Kpeme Ubieresịt Fo

EKIKERE edife ke ubomofụm oro ẹdọn̄de ukwan̄ ntọt ke kọmputa esie akama oyomonsia. Kere n̄ko nte owo okpokpụhọrede ndutịm unọ ndausụn̄ ubomofụm m̀mê okoide-koi ọdọn̄ ukwan̄ ntọt ke enye! Ọfọn, ke ndamban̄a usụn̄, oro edi ata ukem se owo odomode ndinam ye ubieresịt fo. Enye ebiere ndibiat ndutịm ndausụn̄ eti ido uwem fo. Uduak esie edi ndinam fi odu ke ntuaha ye Abasi!—Job 2:2-5; John 8:44.

Anie edi idiọk andibiat emi? Ke Bible, ẹkot enye “akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot.” (Ediyarade 12:9, sịghisịghi ubọkn̄wed edi eke nnyịn.) Ẹma ẹkụt edinam esie ke in̄wan̄ Eden, ke ini enye akadade n̄kari n̄kari ikọ ekpek Eve ndifụmi se enye ọkọfiọkde ete enen ndinyụn̄ nsọn̄ ibuot ye Abasi. (Genesis 3:1-6, 16-19) Ọtọn̄ọde ke ini oro, Satan amada kpukpru abian̄a abian̄a ndutịm ndinam mme owo ke ofụri ofụri ẹdi mme asua ye Abasi. Andinyene nduduọhọ n̄kan ke ofụri ndutịm emi edi nsunsu ido ukpono.—2 Corinth 11:14, 15.

Nsunsu Ido Ukpono Abiat Ubieresịt

Ke n̄wed Ediyarade, ẹwụt nsunsu ido ukpono nte ndamban̄a akpara oro ẹkotde Akwa Babylon. Mme ukpepn̄kpọ esie ẹmetịmede ifiọk eti ido uwem ediwak owo ẹnyụn̄ ẹnam mmọ ẹsua ẹnyụn̄ ẹnam n̄kpọ afai afai ye mbon oro ẹnyenede isio isio edinịm ke akpanikọ. Ke akpanikọ, nte Ediyarade ọdọhọde, Abasi ọduọhọ nsunsu ido ukpono akpan akpan ke iyịp “kpukpru mmọ emi owo ẹkewotde ke isọn̄,” esịnede iyịp mme andituak ibuot nnọ Abasi.—Ediyarade 17:1-6; 18:3, 24.

Jesus ama odụri mme mbet esie utọn̄ aban̄a udomo oro nsunsu ido ukpono editịmerede ndausụn̄ eti ido uwem ndusụk owo ke ini enye ọkọdọhọde ete: “Ini ke onyụn̄ edi eke owo ekededi eke ediwotde mbufo eyese ete imọ inam n̄kpọ inọ Abasi.” Mme utọ afai afai owo oro ẹdi nnan didie ntem ke n̄kan̄ ido uwem! Jesus ọkọdọhọ ete: ‘Mmọ idiọn̄ọke Ete, inyụn̄ idiọn̄ọke Mi.’ (John 16:2, 3) Esisịt ini ke Jesus ama eketịn̄ mme ikọ oro, ẹma ẹwot enye ke idemesie ke ewụhọ mme adaiso ido ukpono oro ubieresịt mîkobiomke mmọ ikpe iban̄a ubiatibet mmọ. (John 11:47-50) Ke edide isio, Jesus ọkọdọhọ ete ke ẹdida ima oro mmọ ẹnyenede ke otu idemmọ ẹfiọk mme ata anditiene imọ. Edi ima mmọ aka anyan akan oro, koro enye atarade esịm idem mme asua mmọ.—Matthew 5:44-48; John 13:35.

Usụn̄ en̄wen oro nsunsu ido ukpono abiatde ubieresịt ediwak owo edi ke ndisịn udọn̄ nnọ ido uwem ekededi, m̀mê oburobụt ido uwem, oro ọwọrọde etop. Apostle Paul ama ebem iso etịn̄ aban̄a emi ete: “Ini ọmọn̄ edi eke mme owo mîdibọhọ eti ukpep-n̄kpọ; ndien sia utọn̄  edebede mmọ ndikop isio ikọ, mmọ ẹyekọ mme andikpep ẹnọ idem nte ekemde ye mme idiọk udọn̄ mmọ.”—2 Timothy 4:3.

Mfịn, mme adaiso ido ukpono ẹnam utọn̄ edebe mme owo ndikop isio ikọ ke ndidọhọ ke Abasi ekeme ndinyịme idan̄ ke ọwọrọde ọkpọn̄ ndọ. Mbon eken ẹnyịme idan̄ ukemuduot. Ke akpanikọ, ndusụk mme ọkwọrọ ederi ke idemmọ ẹdi mme adan̄ ukem uduot. Ibuotikọ kiet ke The Times, n̄wedmbụk n̄kpọntịbe Britain ọkọdọhọ ete ke ẹmek “mme ọkwọrọ ederi duopeta oro ẹtịmde ẹdiọn̄ọ nte mme adan̄ ukemuduot” ẹsịn ke Akwa Esop Ufọkabasi England. Ke ini mme adaiso ufọkabasi ẹfụmide idaha ido uwem eke Bible ndien ufọkabasi inamke n̄kpọ ndomokiet iban̄a, mme idaha ewe ke mbon ufọkabasi mmọ ẹkpetiene? Eyịghe idụhe nte ediwak miliọn owo ẹdude ke ata ndutịme.

Enen̄ede ọfọn didie ntem ndiyak idaha ido uwem oro ebietde un̄wana ye akpanikọ eke spirit oro ẹkpepde ke Bible ada nnyịn usụn̄! (Psalm 43:3; John 17:17) Ke uwụtn̄kpọ, Bible ekpep ete ke mbon use ye mme esịn efịbe “ididaha Obio Ubọn̄ Abasi inyene.” (1 Corinth 6:9, 10) Enye asian nnyịn ete ke iren ye iban oro ẹkpọn̄de “se ẹkebotde mmọ ẹnọ, ẹkabade ẹnam se mîkobotke mmọ inọ . . . ẹnam se mîdotke” ke enyịn Abasi. (Rome 1:26, 27, 32) Mme akpanikọ ẹban̄ade ido uwem mi idịghe se mme anana-mfọnmma owo ẹtịbide; mmọ ẹdi mme idaha Abasi eke odudu spirit, oro akanam enye mîkpụhọkede. (Galatia 1:8; 2 Timothy 3:16) Edi Satan enyene mme usụn̄ en̄wen oro enye adade abiat ubieresịt.

Sasat Unọ Idem Inemesịt

Edi n̄kpọ kiet ndinyịk owo anam idiọkn̄kpọ, edi edi n̄kpọ en̄wen ndinam ọdọn̄ enye ndinam utọ idiọkn̄kpọ oro. Emi edi utịtmbuba Satan, “ọbọn̄ ererimbot emi.” Man esịn idiọk ekikere esie ke ekikere ye esịt mbon ndisịme m̀mê mbon unana ifiọk—akpan akpan mme uyen oro ẹnyenede mmemmem esịt—enye esida n̄kpọ nte ndiọi n̄wed, ndise senima, ikwọ, mbre kọmputa, ye mme ndise idan̄ ke Intanet.—John 14:30; Ephesus 2:2.

Ntọt kiet ke n̄wedmbụk oro Pediatrics ọkọdọhọ ete: “N̄kparawa owo [ke United States] ẹsise n̄kpọ nte edinam afai 10 000 kpukpru isua, ndien mme edinam oro ẹnamde ẹnọ nditọwọn̄ ẹsitie afai afai ẹkan.” Ntọt oro ama ayarade n̄ko nte ke “kpukpru isua, mme uyen ẹsise edinam idan̄ ye mbubru oro ẹkperede ndisịm 15 000.” Enye ama ọdọhọ ete ke idem mme edinam mbubịteyo ke ekebe ndise “ẹsisịne se iwakde ibe edinam idan̄ 8 ke hour kiet kiet, awakde utịm ikanan̄ akan nte ekedide ke 1976.” Idịghe n̄kpọ n̄kpaidem ndụn̄ọde oro akayarade n̄ko nte ke “ndek ndek ikọ ke ọkọri ke n̄wọrọnda usụn̄ n̄ko.” Edi, Bible ye ediwak n̄wed ukpepn̄kpọ ifiọk ntaifiọk ẹtọt ẹte ke ndida mme utọ n̄kpọ oro mbọk ekikere ẹnam mme owo ẹdiọk ẹkan. Ntre edieke afo enen̄erede oyom ndinem Abasi esịt nnyụn̄ mbọ ufọn, nam item Mme  N̄ke 4:23, emi ọdọhọde ete: “Tịm kpeme esịt fo kan kpukpru se ekpemede; koro uwem otode enye.”—Isaiah 48:17.

Ata ediwak ọwọrọetop ikwọ n̄ko ẹsibiat ubieresịt. Akwaikwọ kiet oro mme ikwọ esie ẹnen̄erede ẹwọrọ etop ke ediwak idụt Edem Usoputịn esisịn “san̄asan̄a ukeme ndinam idem aduai owo,” ntem ke ibuotikọ kiet ke n̄wedmbụk n̄kpọntịbe Australia oro The Sunday Mail ọtọt. Ibuotikọ oro ọdọhọ ete ke “mme ikwọ esie ẹsitoro n̄kpọsọn̄ ibọk, idan̄ iman ye idan̄ n̄kanubọk” ye nte ke enye “esikwọ aban̄a owo ndiwot n̄wan esie nnyụn̄ ntop okpo esie nsịn ke n̄kpọdiọhọ mmọn̄.” Mme ikọ ikwọ en̄wen oro ẹkesiakde ẹdehe ẹkaha se ẹwetde ẹsịn mi. Kpa ye oro, ikwọ esie ama anam ẹnọ enye ata akamba enọ. Nte afo akpama ndida utọ ndiọi ekikere nte mbon oro ẹsiakde ke enyọn̄ emi mbọk ekikere ye esịt fo, idem ọkpọkọm ẹdeda ikwọ ẹnam mmọ ẹnem? Ẹdori enyịn ke ukpudaha ubọk, koro mbon oro ẹnamde ntre ẹsabade ubieresịt mmọ ndien ke ntre ẹbot “idiọk esịt” ẹnọ idemmọ, anamde mmọ ẹdi mme asua Abasi.—Mme Hebrew 3:12; Matthew 12:33-35.

Ntre wụt eti ibuot ke unọ idem inemesịt oro afo emekde. Bible eteme nnyịn ete: “N̄kpọ ekededi eke ẹdide akpanikọ, ye n̄kpọ ekededi eke ẹnyenede ukpono, ye n̄kpọ ekededi eke ẹnende, ye n̄kpọ ekededi eke ẹdide edisana, ye n̄kpọ ekededi eke odotde ete ẹma, ye n̄kpọ ekededi eke ọwọrọde eti etop; edieke eti ido odude ke n̄kpọ, edieke itoro onyụn̄ odude, ẹkere n̄kpọ oro.”—Philippi 4:8.

Mme Nsan̄a Ẹsitụk Ubieresịt Fo

Nte nditọwọn̄, Neil ye Franz ẹma ẹsikop inem eti nsan̄a ye mme ata Christian. * Neil ọkọdọhọ ete, edi nte ini akakade “mma ntọn̄ọ ndidụk idiọk nsan̄a.” Utịp oro ekedide ubiatibet ye edisịn ke ufọk-n̄kpọkọbi ẹma ẹda mfụhọ ẹsọk enye. Mbụk Franz edi ukem oro. Enye ama eseme ete: “N̄kekere ke mmekeme ndidụk nsan̄a ye mme uyen ererimbot ye unana edida unan. Edi nte Galatia 6:7 ọdọhọde, ‘owo ikemeke ndibian̄a Abasi: se ededi owo ọtọde, oro ke enye edinyụn̄ ọdọk.’ Mma ndikpep ke ọkpọsọn̄ usụn̄ nte ke Jehovah ama enen, ami n̄kenenke. Ami ndu ke nsinsi n̄kpọkọbi ke ntak idiọkn̄kpọ oro n̄kanamde.”

Mme owo nte Neil ye Franz isiduọhọ idụk ubiatibet ke mbuari; ke akpa, mmọ ẹsikere ke mmimọ ikemeke ndibiat ibet. Emi esitịbe ke ikpehe ke ikpehe, akpa ikpehe esiwak ndidi idiọk nsan̄a. (1 Corinth 15:33) Edida n̄kpọsọn̄ ibọk ye n̄kpọsọn̄ mmịn ke idiọk usụn̄ ẹkeme nditiene. Ke akpanikọ, ẹtịn̄ nte odotde ẹte ke ubieresịt edi “ubak ido owo oro ọkpọsọn̄ mmịn ekemede nditara.” Ọtọn̄ọde do, ayak usio-ukot ifan̄ enye ndiduọ ndụk ubiatibet m̀mê oburobụt ido.

Do, ntak anamde akpa usio-ukot? Utu ke oro, dụk nsan̄a ye mme enyene-ibuot owo oro ẹnen̄erede  ẹma Abasi. Mmọ ẹyen̄wam fi ndisọn̄ọ ubieresịt fo man enye ada fi usụn̄ nte ọfọnde, anamde fi ọbọhọ ediwak afanikọn̄. (Mme N̄ke 13:20) Okposụkedi ẹsụk ẹdude ke ufọk-n̄kpọkọbi, Neil ye Franz ẹmekụt idahaemi ẹte ke ubieresịt mmimọ edi enọ Abasi oro ke akpanikọ oyomde ẹtịm ẹnọ ukpep ẹnyụn̄ ẹnen̄ede ẹkpeme. N̄ko-n̄ko, mmọ ke ẹsịn ọkpọsọn̄ ukeme ndikọri eti itie ebuana ye Abasi mmọ, Jehovah. Nyene ibuot, nyụn̄ kpep n̄kpọ to ndudue mmọ.—Mme N̄ke 22:3.

Kpeme Ubieresịt Fo

Nnyịn iwụt ke imoyom ndikpeme ubieresịt nnyịn ke ini nnyịn ikọride ima inọ inyụn̄ ibuọtde idem ye Abasi, ọkọrọ ye ke ini inyenede eti mbak inọ enye. (Mme N̄ke 8:13; 1 John 5:3) Bible ayarade ete ke ubieresịt oro mînyeneke mme n̄kpọ emi isinyeneke iwụk ke n̄kan̄ ido uwem. Ke uwụtn̄kpọ, Psalm 14:1 etịn̄ aban̄a mbon oro ẹdọhọde ke esịt mmọ ẹte: “Abasi idụhe.” Didie ke unana mbuọtidem emi otụk edu uwem mmọ? Ufan̄ikọ oro aka iso ete: “Mmọ ẹmediọk ẹnyụn̄ ẹnam mbubiam n̄kpọ.”

Mbon oro mînyeneke ata mbuọtidem ke Abasi n̄ko inyeneke idotenyịn eti ini iso. Ntem, mmọ ẹsinyene ntụhọ edidu uwem nnọ mfịn, ẹbịnede se idọn̄de obụkidem mmọ. Ekikere mmọ edi: ‘Ẹyak idia inyụn̄ in̄wọn̄, koro iyakpa n̄kpa n̄kpọn̄.’ (1 Corinth 15:32) Ke n̄kan̄ eken, owo idaha inemesịt ibio ini ererimbot emi iwọn̄ọde ntịn̄enyịn mbon oro enyịn mmọ ẹwụhọde ke utịp nsinsi uwem. Ukem nte kọmputa ubomofụm oro enyenede nnennen ntọt, ubieresịt mmọ oro ẹnọde ukpep an̄wam mmọ ẹka iso ẹsan̄a ke ọyọhọ n̄kopitem nnọ Abasi.—Philippi 3:8.

Man ubieresịt fo aka iso enyene odudu onyụn̄ asan̄a nte enende, enye oyom ndausụn̄ otode Ikọ Abasi kpukpru ini. Bible asian nnyịn ete ke utọ ndausụn̄ oro odu ke ini etịn̄de ke ndamban̄a usem ete: “Utọn̄ fo ẹyekop uyo ke edem fo, ete, ‘Emi edi ọkpọusụn̄, mbufo ẹsan̄a ke esịt,’ ke mbufo ẹdin̄wọn̄ọrede ẹka nnasia, m̀mê ẹnyụn̄ ẹka ufien.” (Isaiah 30:21) Ntre sio ini nịm nọ edikot Bible ke usen ke usen. Emi ọyọsọn̄ọ fi idem onyụn̄ esịn udọn̄ ọnọ fi ke ini afo an̄wanade ndinam se inende m̀mê ke ini afo okopde ọkpọsọn̄ editịmede esịt. Nịm ke akpanikọ ete ke Jehovah eyekpeme fi ke n̄kan̄ ido uwem ye ke n̄kan̄ eke spirit edieke afo enyenede ọyọhọ mbuọtidem ke enye. Ih, kpebe andiwet psalm emi ekewetde ete: “Mmenịm Jehovah ke iso mi kpukpru ini: koro enye odude mi ke ubọk nnasia, ndisehekede.”—Psalm 16:8; 55:22.

[Ikọ idakisọn̄]

[Mme ndise ke page 5]

Nsunsu ido ukpono, oro ẹtịn̄de ẹban̄a ke Bible nte “Akwa Babylon,” abiat ubieresịt ediwak owo

[Ebiet Ẹdade N̄kpọ Ẹto]

Oku ọdiọn̄de udịmekọn̄: U.S. Army photo

[Mme ndise ke page 6]

Ndise ndise afai ye oburobụt ido ayabiat ubieresịt fo

[Ndise ke page 7]

Ndausụn̄ ofụri ini otode Ikọ Abasi eyekpeme ubieresịt fo