Afo Omoyom Ubieresịt Oro Ẹnọde Ukpep

Eketie nte enye edidi n̄wọrọnda usen ọnọ mme akaisan̄ ye mme anamutom ubomofụm oro ẹkedọn̄ọde ke Ubomofụm New Zealand ẹkotde Flight 901 ẹka Antarctica. Mme osio ndise ẹma ẹben̄e idem, ndien kpukpru owo ẹma ẹkop inemesịt nte DC-10 oro ekefede isọn̄ isọn̄ ke ekperede ndisịm Antarctica man ẹkeme ndinen̄ede nda n̄kụt n̄kann̄kụk oro.

ANDIWAT, oro ama akawat ubomofụm ke isua 15, ama awawat uwat ke se ibede hour 11,000. Mbemiso akadahade uwat, enye ama ataip ndutịm uwat esie ye ntịn̄enyịn esịn ke kọmputa ubomofụm, ifiọkke ite ke ẹnọ imọ ukwan̄ ntọt. Ke efede odụk idiọk enyọn̄ ke n̄kpasịp mita 600, DC-10 oro ama akatuak ke isọn̄ isọn̄ Obot Erebus, owotde owo 257 oro ẹkedọn̄ọde ke esịt.

Kpa nte ẹdade kọmputa ẹnọ mme ubomofụm ndausụn̄ ke ikpaenyọn̄ mfịn, ẹnọ mme owo ubieresịt ndida mmọ usụn̄ ke uwem. Ndien enyene-ndịk unọmọ oro ọkọnọmde Flight 901 ekeme ndikpep nnyịn ndusụk okopodudu n̄kpọ mban̄a ubieresịt nnyịn. Ke uwụtn̄kpọ, kpa nte uwat enyọn̄ oro afanikọn̄ mîdụhe ọkọn̄ọde ke eti ndutịm ubomofụm ye nnennen ntọt ndausụn̄, ntre nsọn̄idem nnyịn eke spirit, eke ido uwem, ye idem nsọn̄idem ikpọkidem nnyịn ẹkọn̄ọ ke eti ubieresịt oro nnennen ntọt ido uwem adade usụn̄.

Ke mfụhọ, ke ererimbot mfịn, mme utọ ntọt ndausụn̄ oro idụhe aba m̀mê ẹdi se ẹfụmide-fụmi. Andikpep kiet otode America ọkọdọhọ ete: “Mfịn nnyịn imesikop ekese iban̄a nte eyen ufọkn̄wed United States mîkemeke ndikot n̄wed, nte enye mîkemeke ndiwet n̄kpọ, ye nte enye mîkemeke ndiwụt France ke n̄wed ndise obio. Edi akpanikọ n̄ko nte ke enye ikemeke ndifiọk eti ye idiọk. Ke adianade ye unana ukeme ukotn̄wed ye ukeme unam ibat, nnyịn inyene ndisiak n̄ko akwa ndutịme ido uwem nsịn ke otu mme mfịna ukpep n̄wed.” Enye ama ọdọhọ n̄ko ete ke “mme uyen mfịn ẹdu uwem ke ekịm ke n̄kan̄ ido uwem. Bụp owo mmọ kiet m̀mê mme utọ n̄kpọ nte ‘eti ye idiọk’ ẹdu, ndien inikiet inikiet afo oyokụt nte ke enye ifiọkke se akpanamde, nte enye odopde uyo, okopde ndịk, onyụn̄ ananade ifụre. . . . Unana edifiọk se ẹkpenamde emi akaka iso okpon utu ke ndisosụhọde ke ini mmọ ẹdụkde akamba ufọkn̄wed.”

Ntak kiet kaban̄a ndutịme emi edi ekikere nte ke owo enyene ndibiere se idide idaha ido uwem, kpa ntatara edikere ke mme idaha ẹkpụhọde ẹtiene se owo m̀mê n̄kann̄kụk amade. Kere se ikpetịbede edieke mme awat ubomofụm ẹkpefede ẹtiene mme idiọn̄ọ oro mînyeneke iwụk ẹsinyụn̄ ẹsopde ofụri ofụri ndusụk ini utu ke ndife ntiene idaha oro ẹma ẹkenenịm! Nte eyịghe mîdụhe, mme afanikọn̄ nte enye oro eketịbede ke Obot Erebus ẹkpedi ọsọ n̄kpọ. Ukem ntre, sia ofụmide mme idaha ido uwem oro ẹma ẹkenenịm, ererimbot ọdọk akpakịp enyene-ndịk unana inemesịt ye n̄kpan̄a nte unana edinam akpanikọ abaharede mme ubon ndien ediwak miliọn owo ẹbọde ufen ke ntak AIDS m̀mê ndusụk udọn̄ọ eken ẹmende ẹto idan̄.

Owo ndibiere idaha ido uwem nnọ idem ekeme nditie nte ekikere oro esịnede ifiọk, edi ke nditịm ntịn̄ mme anditiene ekikere emi ẹbiet mbon Nineveh eset oro mîkọdiọn̄ọke “ubọk nnasia mmọ ye ufien mmọ.” Mme anditiene ekikere edibiere se idide eti ido uwem nnọ idem ẹbiet mme ọsọn̄ibuot nditọ Israel oro ẹketịn̄de ẹban̄a “idiọk, ẹte, Eti, ẹban̄a eti, ẹte, Idiọk.”—Jonah 4:11; Isaiah 5:20.

Ntre m̀mọ̀n̄ ke nnyịn ikeme ndiwọn̄ọde n̄ka kaban̄a mme in̄wan̄-in̄wan̄ ibet ye mme edumbet ndida nnọ ubieresịt nnyịn ukpep ndidi  eti adausụn̄? Ediwak miliọn owo ẹkụt ẹte ke Bible enen̄ede oyụhọ udọn̄ oro. Ọtọn̄ọde ke ido uwem tutu esịm edu unam utom onyụn̄ ọtọn̄ọde ke edinọ nditọ ukpep tutu esịm edituak ibuot nnọ Abasi, Bible isioho akpan n̄kpọ ndomokiet iduọk. (2 Timothy 3:16) Enye edi se ẹkemede ndiberi edem ọyọhọ ọyọhọ ke ediwak isua ikie emi ẹbede. Sia andikowụk mme idaha ido uwem eke Bible edide Enye emi okopde odudu akan, kpa Andibot nnyịn, mmọ ẹnyene ufọn ẹnọ kpukpru owo. Ntem, nnyịn inyeneke ntak ndomokiet ndidu ke ekịm ke n̄kan̄ ido uwem.

Nte ededi, mfịn ẹn̄wana en̄wan ye ubieresịt fo ẹkan nte akanam ẹn̄wanade. Didie ke edi ntre? Ndien didie ke afo ekeme ndikpeme ubieresịt fo? Eti usụn̄ nditọn̄ọ edi ndifiọk andin̄wana en̄wan oro ye mme usụn̄ unam n̄kpọ esie. Ẹyeneme emi ke ibuotikọ oro etienede.