‘Edidiọn̄ Jehovah—Ofori Owo’

KPUKPRU nnyịn imoyom ẹdiọn̄ nnyịn. Mme edidiọn̄ ẹsinọ owo inemesịt, nsọn̄idem, m̀mê uforo. Sia Jehovah edide Andinọ “kpukpru eti edinọ ye kpukpru enọ eke ẹfọnde ẹma,” kpukpru ata edidiọn̄ oro ẹbịghide ẹto ima ima Andibot nnyịn. (James 1:17) Enye an̄wan̄a mme edidiọn̄ ọnọ ofụri ubonowo, idem an̄wan̄ade ọnọ mbon oro mîfiọkke enye. Jesus ama etịn̄ aban̄a Ete esie ete: “Enye [anam] utịn Esie asiaha ọnọ mme idiọk owo ye nti owo, onyụn̄ [anam] edịm edep ọnọ ndinen owo ye mme anam ukwan̄-ido.” (Matthew 5:45) Nte ededi, Jehovah esiwụt mbon oro ẹmade enye san̄asan̄a edikere mban̄a.—Deuteronomy 28:1-14; Job 1:1; 42:12.

Andiwet psalm ekewet ete: “Ama edi mmọ eke ẹnen̄erede ẹsan̄a, [Jehovah] isịnke mmọ nti n̄kpọ.” (Psalm 84:11) Ih, mbon oro ẹnamde n̄kpọ Jehovah ẹdu uwem oro enyenede uforo onyụn̄ enyenede se ọwọrọde. Mmọ ẹfiọk ẹte ke “[edidiọn̄, NW] Jehovah ofori owo, enye inyụn̄ idianke afanikọn̄ ke esịt.” Bible ọdọhọ n̄ko ete: ‘Mmọ eke Jehovah ọdiọn̄de ẹyeda isọn̄ ẹnyene.’ (Mme N̄ke 10:22; Psalm 37:22, 29) Nso edidiọn̄ ke oro edidi ntem!

Didie ke nnyịn ikeme ndibọ edidiọn̄ Jehovah? N̄kpọ kiet edi-o, oyom nnyịn ikọri mme edu oro ẹnemde enye esịt. (Deuteronomy 30:16, 19, 20; Micah 6:8) Nnyịn ifiọk emi ito uwụtn̄kpọ mme asan̄autom Jehovah ita ke eset.

Jehovah Ọdiọn̄ Mme Asan̄autom Esie

Noah ekedi n̄wọrọnda asan̄autom Abasi. Ke Genesis 6:8, nnyịn ikot ite: “Noah okụt mfọn ke iso Jehovah.” Ntak-a? Koro Noah okokopde item. Mbụk oro ọdọhọ ete: “Noah asan̄a ye Abasi.” Noah ama etiene ndinen edumbet Jehovah onyụn̄ anam mme ewụhọ esie. Ke ini ererimbot ọkọduọde odụk afai ye oburobụt ido, ama onụk Noah ‘ndinam kpukpru se Abasi eketemede enye, ntem ke enye anam.’ (Genesis 6:9, 22) Nte utịp, Jehovah ama eteme enye ete ọkọn̄ “ubom ndida nnyan̄a ufọk esie.” (Mme Hebrew 11:7) Ke usụn̄ emi, Noah ye ubon esie—ndien ebede ke mmọ ekpụk ubonowo—ẹma ẹbọhọ nsobo emana oro. Ndien Noah akakpa ye idotenyịn edidi se ẹnamde eset edidu uwem ke nsinsi ke paradise isọn̄. Nso akpakịp edidiọn̄ ke ẹkenọ enye ntem!

Abraham n̄ko ama enyene mme edu oro ẹkenemde Jehovah esịt. N̄wọrọnda ke otu emi ekedi mbuọtidem. (Mme Hebrew 11:8-10) Abraham ama ọkpọn̄ inem uwem ke Ur ndien ekem ke Haran koro enye ọkọbuọtde idem ke un̄wọn̄ọ Jehovah oro nte ke mfri esie ọyọtọt onyụn̄ edi edidiọn̄ ọnọ kpukpru idụt. (Genesis 12:2, 3) Kpa ye oro ọkọyọde ke ediwak isua, ẹma ẹnọ mbuọtidem esie utịp ke ini Isaac eyen esie akamanade. Ebede ke enye, Abraham ama akabade edi ete ete edimek idụt Abasi, Israel, ndien ke akpatre akabade edi ete ete Messiah. (Rome 4:19-21) Akan oro, enye edi “ete kpukpru mmọ emi ẹbuọtde idem,” ndien ẹkedikot enye “Ufan Abasi.” (Rome 4:11; James 2:23; Galatia 3:7, 29) Nso enyene-uduak uwem ke enye okodu ntem, ndien ẹkediọn̄ enye didie ntem uwak uwak!

N̄ko, kere ban̄a anam-akpanikọ eren oro Moses. N̄wọrọnda ke otu edu esie ekedi edu  ediwụt esịtekọm mban̄a mme n̄kpọ eke spirit. Moses ama esịn kpukpru inyene Egypt onyụn̄ ‘ọsọn̄ọ ada nte n̄kpọ eke okụtde Enye emi enyịn owo mîkwe.’ (Mme Hebrew 11:27) Ke ama okodu isua 40 ke Midian, enye ama afiak aka Egypt nte akanieren okosobo ye Pharaoh, n̄kponn̄kan andikara ke ini oro, ndiben̄e ẹsana nditọete esie ẹyak. (Exodus 7:1-7) Enye ama okụt ufen duop, edibahade Ididuot Inyan̄, ye nsobo udịmekọn̄ Pharaoh. Jehovah ama ada enye ndinọ Israel Ibet ndinyụn̄ ndi esịne-ufọt ediomi Esie ye obufa idụt oro. Ke isua 40, Moses ama ada idụt Israel usụn̄ ke wilderness. Uwem esie ama enen̄ede enyene uduak, ndien enye ama adara ediwak ọsọn̄urua ifetutom.

Mme Edidiọn̄ ke Eyomfịn

Mme mbụk emi ẹwụt nte ke uwem mbon oro ẹnamde n̄kpọ Abasi esinen̄ede enyene se ọwọrọde. Nte ikọt Jehovah ẹkọride mme utọ edu nte n̄kopitem, mbuọtidem, ye edu ediwụt esịtekọm mban̄a mme n̄kpọ eke spirit, ẹsinen̄ede ẹdiọn̄ mmọ.

Didie ke ẹdiọn̄ nnyịn? Ọfọn, ke adan̄aemi akan̄ eke spirit omụmde ediwak miliọn owo ke Christendom, nnyịn imekeme “[ndikwọ] ke mfọn Jehovah.” (Jeremiah 31:12) Ebede ke Jesus Christ ye “asan̄autom emi anamde akpanikọ, onyụn̄ enyenede ọniọn̄,” Jehovah ọmọnọ akpakịp udia eke spirit oro an̄wamde nnyịn  ndika iso nsan̄a ke “[usụn̄] emi adade owo esịm uwem.” (Matthew 7:13, 14; 24:45; John 17:3) Ndibuana ye nditọete Christian nnyịn edi akwa edidiọn̄ efen. Ke mme mbono esop ye ke mme edinam en̄wen, esidi n̄kpọ akwa inemesịt ndidu ye mme ekemmọ andituak ibuot oro ẹnyenede ima ẹnyụn̄ ẹdomode ndimen “obufa owo” nsịne. (Colossae 3:8-10; Psalm 133:1) Nte ededi, n̄kponn̄kan edidiọn̄ nnyịn edi ọsọn̄urua ifet edinyene ọkpọkpọ itie ebuana ye Jehovah Abasi ye ifet editiene nde ikpat Eyen esie, Christ Jesus.—Rome 5:1, 8; Philippi 3:8.

Ke itiede ikere mme utọ edidiọn̄ oro, nnyịn iyọfiọk nte utom oro inamde inọ Abasi enen̄erede ọsọn̄ urua. Ekeme ndidi nnyịn imekere iban̄a n̄ke Jesus aban̄ade owourua oro okoyomde ndiye pearl. Jesus ama etịn̄ aban̄a owo emi ete: “Ndien ke enye ama okụt pearl kiet emi okponde ekọm-urua, aka akanyam kpukpru se enyenede, edep pearl oro.” (Matthew 13:46) Ke akpanikọ, oro edi nte itie ebuana nnyịn ye Abasi, ifet ndinam n̄kpọ esie, itie ebuana Christian nnyịn, idotenyịn Christian nnyịn, ye kpukpru edidiọn̄ eken oro ẹnyenede ebuana ye mbuọtidem nnyịn, ẹtiede nnyịn ke idem. Idụhe n̄kpọ ndomokiet ke uwem nnyịn oro ọsọn̄de urua akan mmọ.

Nọ Jehovah Usiene

Sia nnyịn ifiọkde ite ke Jehovah edi Andinọ kpukpru nti enọ, esịt edemede nnyịn ndiwụt esịtekọm mban̄a mme edidiọn̄ oro nnyịn ibọde. Didie ke nnyịn ikeme ndinam oro? Usụn̄ kiet edi ndin̄wam mbon en̄wen ẹbọ mme ukem edidiọn̄ emi. (Matthew 28:19) Ke se iwakde ibe idụt 230, Mme Ntiense Jehovah  ẹsika ẹkese mme mbọhọidụn̄ mmọ man ẹnam oro. Nte mmọ ẹnamde oro, mmọ ẹsisịn ọkpọkpọ inyene mmọ—ini, odudu, ye inyene obụkidem—ndin̄wam mbon en̄wen “ẹsịm ifiọk akpanikọ.”—1 Timothy 2:4.

Kere ban̄a mme asiakusụn̄ oro ẹdụn̄de ke Glendale, California, U.S.A. Kpukpru usenubọk Saturday, mmọ ẹsiwat n̄kpọ nte kilomita 100 ẹka ufọk-n̄kpọkọbi idụt oro ẹnyụn̄ ẹwat ẹnyọn̄ọ. Okposụkedi mmọ ẹsikemede ndibiat ibat ibat hour ye mbon n̄kpọkọbi ke ediwaha kiet kiet, mmọ ikopke mmemidem. Owo kiet ke otu mmọ ọdọhọ ete: “Enen̄ede ọnọ uyụhọ ndinam utom ke esen esen efakutom emi. Nnyịn inam emi ye akwa idatesịt. Nnyịn imenyene ata ediwak mbon oro ẹnyenede udọn̄ tutu edi ọkpọsọn̄ n̄kpọ ndise mban̄a udọn̄ mmọ. Idahaemi, nnyịn ikpep n̄kpọ ye owo ition, ndien owo inan̄ en̄wen ke ẹyom ukpepn̄kpọ Bible.”

Mme ifịk ifịk asan̄autom Christian ẹkop inemesịt ndin̄wam ke ndinam utom unyan̄a uwem emi ke mfọn. Mmọ ẹnyene ukem edu Jesus, emi ọkọdọhọde ete: “Mbufo ẹkebọ ke ikpîkpu, ẹnọ n̄ko ke ikpîkpu.” (Matthew 10:8) Ediwak miliọn owo ke ofụri ererimbot ẹbuana ke ukem anana-ibụk utom oro, ndien nte utịp, ata ediwak mbon oro ẹnyenede esịt akpanikọ ke ẹyere ikot ke ẹnyụn̄ ẹkabade ẹdi mme mbet. Ke n̄kpasịp isua ition emi ẹbede, se ikperede ndisịm owo 1,700,000 ẹmeyak uwem mmọ ẹnọ Jehovah. Oyom ẹsion̄o Bible ye mme n̄wed ẹkọn̄ọde ke Bible ẹnyụn̄ ẹbọp mbufa Ufọkmbono Obio Ubọn̄ ye mme itie mbono eken ndida nse mban̄a n̄kọri oro akade-ka iso mi. Okụk oro ẹdade ẹse ẹban̄a se ẹyomde emi esito m̀mọ̀n̄? Kpukpru ẹsito mme enọ unyịmesịt.

Ke ntak idiọk idaha ndutịm uforo ke ndusụk ikpehe ererimbot, ediwak owo ẹsisịn ọkpọsọn̄ ukeme man ẹnọ ubon mmọ mme n̄kpọ oro ẹyomde ke uwem. Nte magazine New Scientist ọdọhọde, miliọn owo kiet ẹsibiat ke nsụhọde n̄kaha mbahade 70 eke ikie ke otu okụkutom mmọ ndidep udia. Ediwak nditọete Christian nnyịn ẹdu ke utọ idaha oro. Ke mîkpedịghe un̄wam otode mme ekemmọ andinịm ke akpanikọ, mmọ ikpekemeke ndinyene mme n̄kpọ nte mme n̄wed Christian m̀mê nti Ufọkmbono Obio Ubọn̄.

Nte ededi, oro iwọrọke ite ke enenem mme utọ owo oro ndiyak mbon en̄wen ẹbiom mbiomo mmimọ. Edi mmọ ẹyom un̄wam. Ke ini ekesịnde udọn̄ ọnọ nditọ Israel ete ẹtịp mme n̄kpọ obụkidem nte usụn̄ ndikọm Jehovah ke enye ndidiọn̄ mmọ, Moses ọkọdọhọ ete: “Kpukpru owo ẹdi ye enọ ke ubọk, ekem ye ufọn eke Jehovah Abasi fo ọfọnde fi.” (Deuteronomy 16:17) Ntem, ke ini Jesus okokụtde ebeakpa kiet nte esịnde “n̄kpri okudọk iba” ke temple, enye ama otoro n̄wan oro ke iso mme mbet esie. N̄wan oro akanam se ekemede. (Luke 21:2, 3) Ukem ntre, mme Christian oro ẹdide ubuene ẹnam se mmọ ẹkemede. Ndien edieke mmọ ẹnanade n̄kpọ, ẹkeme ndida mme etịbe ẹtode mme ekemmọ Christian oro mîdịghe mme ubuene n̄n̄wam unana mmọ.—2 Corinth 8:13-15.

Ke ini inọde Abasi n̄kpọ ke mme utọ usụn̄ oro, edi akpan n̄kpọ ete nnyịn inyene nnennen uduakesịt. (2 Corinth 8:12) Paul ọkọdọhọ ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7) Ebede ke ndinọ enọ ke unyịmesịt, nnyịn inọ n̄kọri ukara Abasi oro akade iso idahaemi ibetedem inyụn̄ inam idatesịt nnyịn okpon.—Utom 20:35, NW.

Ndibuana ke utom ukwọrọikọ ye edinọ mme etịbe unyịmesịt ẹdi usụn̄ iba oro nnyịn ikemede ndinọ Jehovah usiene ke mme edidiọn̄ oro enye ọdiọn̄de nnyịn. Ndien edi n̄kpọ nsịnudọn̄ didie ntem ndifiọk nte ke Jehovah aduak ndin̄wan̄a edidiọn̄ esie nnọ ediwak mbon oro ẹnyenede esịt akpanikọ efen efen, oro ekemede ndidi ifiọkke enye idahaemi! (2 Peter 3:9) Ke ntre, ẹyak nnyịn ika iso ndida inyene nnyịn nsịn ke utom Abasi man iyom mbon oro ẹnyenede esịt akpanikọ inyụn̄ in̄wam mmọ ndikọri mme utọ edu nte n̄kopitem, mbuọtidem, ye esịtekọm. Ke ndinam ntem, nnyịn iyokop idatesịt edin̄wam mmọ “ẹtabi, ẹnyụn̄ ẹse nte Jehovah ọfọnde.”—Psalm 34:8.

[Ekebe ke page 28, 29]

Mme Usụn̄ Emi Ndusụk Owo Ẹmekde Ndinọ

MME ETỊBE KABAN̄A UTOM OFỤRI ERERIMBOT

Ediwak owo ẹsinịm, mîdịghe ẹnam ndutịm ẹban̄a, okụk oro mmọ ẹdisịnde ke mme ekebe etịbe oro ẹdiande idiọn̄ọ: “Contributions for the Worldwide Work—Matthew 24:14.”

Ke ọfiọn̄ kiet kiet mme esop ẹsinọ okụk emi aka edide ibuot itieutom ofụri ererimbot eke Mme Ntiense Jehovah ke Brooklyn, New York, m̀mê ọfis n̄kọk itieutom n̄kann̄kụk. Ẹkeme ndinọ okụk imaesịt nnennen ẹsọk Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, m̀mê ọfis n̄kọk itieutom oro esede aban̄a idụt mbufo. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken ke etịbe. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.

NDUTỊM ẸNAMDE ẸNỌ SE ẸNỊMDE KE UBIỌN̄

Ẹkeme ndinọ okụk ebe ke ndutịm oro ẹnamde san̄asan̄a emi edide, edieke andinọ enyenede ọkpọkpọ n̄kpọ ndida enye nnam, ẹnọ ẹfiak ẹsọk enye. Kaban̄a ntọt efen efen, mbọk nyene nneme ye Treasurer’s Office ke adres ẹwụtde ke enyọn̄ emi.

ENỌ EMI ẸDIOMIDE-DIOMI

Ke adianade ye edinọ okụk nte ata enọ ye mme etịbe okụk oro ẹsịnde ke ubiọn̄, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ ofụri ererimbot. Mmọ emi ẹsịne:

Insurance: Ẹkeme ndiwet enyịn̄ Watch Tower Society nte andibọ ufọn insurance m̀mê okụk ukpọn̄ utom.

Ibatokụk Itie Unịm Okụk: Ẹkeme ndinam ibatokụk itie unịm okụk, n̄wed okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo ẹdu ke enyịn̄ mîdịghe ẹnam ẹkpe ke ini ẹkpade ẹnọ Watch Tower Society, nte ekemde ye ndutịm itie unịm okụk n̄kann̄kụk.

Inyene ye Mbubehe: Ẹkeme ndinọ Watch Tower Society inyene ye mbubehe nte ata enọ.

Isọn̄ ye Inyene: Ẹkeme ndinọ Watch Tower Society isọn̄ ye inyene oro ẹkemede ndinyam edide ke edinọ nte ata enọ m̀mê ke ndimụm n̄kpọ akpa ke isọn̄ ye inyene n̄kama nnọ andinọ, emi ekemede ndisụk n̄ka iso ndụn̄ do ke eyouwem esie. Tọt ọfis n̄kọk itieutom idụt mbufo mbemiso ayakde isọn̄ ye inyene ekededi ọnọ.

Unen N̄kpọ Akpa ye Mme Ebuọt: Ẹkeme ndiyak inyene m̀mê okụk nnọ Watch Tower Society ke ndinọ enye unen ndidia n̄kpọ akpa oro ibet enyịmede, mîdịghe ẹkeme ndiwet enyịn̄ Watch Tower Society nte adia ufọn ke n̄wed ebuọt. Ebuọt oro adade ufọn ọsọk n̄ka ido ukpono ekeme ndinam ẹsụhọde urua tax.

Nte ikọ oro “enọ emi ẹdiomide-diomi” owụtde, mme utọ enọ emi nte ido edide ẹyom andinọ anam ndutịm. Man ẹn̄wam mme owo oro ẹnyenede udọn̄ ndin̄wam utom ofụri ererimbot eke Mme Ntiense Jehovah ebe ke ndusụk orụk enọ emi ẹdiomide-diomi, ẹtịm ediye uduot ekpri n̄wed ke Ikọmbakara ye Spanish ẹkotde Planned Giving to Benefit Kingdom Service Worldwide. Ẹkewet ediye uduot ekpri n̄wed emi ke ntak ediwak mbụme oro ẹbụpde kaban̄a mme enọ, unen n̄kpọ akpa, ye ebuọt. Enye n̄ko esịne mme ntọt efen efen kaban̄a ufọk, okụk, ye ndutịm tax. Ndien ẹtịm enye man an̄wam mme owo ke United States emi ẹdiomide ndinọ san̄asan̄a enọ idahaemi m̀mê ndikpọn̄ n̄kpọ akpa nnọ ke ini ẹkpade man ẹmek usụn̄ oro ọfọnde onyụn̄ okụtde unen akan ndinam ntre ke ẹkerede ẹban̄a mme idaha ubon ye ọkpọkpọ idaha mmọ. Ẹkeme ndinyene ediye uduot ekpri n̄wed emi ebe ke ndiben̄e idem esie kiet nnennen nnennen nto Itieutom Esede Aban̄a Enọ Emi Ẹdiomide-Diomi.

Ke ẹma ẹkekot ediye uduot ekpri n̄wed emi ẹnyụn̄ ẹnyene nneme ye Itieutom Esede Aban̄a Enọ Emi Ẹdiomide-Diomi, ediwak owo ẹma ẹkeme ndin̄wam Mme Ntiense Jehovah ke ofụri ererimbot ndien ke ukem ini oro ẹbọ n̄kponn̄kan ufọn ukpe tax ẹto edinam ntre. Ẹkpenyene ndinam Itieutom Esede Aban̄a Enọ Emi Ẹdiomide-Diomi ọfiọk aban̄a onyụn̄ ọbọ n̄wetnnịm n̄kpọ oro odotde ke ekededi ke otu ndutịm emi. Edieke afo enyenede udọn̄ ke ekededi ke otu ndutịm enọ oro ẹdiomide-diomi mi, afo ekpenyene ndinyene nneme ye Itieutom Esede Aban̄a Enọ Emi Ẹdiomide-Diomi, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi m̀mê ke ọfis Mme Ntiense Jehovah emi esede aban̄a idụt mbufo.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telephone: (845) 306-0707