Mme Mbụme Ẹtode Mme Andikot

Nte ewụhọ Abasi oro ẹwetde ke Jeremiah 7:16 ọwọrọ ete ke mme Christian ikpọbọn̄ke akam iban̄a owo oro ẹma ẹkesio ẹfep ke esop Christian koro enye edide anamidiọk oro mîkabakede esịt?

Ke ama akatan̄a ubiereikpe esie odori Judah oro mîkanamke akpanikọ, Jehovah ama ọdọhọ Jeremiah ete: “Afo kûnam ndien n̄kpe-ubọk unọ mbio emi, kûnyụn̄ umenede eseme ye akam uban̄a mmọ, kûnyụn̄ ukpe mi ubọk: koro ami mendikopke uyo fo.”—Jeremiah 7:16.

Ntak emi Jehovah akakpande Jeremiah ndibọn̄ akam mban̄a nditọ Israel? Nte an̄wan̄ade, ekedi koro mmọ ẹkebiatde Ibet esie in̄wan̄-in̄wan̄. Mmọ ẹma “ẹyịp inọ, ẹwot owo, ẹnyụn̄ ẹsịn efịbe, ẹnyụn̄ ẹtomo Abasi ke nsu, ẹnyụn̄ ẹfọp n̄kpọ ẹnọ Baal, ẹnyụn̄ ẹtiene abasi efen” an̄wan̄wa ye unana edikop bụt. Nte utịp, Jehovah ama asian mme Jew oro ẹkenanade mbuọtidem ete: “Nyonyụn̄ mmen mbufo ke iso mi nduọk, kpasụk nte n̄kọduọkde kpukpru nditọ-ete mbufo, kpa ofụri ubon Ephraim.” Ke akpanikọ, ikpodotke Jeremiah, m̀mê owo en̄wen ekededi, ndibọn̄ akam mben̄e Jehovah okpụhọde ubiereikpe Esie.—Jeremiah 7:9, 15.

Ke n̄kemuyo ye emi, apostle John ama ewet aban̄a nnennen akam oro ẹkpebọn̄de ẹnọ Abasi. Akpa, enye ama ọsọn̄ọ ọnọ mme Christian ete: “Edieke nnyịn iben̄ede n̄kpọ ekededi nte ekemde uduak Esie, Enye ọbiọn̄ utọn̄ ke eben̄e nnyịn.” (1 John 5:14) Ekem, ke se iban̄ade edibọn̄ akam ke ibuot mbon efen, John ama aka iso ete: “Edieke owo okụtde eyenete esie anamde idiọk-n̄kpọ eke mîdaha n̄kpa idi, enye ayanam n̄kpe-ubọk, ndien Abasi ayada uwem ọnọ enye, kpa ọnọ mmọ eke mînamke idiọk-n̄kpọ n̄kpa. Idiọk-n̄kpọ emi adade n̄kpa edi odu; ndọhọke nte owo anam n̄kpe-ubọk aban̄a utọ idiọk-n̄kpọ emi.” (1 John 5:16) Jesus n̄ko ama etịn̄ aban̄a idiọkn̄kpọ emi ‘owo mîdifenke,’ oro edi, idiọkn̄kpọ emi ẹnamde ẹdian edisana spirit.—Matthew 12:31, 32.

 Ndi emi ọwọrọ ete ke kpukpru mbon oro ẹsiode ẹfep ke esop Christian ke ntak edinam idiọkn̄kpọ ye unana edikabade esịt ẹnam mme idiọkn̄kpọ oro ‘ẹdade n̄kpa ẹdi’ ndien ke ntre owo ikpọbọn̄ke akam iban̄a mmọ? Inen̄ekede idi ntre koro ke ndusụk idaha mme utọ idiọkn̄kpọ oro isidịghe mme idiọkn̄kpọ oro ẹdade n̄kpa ẹdi. Ke akpanikọ, ọsọsọn̄ ndifiọk m̀mê mmọ ẹdi. Uwụtn̄kpọ kiet edi Edidem Manasseh eke Judah. Enye ama anam itieuwa ọnọ mme nsunsu abasi, awa nditọ esie, esịn idem ke ubụpekpo, onyụn̄ enịm edisọi mbiet ke temple Jehovah. Ke akpanikọ, Bible ọdọhọ ete ke Manasseh ye mbio obio oro ẹma ẹnam “idiọk ẹkan mme idụt oro Jehovah okosobode ke iso nditọ Israel efep.” Ke kpukpru emi, Jehovah ama amia Manasseh ufen ke ndinam ẹsịn enye ke ebuka ẹda ẹka ntan̄mfep ke Babylon.—2 Ndidem 21:1-9; 2 Chronicles 33:1-11.

Nte mme idiọkn̄kpọ Manasseh, adan̄a edikpon emi mmọ ẹkekponide, ẹkedi mme orụk idiọkn̄kpọ oro ẹdade n̄kpa ẹdi? Nte an̄wan̄ade ikedịghe, koro mbụk oro aka iso etịn̄ aban̄a enye ete: “Ndien ke nnanenyịn esie, enye ekpe Jehovah Abasi esie ubọk, onyụn̄ osụk idem esie eti-eti ke iso Jehovah Abasi mme ete esie, onyụn̄ ọbọn̄ akam ọnọ enye: ndien enye okop uyo esie, onyụn̄ akpan̄ utọn̄ ke eseme esie, ndien ada enye afiak ke Jerusalem ke itie ubọn̄ esie. Ndien Manasseh ọfiọk ete ke edi Jehovah edi Abasi.”—2 Chronicles 33:12, 13.

Ntem, nnyịn ikpenyeneke ndisọsọp nsịm ubiere nte ke anaedi owo anam idiọkn̄kpọ oro adade n̄kpa edi n̄kukụre koro ẹsiode enye ẹfep ke esop. Ekeme ndida ini mbemiso ẹfiọkde se ata idaha esịt owo oro edide. Ke nditịm ntịn̄, ẹsiwak ndidọhọ ke kiet ke otu uduak edisio mfep edi ndinam enyịn atara anamidiọk man enye atua n̄kpọfiọk onyụn̄ akabade esịt.

Sia owo oro mîdụhe aba ke esop, ekeme ndidi mbon oro ẹkperede enye, utọ nte nsan̄a ndọ m̀mê mbonubon ẹdibem iso ẹkụt edikabade esịt ye edu ekededi. Mbon oro ẹkụtde mme utọ ukpụhọde oro ẹkeme ndisịm ubiere nte ke anamidiọk oro ikanamke idiọkn̄kpọ oro adade n̄kpa edi. Ekeme ndinụk mmọ ndibọn̄ akam nte enye akpakam ọbọ odudu oto Ikọ Abasi eke odudu spirit ye nte Jehovah akpakam anam n̄kpọ ye anamidiọk oro nte ekemde ye uduak Esie.—Psalm 44:21; Ecclesiastes 12:14.

Ke adan̄aemi ndusụk owo ẹkemede ndidu ke idaha ndikụt uyarade oro ekemde ndinam ẹnịm nte ke anamidiọk oro akabade esịt, ekeme ndidi emi ididịghe ntre ye ofụri esop. Mmọ ẹkpekop n̄kpaidem, editịmede esịt, idem ẹtuakde ukot ẹduọn̄ọ edieke mmọ ẹkpekopde nte owo ọbọn̄de akam an̄wan̄wa aban̄a anamidiọk oro. Ke ntak emi, mbon oro esịt onụkde ndibọn̄ akam mban̄a anamidiọk oro ẹkpenyene ndinam ntre ke ndịbe kpọt, ẹyakde n̄kpọ efen ekededi oro enyenede ebuana ye n̄kpọ oro ẹsịn mbiowo oro ẹnyenede mbiomo ke esop, ke ubọk.

[Ndise ke page 31]

Ẹma ẹfen ikpọ idiọkn̄kpọ Manasseh ke ini enye okosụhọrede idemesie ke iso Jehovah

[Ebiet Ẹdade Ndise Ẹto ke page 30]

Ẹfiak ẹmịn̄ ẹto Illustrierte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s