Anie Edidianade Nnyịn ke Ima Abasi?
Anie Edidianade Nnyịn ke Ima Abasi?
“Nnyịn ima ima, koro Enye ekebemde iso ama nnyịn.”—1 JOHN 4:19.
1, 2. (a) Ntak emi edifiọk nte ke ẹma nnyịn edide akpan n̄kpọ ọnọ nnyịn? (b) Ima anie ke nnyịn iyom ikan?
NDIFIỌK nte ke ẹma fi edi akpan n̄kpọ adan̄a didie ọnọ fi? Owo ada ima ọkọri ọtọn̄ọde ke ini nsek tutu enye okpon. Nte afo emesikụt nte eka afatde nsekeyen esie akama ima ima? Inamke n̄kpọ m̀mê nso itịbe ke n̄kann̄kụk, ediwak ini nte nsekeyen owụkde enyịn ese iso eka esie oro etiede imam imam, enye esinyene ifụre, enyene emem ke ubọk eka oro amade enye. Mîdịghe nte afo emeti nte afo eketiede ke mme isua uwọrọ ndụk akwa owo oro ẹkesidide mfịna mfịna ndusụk ini? (1 Thessalonica 2:7) Ke ndusụk idaha, ekeme ndidi afo ukọfiọkke se okoyomde m̀mê ndikam mfiọk nte etiede fi ke idem, edi ekedi akpan n̄kpọ didie ntem afo ndifiọk nte ke ete ye eka fo ẹma fi! Nte ikedịghe n̄kpọ un̄wam ndifiọk nte ke afo emekeme ndida mfịna m̀mê mbụme ekededi mbịne mmọ? Ke akpanikọ, ke ofụri uwem nnyịn, kiet ke otu n̄kponn̄kan udọn̄ nnyịn edi udọn̄ ndidi se ẹmade. Utọ ima oro esinam nnyịn ifiọk ke imenyene ufọn.
2 Ke akpanikọ, ima ete ye eka oro mîkpụhu esitịp esịn ke eti n̄kọri ye edida ukem ukem. Edi, ndinyene mbuọtidem nte ke Ete nnyịn eke heaven, Jehovah, ama nnyịn enen̄ede edi akpan n̄kpọ akan ọnọ nsọn̄idem nnyịn eke spirit ye eke ntụk. Ekeme ndidi ndusụk mme andikot magazine emi ikenyeneke mme ete ye eka oro ẹkenen̄erede ẹse ẹban̄a mmọ. Edieke edide ntre ye afo, sọn̄ esịt. Idem ọkpọkọm ima ete ye eka ikodụhe m̀mê ikokponke ikem, ima Abasi oro mîkpụhu ada itie esie.
3. Didie ke Jehovah ọsọn̄ọ ọnọ ikọt esie nte ke imama mmọ?
3 Ebede ke Isaiah prọfet esie, Jehovah ama ọdọhọ ete ke eka ekeme “ndifre” eyennsek esie, edi imọ idifreke ikọt imọ. (Isaiah 49:15) Ukem ntre, David ama ọdọhọ ye mbuọtidem ete: “Koro ete mi ye eka mi ẹkekpọn̄de mi, ndien Jehovah emen mi akama.” (Psalm 27:10) Emi ọnọ ndọn̄esịt didie ntem! Se ededi oro mme idaha fo ẹdide, edieke edide afo omodụk itie ebuana oro ayakde idem ọnọ Jehovah Abasi, kpukpru ini afo ekpenyene nditi nte ke ima oro enye amade fi okpon akan ima owo ekededi!
Mụm Idem Nịm ke Ima Abasi
4. Didie ke ẹkenam mme Christian akpa isua ikie ẹfiọk ke Abasi ama mmọ?
4 Ini ewe ekedi akpa ini oro afo ekedide edifiọk ima Jehovah? Eyedi afo ama enyene ukem ifiọk n̄kpọntịbe mme Christian akpa isua ikie. Ọyọhọ ibuot 5 ke leta oro Paul ekewetde ọnọ ẹsọk mbon Rome etịn̄ inem inem nte mme anamidiọk, oro ini kiet ko ẹkedian̄arede ẹkpọn̄ Abasi, ẹkedide ẹdifiọk ima Jehovah. Ke ufan̄ikọ 5, nnyịn ikot ite: “Abasi aman̄wan̄a ima Esie esịn ke esịt nnyịn oto ke Edisana Spirit emi Enye ọkọnọde nnyịn.” Ke ufan̄ikọ 8, Paul adian do ete: “Abasi etịm ayarade ima eke amade nnyịn, ke emi Christ akpade ke ibuot nnyịn ke adan̄aemi nnyịn isụk idide mme idiọk owo kan̄a.”
5. Afo akasan̄a didie edifiọk nte ima Abasi okponde?
5 Ke ukem usụn̄ oro, ke ini ẹketịn̄de akpanikọ Ikọ Abasi ẹnọ fi, afo okonyụn̄ ọtọn̄ọde ndinyene mbuọtidem, edisana spirit Jehovah ama ọtọn̄ọ ndinam utom ke esịt fo. Ke usụn̄ emi afo ama ọtọn̄ọ ndifiọk nte se Jehovah akanamde okponde ke enye ndinọ edima Eyen esie edikpa ọnọ fi. Ntem Jehovah ama an̄wam fi ndifiọk adan̄a nte imọ inen̄erede ima ubonowo. Ke ini afo ekedide edifiọk nte ke, okposụkedi imọ ikamanade nte anamidiọk oro adianarede ọkpọn̄ enye, Jehovah ama eberede usụn̄ ọnọ mme owo ndidi se ẹtebede ikpe ye idotenyịn anana-utịt uwem, nte oro ikotụkke esịt fo? Nte oro ikanamke fi ama Jehovah?—Rome 5:10.
6. Ntak emi ekemede nditie nnyịn ke idem ndusụk ini nte ke imadian̄ade ikpọn̄ Jehovah?
6 Ke ima Ete fo eke heaven ama okodụri fi ndien ke afo ama akanam mme ukpụhọde ke uwem fo man edi se enye enyịmede, afo ama ayak uwem fo ọnọ Abasi. Afo emenyene emem ye Abasi idahaemi. Edi, nte esitie fi ke idem ndusụk ini nte ke amadian̄ade ọkpọn̄ Jehovah? Oro ekeme nditịbe nnọ owo nnyịn ekededi. Edi ti kpukpru ini ete ke Abasi ikpụhọkede. Ima esie odu ke nsinsi nte utịn, emi akananam mîtreke ndiyama ke isọn̄. (Malachi 3:6; James 1:17) Ke n̄kan̄ eken, nnyịn imekeme ndikpụhọde—idem ọkpọkọm ke ibio ini. Nte ererimbot ọwọn̄ọrede, ubak ekondo esidụk ekịm. Kpasụk ntre, edieke nnyịn iwọn̄ọrede ikpọn̄ Abasi, idem ekpedi ata esisịt, nnyịn imekeme ndikop ndobo ke itie ebuana nnyịn ye enye. Nso ke nnyịn ikeme ndinam man inen̄ede idaha oro?
7. Didie ke ndụn̄ọde idemowo ekeme ndin̄wam nnyịn ndika iso ndu ke ima Abasi?
7 Edieke etiede nnyịn ke idem nte ke imadian̄ade ikpọn̄ ima Abasi, nnyịn ikpenyene ndibụp idem nnyịn: ‘Ndi ami nda ima Abasi mfefere mfefere? Ndi mmọwọn̄ọde sụn̄sụn̄ n̄kpọn̄ odu-uwem ye ima ima Abasi, n̄wụtde ke nsio nsio usụn̄ nte ke mbuọtidem mi emem? Ndi ami n̄wụk ekikere ke “n̄kpọ obụkidem,” utu ke ndiwụk ke “n̄kpọ spirit”?’ (Rome 8:5-8; Mme Hebrew 3:12) Edieke edide nnyịn imadian̄ade ikpọn̄ Jehovah, nnyịn imekeme ndinam mme usio-ukot ndinen̄ede mme n̄kpọ, ndifiak nnyene n̄kpet n̄kpet, ufiop ufiop itie ebuana ye enye. James esịn udọn̄ ọnọ nnyịn ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Ẹnam mme ikọ Jude emi: “Ndima, mbufo ẹbọp idem ke enyọn̄ edisana mbuọtidem mbufo ẹkọri, ẹbọn̄ akam ke Edisana Spirit; ntem ke ẹdimụm idem mbufo ẹnịm ke ima Abasi.”—Jude 20, 21.
Mme Idaha Ndikpụhọde Ibiatke Ima Abasi
8. Mme ukpụhọde ewe ikeme nditịbe ke mbuari ke uwem nnyịn?
8 Uwem nnyịn ke editịm n̄kpọ emi ekeme ndikpụhọde ediwak ini. Edidem Solomon ọkọdọhọ ete ke “ini ye unọmọ [ẹtetịbe] ẹnọ [nnyịn] kpukpru.” (Ecclesiastes 9:11) Ke mbuari, uwem nnyịn ekeme ndikpụhọde ofụri ofụri. Nnyịn imekeme ndikop nsọn̄idem mfịn, n̄kpọn̄ nnyịn idọn̄ọ idiọk idiọk. Mfịn utom idịbi udia nnyịn ekeme nditie nte utom oro mîkemeke ndikpu, n̄kpọn̄ nnyịn inana utom. Owo ima nnyịn ekeme ndikpa ke mbuari. Mme Christian oro ẹdude ke idụt kiet ẹkeme ndinyene emem ke ndusụk ini, ndien ekem, ke mbuari, afai afai ukọbọ ọtọn̄ọ. Eyedi ẹdori nnyịn ikọ, ndien ke ntak emi, nnyịn ibọ ufen nte mîdotke. Ih, uwem inyeneke iwụk m̀mê ọyọhọ ifụre.—James 4:13-15.
9. Ntak ọfọnde ndikere mban̄a ikpehe N̄wed Mbon Rome ibuot 8?
9 Ke ini mme n̄kpọ mfụhọ ẹtịbede ẹnọ nnyịn, nnyịn imekeme nditọn̄ọ ndikere ke ẹkpọn̄ nnyịn, idem ikerede ke Abasi imaha nnyịn aba. Sia mme utọ n̄kpọ oro ẹsitịbede ẹnọ kpukpru nnyịn, nnyịn iyanam ọfọn nditịm n̄kere mme ikọ ndọn̄esịt apostle Paul oro ẹwetde ke N̄wed Mbon Rome ibuot 8. Ẹkewet mme ikọ oro ẹnọ mme Christian oro ẹkeyetde aran ke spirit. Edi, edumbet mmọ abuana mme erọn̄ en̄wen n̄ko, oro ẹbatde ke edinen nte mme ufan Abasi, nte ẹkebatde Abraham mbemiso eyo mme Christian.—Rome 4:20-22; James 2:21-23.
10, 11. (a) Mme edori ikọ ewe ke mme asua ẹsidori ikọt Abasi ndusụk ini? (b) Ntak emi mme utọ edori ikọ oro mînyeneke se ẹwọrọde inọ mme Christian?
10 Kot Rome 8:31-34. Paul obụp ete: “Edieke Abasi adade ye nnyịn, anie edikeme ndibiọn̄ọ nnyịn?” Edi akpanikọ, Satan ye idiọk ererimbot esie ẹn̄wan̄wana ye nnyịn. Mme asua ẹkeme ndisu nsu ndian nnyịn, idem ke esopikpe. Ẹdori ndusụk mme ete ye eka ẹdide Christian ikọ ẹte ke mmọ ẹsesua nditọ mmọ koro mmọ mînyịmeke ẹnọ mmọ usọbọ oro abiatde ibet Abasi m̀mê koro mmọ mîyakke nditọ ẹbuana ke mme usọrọ ukpono ndem. (Utom 15:28, 29; 2 Corinth 6:14-16) Ẹdori mme anam-akpanikọ Christian eken ikọ ẹte ke mmọ ẹsọn̄ ibuot ye ukara koro mmọ mînyịmeke ndiwot mme ekemmọ owo ke ekọn̄ m̀mê ndibuana ke mbre ukara. (John 17:16) Ndusụk mme andibiọn̄ọ ẹsuan nsunsu edori ikọ ke ndutịm usuanetop, idem ẹdọhọde ke nsu ẹte ke Mme Ntiense Jehovah ẹdi idiọk n̄ka.
11 Edi kûfre ete ke eyo mme apostle, ẹma ẹdọhọ ẹte: “Ama edi n̄ka emi, nnyịn imọfiọk ite mme owo ẹtịn̄ n̄kpọ ẹbiat enye ke kpukpru ebiet.” (Utom 28:22) Nte mme nsunsu edori ikọ ẹnen̄ede ẹnam n̄kpọ? Edi Abasi abat mme ata Christian ke ndinen, ọkọn̄ọde ke mbuọtidem mmọ ke uwa Christ. Ntak emi Jehovah ekpetrede ndima mme andituak ibuot nnọ enye ke enye ama ọkọnọ mmọ n̄kponn̄kan ẹnọ oro enye ekekemede ndinọ mmọ—edima Eyen esie? (1 John 4:10) Ke emi ẹma ẹkenam Christ eset ke n̄kpa ẹnyụn̄ ẹdori enye ke ubọk nnasia Abasi, enye ke ekpe ubọk ifịk ifịk aban̄a mme Christian. Anie ekeme ndifan̄a nte enende nte ke Christ idaha inọ mme anditiene enye mîdịghe anie ekeme ndikụt unen ke nditọhọ ye Abasi ke enye ndibat mme anam-akpanikọ ikọt esie ke edinen? Owo ndomokiet ikemeke!—Isaiah 50:8, 9; Mme Hebrew 4:15, 16.
12, 13. (a) Mme idaha ewe mîkemeke ndidian̄ade nnyịn ke ima Abasi? (b) Nso idi uduak Devil ke ndinam n̄kpọsọn̄ idaha ẹsịm nnyịn? (c) Ntak emi mme Christian ẹnyenede ọyọhọ edikan?
12 Kot Rome 8:35-37. Ke ẹsiode nnyịn ẹfep, ndi odu owo m̀mê n̄kpọ ekededi oro ekemede ndidianade nnyịn ke ima Jehovah ye Eyen esie, Christ Jesus? Satan ekeme ndida mme isụn̄utom esie ke isọn̄ nnam ekese afanikọn̄ ẹsịm mme Christian. Ke isua ikie oro ẹbede, ẹmeda afai afai ukọbọ ẹtiene ediwak nditọete Christian nnyịn ke ediwak idụt. Ke ndusụk itie mfịn, nditọete nnyịn ẹsobo nsọn̄ọn̄kpọ ke usen ke usen. Ndusụk mmọ ẹtie biọn̄ m̀mê ẹnana edisịnen̄kpọ oro ekemde. Nso idi uduak Devil ke ndinam n̄kpọsọn̄ idaha emi ẹsịm mmọ? Ke nsụhọde n̄kaha ke ubak ubak, uduak esie edi ndibiọn̄ọ utuakibuot akpanikọ Jehovah. Satan oyom ndinam nnyịn inịm ke akpanikọ nte ke Abasi imaha nnyịn aba. Nte ededi, nte oro edi akpanikọ?
13 Ukem nte Paul, oro okokotde oto Psalm 44:22, nnyịn imekpep Ikọ Abasi oro ẹwetde-wet. Nnyịn imọfiọk ite ke mme n̄kpọ emi ẹtịbe ẹnọ nnyịn, mme “erọn̄” esie, ke ntak enyịn̄ Abasi. Edinam enyịn̄ Abasi asana ye ediwụt unen itie edikara ofụri ekondo esie ẹbuana. Abasi ayak mme idomo ẹdu ke ntak mme utọ akpan eneni oro, idịghe koro enye mîmaha nnyịn aba. Inamke n̄kpọ m̀mê idaha etie mfịghe mfịghe adan̄a didie, ẹsọn̄ọ ẹnọ nnyịn ẹte ke ima oro Abasi amade ikọt esie, esịnede nnyịn owo kiet kiet, ikpụhọkede. N̄kpọ ekededi oro nnyịn isobode oro ekpetiede nte edikpu ayakabade edi edikan edieke imụmde nsọn̄ọnda ikama. Nnyịn ndifiọk nte ke ima Abasi ikemeke ndikpu ọsọn̄ọ nnyịn idem onyụn̄ omụm nnyịn akama.
14. Ntak emi Paul ekenịmde ke akpanikọ ete ke ima Abasi ikpụhu kpa ye n̄kpọsọn̄ idaha oro mme Christian ẹkemede ndisobo?
14 Kot Rome 8:38, 39. Nso ikanam Paul enịm ke akpanikọ ete ke n̄kpọ ndomokiet ikemeke ndidianade mme Christian ke ima Abasi? Eyịghe idụhe nte ke ọkpọkpọ ifiọk n̄kpọntịbe Paul ke adan̄aemi akanamde utom ukwọrọikọ ama anam enye enen̄ede enịm ke akpanikọ ete ke n̄kpọsọn̄ idaha ikemeke ndinam Abasi etre ndima nnyịn. (2 Corinth 11:23-27; Philippi 4:13) N̄ko, Paul ama ọfiọk aban̄a nsinsi uduak Jehovah ye nte enye akanamde n̄kpọ ye ikọt Esie ke eset. Nte n̄kpa ke idemesie ekeme ndikpan Abasi ndima mbon oro ẹnamde n̄kpọ ẹnọ enye ke edinam akpanikọ? Ikemeke! Mme utọ anam-akpanikọ owo oro ẹkekpan̄ade do ẹyeka iso ẹdu ke mfọnmma ibuot uti n̄kpọ Abasi, ndien enye ayanam mmọ ẹset ke edikem ini.—Luke 20:37, 38; 1 Corinth 15:22-26.
15, 16. Siak ndusụk n̄kpọ oro mîkemeke ndikpan Abasi ndima mme anam-akpanikọ asan̄autom esie.
15 Afanikọn̄ ekededi oro ekemede ndisịm nnyịn mfịn—edide mbabuat n̄kpọntịbe oro obiomode owo ndo, udọn̄ọ n̄kpa, m̀mê nsọn̄ọn̄kpọ—n̄kpọ ndomokiet ikemeke ndibiat ima oro Abasi amade ikọt esie. Mme okopodudu angel, utọ nte ọsọn̄ibuot angel oro akakabarede edi Satan, ikemeke ndinam Jehovah etre ndima mme asan̄autom esie oro ẹyakde idem ẹnọ enye. (Job 2:3) Ukara ekeme ndidori mme asan̄autom Abasi ukpan, ẹsịn mmọ ke ufọk-n̄kpọkọbi, ẹnyụn̄ ẹmia mmọ ufen ndien ẹkeme ndikot mmọ “se owo mîmaha.” (1 Corinth 4:13) Utọ anana-ntak usua otode mme idụt do ekeme ndinyịk mme owo ndiwọn̄ọde n̄n̄wana ye nnyịn, edi oro inamke Andikara ekondo ọkpọn̄ nnyịn.
16 Nte mme Christian, iyomke nnyịn ikop ndịk nte ke ekededi ke otu mme n̄kpọ oro Paul okokotde “n̄kpọ eke ẹdude ke emi”—kpa mme n̄kpọntịbe ye mme idaha ke editịm n̄kpọ oro odude ke emi—m̀mê mme “n̄kpọ eke ẹdidide” ke ini iso ẹkeme ndinam Abasi etre ndima ikọt esie. Okposụkedi mme odudu oro ẹdude ke isọn̄ ye mme odudu oro ẹdude ke enyọn̄ ẹn̄wanade ekọn̄ ye nnyịn, ima akpanikọ Abasi odu ndimụm nnyịn n̄kama. Nte Paul ọkọsọn̄ọde etịn̄, “ukon̄ ye utụn̄ọ” ikemeke ndibiọn̄ọ ima Abasi. Ih, n̄kpọ ekededi oro okpoyomde ndinam idem emem nnyịn, m̀mê n̄kpọ ekededi oro okpoyomde ndikara nnyịn, ikemeke ndidianade nnyịn ke ima Abasi; n̄kpọ obot efen ekededi inyụn̄ ikemeke ndibiat itie ebuana Andibot ye mme anam-akpanikọ asan̄autom esie. Ima Abasi ikpụhu tutu amama; enye odu ke nsinsi.—1 Corinth 13:8.
Wụt Esịtekọm Ban̄a Ima Mfọnido Abasi ke Nsinsi
17. (a) Ntak emi Abasi ndima nnyịn “ọfọnde akan uwem”? (b) Didie ke nnyịn ikeme ndiwụt nte ke nnyịn imowụt esịtekọm iban̄a ima mfọnido Abasi?
17 Ima Abasi edi akpan n̄kpọ adan̄a didie ọnọ fi? Nte etie fi ke idem nte eketiede David, emi ekewetde ete: “Koro ima fo ọfọnde akan uwem, n̄kpọk-inua mi ẹyetoro fi. Ntreke ndikọm fi ke uwem mi; nyemenede ubọk mi ke enyịn̄ fo”? (Psalm 63:3, 4) Ke akpanikọ, nte odu n̄kpọ ekededi oro uwem ererimbot emi ekemede ndinọ oro ọfọnde akan Abasi ndima nnyịn ye nnyịn ndinyene eti itie ufan ye enye? Ke uwụtn̄kpọ, nte edibịne uforo uforo ubọkọkọ ọfọn akan edinyene ifụre ekikere ye inemesịt oro ẹtode edinyene n̄kpet n̄kpet itie ebuana ye Abasi? (Luke 12:15) Ndusụk Christian ẹsisobo mme idaha edimek ndikan̄ Jehovah mîdịghe ndikpa n̄kpa. Oro ama etịbe ọnọ ediwak Mme Ntiense Jehovah ke mme itienna ekikere Nazi ke ini Ekọn̄ Ererimbot II. Ke ẹsiode ibat ibat mmọ ẹfep, nditọete Christian nnyịn ẹma ẹmek ndika iso ndu ke ima Abasi, ẹnyịmede ndikpa edieke oyomde. Mbon oro ẹsọn̄ọde ẹdu ke ima esie ẹkeme ndidori enyịn Abasi ndinọ mmọ nsinsi ini iso, n̄kpọ oro ererimbot mîkemeke ndinọ nnyịn. (Mark 8:34-36) Edi se ibuanade akam okpon akan nsinsi uwem.
18. Ntak emi nsinsi uwem edinen̄erede enem?
18 Okposụkedi owo mîkemeke ndidu uwem ke nsinsi ke ẹsiode Jehovah ẹfep, domo ndikere nte edidu anyan isua uwem ekpetiede ke ẹsiode Andibot nnyịn ẹfep. Enye ekpedi ukpọk, ikpenyeneke ata uduak. Jehovah ọmọnọ ikọt esie ọnọ-uyụhọ utom ndinam ke mme ukperedem ini emi. Ntre nnyịn imekeme ndinyene mbuọtidem nte ke ini Jehovah, Akwa Aduak Uduak, edinọde nsinsi uwem, enye ediyọhọ ye ndinem n̄kpọ oro ẹdotde ẹnọ nnyịn ndikpep nnyụn̄ nnam. (Ecclesiastes 3:11) Inamke n̄kpọ m̀mê idụn̄ọde mmọ adan̄a didie ke ediwak tọsịn isua oro ẹdidide, tutu amama nnyịn idikemeke ndidụn̄ọde “uwak ọniọn̄ ye ifiọk Abasi” ofụri ofụri.—Rome 11:33.
Ete Ama Fi
19. Nso ikọ unyọn̄ ke Jesus Christ eketịn̄ ọnọ mme mbet esie?
19 Ke Nisan 14, 33 E.N., ke akpatre mbubịteyo oro enye okodude ye mme anam-akpanikọ apostle esie 11, Jesus ama etịn̄ ediwak ikọ ndisọn̄ọ mmọ idem kaban̄a se ikanade mmọ ke iso. Kpukpru mmọ ẹma ẹsọn̄ọ ẹda ye Jesus ke mme idomo esie, ndien mmọ ẹma ẹfiọk ke enye ama mmimọ. (Luke 22:28, 30; John 1:16; 13:1) Ekem Jesus ama ọsọn̄ọ ọnọ mmọ ete: “Ete ke Idem Esie amama mbufo.” (John 16:27) Anaedi mme ikọ oro ẹken̄wam mme mbet didie ntem ndifiọk ima oro Ete mmọ eke heaven akamade mmọ!
20. Nso ke afo ebiere ndinam, ndien afo ekeme ndibuọt idem ke nso?
20 Ediwak mbon oro ẹdude uwem idahaemi ẹmenam n̄kpọ Jehovah ke edinam akpanikọ ke ediwak isua. Nte eyịghe mîdụhe, mbemiso idiọk editịm n̄kpọ emi esịmde utịt, nnyịn iyosobo ediwak idomo efen efen. Kûdede uyak mme utọ idomo m̀mê nnanenyịn oro ẹnam fi eyịk ima akpanikọ oro Abasi amade fi. Ufọn idụhe nditetịn̄ akpanikọ emi: Jehovah ama fi. (James 5:11) Ẹyak nnyịn owo kiet kiet ika iso ndinam udeme nnyịn, ikade iso ndinịm mme ewụhọ Abasi. (John 15:8-10) Nnyịn ikpakam ida kpukpru ifet nditoro enyịn̄ esie. Nnyịn ikpenyene ndisọn̄ọ mbiere ndika iso nsan̄a n̄kpere Jehovah ke akam ndinyụn̄ n̄kpep Ikọ esie. Se ededi oro n̄kpọn̄ edidade edi, edieke nnyịn inamde ofụri ukeme nnyịn ndinem Jehovah esịt, nnyịn iyenyene emem, ibuọtde idem ọyọhọ ọyọhọ ke ima esie oro mîkemeke ndikpu.—2 Peter 3:14.
Didie ke Afo Ọkpọbọrọ?
• Man ida ukem ukem ke n̄kan̄ eke spirit ye ke n̄kan̄ eke ntụk, nnyịn iyom ima anie akpan akpan?
• Mme n̄kpọ ewe mîkemeke ndikpan Jehovah ndima mme asan̄autom esie?
• Ntak emi Jehovah ndima nnyịn “ọfọnde akan uwem”?
[Mme Mbụme Ukpepn̄kpọ]
[Ndise ke page 13]
Edieke etiede nnyịn ke idem nte ke imadian̄ade ikpọn̄ ima Abasi, nnyịn imekeme ndinam utom ndinen̄ede mme n̄kpọ
[Ndise ke page 15]
Paul ama ọfiọk ntak oro ẹkekọbọde enye