediomi ndọ onyụn̄ ọtọn̄ọ ndinam ndutịm udianndọ esie. Kpa ke isua oro kansa ama afiak ọtọn̄ọ, ndien enye ama ọfiọk ete ke imọ inyene urua ifan̄ kpọt ndidu uwem. Sarah Jayne ama akpa ke June 2000, esisịt ini mbemiso enye esịmde isua 21 ke emana.

SE IKOTỤKDE isenowo oro ẹkekade ẹkese Sarah Jayne ke ufọkibọk ekedi emem esịtidem ye mbuọtidem oro enye ekenyenede aban̄a ini iso, ke adianade ye ọkpọsọn̄ mbuọtidem esie ke Abasi ye ke Ikọ esie, kpa Bible. Kpa ye enyene-ndịk afanikọn̄ oro ekesịmde enye, enye ama enyene idotenyịn ediset ke n̄kpa—ke imọ iyafiak ikụt kpukpru ufan imọ. (John 5:28, 29) Enye ọkọdọhọ ete: “Nyokụt kpukpru mbufo ke obufa ererimbot Abasi.”

Ndusụk owo ẹdọhọ ke utọ mbuọtidem oro edi abian̄a. Ludovic Kennedy obụp ete: “Nso ke uwem ke n̄kpa ebede edi ke mîbọhọke idotenyịn mbon oro mînyeneke ifụre nte ke ini ẹfụride akpatre ukotowo, udia, edin̄wọn̄ n̄kpọ ye ikwọ ẹyedu ẹnọ mmimọ n̄ko, nte ke mmimọ iyokop inem ndidu ọtọkiet ke in̄wan̄ oro ebietde Eden ye mbon oro ẹkebemde mmimọ iso ẹkpan̄a ye mbon eken oro ẹditienede?” Ke ikọ oro, nnyịn inyene ndibụp mbụme owụtde ke owo inyịmeke. Ewe esịne ifiọk akan—ndinịm ke akpanikọ nte ke “uwem emi edi ukụre se idude, ntre ke nnyịn ikpenyene ndida enye nnam n̄kpọ ọyọhọ ọyọhọ,” nte Kennedy ọnọde ekikere, m̀mê ndinịm  Abasi ye un̄wọn̄ọ esie aban̄ade ediset ke n̄kpa ke akpanikọ? Sarah Jayne ekemek ndinịm Abasi ye un̄wọn̄ọ esie aban̄ade ediset ke n̄kpa ke akpanikọ. Enye akasan̄a didie enyene utọ mbuọtidem oro?

‘Yom Abasi, Nyụn̄ Kụt Enye’

Man enyene mbuọtidem onyụn̄ enịm owo ke akpanikọ, oyom afo ọdiọn̄ọ enye onyụn̄ ekpep nte enye esikerede onyụn̄ anamde n̄kpọ. Edinam emi abuana esịt ọkọrọ ye ekikere. Enen̄ede edi ukem oro ke ini edide edisịm edinyene ata mbuọtidem ke Abasi. Oyom afo ọdiọn̄ọ enye, ekpep aban̄a mme edu esie, odụn̄ọde ọfiọk adan̄a nte enye edide se ẹkemede ndiberi edem ke kpukpru se enye etịn̄de onyụn̄ anamde.—Psalm 9:10; 145:1-21.

Ndusụk owo ẹkere ke owo ikemeke ndinam emi. Mmọ ẹdọhọ ke Abasi odu oyom usụn̄ akaha, enen̄ede ayan̄a owo ifiọk—edieke edide enye akam ododu. Mbon eyịghe ẹbụp ẹte: “Edieke Abasi edide ata owo nte mme Christian nte Sarah Jayne ẹkerede, ntak emi enye mîyarakede idemesie inọ nnyịn eken?” Edi nte Abasi enen̄ede odu oyom usụn̄ onyụn̄ edi se owo mîkemeke ndikụt? Ke ini eketịn̄de ikọ ọnọ mbon akwaifiọk ke Athens, apostle Paul ọkọdọhọ ete ke “Abasi, emi okobotde ererimbot ye kpukpru se idude ke esịt” ọmọnọ n̄ko kpukpru se ẹyomde man mmọ ‘ẹyom, ẹnyụn̄ ẹkụt enye.’ Ke akpanikọ, Paul ama ọdọhọ ete: ‘Enye iyomke usụn̄ ye baba nnyịn owo kiet.’—Utom 17:24-27.

Didie, ndien, ke afo ekeme ‘ndiyom Abasi nnyụn̄ n̄kụt enye’? Ndusụk owo ẹnam emi ebe ke ndise n̄kanade ekondo oro akande mmọ okụk. Ye ediwak owo, oro ke idemesie ọnọ uyarade oro ekemde ndinam mmọ ẹnịm ẹte ke anaedi Andibot odu. * (Psalm 19:1; Isaiah 40:26; Utom 14:16, 17) Mmọ ẹfiọk, nte apostle Paul ọkọfiọkde, ẹte ke “tọn̄ọ nte ẹkebot ererimbot owo ẹtịm ẹkụt ndịbe-ndịbe n̄kpọ emi enyenede [Abasi], kpa nsinsi odudu Esie ye idaha Esie nte Abasi; ẹda mme n̄kpọ emi Enye akanamde ẹtịm ẹfiọk.”—Rome 1:20; Psalm 104:24.

Afo Omoyom Bible

Nte ededi, man enyene ata mbuọtidem ke Andibot, afo omoyom n̄kpọ efen oro enye ọnọde. Nso idi oro? Bible—Ikọ Abasi eke odudu spirit, emi enye adade ayarade uduak esie. (2 Timothy 3:16, 17) Ndusụk owo ẹyedọhọ ẹte: “Edi yak kan̄a ise, didie ke afo ekeme ndinịm n̄kpọ ekededi oro Bible ọdọhọde ke ini afo okụtde mme enyene-ndịk n̄kpọ oro mbon oro ẹdọhọde ke itiene Bible ẹnamde?” Edi akpanikọ, Christendom ọwọrọ etop mbubịk ido, ibak, ye oburobụt ido. Edi enyene-ibuot owo ekededi ekeme ndikụt nte ke Christendom n̄kukụre ananam nte imetiene mme edumbet Bible.—Matthew 15:8.

Bible ke idemesie ama ọtọt ete ke ediwak owo ẹyedọhọ ke mmimọ ikpono Abasi edi, ke akpanikọ, mmọ “ẹkan̄ kpa Ọbọn̄ emi akafakde mmọ.” Apostle Peter ọkọdọhọ ete: “Oto mmọ ke owo ẹyenyụn̄ ẹtịn̄ idiọk ẹdian usụn̄ akpanikọ.” (2 Peter 2:1, 2) Jesus Christ ọkọdọhọ ete ke mmọ emi ẹdi “mme anam-ukwan̄n̄kpọ” oro ẹdidade ndiọi edinam mmọ ẹtịm ẹfiọk mmọ. (Matthew 7:15-23) Ndisịn Ikọ Abasi ke ntak mbụk Christendom etie nte editop leta otode ufan oro owo ọbuọtde idem nduọk n̄kukụre koro andida enye nsọk fi mîwọrọke eti etop.

Ke Ikọ Abasi mîdụhe owo ikemeke ndikọri ata mbuọtidem. Edi ke Bible kpọt ke Jehovah owụt idaha esie, yak idọhọ ntre. Enye ọnọ ibọrọ ke mme utọ mbụme anyan ini nte ntak emi enye ayakde ndutụhọ ye ubiak ẹdu ye se enye edinamde aban̄a mmọ. (Psalm 119:105; Rome 15:4) Sarah Jayne ama edinịm ke akpanikọ ete ke Bible edi Ikọ Abasi eke odudu spirit. (1 Thessalonica 2:13; 2 Peter 1:19-21) Didie? Idịghe n̄kukụre koro ete ye eka esie ẹkedọhọde enye ntre, edi koro enye akadade ini ye ofụri esịt odụn̄ọde kpukpru uyarade oro ẹwụtde nte ke Bible edi n̄wọrọnda ediyarade otode Abasi. (Rome 12:2) Ke uwụtn̄kpọ, enye ama okụt odudu oro Bible enyenede ke idem mbon oro ẹsọn̄ọde ẹyịre ke mme edumbet esie. Ye un̄wam n̄wed nte The Bible—God’s Word or Man’s?, * enye n̄ko ama etịm odụn̄ọde akpakịp uyarade Bible oro ẹsọn̄ọde nte ke ẹkeda odudu spirit Abasi ẹwet.

 “Mbuọtidem Oto ke Edikop”

Nte ededi, ikemke n̄kukụre ndinyene Bible m̀mê idem ndinịm ke akpanikọ nte ke ẹkeda odudu spirit ẹwet enye. Apostle Paul ewet ete: “Mbuọtidem oto ke edikop.” (Rome 10:17) Ndikop se Bible ọdọhọde ọbọp mbuọtidem, idịghe n̄kukụre ndinyene Bible. Afo “okop” se Abasi ọdọhọde ebe ke ndikot nnyụn̄ n̄kpep Ikọ esie. Idem n̄kpri owo ẹkeme ndinam emi. Paul ọdọhọ ete ke “toto ke uyen,” eka ye eka eka Timothy ẹma ẹkpep enye “Edisana N̄wed Abasi.” Ndi emi ọnọ ekikere nte ke ndusụk orụk edinyịk ama abuana? Baba! Owo ikenyịkke m̀mê ndibabian̄a Timothy ke usụn̄ ekededi. ‘Ẹkekpekpek enye man enịm’ se enye okokopde onyụn̄ okotde.—2 Timothy 1:5; 3:14, 15, NW.

Ẹkekpek Sarah Jayne ke ukem usụn̄ oro. Ukem nte mbon Beroea akpa isua ikie, enye ama ‘okop ikọ [oto ete ye eka esie ye mme andikpep eken] ke edinyịme esịt.’ Nte eyenọwọn̄, eyịghe idụhe nte ke enye ama ọbuọt idem unyịme unyịme ke se ete ye eka esie ẹketịn̄de ẹnọ enye. Ke ukperedem, nte ọkọkọride ọwọrọ owo, enye ikenyịmeke kpukpru se ẹkekpepde enye ntre nnan nnan m̀mê ndebe ndebe. Enye ama ‘odụn̄ọde n̄wed Abasi ke usen ke usen, ete ifiọk m̀mê mme ikọ oro ẹkem ntre.’—Utom 17:11.

Afo Emekeme Ndikọri Ata Mbuọtidem

Afo n̄ko emekeme ndikọri ata mbuọtidem—orụk mbuọtidem oro apostle Paul eketịn̄de aban̄a ke leta oro enye ọkọnọde ẹsọk mme Christian ẹdide mme Hebrew. Enye ọkọdọhọ ete ke utọ mbuọtidem oro edi “ọyọhọ edibet mme n̄kpọ ẹdoride enyịn ẹban̄a, edinam n̄wụt in̄wan̄-in̄wan̄ nte ke mme ata idem n̄kpọ ẹdu okposụkedi owo mîkwe.” (Mme Hebrew 11:1, NW) Ke enyenede utọ mbuọtidem oro, afo eyenen̄ede enịm ke akpanikọ ete ke kpukpru se imọ idoride enyịn iban̄a, esịnede un̄wọn̄ọ Abasi aban̄ade ediset ke n̄kpa, ẹyesu. Afo eyenịm ke akpanikọ ete ke mme utọ idotenyịn oro ẹkọn̄ọ ke mme un̄wọn̄ọ oro mîkemeke ndikpu, ikọn̄ọke ke ndap ndap ekikere. Afo ọyọfiọk ete ke akananam Jehovah ikpụhu ndinịm mme un̄wọn̄ọ esie. (Joshua 21:45; 23:14; Isaiah 55:10, 11; Mme Hebrew 6:18) Obufa ererimbot emi Abasi ọn̄wọn̄ọde eyedi ata idem n̄kpọ ọnọ fi nte n̄kpọ eke enye ama ekededi. (2 Peter 3:13) Ndien afo ayada enyịn mbuọtidem okụt in̄wan̄-in̄wan̄ nte ke Jehovah Abasi, Jesus Christ, ye Obio Ubọn̄ Abasi, ẹdi ata idem n̄kpọ, idịghe abian̄a.

Owo ikpọn̄ke fi ndikọri ata mbuọtidem ikpọn̄.  Ke ẹsiode ndinam Ikọ esie odu ẹfep, Jehovah ọnọ n̄ko esop Christian ofụri ererimbot oro enyịmede ndin̄wam mbon oro ẹnyenede esịt akpanikọ ndinyene mbuọtidem ke Abasi. (John 17:20; Rome 10:14, 15) Nyịme kpukpru un̄wam oro Jehovah ọnọde ebe ke esop oro. (Utom 8:30, 31) Ndien sia mbuọtidem edide mbun̄wụm edisana spirit Abasi, bọn̄ akam kpukpru ini ben̄e spirit oro an̄wam fi enyene ata mbuọtidem.—Galatia 5:22, NW.

Kûyak mbon eyịghe oro ẹsakde owo ekededi oro ọbuọtde idem ke Abasi ye Ikọ esie ẹnam idem emem fi. (1 Corinth 1:18-21; 2 Peter 3:3, 4) Ke akpanikọ, ata mbuọtidem enen̄ede edi akpan n̄kpọ ke ndisọn̄ọ ubiere fo ndiyọ utọ nsahi oro. (Ephesus 6:16) Sarah Jayne ama okụt ke oro edi ntre, ndien enye ama esisịn udọn̄ ọnọ mbon oro ẹkekade ẹkese enye ke ufọkibọk ndisọn̄ọ mbuọtidem mmọ. Enye ekesidọhọ ete: “Nam akpanikọ edi okwo. Kpep Ikọ Abasi. Sịk kpere esop Abasi. Bọn̄ akam kpukpru ini. Nyene ifịk ke utom Jehovah.”—James 2:17, 26.

Ke okụtde mbuọtidem oro enye ekenyenede ke Abasi ye ke ediset ke n̄kpa, kiet ke otu mme nurse esie ama ọdọhọ ete: “Afo emenen̄ede enịm emi ke akpanikọ, nte idịghe ntre?” Ke ini ẹkebụpde m̀mê nso ikanam enye enyene utọ idotenyịn oro kpa ye mme afanikọn̄ esie, enye ama ọbọrọ ete: “Edi edinyene mbuọtidem ke Jehovah. Enye edi ata ufan mi, ndien mmenen̄ede mma enye.”

[Mme Ikọ idakisọn̄]

[Ndise ke page 6]

“Toto ke uyen” eka ye eka eka Timothy ẹma ẹkpep enye “Edisana N̄wed Abasi”

[Ndise ke page 6]

Ẹma ẹtoro mbon Beroea ke ndikodụn̄ọde N̄wed Abasi ke usen ke usen

[Ebiet Ẹdade N̄kpọ Ẹto]

Ẹda ẹto “Photo-Drama of Creation,” 1914

[Mme ndise ke page 7]

Ndikop nnyụn̄ nnam se Bible ọdọhọde ọbọp mbuọtidem, idịghe n̄kukụre ndinyene Bible

[Ndise ke page 7]

“Nyokụt kpukpru mbufo ke obufa ererimbot Abasi”