Ntọt Mme Anditan̄a Obio Ubọn̄

“Emedue Nọmba Oro Okotde”

KE Johannesburg, South Africa, Leslie ye Caroline ke ẹkenọ mme andidụn̄ ke itieidụn̄ mbon oro ẹma ẹkekpọn̄ utom oro ẹnọde ọkpọsọn̄ ukpeme, ikọ ntiense urụk ukopikọ. Ibat ibat owo oro ẹkedude ke ufọk ikenyeneke udọn̄ ke etop Christian mmọ, ntre Caroline ama okop inemesịt ke ini n̄wan kiet ọkọbọrọde ikot esie.

Caroline ama obụp ete: “Ndi Mma B—edi oro?

Ufan ufan uyo kiet ama ọbọrọ ete, “Baba-o, ami ndi Mma G—. Emedue nọmba oro okotde.”

Ke okopde ufan ufan uyo oro, Caroline ama ọdọhọ ete: “Ọfọn, yak nnam an̄wan̄a fi se n̄koyomde ndisian Mma B—.” Do enye ama etịn̄ aban̄a mme edidiọn̄ Obio Ubọn̄ Abasi oro edide. Ke ẹma ẹkediomi ndida ediye uduot ekpri n̄wed Nso ke Abasi Oyom Oto Nnyịn? nsọk enye, Mma G— ama obụp ete: “Yak kan̄a ise, afo esika ewe ufọkabasi?”

Caroline ama ọbọrọ ete: “Nnyịn idi Mme Ntiense Jehovah.”

“Ih ih, mmaha ufọkabasi oro! N̄kereke ke mmoyom ndikụt fi.”

Caroline ama ọdọhọ ete: “Edi Mma G—, ke minit 20 emi ẹbede, mmabuana ata utịbe utịbe etop ye afo, ndade Bible n̄wụt fi se Obio Ubọn̄ Abasi edinamde inọ ubonowo ke mîbịghike. Afo ama enen̄ede okop inemesịt—idem okopde nduaidem—ndikop mme n̄kpọ emi, ama onyụn̄ oyom ndikpep mme n̄kpọ efen efen. Nso ke afo enen̄ede ọfiọk aban̄a Mme Ntiense Jehovah? Edieke afo ọkpọdọn̄ọde, ndi akpaka ebịne ọdiọn̄ ubomisọn̄? Ntak mûyakke mi nsian fi se Mme Ntiense Jehovah ẹnịmde ke akpanikọ?”

Ke ama okodop uyo ke esisịt ini enye ama ọbọrọ ete: “N̄kere ke afo emenen. Ekem afo edi. Edi fiọk ete ke afo udukemeke ndikpụhọde mi!”

Caroline ama ọbọrọ ete: “Mma G—, ami n̄kemeke ndikpụhọde fi idem ọkpọkọm nyoyom ndinam oro. Jehovah kpọt ekeme ndikpụhọde fi.”

Ẹma ẹda ediye uduot ekpri n̄wed oro ẹsọk enye, ndien Mma G— (Betty) ama enyịme ẹfiak ẹwaha ẹdise imọ. Ke ini Caroline akafiakde aka, Betty ama ọdọhọ ke imọ ima isian iban ẹsitiede ke okpokoro udia ye imọ ite ke imọ ikenyene nneme ye Mme Ntiense Jehovah. Mmọ ẹma ẹkpan̄a nsa, ẹnyụn̄ ẹbụp ẹte: “Akpasasan̄a didie anam oro? Mmọ ikam inịmke Jesus ke akpanikọ!”

Caroline ama ọsọsọp eti Betty akpan n̄kpọ kiet ke akpatre nneme oro mmọ ẹkenemede ẹban̄a Obio Ubọn̄ Abasi.

Caroline ama obụp ete: “Anie edidi Edidem?”

Betty ama ọbọrọ ete: “Jesus nan̄a.”

Caroline ama ọdọhọ ete: “Edi akpanikọ.” Ekem enye ama aka iso ndinam an̄wan̄a ete ke Mme Ntiense Jehovah ẹnịm ke akpanikọ ẹte ke Jesus edi Eyen Abasi, edi nte ke enye idịghe n̄ka ye Abasi nte ubak Abasi-Ita-ke-Kiet.—Mark 13:32; Luke 22:42; John 14:28.

Ke ẹma ẹkenam mfiakn̄ka ifan̄ efen, ama ana in̄wan̄-in̄wan̄ nte ke okposụkedi ekesinyenede in̄wan̄-in̄wan̄ idara idara edu, idem ikọsọn̄ke Betty. Ke akpanikọ, enye ọkọdọn̄ọ kansa ama onyụn̄ okop ndịk nte ke imọ imọn̄ ikpa. Enye ọkọdọhọ ete: “Ubaha nte ekpedide mma n̄kop mme n̄kpọ emi nnyụn̄ nnịm se mbufo ẹnịmde ke akpanikọ ke ediwak isua emi ẹkebede.” Caroline ama ọdọn̄ enye esịt ebe ke ndiwụt enye mme itie N̄wed Abasi oro ẹtịn̄de ẹban̄a n̄kpa nte ọkpọsọn̄ idap emi owo ekemede ndidemede ke ediset ke n̄kpa. (John 11:11, 25) Emi ekenen̄ede edi n̄kpọ nsịnudọn̄ ọnọ Betty, oro ekpepde Bible ofụri ini idahaemi. Unana nsọn̄idem esie kpọt ọbiọn̄ọ enye ndidụk mme mbono esop ke Ufọkmbono Obio Ubọn̄.

Caroline ọdọhọ ete: “An̄wan̄a mi nte ke mme angel ke ẹnọ utom emi ndausụn̄. N̄kokot nọmba Betty ke ‘ndudue,’ ndien kam kere, enye edi isua 89 ke emana!”—Ediyarade 14:6.