Ata Mbuọtidem—Ndi Enye ke Osụk Ododu?
Ata Mbuọtidem—Ndi Enye ke Osụk Ododu?
“Mbuọtidem edi odu-uwem ye ọkpọsọn̄ uko ke mfọn Abasi, oro enen̄erede ọsọn̄ tutu andinịm ke akpanikọ enyịme ndisịn uwem esie ke itiendịk utịm ike-tọsịn ke ntak oro.”—MARTIN LUTHER, 1522.
“Etie nte nnyịn idi n̄kaowo oro mbuọtidem ye mme edinam Christian ẹma ẹkesop ofụri ofụri.”—LUDOVIC KENNEDY, 1999.
MME ekikere ke se mbuọtidem edide ẹkpụhọde akamba akamba. Ke eset, ekedi ọsọ n̄kpọ ndibuọt idem ke Abasi. Mfịn, ke ererimbot eyịghe ye ndutụhọ emi, ata mbuọtidem ke Abasi ye ke Bible ke osop usọp usọp.
Ata Mbuọtidem
Ye ediwak owo, “mbuọtidem” ọwọrọ sụk edinyene edinịm ke akpanikọ ido ukpono m̀mê editiene usụn̄ utuakibuot kiet. Nte ededi, nte ẹdade enye ẹtịn̄ ikọ ke Bible, “mbuọtidem” enen̄ede ọwọrọ ndiberi edem ofụri ofụri—ọyọhọ edinịm ke akpanikọ oro mîsehekede ke Abasi ye ke mme un̄wọn̄ọ esie. Enye edi edu oro ẹdade ẹdiọn̄ọ mbet Jesus Christ.
Ke idaha kiet, Jesus Christ ama etịn̄ aban̄a ufọn edibọn̄ akam ye ‘unana edikpa mba.’ Ke nditịn̄ ntre, enye ama obụp m̀mê ata mbuọtidem ayakam ododu ke eyo nnyịn. Enye okobụp ete: “Ke adan̄aemi Eyen Owo edidide, nte Enye oyokụt mbuọtidem [emi] ke isọn̄?” Ntak emi enye okobụpde utọ mbụme oro?—Luke 18:1, 8, ikọ idakisọn̄ NW.
Mbuọtidem Osop
Ediwak n̄kpọ ẹkeme ndinam mme owo ẹduọk mbuọtidem ekededi emi mmọ ẹnyenede. Ndusụk ke otu mmọ ẹdi mfịghe ye mme idomo uwem eke usen ke usen. Ke uwụtn̄kpọ, Prọfesọ Michael Goulder ekedi oku ufọkabasi ke Manchester, England, ke ini ubomofụm Munich okobomode ke 1958, owotde ediwak mbon mbre bọl Manchester United. Ke edinam ekebe ndise BBC, asuanetop oro Joan Bakewell ama anam an̄wan̄a ete ke “idem ama emem” Goulder “ndikụt udomo nte mme owo ẹkefụhọde.” Utịp kiet ekedi nte ke enye ama “ọduọk mbuọtidem ke Abasi emi
ekemede ndisịbe ndụk akan̄a owo.” Goulder ama ọdọhọ ete ke imọ imenịm ite ke “Bible idịghe . . . ikọ Abasi oro mînyeneke ndudue” edi, utu ke oro, edi “ikọ owo oro ndudue ẹdude, eyedi enyenede ndausụn̄ spirit Abasi ke itie ifan̄.”Ndusụk ini mbuọtidem esikam emem. Oro edi se iketịbede inọ ewetn̄wed ye okotmbụk n̄kpọntịbe oro Ludovic Kennedy. Enye ọdọhọ ete ke toto ke uyen, imọ ima isinyene “eyịghe ndien ndien [iban̄a Abasi] ndien ke mme unana edinịm ke akpanikọ imọ ẹma ẹkọri.” Etie nte owo ndomokiet ikekemeke ndinọ enye ndinen ibọrọ ke mme mbụme esie. Ete esie ndikpa ke inyan̄ ama enen̄ede otụk mbuọtidem esie oro ama ekememem. Owo ikọbọrọke akam oro ẹkebọn̄de ẹnọ Abasi ẹte “ekpeme nnyịn osio ke n̄kpọndịk inyan̄ibom ye ke afai mme asua” nte nsụn̄ikan̄ ekọn̄ mbon Germany ekebịnede onyụn̄ anuakde nsụn̄ikan̄ umen owo oro ete esie ekesịnede ke ini Ekọn̄ Ererimbot II.—All in the Mind—A Farewell to God.
Mme utọ ifiọk n̄kpọntịbe oro idịghe esen n̄kpọ. Apostle Paul ọdọhọ ete: “Idịghe kpukpru owo ẹnyene mbuọtidem.” (2 Thessalonica 3:2) Nso idi ekikere fo? Nte ata mbuọtidem ke Abasi ye Ikọ esie ke osụk ododu ke ererimbot emi eyịghe ọyọhọde mi? Dụn̄ọde se ibuotikọ oro etienede enyenede nditịn̄ ke ibuot nneme emi.