Henry VIII ye Bible
Henry VIII ye Bible
KE N̄WED esie oro History of the English-Speaking Peoples (Eboho 2), Winston Churchill ekewet ete: “N̄ka Unam Ukpụhọde ama ada akwa ukpụhọde edi ke n̄kan̄ ido ukpono. Idahaemi Bible enyene obufa ye ntatara odudu. Mbon eyo oko ẹkeda ke edi n̄kpọndịk mbon oro mîfiọkke n̄wed ndinyene Edisana Uwetn̄kpọ ye nte ke mme oku kpọt ẹkpenyene ndikot enye.”
Mbụk oro aka iso ete: “Ofụri Bible oro ẹmịn̄de-mịn̄, oro Tyndal ye Coverdale ẹkekabarede ẹsịn ke Ikọmbakara, ama ọwọrọ edi ke akpa ini ke utịt utịt ini idọk eke 1535, ndien idahaemi ẹmịn̄ ediwak nsiondi. Ukara ama ọdọhọ mme ọkwọrọ ederi ete ẹsịn udọn̄ ẹnọ edikot Bible.” Ke ediwak isua ikie oro owo mîkenyeneke ifiọk Bible ẹma ẹkebe, mbon England ẹma ẹdifiọk Bible, edi emi ekedi ye un̄wam ukara Henry VIII utu ke ndidi ye un̄wam ufọkabasi. *
“Nte n̄kaiso usụn̄ ndibiọn̄ọ ido eyo oko, Ukara ama ọnọ unyịme ke Paris ete ẹmịn̄ ediwak Bible Ikọmbakara, oro ẹyede ẹkan nsiondi ekededi oro ẹkebemde mmọ iso, ndien ke September 1538 Ukara ama ọnọ uyo ete kpukpru ufọkabasi ke idụt oro ẹdep ata akamba eboho Bible ke Ikọmbakara ẹnịm ke ufọkabasi kiet kiet, ke ebiet edide mmemmem ọnọ mbon ufọkabasi ndikụbọde n̄kot. Ẹma ẹbon idem itiokiet ke ufọkabasi St Paul, ke Obio London, ndien akwa udịmowo ẹsibụn̄ọ ẹdụk ufọkabasi oro kpukpru usen ndikot mmọ, akpan akpan, nte ẹtịn̄de ẹnọ nnyịn, ke ini mmọ ẹkụtde owo ekededi oro ekemede ndikot n̄wed uyo ọwọrọ.”
Ke mfụhọ, ke ediwak idụt, ediwak owo idaha ifet emi mmọ ẹnyenede ikot Bible kpukpru ini. Emi enen̄ede edi n̄kpọ ndikere mban̄a, sia Bible kpọt ke ‘ẹda odudu Spirit Abasi ẹwet, onyụn̄ edide se ifọnde ndida n̄kpep owo n̄kpọ nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido.’—2 Timothy 3:16.
[Ikọ idakisọn̄]
^ ikp. 3 Edidem Henry VIII akakara England ọtọn̄ọde ke 1509 esịm 1547.
[Ebiet Ẹdade Ndise Ẹto ke page 32]
Henry VIII: Mbuwed odude ke Royal Gallery ke Kensington, oro ẹdade ẹto n̄wed oro The History of Protestantism (Eboho I)