Mme Mbụme Ẹtode Mme Andikot

Urụkikọt oro ke in̄wan̄ Eden akasan̄a didie ọnọ Eve ekikere ete abiat ibet Abasi aban̄ade eto ifiọk eti ye idiọk?

Genesis 3:1 ọdọhọ ete: “Ndien urụkikọt enyene n̄kari akan kpukpru unam obot emi Jehovah Abasi akanamde. Ekem enye ọdọhọ n̄wan oro, ete, Nte Abasi ọkọdọhọ ete, Mbufo ẹkûdia baba eto in̄wan̄ emi kiet?” Ẹnọ nsio nsio ekikere ẹban̄a usụn̄ oro urụkikọt akadade enyene nneme ye Eve. Ekikere kiet edi nte ke enye akanam oro ebe ke edida idem ntịn̄ ikọ. Ke uwụtn̄kpọ, ọkwọrọ ederi owo England oro Joseph Benson ọkọdọhọ ete: “Enen̄ede etie nte ke enye akada ndusụk orụk idiọn̄ọ. Ndusụk owo, k’akpan, ẹnọ ekikere ẹte ke urụkikọt ama enyene ifiọk ukere n̄kpọ ye ukeme utịn̄ikọ ini oro, . . . edi uyarade baba kiet idụhe kaban̄a emi.”

Nte ededi, didie ke urụkikọt ekpekekeme ndida sụk edida idem ntịn̄ ikọ nnọ Eve ekikere nte ke ebede ke ndidia mfri oro ẹkekpande ke enye ayakabade etie nte Abasi, ekeme ndibiere se ifọnde ye se idiọkde? N̄ko-n̄ko, Eve ama abuana ke nneme oro, ọbọrọde mbụme oro urụkikọt okobụpde. (Genesis 3:2-5) Edidọhọ ke urụkikọt akada idem m̀mê idiọn̄ọ kpọt etịn̄ ikọ akpada esịm edibiere nte ke Eve akada idiọn̄ọ ọbọrọ, ke adan̄aemi Bible ọdọhọde ete ke Eve ama etịn̄ ikọ.

Ke etịn̄de aban̄a n̄kpọntịbe emi, apostle Paul ama odụri mme ekemmọ Christian utọn̄ ete: “Mmefehe ndịk, mbak ke usụn̄ ekededi, nte urụkikọt akabian̄ade Eve ke n̄kari esie, ẹdibiat ekikere mbufo.” N̄kpọndịk oro Paul eketịn̄de aban̄a okoto “mme apostle abian̄a, mme anam-utom n̄kari.” Idịghe idiọn̄ọ ye edida idem ntịn̄ ikọ kpọt ke “mme akakan apostle” oro ẹkesida ẹsịn owo ndịk ke idem. Emi ama esịne ikọ inua mmọ—mme n̄kari n̄kari ikọ mmọ, oro ẹketịn̄de man ẹda mbon en̄wen ẹtụn usụn̄.—2 Corinth 11:3-5, 13.

Okposụkedi ẹkedade ikọ inua ẹtụn Eve usụn̄ ke in̄wan̄ Eden, n̄kpọ ndomokiet idụhe oro ọnọde ekikere nte ke ata ata urụkikọt ama enyene esịp uyo. Ke akpanikọ ikoyomke enye enyene. Ke ini angel Abasi akadade ass etịn̄ ikọ ọnọ Balaam, ikoyomke unam oro enyene awak-n̄kukọhọ efọk uyo oro ebietde eke owo. (Numbers 22:26-31) Nte an̄wan̄ade, ke ini ‘ass imụm emi eketịn̄de ikọ ke uyo owo,’ ukeme ndinam oro okoto obio mme spirit.—2 Peter 2:16.

Ke Bible, ẹnam ẹdiọn̄ọ edibotn̄kpọ eke spirit oro akadade ke edem urụkikọt etịn̄ ikọ ọnọ Eve nte “akani urụkikọt oro ẹkotde enye ẹte, andidori ikọt Abasi ikọ ye Satan.” (Ediyarade 12:9) Mme ikọ oro Eve okokopde onyụn̄ ọbọrọde ẹketo Satan, emi “[akade] iso ndinam idemesie angel un̄wana.”—2 Corinth 11:14, NW.

[Ndise ke page 27]

“Mbufo ẹyenyụn̄ ẹtie nte Abasi, ẹfiọk eti ye idiọk”