‘Ibọk Enyịn Ndida Nyet Enyịn Fo’

JESUS CHRIST eketeme esop Christian akpa isua ikie ke Laodicea, Asia Minor, ibọk emi.

Jesus ọkọdọhọ ete: ‘Dep ibọk enyịn da yet enyịn fo, man okụt usụn̄.’ Okoyom ẹkọk nnan eke spirit, idịghe ata ata udọn̄ọ enyịn. Edu obio uforo oro mmọ ẹkedụn̄ọde ama akara mme Christian ke Laodicea ndien mmọ ikekereke iban̄a mme ata udọn̄ n̄kpọ eke spirit mmọ.

Ke etịn̄de aban̄a emi nte se inamde mmọ ẹdọn̄ọ nnan, Jesus ọkọdọhọ ete: “Koro ọdọhọde ete, Mmenyene inyene, mmonyụn̄ n̄kọ inyene, nnyụn̄ nnanake n̄kpọ; ndien udiọn̄ọke ete ke idi ata nditaha owo, emi enyenede mbọm, inyụn̄ ibuene, inyụn̄ idọn̄ọ nnan, inyụn̄ inana edisịne-n̄kpọ.” (Sịghisịghi ubọkn̄wed edi eke nnyịn.) Okposụkedi mîkọfiọkke, mme andibuana ke esop oro ẹma ẹyom “ibọk enyịn” oro ẹkekemede ndinyene n̄kukụre ebe ke ndinyịme ukpepn̄kpọ ye item Jesus Christ. Jesus ọkọdọhọ ete: ‘Dep ke ubọk Mi.’—Ediyarade 3:17, 18.

Nte ekedide ye mbon Laodicea, oyom mme ata Christian mfịn ẹkpeme ẹbiọn̄ọ ediyak n̄kann̄kụk oro mmọ ẹdụn̄de oro amade inyene ye unọ idem inemesịt akara mmọ nte mîdotke, eyedi ke unana mmọ ndidiọn̄ọ. Ẹteme ibọk edida nnam enyịn eke spirit an̄wan̄a ke ikọ emi: ‘Dep ibọk enyịn ke ubọk Jesus da yet enyịn fo, man okụt usụn̄.’

Se idotde ẹtịm ẹfiọk edi nte ke ẹnyene ndidedep “ibọk enyịn” emi. Ekọmurua abuana. Ana ẹbiat ini ndikpep nnyụn̄ ntie n̄kere Ikọ Abasi. Andiwet psalm ọsọn̄ọ ọnọ nnyịn ete ke Ikọ emi ‘ayama, an̄wan̄a owo enyịn’ eke spirit.—Psalm 19:8.