Didie ke Afo Ekeme Ndin̄wam Eyen Emi Ebietde “Idiọk Udo”?

‘Nem esịt, koro enye ama osop, ndien ẹkụt enye.’—LUKE 15:32.

1, 2. (a) Ndusụk uyen ẹnam n̄kpọ didie ẹban̄a esop Christian? (b) Ekeme nditie mme ete ye eka ye nditọ oro ẹdude ke utọ idaha oro ke idem didie?

 “MMỌN̄ n̄kpọn̄ esop!” Esidi n̄kpọ n̄kpaidem didie ntem ọnọ mme ete ye eka oro ẹbakde Abasi oro ẹdomode ofụri ukeme ndibọk nditọ mmọ ke usụn̄ Christian ndikop eyen mmọ etịn̄de mme ikọ emi! Mme uyen efen ẹsikam ‘ẹfiọrọ ẹkpọn̄’ usụn̄ ye unana editịn̄ uduak mmọ. (Mme Hebrew 2:1) Ediwak ke otu mmọ emi ẹbiet idiọk udọ eke n̄ke Jesus, oro ọkọkpọn̄de ufọk ete esie akasuan inyene esie ke anyan idụt.—Luke 15:11-16.

² Okposụkedi ata ediwak ke otu Mme Ntiense Jehovah mînyeneke mfịna emi, ye mbon oro ẹnyenede, ikọ ndọn̄esịt ndomokiet idụhe oro ekemede ndibịn mfụhọ mmọ mfep ofụri ofụri. Ndien owo inyeneke ndifụmi unana inemesịt oro otụtutọn̄ eyen oro ke idemesie ekemede ndinyene. Ke esịt esie, ubieresịt ekeme ndifịna enye. Ke n̄ke Jesus, ‘enyịn ama edin̄wan̄a’ idiọk udọ oro ke akpatre, anamde ete esie okop idatesịt. Didie ke mme ete ye eka ye mbon en̄wen ke esop ẹkeme ndin̄wam nnam ‘enyịn an̄wan̄a’ mbon oro ẹbietde idiọk udọ?—Luke 15:17.

Ntak Emi Ndusụk Nditọ Ẹmekde Ndikpọn̄ Esop

3. Nso idi ndusụk ntak emi ẹsinamde mme uyen ẹmek ndikpọn̄ esop Christian?

³ Ediwak tọsịn uyen ke mme itie ikie ẹdu  oro ẹnamde n̄kpọ Jehovah ke inemesịt ke esop Christian. Ntak, ndien, mme uyen eken ẹsikpọn̄de esop? Mmọ ẹkeme ndikere ke mmimọ imataba se ererimbot ọnọde. (2 Timothy 4:10) Mîdịghe mmọ ẹkeme ndikere ke ufọkerọn̄ Jehovah oro ọnọde ukpeme etie ukpan ukpan akaha. Ubieresịt oro obiomde owo ikpe, ọkpọsọn̄ udọn̄ mmọ ẹnyenede ke idem owo isio uduot, m̀mê udọn̄ ndidi se mme uke ẹnyịmede ẹkeme n̄ko ndinam uyen ọfiọrọ ọkpọn̄ otuerọn̄ Jehovah. Uyen ekeme nditre ndinam n̄kpọ Abasi ke ntak se itiede nte mbubịk ke n̄kan̄ ete ye eka esie m̀mê ndusụk Christian en̄wen.

4. Nso isiwak ndidi akpan ntak oro mme uyen ẹyode ẹkpọn̄ usụn̄?

⁴ Edu nsọn̄ibuot eyen esiwak ndidi idiọn̄ọ mmeme eke spirit, owụtde se idude enye ke esịt. (Mme N̄ke 15:13; Matthew 12:34) Ke se ededi ntak oro uyen oyode ọkpọn̄ usụn̄, akpan ntak mfịna emi esiwak ndidi unana enye “ndisịm ifiọk akpanikọ.” (2 Timothy 3:7) Utu ke ndituak ibuot nnọ Jehovah enyọn̄ enyọn̄, edi akpan n̄kpọ ete mme uyen ẹnyene ọkpọkpọ n̄kpet n̄kpet itie ebuana ye enye. Nso idin̄wam mmọ ndinam oro?

San̄a Kpere Abasi

5. Nso idi se ẹyomde man akparawa owo enyene ọkpọkpọ itie ebuana ye Abasi?

⁵ Mbet oro James ekewet ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Man anam oro, ana ẹn̄wam akparawa owo enyene udọn̄ ke Ikọ Abasi. (Psalm 34:8) Ke ntọn̄ọ ntọn̄ọ enye oyoyom “mmọn̄eba”—mme akpan ukpepn̄kpọ Bible. Edi nte enye amade Ikọ Abasi onyụn̄ enyenede udọn̄ ndidia “ọkpọsọn̄ udia”—ntotụn̄ọ ntọt eke spirit—enye ọyọsọp ndikọri nsịm ọyọhọ idaha eke spirit. (Mme Hebrew 5:11-14; Psalm 1:2) Uyen kiet oro ekenyịmede ete ke usụn̄ uwem ererimbot ama adia imọ idem ama ọtọn̄ọ ndidiọn̄ọ mme ufọn n̄kpọ eke spirit. Nso ikan̄wam enye ndifiak ndi? Ke anamde n̄kpọ aban̄a ekikere oro ẹkenọde enye ẹte okot ofụri Bible, enye ama ọsọn̄ọ eyịre ke ndutịm edikot Bible ofụri ini. Ih, ndikot Ikọ Abasi kpukpru ini edi akpan n̄kpọ ke ndinyene n̄kpet n̄kpet itie ebuana ye Jehovah.

6, 7. Didie ke mme ete ye eka ẹkeme ndin̄wam nditọ mmọ ndikọri ima nnọ Ikọ Abasi?

⁶ Edi akpan n̄kpọ didie ntem ete mme ete ye eka ẹn̄wam nditọ mmọ ndikọri ima nnọ Ikọ Abasi! Kpa ye oro ẹsinịmde ukpepn̄kpọ ubon ofụri ini, n̄kaiferi kiet ama odụk ndụk ye mbon nsọn̄ibuot. Kaban̄a ukpepn̄kpọ ubon mmọ, enye eti ete: “Ke ini Papa obụpde mbụme, n̄kesikokot ibọrọ, ye unana edikam nse enye ke iso.” Utu ke ndiyom ndikụre ibuotikọ ke ini ukpepn̄kpọ ubon, mme ete ye eka oro ẹnyenede eti ibuot ẹsikama usọ unọ ukpep. (2 Timothy 4:2, NW) Man uyen okop inem, ana enye ọfiọk ke ukpepn̄kpọ oro ebehe imọ. Ntak mûbụpke mme mbụme ẹdade ẹfiọk ekikere owo ndien ayak enye etịn̄ ikọ? Sịn udọn̄ nọ uyen oro ndida se ẹnemede nsịn ke edinam. *

⁷ Akan oro, nam nneme N̄wed Abasi oro enyene inem. Ke ini odotde, nam nditọ ẹnanam mme n̄kpọntịbe ye mme drama Bible ẹwụt. N̄wam mmọ ẹda enyịn ikike mmọ ẹkụt mme itie ye mme ikpehe isọn̄ oro mme n̄kpọntịbe oro ẹnemede ẹkedade itie. Ndida mme n̄wed ndise obio ye mme chart nnam n̄kpọ ekeme ndin̄wam. Ih, ye esisịt n̄kọkibuot, ẹkeme ndinam ukpepn̄kpọ ubon enyene inem onyụn̄ enyene ukpụhọde. Mme ete ye eka ẹyenam ọfọn n̄ko ndidụn̄ọde itie ebuana mmọ ye Jehovah. Nte mmọ ke idemmọ ẹsan̄ade ẹkpere Jehovah, mmọ ẹkeme ndin̄wam nditọ mmọ ndinam ntre.—Deuteronomy 6:5-7.

8. Didie ke akam an̄wam owo ndisan̄a n̄kpere Abasi?

⁸ Akam n̄ko ekeme ndin̄wam owo asan̄a ekpere Abasi. N̄kaiferi kiet oro okodude ke ntọn̄ọ ntọn̄ọ isua uyen esie ikọfiọkke m̀mê ikpemek usụn̄ uwem Christian m̀mê ikpemek itie ebuana imọ ye mme ufan oro mînịmke se imọ inịmde ke akpanikọ. (James 4:4) Nso ke enye akanam aban̄a oro? Enye ọkọdọhọ ete: “Ke ata akpa ini, mma nnen̄ede mbọn̄ akam nnọ Jehovah mban̄a nte etiede mi ke idem.” Enye ama eberi ete ke  ẹma ẹbọrọ akam imọ ke ini imọ ke akpatre ikenyenede ufan kiet ke esịt esop Christian oro ikekemede nditịn̄ ikọ idịbi nnọ. Ke ọfiọkde ete ke Jehovah ke ada imọ usụn̄, enye ama ọtọn̄ọ ndikọri ọkpọkpọ itie ebuana ye Abasi. Mme ete ye eka ẹkeme ndin̄wam nditọ mmọ ebe ke ndifori uduot akam mmọ. Ke ini ẹbọn̄de akam nte ubon, mme ete ye eka ẹkeme ndin̄wan̄a esịt mmọ man nditọ mmọ ẹkeme ndikụt ọkpọkpọ itie ebuana oro odude ke ufọt mmọ ye Jehovah.

Nyene Ime Edi Nyene Iwụk

9, 10. Nso uwụtn̄kpọ ke Jehovah ekenịm ke ndinyene anyanime ye otụtutọn̄ nditọ Israel?

⁹ Ke ini uyen ọtọn̄ọde ndiyo n̄kpọn̄ usụn̄, enye ekeme ndidomo ndidu ikpọn̄ nnyụn̄ mbiọn̄ọ ukeme ekededi oro ete ye eka esie ẹsịnde ndineme n̄kpọ eke spirit ye enye. Nso ke mme ete ye eka ẹkeme ndinam ke utọ idomo idomo idaha oro? Kere ban̄a se Jehovah akanamde ye Israel eset. Enye ama ọyọ nditọ Israel oro ẹkedide mbon “nsọn̄ibuot” ke se iwakde ibe isua 900 mbemiso ayakde mmọ ọnọ usụn̄ uwem ntụtutọn̄ mmọ. (Exodus 34:9; 2 Chronicles 36:17-21; Rome 10:21) Kpa ye oro mmọ ‘ẹkedomode Enye’ ndien ndien, Jehovah ama atua mmọ ‘mbọm.’ “[Enye] awak ndikabade n̄kpọn̄ iyatesịt esie, inyụn̄ idemekede ofụri ifụtesịt esie.” (Psalm 78:38-42) Abasi ikenyeneke ndudue ke nte enye akanamde n̄kpọ ye mmọ. Mme ima ima ete ye eka ẹsikpebe Jehovah ẹnyụn̄ ẹnyene ime ke ini eyen mmọ mînamke n̄kpọ usọp usọp iban̄a ukeme oro mmọ ẹsịnde ndin̄wam enye.

¹⁰ Ndinyene anyanime iwọrọke “edime n̄kpọ ke anyan ini”; enye ọwọrọ nditre ndiduọk idotenyịn ofụri ofụri nte ke itie ebuana oro etiede mfịna mfịna oyokpụhọde. Jehovah enịm uwụtn̄kpọ ke nte ẹkpenyenede anyanime. Enye ama anam usio-ukot ke ndidọn̄ mme isụn̄utom esie ẹka ẹbịne nditọ Israel “ndien ndien.” (NW) Jehovah ‘ama enyene mbọm ye ikọt esie,’ idem okposụkedi mmọ ‘ẹkesakde mme isụn̄utom Abasi, ẹnyụn̄ ẹsịnde ikọ esie ke ndek.’ (2 Chronicles 36:15, 16) Enye ama ekpe nditọ Israel ubọk, ete: “Mbọk mbufo kiet kiet ẹkabade ẹkpọn̄ mme idiọk usụn̄ mbufo.” (Jeremiah 25:4, 5) Kpa ye oro, Jehovah ikabiatke ndinen edumbet esie. Ẹma ẹteme nditọ Israel ẹte “ẹkabade” ẹbịne Abasi ye mme usụn̄ esie.

11. Didie ke mme ete ye eka ẹkeme ndinyene anyanime edi ẹnyene iwụk ke nte mmọ ẹnamde n̄kpọ ye eyen oro oyode ọkpọn̄ usụn̄?

¹¹ Mme ete ye eka ẹkeme ndikpebe Jehovah  ke ndinyene anyanime ebe ke nditre ndisọsọp nduọk idotenyịn ke idem eyen oro oyode ọkpọn̄ usụn̄. Ye unana ediduọk idotenyịn, mmọ ẹkeme ndinam usio-ukot ndinam usụn̄ nneme ana in̄wan̄ m̀mê ndifiak ntọn̄ọ nneme. Ke adan̄aemi ẹsọn̄ọde ẹyịre ke ndinen edumbet, mmọ ẹkeme ndikpe eyen mmọ ubọk “ndien ndien” ndifiak mbịne usụn̄ akpanikọ.

Ke Ini Ẹsiode Ekpri Eyen Ẹfep ke Esop

12. Nso mbiomo ke ete ye eka ẹnyene ke idem eyen oro odụn̄de ye mmọ edi oro ẹsiode ẹfep ke esop?

¹² Nso edieke ekpri eyen oro odụn̄de ye ete ye eka esie anamde akwa idiọkn̄kpọ ndien ẹsio enye ẹfep ke esop ke ntak edu unana edikabade esịt esie? Sia eyen oro odụn̄de ye ete ye eka esie, mmọ ẹsụk ẹnyenyene mbiomo ndinọ enye ukpep ye ntụnọ ke n̄kemuyo ye Ikọ Abasi. Didie ke ẹkeme ndinam emi?—Mme N̄ke 6:20-22; 29:17.

13. Didie ke ete ye eka ẹkpedomo ndisịm esịt eyen oro anamde idiọkn̄kpọ?

¹³ Ọkpọfọn—ke akpanikọ, ekpedi mfọnn̄kan n̄kpọ—ndinọ utọ ukpep ye ntụnọ oro ke ini ẹkpepde Bible ye enye ọkpọkpọ. Ana ete m̀mê eka ese ebe edu isọn̄esịt eyen oro onyụn̄ odomo ndikụt se idude enye ke esịt. Enye ọdọn̄ọ adan̄a didie ke n̄kan̄ eke spirit? (Mme N̄ke 20:5) Nte ẹkeme ndisịm ikpehe esịt esie oro ememde? Mme itien̄wed Abasi ewe ke ẹkeme ndida nnam n̄kpọ uforo uforo? Apostle Paul ọsọn̄ọ ọnọ nnyịn ete: “Ikọ Abasi enyene uwem, onyụn̄ ananam n̄kpọ, onyụn̄ ọsọp akan kpukpru ofụt iso iba, ekịm abahade ukpọn̄ ye spirit, ye ikek ye ndia; onyụn̄ enyene ukeme ndidụn̄ọde ekikere ye uduak esịt owo.” (Mme Hebrew 4:12) Ih, ete ye eka ẹkeme ndinam se ikande ikpîkpu edidọhọ eyen mmọ okûfiak anam idiọkn̄kpọ aba. Mmọ ẹkeme ndidomo nditọn̄ọ nnyụn̄ n̄ka iso ke edikọk unan oro.

14. Nso idi akpa usio-ukot oro uyen oro akanamde idiọkn̄kpọ akpanamde man afiak enyene itie ebuana esie ye Jehovah, ndien didie ke ete ye eka ẹkpen̄wam eyen oro anam usio-ukot oro?

¹⁴ Oyom uyen oro akanamde idiọkn̄kpọ afiak enyene itie ebuana ye Jehovah. Akpa usio-ukot oro anade enye anam edi ‘ndikabade esịt nnyụn̄ mfiak edem.’ (Utom 3:19; Isaiah 55:6, 7) Ke ndin̄wam uyen oro odude ye mmọ akabade esịt, ana ete ye eka ‘ẹme ime ke ini ẹnamde mmọ idiọk, ẹnyụn̄ ẹda ata nsụkesịt ẹnam’ idiọk eyen emi enen̄ede asan̄a. (2 Timothy 2:24-26) Oyom mmọ ‘ẹsua ẹnọ’ enye ke usụn̄ ifiọk eke Bible. Ẹkeme n̄ko ndikabade ikọ Greek oro ẹkabarede “sua nọ” nte “nọ uyarade anamde ẹnịm.” (Ediyarade 3:19; John 16:8, NW) Ke ntre, ndisua nnọ abuana ndinọ uyarade oro ekemde man eyen oro okụt nte usụn̄ uwem imọ ọdiọkde. Nte ẹnyịmede, idịghe mmemmem n̄kpọ ndinam ntre. Ke ebiet ẹkemede, ete ye eka ẹkeme ndidemede esịt esie, ẹkamade kpukpru usụn̄ oro ẹkemde ye N̄wed Abasi ndinam enye okụt oro. Mmọ ẹkpenyene ndidomo ndin̄wam enye ọfiọk ufọn ‘edisua idiọk, nnyụn̄ mma eti.’ (Amos 5:15) Eyen oro ekeme ‘ndinyan̄a idem nsio ke afia eke Satan akadade omụm enye.’

15. Nso udeme ke akam enyene ke ndinam owo oro akanamde idiọkn̄kpọ afiak enyene eti itie ebuana ye Jehovah?

¹⁵ Akam edi ata akpan n̄kpọ ke owo ndifiak nnyene itie ebuana esie ye Jehovah. Nte ededi, owo ndomokiet ikpenyeneke ‘ndinam n̄kpeubọk’ mban̄a akwa idiọkn̄kpọ emi andikabuana ye esop Christian inikiet ko anamde in̄wan̄-in̄wan̄ ye unana edikabade esịt. (1 John 5:16, 17; Jeremiah 7:16-20; Mme Hebrew 10:26, 27) Edi, ete ye eka ẹkeme ndiben̄e Jehovah eti ibuot man ẹse ẹban̄a idaha oro. (James 1:5)  Edieke uyen oro ẹma ẹkesio ẹfep ọnọde uyarade edikabade esịt edi mînyeneke “ifụre utịn̄ikọ ke iso Abasi,” ete ye eka esie ẹkeme ndibọn̄ akam ẹte edieke Abasi okụtde ntak ndifen idiọkn̄kpọ eyen emi, yak uduak Esie ada itie. (1 John 3:21, NW) Ndikop mme utọ akam emi ekpenyene ndin̄wam uyen oro okụt Jehovah nte Abasi mbọm. *—Exodus 34:6, 7; James 5:16.

16. Didie ke nnyịn ikeme ndin̄wam mme andibuana ke ubon ekpri eyen oro ẹkesiode ẹfep?

¹⁶ Edieke ẹsiode uyen oro ama akana baptism ẹfep, mme andibuana ke esop ikpenyeneke ‘ndidụk ndụk’ ye enye. (1 Corinth 5:11; 2 John 10, 11) Emi ekeme ndinam ‘enyịn an̄wan̄a enye’ nte ini akade, onyụn̄ anam enye afiak edidụk ufọkerọn̄ Abasi emi ọnọde ukpeme. (Luke 15:17) Nte ededi, edide enye ọnyọn̄ edi m̀mê inyọn̄ke, mme andibuana ke esop ẹkeme ndinọ ubon uyen oro ẹkesiode ẹfep mi nsịnudọn̄. Kpukpru nnyịn imekeme ndiyom mme ifet ndiwụt “mbọm” ndinyụn̄ nnyene “mfefere esịt” ye mmọ.—1 Peter 3:8, 9.

Nte Mbon En̄wen Ẹkemede Ndin̄wam

17. Nso ke mme andibuana ke esop ẹkpenyene nditi ke ini ẹdomode ndin̄wam eyen oro oyode ọkpọn̄ usụn̄?

¹⁷ Nso kaban̄a uyen oro owo mîsioho ifep ke esop Christian edi oro ememde ke mbuọtidem? Apostle Paul ekewet ete: “Edieke ndido kiet okopde ndutụhọ kpukpru ndido eken ẹtiene enye ẹkop ndutụhọ.” (1 Corinth 12:26) Mbon en̄wen ẹkeme ndinyene ọkpọsọn̄ udọn̄ ke idem utọ uyen oro. Nte ededi, oyom ẹdu ke ukpeme, sia uyen oro ọdọn̄ọde ke n̄kan̄ eke spirit ekeme ndinyene idiọk odudu ke idem mme uyen eken. (Galatia 5:7-9) Ke esop kiet, ikpọ owo emi ẹnyenede nti uduak oro ẹkeyomde ndin̄wam ndusụk uyen oro ẹkememde ke n̄kan̄ eke spirit ẹma ẹnọ mmọ ikot ẹte ẹdidụk mme mboho man mmọ ẹbre mme ọwọrọetop ikwọ ọtọkiet. Okposụkedi mme uyen oro ẹkenyịmede ikot oro usọp usọp ẹnyụn̄ ẹkopde inem utọ edinam oro, nte ini akade odudu oro mmọ ẹkenyenede ke idem mbon en̄wen ama osụn̄ọ ke mmọ nditre ebuana ye esop. (1 Corinth 15:33; Jude 22, 23) Idịghe mboho n̄kaowo oro mînyeneke ndausụn̄ eke spirit ekeme ndinam eyen oro ọdọn̄ọde okop nsọn̄idem, edi edi  ebuana oro an̄wamde enye ndikọri udọn̄ nnọ mme n̄kpọ eke spirit ekeme ndin̄wam. *

18. Didie ke nnyịn ikeme ndikpebe edu ete idiọk udọ ke n̄ke Jesus?

¹⁸ Ke ini uyen oro ama ọkọkpọn̄ esop afiakde edi Ufọkmbono Obio Ubọn̄ m̀mê odụkde mbono, kere nte ekemede nditie enye ke idem. Nte nnyịn ikpowụtke edu edidara oro ete idiọk udọ ke n̄ke Jesus okowụtde? (Luke 15:18-20, 25-32) Uyen oro ọkọkpọn̄de esop Christian okonyụn̄ odụkde mbono district ke ukperedem ọkọdọhọ ete: “N̄kekere ke kpukpru owo ẹyefụmi utọ owo nte ami, edi nditọete ẹma ẹsan̄a ẹkpere mi ẹnyụn̄ ẹdara mi. Emi ama enen̄ede otụk mi.” Enye ama afiak ọtọn̄ọ ndikpep Bible onyụn̄ ana baptism ke ukperedem.

Ẹkûkpa Mba

19, 20. Ntak emi nnyịn ikpenyenede in̄wan̄-in̄wan̄ edu iban̄a eyen oro ebietde idiọk udọ?

¹⁹ Ndinam ‘enyịn an̄wan̄a’ eyen oro ebietde “idiọk udọ” oyom ime onyụn̄ ekeme ndidi n̄kpọ-ata nnọ mme ete ye eka ye mbon en̄wen. Edi ẹkûkpa mba. “Ọbọn̄ iduọnke ke edinam un̄wọn̄ọ Esie, ke ido nte ndusụk owo ẹkerede ẹte, Enye ọduọn; Enye akam enyene anyan ime ye mbufo, inyụn̄ iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Nnyịn imenyene nsọn̄ọ N̄wed Abasi nte ke Jehovah oyom mme owo ẹkabade esịt ẹnyụn̄ ẹdu uwem. Ke akpanikọ, enye anam usio-ukot ke ndinam ndutịm ndinam mme owo ẹtie ke emem ye enye. (2 Corinth 5:18, 19) Ime esie anam edi mmemmem enyịn ndin̄wan̄a ediwak miliọn owo.—Isaiah 2:2, 3.

²⁰ Do, nte ete ye eka ikpadaha kpukpru usụn̄ N̄wed Abasi oro mmọ ẹkemede ndinam enyịn an̄wan̄a ekpri eyen mmọ oro ebietde idiọk udọ? Ke ndikpebe Jehovah, nyene anyanime nte afo anamde mme ata ata usio-ukot ndin̄wam eyen fo afiak ebịne Jehovah. Sọn̄ọ yịre ke mme edumbet Bible, nyụn̄ domo ndiwụt mme edu Jehovah ẹdide ima, unenikpe, ye ọniọn̄ ke adan̄aemi afo ọbọn̄de akam oyom un̄wam esie. Kpa nte ediwak mbon isọn̄esịt ẹnamde n̄kpọ ẹban̄a ima ima ikot oro Jehovah okotde mmọ ete ẹfiak edem, eyen fo oro ebietde idiọk udọ ekeme ndifiak ndi ufọkerọn̄ Abasi oro ọnọde ukpeme.—Luke 15:6, 7.

[Mme Ikọ idakisọn̄]

Nte Afo Emeti?

• Nso ikeme ndidi akpan ntak emi mme uyen ẹkpọn̄de esop?

• Didie ke ẹkeme ndin̄wam mme uyen ẹkọri ọkpọkpọ itie ebuana ye Jehovah?

• Ntak oyomde mme ete ye eka ẹnyene anyanime edi ẹnyene iwụk ke nte mmọ ẹn̄wamde eyen mmọ oro ebietde idiọk udọ?

• Didie ke mme andibuana ke esop ẹkeme ndin̄wam uyen oro ebietde idiọk udọ afiak edi?

[Mme Mbụme Ukpepn̄kpọ]

[Ndise ke page 15]

Ndikot Ikọ Abasi edi akpan n̄kpọ ke ndikọri n̄kpet n̄kpet itie ebuana ye Jehovah

[Ndise ke page 15]

Akam oro mme ete ye eka ẹbọn̄de ke ofụri esịt ekeme ndin̄wam nditọ mmọ ndikụt ọkpọkpọ itie ebuana oro odude ke ufọt mmọ ye Jehovah

[Ndise ke page 17]

Dara eyen oro ebietde idiọk udọ ke ini ‘enyịn an̄wan̄ade enye’

[Ndise ke page 18]

Nam mme ata ata usio-ukot ndin̄wam eyen fo afiak ebịne Jehovah