Mme Mbụme Ẹtode Mme Andikot
Mme Mbụme Ẹtode Mme Andikot
Ẹkefak mme esan̄ oro ẹkesidade ẹbiom ekebe ediomi didie, sia 1 Ndidem 8:8 ọdọhọde ete ke ẹma ẹsitie ke Edisana ẹkụt mmọ?
Ke ini Jehovah ọkọnọde Moses n̄wed ndudiọn̄ ataya ke wilderness, akpan n̄kpọ kiet emi ekesịnede ke enye ekedi ekebe ediomi. Ẹma ẹsidọn̄ mme itiatn̄wed oro ẹkewetde Ibet ye mme n̄kpọ en̄wen ke akwakwa Ekebe oro ẹkefụkde gold mi. Ẹkesinịm enye ke ata esịt ikpehe, kpa Ata Edisana. Mbiet cherub o-gold iba oro ẹtatde mba mmọ ke enyọn̄ ẹma ẹdu ke okukịp Ekebe oro. Mme n̄kpanuen ẹma ẹdu ke n̄kan̄ Ekebe oro kiet kiet man ẹkeme ndifak esan̄ iba, oro ẹkedade eto shittim ẹnam ẹnyụn̄ ẹdade gold ẹfụk, mbiom enye. Nte owụtde ifiọk, ẹkefak mme esan̄ oro ke mme n̄kpanuen ye ke n̄kan̄ Ekebe oro ọkọniọn̄de akan. Ntem, ke ini Ekebe oro anade ke Ata Edisana ataya, oro akasakde iso ese edem usiahautịn, mme esan̄ oro ẹkese edem edere ye edem usụk. Ukem oro ke ekedi ke ukperedem ke ini Ekebe oro okodude ke temple oro Solomon ọkọbọpde.—Exodus 25:10-22; 37:4-9; 40:17-21. *
Ikpehe ama esibahade Ata Edisana ye Edisana (ubet an̄wa). Mme oku oro ẹkedude ke Edisana ikekemeke ndidu do n̄kụt Ata Edisana ye Ekebe oro, emi Abasi ekesiwụtde idemesie. (Mme Hebrew 9:1-7) Ntem ekeme nditie nte 1 Ndidem 8:8 in̄wan̄ake owo: “Mmọ ẹdụdi mme esan̄ ẹbon, ndien owo etie ke edisana ebiet ke iso ubet-etak okụt mbuot esan̄, edi owo eke odude ke esien ikwe mmọ.” Ẹtịn̄ ukem ikọ oro ke 2 Chronicles 5:9. Didie ke owo ekededi oro odude ke Edisana ke temple oro ekekeme ndida n̄kụt mme esan̄ oro?
Ndusụk owo ẹkere ke mme esan̄ oro ẹma ẹsituaha ikpehe oro, ẹsion̄ode mme ekpụk oro ẹkekemede ndida n̄kụt. Edi oro ikemeke ndidi ntre edieke mme esan̄ oro ẹkesede edem edere ye edem usụk, ikpehe onyụn̄ esede ukem edem oro mme esan̄ oro ẹkesede. (Numbers 3:38) Edinam an̄wan̄a oro esịnede ifiọk akan odu. Eyedi ẹma ẹsida ẹkụt mme esan̄ oro edieke ekpri ufan̄ okodude ke ufọt ikpehe oro ye ibibene temple mîdịghe ke ini akwa oku okoyomde ndibe ndụk Ata Edisana. Ikpehe oro ikesiyakke ẹda ẹkụt Ekebe oro ke idemesie, edi ekeme ndidi ẹma ẹsida ẹkụt mme esan̄ oro ẹkedude ke n̄kan̄ esie kiet kiet ke ufan̄ ikpehe oro. Ke adan̄aemi edinam an̄wan̄a emi esịnede ifiọk, nnyịn ikpenyeneke ndisọn̄ọ nyịre ke n̄kpọ emi.
Nte an̄wan̄ade, ediwak ntọt ẹdu oro nnyịn mîfiọkke kan̄a. Apostle Paul ama etịn̄ aban̄a ikpehe ifan̄ ke leta oro enye ekewetde ọnọ ẹsọk mme Hebrew. Ekem enye ama ọdọhọ ete: “Edi nnyịn ikemeke ndidọhọ mban̄a n̄kpọ emi kiet kiet ke emi.” (Mme Hebrew 9:5) Edinam mme anam-akpanikọ ẹset ke n̄kpa ke ini iso eyeberede idara idara ifet ndikpep n̄kpọ nto utọ iren nte Moses, Aaron, Bezalel, ye mbon en̄wen oro ẹkemehede ye ndudiọn̄ ye edinam ataya.—Exodus 36:1.
[Ikọ idakisọn̄]
^ ikp. 3 Owo ikenyeneke ndifahade mme esan̄ oro ke mme n̄kpanuen oro idem ke ini Ekebe akanade ke itie esie ke ataya. Mmọdo, owo ikekemeke ndida mme esan̄ oro nnam n̄kpọ efen ekededi. N̄ko, ikanaha ẹtụk Ekebe oro; edieke ẹkefaharede mme esan̄ oro ke n̄kpanuen, okpoyom ẹsimụm edisana Ekebe oro man ẹfiak ẹfak mmọ ke ini kiet kiet oro ẹkeyomde ndimen Ekebe. Se etịn̄de ke Numbers 4:6 ẹban̄a ‘ndisịn eto esie’ ekeme ndida mban̄a editịm mme esan̄ oro ndọn̄ m̀mê edinam mmọ ẹsịne ẹfọn ke mben̄eidem edimen ndodobi Ekebe oro n̄ka obufa itienna.