Edu Unyịmesịt Ada Mme Owo Edi Gilead

UFỌKN̄WED Enyọn̄-Ukpeme Ukpep Bible eke Gilead odu ndinọ iren ye iban oro ẹma ẹkeyak idem ẹnọ ukpep kaban̄a utom isụn̄utom. Mmanie ẹdot ndidi Gilead? Mbon oro ẹnyenede edu unyịmesịt. (Psalm 110:3) Ẹma ẹnen̄ede ẹkụt emi ke September 8, 2001, ke ini ọyọhọ otu 111 ẹkekụrede ukpep.

Ndusụk nditọ ufọkn̄wed otu oro ẹma ẹnyenyịme ndikpọn̄ ubon, mme ufan, ye idụt ẹmana mmọ man ẹkenam utom ke ebiet oro udọn̄ okponde akan. Ke ndinam ntre, mmọ ẹkedomo ẹse m̀mê mmimọ imekeme ndinam mme ukpụhọde man idụn̄ ke n̄kann̄kụk oro okpụhọrede esisịt. Ke uwụtn̄kpọ, Richer ye Nathalie ẹma ẹdiomi mbubehe mmọ man ẹwọrọ ẹka Bolivia, Todd ye Michelle ẹma ẹwọrọ ẹka Dominican Republic, ndien David ye Monique ẹma ẹwọrọ ẹka idụt kiet ke Asia ndikasuan eti mbụk Obio Ubọn̄ Abasi. Nditọ ufọkn̄wed eken ẹma ẹnanam utom ke Nicaragua, Ecuador, ye Albania.

Ẹma ẹsịn udọn̄ ẹnọ Christy ndikpep usem Spanish ke akamba ufọkn̄wed, an̄wamde nditịm enye idem mben̄e ndidu isua iba ke Ecuador mbemiso ọdọde ndọ. Mbon eken ẹma ẹbuana ye mme esop ẹsemde usem esenidụt ke idụt emana mmọ. Ke ẹsakde iso ẹse isio isio n̄kpọ-ata, Saul ye Priscilla ẹma ẹwụt edu unyịmesịt ke ndinam utom ọkpọsọn̄ ndifori Ikọmbakara mmọ mbemiso ẹkedide ufọkn̄wed oro.

Urua 20 oro ẹkedade ẹnọ ukpep isụn̄utom ẹma ẹbe usọp usọp. Usen edinam ukụre ukpep ama edisịm, ndien nditọ ufọkn̄wed ẹma ẹdu ye mme ufan ye ubon mmọ, ẹkpan̄de utọn̄ ẹnọ ọniọn̄ ọniọn̄ item ye nsịnudọn̄ ini unyọn̄.

Etieibuot okpokoro edinam oro ekedi Theodore Jaracz, andikụre ukpep ke ọyọhọ otu itiaba eke Ufọkn̄wed Gilead, oro anamde utom idahaemi nte owo Otu Ukara eke Mme Ntiense Jehovah. Ntọn̄ọikọ esie ama owụt ke nte esop, akananam nnyịn ifreke uduak edinọ nditọ ufọkn̄wed ukpep ke Gilead, oro edi ndikwọrọ eti mbụk Obio Ubọn̄ ke ofụri isọn̄. (Mark 13:10) Gilead esitịm nditọ ufọkn̄wed oro ẹdotde idem ndinam utom ukwọrọikọ emi ke udomo oro okponde akan se mmọ ẹkesinamde ke ini edem, ndinyụn̄ nnam enye ke mme ikpehe ererimbot oro ẹnen̄erede ẹyom mme isụn̄utom. Brọda Jaracz ama ọnọ nditọ ufọkn̄wed oro item ete ẹda ukpep oro mmọ ẹbọde ke Gilead ẹnam n̄kpọ nte ọfọnde nte mmọ idahaemi ẹdianade ye mme isụn̄utom oro ẹnamde utom idahaemi ke idụt 19 oro ẹnọde mme andikụre ukpep oro ẹka.

Ekemini Item Ẹnọde Mbon Oro Ẹkụrede Ukpep

Udịm udịm utịn̄ikọ ẹma ẹtiene. William Van De Wall, andibuana ke Kọmiti N̄kọk Itieutom United States, ama etịn̄ ikọ ke ibuotikọ oro “Ifịk Isụn̄utom—Se Ẹdade Ẹdiọn̄ọ Mme Ata Christian.” Enye ama owụk ntịn̄enyịn ke utom ‘edinam mbet,’ oro ẹwetde ke Matthew 28:19, 20, ndien enye ama eteme nditọ ufọkn̄wed oro ete: “Ẹkpebe Jesus, oro akanamde utom isụn̄utom esie ye ifịk ye ifiopesịt.” Man an̄wam mme isụn̄utom ini iso oro ndika iso nnyene ifịk ke utom isụn̄utom, enye ama esịn udọn̄ ọnọ mmọ ete: “Ẹsọn̄ọ ẹyịre ke  eti ndutịm; ẹka iso ke nti edu ukpepn̄kpọ idemowo, ẹsan̄ade ikpat kiet ye ndutịm ukara Abasi; ẹnyụn̄ ẹwụkde ntịn̄enyịn kpukpru ini ke ntak emi mbufo ẹdude ke efakutom mbufo.”

Owo en̄wen ke ndutịm ekedi Guy Pierce, owo Otu Ukara. Enye ama atat ibuotikọ oro “Ẹka Iso Ndifori ‘Ukeme Ukere N̄kpọ Mbufo.’” (Rome 12:1, NW) Enye ama ọnọ otu oro ẹkekụrede ukpep mi eti item, esịnde udọn̄ ọnọ mmọ ndida ukeme ukere n̄kpọ ye ukeme n̄kọkibuot oro Abasi ọnọde mmọ nnam n̄kpọ. Enye ama ọdọhọ ete: “Ẹka iso ndikere ntotụn̄ọ ntotụn̄ọ mban̄a se Jehovah etịn̄de ọnọ mbufo ebe ke Ikọ esie. Emi eyekpeme mbufo.” (Mme N̄ke 2:11) Brọda Pierce ama ọnọ otu oro item n̄ko ete mmọ ẹkûsọn̄ọ ẹyịre ke ekikere idemmọ mbak mmọ ẹdibiọn̄ọ “ukeme ukere n̄kpọ” mmọ. Ke akpanikọ, mme ekemini n̄kpọ editi emi ẹyedi n̄kpọ un̄wam nte mme andikụre ukpep emi ẹnamde utom nte isụn̄utom.

Ekem etieibuot okpokoro ama okot kiet ke otu mme andikpep ke Gilead, Lawrence Bowen, oro eketịn̄de ikọ ke ibuotikọ oro “Ẹbiere Ẹte ke Mmimọ Idifiọkke Baba N̄kpọ Kiet.” Enye ama owụt ete ke ebuana ye utom isụn̄utom esie ke Corinth, apostle Paul ‘ama ebiere ete imọ idifiọkke baba n̄kpọ kiet, ke mîbọhọke Jesus Christ, ye nte ẹkewotde Enye ke eto.’ (1 Corinth 2:2, NW)  Paul ama ọfiọk ete ke akakan odudu ke ekondo, edisana spirit, ọnọ etop oro odude ke ofụri Bible ibetedem: Ediwụt unen itie edikara Jehovah ebe ke Mfri oro ẹken̄wọn̄ọde. (Genesis 3:15, NW) Ẹma ẹsịn udọn̄ ẹnọ nditọ ufọkn̄wed 48 oro ẹkekụrede ukpep nditie nte Paul ye Timothy ndinyụn̄ n̄kụt unen nte mme isụn̄utom, ẹmụmde “nti ikọ” ẹkama.—2 Timothy 1:13.

“Ẹwụt Esịtekọm Ẹban̄a Ifetutom Mbufo, kpa Enọ Abasi” ekedi ibuotikọ akpatre ke otu udịm udịm utịn̄ikọ oro ẹkedade ẹtọn̄ọ. Wallace Liverance, esịn-owo-enyịn̄ ke Ufọkn̄wed Gilead, ama an̄wam mme andikụre ukpep oro ndifiọk nte ke ifetutom edi uyarade ima mfọnido Abasi oro owo mîdotke, idịghe n̄kpọ oro mmọ ẹkenyenede unen ndibọ m̀mê ẹkebọde ke ntak utom mmọ. Ke adade uwụtn̄kpọ apostle Paul, Brọda Liverance ama ọdọhọ ete: “Idịghe utom oro Paul akanamde ke Jehovah akada emek enye nte apostle mme Gentile, man ekpetie nte ke Paul ama enyene unen m̀mê ama odot ndinam utom oro. Edimek oro ikọkọn̄ọke ke ediwak isua ke utom m̀mê mbufiọk oro enye ekenyenede. Ke idaha ekikere owo, ekeme nditie nte okpokowụt eti ibuot ndimek Barnabas. Emi ikọkọn̄ọke ke ọkpọkpọ ukeme; etie nte Apollos ama ekeme nditịn̄ ikọ ọdọnọ akan Paul. Emi ekedi uyarade ima mfọnido Abasi oro owo mîdotke.” (Ephesus 3:7, 8) Brọda Liverance ama esịn udọn̄ ọnọ mme andikụre ukpep oro ete ẹda enọ, m̀mê ifetutom, mmọ ndin̄wam mbon en̄wen ẹkabade ẹdi ufan Abasi ye mme andibọ ‘enọ Abasi emi edide nsinsi uwem ke Christ Jesus Ọbọn̄ nnyịn.’—Rome 6:23.

Ke etienede emi, Mark Noumair, andikpep efen ke Gilead, ama ada usụn̄ ke ufiop ufiop nneme ye ediwak nditọ ufọkn̄wed ke ibuotikọ oro: “Ntịmidem Ada Nti Utịp Edi.” (Mme N̄ke 21:5) Mme ifiọkutom ẹma ẹwụt ẹte ke ini ọkwọrọ ikọ etịmde idem mfọn mfọn ọnọ an̄wautom, akpan akpan ebede ke nditịm esịt esie, enye eyenyene ata udọn̄ ke idem mme owo. Enye idinanake se etịn̄de. Utu ke oro, enye eyetịn̄ onyụn̄ anam n̄kpọ ndin̄wam mmọ ke n̄kan̄ eke spirit. “Emi edi ukpọhọde edidi isụn̄utom oro okụtde unen,” ntre ke Brọda Noumair ọkọdọhọ, ọnọde ọkpọkpọ ifiọkutom oro enye ekenyenede ke ini ekedide isụn̄utom ke Africa.

Utom Isụn̄utom —Ubọkọkọ Oro Ọnọde Uyụhọ

Ralph Walls ye Charles Woody ẹma ẹnam ndụn̄ọde ye ndusụk isụn̄utom oro ẹnyenede mbufiọk, emi n̄ko ẹkedude ke Itie Unọ Ukpep Patterson ndibọ san̄asan̄a ukpep. Ndụn̄ọde emi ama ọsọn̄ọ owụt nte ke edi ima ẹnyenede ẹnọ mme owo esida idatesịt edi ke utom isụn̄utom. Ekedi n̄kpọ nsịnudọn̄ ọnọ nditọ ufọkn̄wed oro ye mbonubon ye mme ufan mmọ oro ẹkedude ke otuowo ndikpan̄ utọn̄ nnọ mme isụn̄utom emi ẹnyenede mbufiọk mi nte mmọ ẹnamde an̄wan̄a ntak emi utom isụn̄utom edide ubọkọkọ oro ọnọde uyụhọ.

John E. Barr, oro edide owo Otu Ukara, ọkọnọ akpan utịn̄ikọ usen oro, emi ibuotikọ ekedide “Ẹkwọ Obufa Ikwọ Ẹnọ Jehovah.” (Isaiah 42:10) Brọda Barr ama ọdọhọ ete ke ikọ oro “obufa ikwọ” odu ke Bible utịm ike usụkkiet. Enye ama obụp ete, “Obufa ikwọ emi aban̄a nso?” Ekem enye ama ọbọrọ ete: “Udọn̄ikọ owụt nte ke ẹkwọ obufa ikwọ ke ntak mbufa n̄kpọ oro ẹtịbede ndiwụt unen itie edikara Jehovah.” Enye ama esịn udọn̄ ọnọ nditọ ufọkn̄wed oro ndika iso ndian uyo ke ndikwọ ikwọ itoro Obio Ubọn̄ Abasi oro enyenede edikan ke ubọk Edidem Messiah, Christ Jesus. Brọda Barr ama etịn̄ ete ke ukpep oro mmọ ẹkebọde ke Gilead ama an̄wam mmọ nditịm mfiọk nsio nsio ikpehe “obufa ikwọ” emi n̄kan nte akanam mmọ ẹfiọkde. “Ufọkn̄wed emi ọsọn̄ọ etịn̄ nte ke oyom mbufo ẹdiana ye nditọete mbufo ‘ẹkwọ’ itoro Jehovah ke ebiet ekededi oro mbufo ẹkade; ẹkọri edu edidianakiet ye mbon en̄wen ke efakutom mbufo kpukpru ini.”

Ke ẹma ẹkenọ nditọ ufọkn̄wed oro n̄weditoro mmọ, anditịn̄ ikọ ke ibuot otu oro ama okot leta owụtde ntotụn̄ọ esịtekọm mmọ kaban̄a ukpep oro mmọ ẹkebọde ke Gilead.

Nte afo emekeme nditat utom oro afo anamde ọnọ Abasi nnyụn̄ nnam enye enyene uforo akan? Edieke edide ntre, nam utom ọkpọsọn̄ nte nditọ ufọkn̄wed oro ẹkụrede ukpep mi ẹkenamde. Emi akan̄wam ndinam mmọ ẹdot ndika an̄wautom isụn̄utom. Akwa idatesịt esidu ke ini owo ọnọde idem unyịme unyịme ke utom Abasi ye inemesịt.—Isaiah 6:8.

[Ekebe ke page 25]

IDAHA OTU

Ibat idụt ẹtode: 10

Ibat idụt ẹnọde ẹka: 19

Ibat nditọ ufọkn̄wed: 48

Isua emana ke ẹbaharede ukem ukem: 33.2

Isua ẹdude ke akpanikọ ke ẹbaharede ukem ukem: 16.8

Isua ẹdude ke utom uyọhọ ini ke ẹbaharede ukem ukem: 12.6

[Ndise ke page 26]

Ọyọhọ Otu 111 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead

Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.