Mme Ete Ye Eka—Ẹnọ Se Nditọ Mbufo Ẹyomde!

NDITỌ ẹnen̄ede ẹyom ndausụn̄ ye ima ima ntụnọ ẹto mme ete ye eka mmọ. Ke afan̄ emi, andikpep kiet otode Brazil, Tania Zagury, ọdọhọ ete: “Udọn̄ kpukpru nditọwọn̄ edi ndiyom inemesịt. Oyom ẹnịm mme adan̄a. Mme ete ye eka ẹnyene ndinam emi. Edieke mmọ mînamke, owo idikemeke ndikara nditọ oro.”

Nte ededi, ke ediwak idụt odudu anana-ukpan n̄kaowo oro esịnde udọn̄ ọnọ edinyene ọkpọkpọ ifụre ekeme ndinam edi ọkpọsọn̄ n̄kpọ nditiene item eke enyọn̄ emi. Do, m̀mọ̀n̄ ke mme ete ye eka ẹkeme ndika n̄koyom un̄wam? Mme ete ye eka oro ẹbakde Abasi ẹfiọk ẹte ke nditọ mmimọ ẹdi “udeme Jehovah.” (Psalm 127:3) Ntem, mmọ ẹberi edem ke Ikọ Abasi, kpa Bible, kaban̄a ndausụn̄ ke ndibọk mmọ. Ke uwụtn̄kpọ, Mme N̄ke 13:24 ọdọhọ ete: “Osụk eto esie asua eyen esie: edi ama eyen abak ọtụnọ enye.”

Owo ikpenyeneke ndida nte ke usụn̄ emi Bible adade ikọ oro “eto” etịn̄ ikọ ọwọrọ edimia ufen kpọt; enye ada aban̄a usụn̄ emi ẹnọde edinen̄ede, usụn̄ ekededi oro ẹdade. Ke akpanikọ, ata ediwak ini ikọ ekeme ndidi n̄kukụre se ẹyomde ke ndinen̄ede otụtutọn̄ eyen. Mme N̄ke 29:17 ọdọhọ ete: “Tụnọ eyen fo, ndien enye ọyọnọ fi nduọk-odudu, onyụn̄ adat fi esịt.”

Nditọwọn̄ ẹyom ima ima ntụnọ man ẹduọn̄ọ ndiọi edu. Utọ enyene-iwụk ye ima ima edinen̄ede oro ọnọ uyarade nte ke ete ye eka ẹkere ẹban̄a eyen mmọ. (Mme N̄ke 22:6) Ntre mme ete ye eka, ẹkûkpa mba! Ebede ke nditiene eti item Bible, mbufo ẹyenem Jehovah Abasi esịt, nditọ mbufo ẹyenyụn̄ ẹkpono mbufo.