Ukpepn̄kpọ Otode Eyop

“EDIYE eto emi enyenede n̄wọrọnda uyai.” Ntre ke n̄wed ofụri orụk ifiọk Bible kiet etịn̄ aban̄a eyop ẹkotde date palm. Ke mme ini Bible ye mfịn, mme eyop emi ẹnam Itịghede Nile Egypt eye, ndien mmọ ẹsịn mfụt ke eti isọn̄ Desat Negeb.

Ukem nte ata ediwak uduot eyop, eyop ẹkotde date palm esida ata nnennen. Ndusụk mmọ ẹsiniọn̄ ẹsịm mita 30 ẹsinyụn̄ ẹka iso ndin̄wụm mfri ke isua 150. Ih, eyop emi esiye ndise esinyụn̄ on̄wụm mfri ke usụn̄ oro akpade owo idem. Ke isua kiet kiet enye esin̄wụm ediwak ifen. Ifen kiet kpọt ekeme ndisịne se iwakde ibe isịp 1,000. Kaban̄a isịp eyop emi, ewetn̄wed kiet ekewet ete: “Mbon oro . . . ẹtade nsat isịp emi mmọ ẹdepde ke mme ufọkurua, isifiọkke nte nsek isịp emi esinemde.”

Nte odotde, Bible emen ndusụk owo odomo ye eyop. Nte eyop oro on̄wụmde mfri, man owo ọfọn Abasi ke enyịn, ana enye asana ke ido uwem onyụn̄ aka iso ndin̄wụm mfri ke ndinam nti utom. (Matthew 7:17-20) Ke ntak emi, ẹma ẹkap mbiet eyop nte ndudiọn̄ ke temple Solomon ye ke temple oro Ezekiel okokụtde ke n̄kukụt. (1 Ndidem 6:29, 32, 35; Ezekiel 40:14-16, 20, 22) Ntem, man Abasi enyịme utuakibuot esie, ana owo etie nte eyop. Ikọ Abasi anam an̄wan̄a ete: “Edinen owo ayasiaha nte eyop.”—Psalm 92:12.