Mme Mbụme Ẹtode Mme Andikot

Didie ke n̄wanndọ Christian ekeme ndinam edinam akpanikọ nnọ Abasi ye nsụkibuot nnọ ebe esie oro mînịmke ke akpanikọ ẹda ukem ukem edieke ebe esie abuanade ke mme edinam usen nduọkodudu ido ukpono?

Oyoyom ọniọn̄ ye mbufiọk man enye anam oro. Edi enye anam se inende ke ndidomo ndinam mbiomo esie mbiba ẹda ukem ukem. Jesus ama ọnọ item aban̄a ukem idaha oro ete: “Ẹnọ Caesar ndien n̄kpọ eke enyenede Caesar; ẹnyụn̄ ẹnọ Abasi n̄kpọ eke enyenede Abasi.” (Matthew 22:21) Edi akpanikọ, enye eketịn̄ aban̄a mbiomo ẹnyenede ẹnọ ukara, emi ẹkesiande mme Christian ke ukperedem ẹte ẹsụk idem ẹnọ. (Rome 13:1) Edi, ẹkeme ndida item esie ndibuan ye n̄wan ndinam mbiomo oro enye enyenede ọnọ Abasi ye nsụkibuot oro N̄wed Abasi ọdọhọde enye osụk ọnọ ebe esie ẹda ukem ukem, idem ọkpọkọm ebe esie inịmke ke akpanikọ.

Idụhe owo ekededi oro emehede ye Bible oro akpafan̄ade ete ke enye isọn̄ọke itịn̄ ite ke akpa mbiomo Christian edi kaban̄a Ata Ọkpọsọn̄ Abasi, ndinam akpanikọ nnọ enye kpukpru ini. (Utom 5:29) Kpa ye oro, ke ediwak idaha ata andituak ibuot ekeme ndinam eben̄e akama-itie oro mînịmke ke akpanikọ ke adan̄aemi mîbuanake ke edibiat mme n̄kokon̄ ibet Abasi.

Nnyịn imokụt enyene-ufọn uwụtn̄kpọ ukpepn̄kpọ nditọ Hebrew ita, nte ẹbụkde ke Daniel ibuot 3. Andikara mmọ, Nebuchadnezzar, ama owụk ewụhọ ete mmọ ye mbon en̄wen ẹwọrọ ẹdi unaisọn̄ Dura. Ke ẹfiọkde ẹte ke ẹdiomi nsunsu utuakibuot, eyedi nditọ Hebrew ita oro ẹkpekemek nditre ndiwọrọ n̄ka do. Eyedi Daniel ama ekeme ndifep, edi owo ita emi ikekemeke. * Ntre mmọ ẹma ẹsụk ibuot ẹkesịm ediwọrọ n̄ka do, edi mmọ ikabuanake ke idiọk edinam ekededi.—Daniel 3:1-18.

Ukem ntre, ke mme ini nduọkodudu, ebe oro mînịmke ke akpanikọ ekeme ndidọhọ n̄wan esie oro edide Christian anam n̄kpọ oro n̄wan mîkpamaha ndinam. Kere ban̄a ndusụk uwụtn̄kpọ: Enye ọdọhọ n̄wan esie etem ndusụk orụk udia ke usen emi enye ye mbon en̄wen ẹdidiade usọrọ usen nduọkodudu. Mîdịghe enye oyom ubon oro (esịnede n̄wan esie) ẹka edem iman ke usen oro ndikadia udia m̀mê ikpîkpu edika n̄kese mmọ. Mîdịghe idem mbemiso usen nduọkodudu oro, enye ekeme ndidọhọ ete ke adan̄aemi n̄wan imọ akade ndidep mme n̄kpọ, enye enyene ndidep ndusụk n̄kpọ nsọk imọ—san̄asan̄a udia usen nduọkodudu, mme n̄kpọ oro ẹdinọde nte enọ, m̀mê mme babru ubọp ẹnọ ye mme kad ekọm ndida ndian ye mme enọ imọ.

Ini kiet efen, n̄wanndọ Christian oro ekpenyene ndibiere nditre ndibuana ke mme edinam nsunsu ido ukpono, edi nso kaban̄a mme utọ utom oro? Ebe edi ibuot ufọk, ndien Ikọ Abasi ọdọhọ ete: “Iban, ẹsụk idem ẹnọ mme ebe mbufo, nte odotde ke Ọbọn̄.” (Colossae 3:18) Ke mme idaha emi, nte enye ekeme ndiwụt nsụkibuot n̄wanndọ ke adan̄aemi anamde akpanikọ ọnọ Abasi? Ana enye ebiere nte enye edinamde nsụkibuot nnọ ebe esie ye nsụkibuot nnọ Jehovah oro edide akpan n̄kpọ akan ẹda ukem ukem.

Ke mme idaha efen, ebe esie ekeme ndidọhọ enye etem ndusụk orụk udia, edide koro enye esinen̄erede ama udia oro m̀mê koro enye esidiade udia oro ke akpan ini. N̄wanndọ oyoyom ndiwụt ebe esie ima nnyụn̄ nnyịme itieibuot esie. Nte enye ekeme ndinam ntre idem ọkpọkọm ebe esie anam eben̄e oro kaban̄a usọrọ usen nduọkodudu? Eyedi ndusụk ibanndọ Christian ẹkeme ndinam ntre ye eti ubieresịt, ẹdade enye n̄kukụre nte edinam editem udia eke usen ke usen. Ke akpanikọ, anam-akpanikọ Christian ndomokiet ikpadaha emi ikabuan ye edinam usen nduọkodudu ekededi, idem ọkpọkọm ebe esie ananam ntre. Kpasụk ntre, ebe esie ekeme ndiyom enye asan̄a ye imọ ekese mme iman imọ ke nsio nsio ini ke ọfiọn̄ m̀mê isua kiet kiet. Nte enye ekeme ndinam oro edieke edide ke usen nduọkodudu? Mîdịghe nte enye nte ido edide eyenyịme ndidep mme n̄kpọ oro ebe esie oyomde, ye unana edikere mban̄a se enye oyomde ndida mme n̄kpọ oro imọ idepde isọk enye nnam?

Nte ededi, n̄wanndọ Christian ekpenyene ndikere mban̄a mbon en̄wen—nte emi editụkde mmọ. (Philippi 2:4) Enye akpama ndifep ndinam mme owo ẹkere ke imọ ibuana ke usen nduọkodudu, kpa nte ekemede ndidi nditọ Hebrew ita oro ikoyomke mbon efen ẹkụt mmimọ nte inamde isan̄ ika unaisọn̄ Dura. Ntre enye ekeme ndida mbufiọk ndomo ndikọk ibuot ye ebe esie man ọfiọk m̀mê enye, ke ekerede aban̄a ntụk imọ, ekeme ndinam ndusụk n̄kpọ oro ẹnyenede ebuana ye usen nduọkodudu ke idemesie man an̄wam n̄wan oro amade onyụn̄ okponode enye. Ebe ekeme ndikụt eti ibuot oro odude ke nditre ndisịn idem ke idaha ekemede ndida esuene ndi edieke n̄wan esie mînyịmeke ndibuana ke mme edinam nsunsu ido ukpono. Ih, edibem iso nneme n̄kpọ oro sụn̄sụn̄ ekeme ndida nsịm edikọk mfịna oro emem emem.—Mme N̄ke 22:3.

Ke akpatre, ana anam-akpanikọ Christian odụn̄ọde mme n̄kpọ oro ẹbuanade ndien ekem ebiere se enye akpanamde. Nsụkibuot nnọ Abasi enyene ndidi ebeiso, nte ekedide ọnọ nditọ Hebrew ita. (1 Corinth 10:31) Edi ye oro ke ekikere, Christian kiet kiet enyene ndibiere se enye ekemede ndinam ke ini owo oro akamade itie ke ubon m̀mê ke obio ọdọhọde enye anam n̄kpọ oro edinamde enye akan̄ mbuọtidem.

[Ikọ idakisọn̄]