“Nnyịn Iyokụt Un̄wana ke Un̄wana Fo”

UN̄WANA edi n̄kpọ oro nnyịn isiwakde ndida mfefere mfefere ibọhọke ini ẹbọde ikan̄, ekịm onyụn̄ ofụkde n̄kann̄kụk nnyịn. Ke inemesịt, ẹkeme ndinen̄ede mberi edem ke “itie unọ un̄wana” nnyịn eke enyọn̄—utịn. Ndien ke ntak un̄wana utịn, nnyịn imekeme ndikụt usụn̄, ndidia udia, ndikot ibifịk, ndinyụn̄ ndu uwem.

Sia un̄wana edide akpan n̄kpọ ọnọ uwem, ikpedịghe n̄kpọ n̄kpaidem inọ nnyịn ndikot ke Genesis nte ke un̄wana ekedidu ke akpa usen edibotn̄kpọ. “Abasi ọdọhọ ete, Yak un̄wana odu: ndien un̄wana odu.” (Genesis 1:3) Iren oro ẹbakde Abasi nte Edidem David ẹdiọn̄ọ kpukpru ini ẹte ke Jehovah edi ebiet emi uwem ye un̄wana ẹtode. David ekewet ete: “Koro obụbe mmọn̄ uwem odude ye afo: nnyịn iyokụt un̄wana ke un̄wana fo.”—Psalm 36:9.

Mme ikọ David ẹnyene se ẹwọrọde ke ata ata usụn̄ ye ke ndamban̄a usụn̄. Encyclopædia Britannica ọdọhọ ete: “Ke akpanikọ, un̄wana anam owo ekeme ndikụt usụn̄.” Ekem enye adian do ete: “Mme ntọt ẹsibe ke enyịn ẹsịm mfre ẹkan nte ẹbede ke ndido ufiọkn̄kpọ en̄wen ekededi.” Sia ata ediwak n̄kpọ oro nnyịn ikpepde ẹkọn̄ọde ke ukeme ukụt usụn̄—emi oyomde un̄wana man anam utom mfọn mfọn—ẹda un̄wana n̄ko ẹtịn̄ ikọ ke ndamban̄a usụn̄ ke N̄wed Abasi.

Ntem, Jesus ama asian mme mbet esie ete: “Ami ndi un̄wana ererimbot; owo eke etienede Mi idisan̄ake ke ekịm, edi eyenyene un̄wana uwem.” (John 8:12) Ndamban̄a un̄wana oro Jesus eketịn̄de aban̄a ekedi etop akpanikọ oro enye ọkọkwọrọde, oro ekekemede ndiyama ke ekikere ye esịt mme andikpan̄ utọn̄ nnọ enye. Ke ẹma ẹkedu ke ekịm eke spirit ke ediwak isua, mme mbet Jesus ke akpatre ẹma ẹkeme ndifiọk uduak Abasi kaban̄a ubonowo ye idotenyịn Obio Ubọn̄. Ke akpanikọ emi ekedi “un̄wana uwem,” sia ifiọk oro ekekemede ndida nsịm nsinsi uwem. Jesus ọkọdọhọ ke akam oro enye ọkọbọn̄de ọnọ Ete esie eke heaven ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Akpakam nnyịn idehede ida un̄wana eke spirit emi mfefere mfefere!