Ntọt Mme Anditan̄a Obio Ubọn̄

Ndisịm Mbon Oro Esisọn̄de Ndisịm

MME NTIENSE JEHOVAH ẹdomo ndida etop Obio Ubọn̄ nsọk kpukpru owo oro mmọ ẹkemede ndisịm. Ke ndusụk idaha, esiyom ọkpọsọn̄ ukeme man ẹsịm mbon oro mîsiwakke ndidu ke ufọk. (Mark 13:10) Ke afan̄ emi, asan̄autom edide akpan asiakusụn̄ ke idụt Edem Usụk America kiet obụk ifiọkutom oro etienede mi.

“Usen kiet mma n̄kop nte ke andikara stet eyedi efakutom oro ẹnọde mi ye n̄wan mi inam utom. Nte an̄wan̄ade, sia enye ekedide kiet ke otu mbon oro mîsiwakke ndidu ke ufọk, mma n̄wet leta nnọ ẹsọk enye nnyụn̄ nsịn ediwak n̄wed Bible, esịnede ediye uduot ekpri n̄wed oro Nso ke Abasi Oyom Oto Nnyịn? ye n̄wed oro Mankind’s Search for God ye Ifiọk Oro Adade Osịm Nsinsi Uwem. Mma nnam uduak n̄wed emi kiet kiet an̄wan̄a ke leta mi.

“Sia n̄kenyenede udọn̄ ndifiọk nte enye edinamde n̄kpọ aban̄a mme n̄wed oro, mma mben̄e ndisobo ye enye. Ndusụk urua ke ukperedem ẹma ẹnyịme mi nsobo ye enye, ndien mma mmen vidio oro Jehovah’s Witnesses—The Organization Behind the Name, n̄kama. Nneme oro ama ebịghi ke n̄kpọ nte hour iba. Ke mma n̄kese vidio oro n̄kụre ye andikara oro, mma mbụp enye se idide ekikere esie kaban̄a vidio oro. Enye ama ọbọrọ ete: ‘Idụhe esop efen ekededi ke isọn̄ oro ebietde eke mbufo. Ubaha nte n̄kpenyenede utọ owo nte mbufo oro ẹkpen̄wamde mi ndikụre mme utom ukara mi!’ Ekem enye ama obụp m̀mê akanam ami mmaka ibuot itieutom ofụri ererimbot esop nnyịn. Mma ndọhọ enye nte ke okposụkedi oro edide utịtmbuba mi toto ke ini n̄kedide isua 14 ke emana, nnyeneke ukeme ndika n̄kese ibuot itieutom ofụri ererimbot nnyịn ke Brooklyn, New York. Enye ekedi kiet ke otu utịtmbuba oro edide ọkpọsọn̄ n̄kpọ ndisịm. Enye ama owụk enyịn ese mi ke esisịt ini. Ekem enye ama ọdọhọ ke imọ imoyom mi nnyene ifet oro. Enye ama anam nnyịn inyene n̄wed unyịme oro ekemde ye ibet onyụn̄ ọnọ nnyịn tiket ubomofụm!

“Idahaemi andikara oro esibọ magazine Enyọn̄-Ukpeme ye Awake! kpukpru ini. Nnyịn imodori enyịn ite ke mîbịghike nnyịn iyekeme nditọn̄ọ ukpepn̄kpọ Bible ye enye.”