Ẹka Iso Ndiwụt Eti Ido
Ẹka Iso Ndiwụt Eti Ido
“Mfri eke otode un̄wana esịne ke kpukpru nti ido ye edinen ido ye akpanikọ.”—EPHESUS 5:9.
1. Didie ke ediwak miliọn owo ẹwụt idahaemi nte ke mmimọ imenyịme ye Psalm 31:19?
MFỌNN̄KAN n̄kpọ oro owo ekededi ekemede ndinam edi ndinọ Jehovah ubọn̄. Mfịn, ediwak miliọn owo ke ẹnam emi ebe ke nditoro Abasi kaban̄a eti ido esie. Nte Mme Ntiense Jehovah oro ẹnamde akpanikọ, nnyịn ke ofụri esịt imenyịme ye andiwet psalm oro ọkọkwọde ete: “Ufọn [“eti ido,” NW] fo okpon didie emi afo enịmde ọnọ mmọ eke ẹbakde fi”!—Psalm 31:19.
2, 3. Nso ikeme nditịbe edieke utom edinam mbet nnyịn mîsan̄ake ye eti edu uwem?
2 Ukpono ukpono mbak oro inyenede inọ Jehovah onụk nnyịn nditoro enye kaban̄a eti ido esie. Enye n̄ko onụk nnyịn ‘ndikọm Jehovah, nditoro enye, ndinyụn̄ mbụk ubom ubọn̄ esie.’ (Psalm 145:10-13) Ntak edi oro nnyịn ibuanade ifịk ifịk ke utom edikwọrọ Obio Ubọn̄ ye edinam mbet. (Matthew 24:14; 28:19, 20) Nte ededi, ana utom ukwọrọikọ nnyịn asan̄a ye eti edu uwem. Mîdịghe ntre, nnyịn imekeme ndida esuene nsọk edisana enyịn̄ Jehovah.
3 Ediwak owo ẹdọhọ ke mmimọ ituak ibuot inọ Abasi, edi edu uwem mmọ isan̄ake ikekem ye mme idaha oro ẹnịmde ke Ikọ esie eke odudu spirit. Kaban̄a ndusụk mbon oro mîkodụhe uwem ikekem ye nti ido oro mmọ ẹkedọhọde nte inamde, apostle Paul ama ewet ete: “Afo emi ekpepde owo efen, nte ukpepke idem fo? afo emi ọkwọrọde ete owo okûyịp inọ, nte emeyịp ke idem fo? afo emi ọdọhọde ete owo okûsịn efịbe, nte emesịn efịbe? Koro ẹwet ẹte, Oto mbufo ke ẹsụn̄i enyịn̄ Abasi ke otu mme Gentile.”—Rome 2:21, 22, 24.
4. Eti edu uwem nnyịn esinyene nso utịp?
4 Utu ke ndida esuene nsọk enyịn̄ Jehovah, nnyịn imesidomo ndida eti edu uwem nnyịn nnọ enyịn̄ esie ubọn̄. Emi esinyene eti odudu ke idem mbon oro mîdụhe ke esop Christian. N̄kpọ kiet edi-o, enye esin̄wam nnyịn ndikịbi mme andibiọn̄ọ nnyịn inua. (1 Peter 2:15) Ke edide akpan n̄kpọ akan, eti edu uwem nnyịn esidụri mme owo edi esop Jehovah, eberede usụn̄ ọnọ mmọ ndinọ enye ubọn̄ ndinyụn̄ nnyene nsinsi uwem.—Utom 13:48.
5. Mme mbụme ewe ke nnyịn ikpekere iban̄a idahaemi?
5 Sia nnyịn idide mme anana-mfọnmma owo, didie ke nnyịn ikeme ndifep edu oro ekemede ndida esuene nsọk Jehovah onyụn̄ ekemede ndinam mbon oro ẹyomde akpanikọ ẹtuak ukot ẹduọn̄ọ? Ke akpanikọ, didie ke nnyịn ikeme ndikụt unen ke ndiwụt eti ido?
Mfri Eke Otode Un̄wana
6. Nso idi ndusụk “utom ekịm eke mîn̄wụmke mfri,” edi nso mfri ke mme Christian ẹkpen̄wụm?
6 Nte mme Christian oro ẹma ẹkeyak idem ẹnọ, nnyịn imesima n̄kpọ oro ekemede ndin̄wam nnyịn ifep “mme utom ekịm eke mîn̄wụmke mfri.” Mmọ emi ẹsịne mme utọ utom oro mînọhọ Abasi ukpono nte usu nsu, uyịpinọ, ikọ isụn̄i, ndiọi ikọ ẹban̄ade idan̄, oburobụt ido, ikọ idiọk mbubru, ye ukpammịn. (Ephesus 4:25, 27, 28, 31; 5:3, 4, 11, 12, 18) Utu ke ndisịn idem ke mme utọ utom oro, nnyịn ‘ika iso ndisan̄a nte nditọ un̄wana.’ Apostle Paul ọdọhọ ete ke “mfri eke otode un̄wana esịne ke kpukpru nti ido ye edinen ido ye akpanikọ.” (Ephesus 5:8, 9) Ntre ebede ke ndisan̄a ke un̄wana ke nnyịn ikeme ndika iso n̄wụt eti ido. Edi nso utọ un̄wana ke emi edi?
7. Nso ke ana nnyịn inam man ika iso ndiwụt eti ido?
7 Kpa ye unana mfọnmma nnyịn, nnyịn imekeme ndiwụt eti ido edieke nnyịn isan̄ade ke un̄wana eke spirit. Andiwet psalm ama ọkwọ ete: “Ikọ fo edi utuenikan̄ ukot mi, ye un̄wana usụn̄ mi.” (Psalm 119:105) Edieke nnyịn iyomde ndika iso nda “kpukpru nti ido” n̄wụt “mfri eke otode un̄wana,” ana nnyịn ibọ ufọn kpukpru ini ito un̄wana eke spirit oro odude ke Ikọ Abasi, oro ẹsidụn̄ọrede ye ntịn̄enyịn ke mme n̄wed Christian, ẹsinyụn̄ ẹnemede kpukpru ini ke mme mbono esop nnyịn kaban̄a utuakibuot. (Luke 12:42; Rome 15:4; Mme Hebrew 10:24, 25) Oyom nnyịn n̄ko inọ uwụtn̄kpọ ye mme ukpepn̄kpọ Jesus Christ, kpa “un̄wana ererimbot” ye “uyama ubọn̄ [Jehovah],” akpan ntịn̄enyịn.—John 8:12; Mme Hebrew 1:1-3.
Mbun̄wụm Spirit
8. Ntak emi nnyịn ikemede ndiwụt eti ido?
8 Nte eyịghe mîdụhe, un̄wana eke spirit an̄wam nnyịn ndiwụt eti ido. Ke adianade do, nnyịn ikeme ndiwụt edu emi koro edisana spirit, m̀mê anamutom odudu Abasi, adade nnyịn usụn̄. Eti ido edi ubak “mbun̄wụm spirit.” (Galatia 5:22, 23) Edieke nnyịn isụkde idem inọ ndausụn̄ edisana spirit Jehovah, enye ayanam nnyịn ision̄o utịbe utịbe mbun̄wụm esie oro edide eti ido.
9. Didie ke nnyịn ikeme ndinam n̄kpọ ke n̄kemuyo ye ikọ Jesus oro ẹwetde ke Luke 11:9-13?
9 Ọkpọsọn̄ udọn̄ ndinem Jehovah esịt ebe ke ndision̄o mbun̄wụm spirit edide eti ido ekpenyene ndinụk nnyịn ndinam n̄kpọ ke n̄kemuyo ye mme ikọ Jesus emi: “Ẹben̄e, ndien ẹyenọ mbufo; ẹyom, ndien mbufo ẹyekụt; ẹtuak, ndien ẹyesio usụn̄ ẹnọ mbufo. Koro kpukpru owo eke ẹben̄ede ẹbọde; owo eke oyomde okụtde; ẹdinyụn̄ ẹsiode usụn̄ ẹnọ owo eke atuakde. Ewe ete odu ke otu mbufo eke edinọde eyen itiat, ke ini eyen eben̄ede enye uyo; m̀mê edinọde eyen urụkikọt ke ibuot iyak ke ini eyen eben̄ede enye iyak; m̀mê edinọde eyen ikpeyen, ke ini eyen eben̄ede enye nsen-unen? Mmọdo edieke mbufo emi ẹdiọkde ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak Edisana Spirit ọnọ mmọ eke ẹben̄ede Enye?” (Luke 11:9-13) Ẹyak nnyịn itiene item Jesus ebe ke ndibọn̄ akam mben̄e spirit Jehovah man ika iso ndision̄o mbun̄wụm esie edide eti ido.
“Nam Se Ifọnde”
10. Mme ikpehe eti ido Jehovah ewe ke ẹsiak ke Exodus 34:6, 7?
10 Ye un̄wana eke spirit emi otode Ikọ Abasi ye un̄wam edisana spirit Abasi, nnyịn imekeme ‘ndinam se ifọnde.’ (Rome 13:3) Ebede ke ukpepn̄kpọ Bible ofụri ini, nnyịn imekpep ekese iban̄a nte nnyịn ikemede ndikpebe eti ido Jehovah. Ibuotikọ oro ekebemde iso ama eneme mme ikpehe eti ido Abasi oro ẹsiakde ke se ẹketan̄ade ẹnọ Moses, oro ẹwetde ke Exodus 34:6, 7, emi nnyịn ikotde ite: “Jehovah, Jehovah, Abasi mbọm, ye mfọn, ye anyan ime, awak [ima mfọnido, NW] ye akpanikọ, enịm [ima mfọnido, NW] ọnọ ediwak tọsịn, efen mme ukwan̄-n̄kpọ, ye ndudue, ye idiọk ido, edi iyakke mbon-isop ẹbọhọ.” Editịm ndụn̄ọde mme ikpehe eti ido Jehovah emi ayan̄wam nnyịn ‘ndinam se ifọnde.’
11. Nnyịn ndifiọk nte ke Jehovah esiwụt mbọm ye mfọnido okpotụk nnyịn didie?
11 Se Abasi akatan̄ade emi anam nnyịn idu ke edidemede iban̄a ufọn edikpebe Jehovah ebe ke ndiwụt mbọm ye mfọnido. Jesus ọkọdọhọ ete: “Ọfọfọn ọnọ mmọ eke ẹtuade owo mbọm: koro ẹyetua mmọ mbọm.” (Matthew 5:7; Luke 6:36) Sia ifiọkde ite ke Jehovah ọfọn ido, onụk nnyịn ndifọn ido nnyụn̄ ntie ufan ufan ke nte nnyịn inamde n̄kpọ ye mbon en̄wen, esịnede mbon oro nnyịn ikwọrọde ikọ inọ. Emi odu ke n̄kemuyo ye item Paul emi: “Ẹyak nneme mbufo enyene inem ke esịt kpukpru ini, nte ẹsịnde inụn̄ ke esịt, kpan̄ mbufo ẹdiọn̄ọ nte mbufo ẹkpemende ikọ ẹnọ kpukpru owo ibọrọ.”—Colossae 4:6.
12. (a) Sia Abasi enyenede anyanime, didie ke nnyịn ikpanam n̄kpọ ye mbon en̄wen? (b) Ima mfọnido Jehovah onụk nnyịn ndinam nso?
12 Sia Abasi enyenede anyan ime, udọn̄ nnyịn ‘ndinam se ifọnde’ onụk nnyịn ndiyọ n̄kpri ndudue mme ekemmọ andinịm ke akpanikọ nnyụn̄ n̄wụk ntịn̄enyịn ke nti edu mmọ. (Matthew 7:5; James 1:19) Ima mfọnido Jehovah onụk nnyịn ndiwụt ima akpanikọ, idem ke idak mme idaha oro ẹnen̄erede ẹtie idomo idomo. Ẹnen̄ede ẹyom emi.—Mme N̄ke 19:22.
13. Didie ke nnyịn ikpanam n̄kpọ ndiwụt nte ke Jehovah ‘awak akpanikọ’?
13 Sia Ete nnyịn eke heaven ‘awakde akpanikọ,’ nnyịn iyom ‘ndida ikọ akpanikọ n̄wụt nte ke nnyịn idi mme asan̄autom esie.’ (2 Corinth 6:3-7) “Edeme nsu” ye “owo eke oyokde nyok, nte ntiense nsu,” ẹdu ke otu n̄kpọ itiaba oro Jehovah esede ke mbubiam. (Mme N̄ke 6:16-19) Ntre udọn̄ nnyịn ndinem Abasi esịt onụk nnyịn ‘ndiduọk nsu nnyụn̄ ntịn̄ akpanikọ.’ (Ephesus 4:25) Akpakam nnyịn idehede ikpu ndiwụt eti ido ke akpan usụn̄ emi.
14. Ntak emi nnyịn ikpefende inọ owo?
14 Se Abasi akatan̄ade ọnọ Moses ekpenyene n̄ko ndinụk nnyịn ndifen nnọ, koro Jehovah esidu ke mben̄eidem ndifen nnọ. (Matthew 6:14, 15) Edi akpanikọ, Jehovah esimia mme anamidiọk oro mîkabakede esịt ufen. Ke ntre, ana nnyịn isọn̄ọ imụm mme idaha eti ido esie ikama ke ini edide edisịm edikpeme edisana idaha eke esop.—Leviticus 5:1; 1 Corinth 5:11, 12; 1 Timothy 5:22.
“Ẹtịn̄ Enyịn Ẹkpeme”
15, 16. Didie ke item Paul oro ẹwetde ke Ephesus 5:15-19 ekeme ndin̄wam nnyịn ndika iso nnam se ifọnde?
15 Man ibịne usụn̄ uwem eti ido kpa ye idiọkn̄kpọ oro ẹkande nnyịn ẹkụk, oyom nnyịn iyọhọ ye spirit Abasi inyụn̄ ikpeme nte nnyịn isan̄ade. Mmọdo, Paul ama eteme mme Christian ke Ephesus ete: “Ẹtịn̄ enyịn ẹkpeme nte ẹsan̄ade: ẹkûsan̄a nte ndisịme, edi ẹsan̄a nte mbon eti ibuot. Ẹdedep ifet, koro mme usen ẹdiọkde. Mmọdo ẹkûdi mme ọkọi, edi ẹtịm ẹfiọk se Ọbọn̄ amade. Ẹkûnyụn̄ ẹkpa mmịn; oro ọwọrọ etịme-etịme ido: edi ẹyọhọ ye spirit. Ẹda psalm ye hymn ye ikwọ spirit ẹneme nneme ye kiet eken, ẹkwọ ẹnyụn̄ ẹnam edinem uyom ke esịt mbufo ẹnọ Ọbọn̄.” (Ephesus 5:15-19) Item emi etịm odot ye nnyịn ke idiọk ukperedem ini emi.—2 Timothy 3:1.
16 Edieke anade nnyịn ika iso inam se ifọnde, ana nnyịn itịn̄ enyịn ikpeme nte ke nnyịn imasan̄a nte mbon oro ẹwụtde eti ibuot emi otode Abasi. (James 3:17) Ana nnyịn ifep ikpọ idiọkn̄kpọ ndien ana iyọhọ ye edisana spirit, iyakde enye ada nnyịn usụn̄. (Galatia 5:19-25) Ebede ke ndida item eke spirit oro ẹsinọde ke mme mbono esop Christian ye ke n̄kpri ye ikpọ mbono nsịn ke edinam, nnyịn imekeme ndika iso nnam se ifọnde. Mme ikọ oro Paul ekewetde ọnọ ẹsọk mbon Ephesus ẹkeme n̄ko nditi nnyịn nte ke ata ediwak mboho utuakibuot nnyịn, nnyịn imesibọ ufọn ito edikwọ “ikwọ spirit”—ediwak ke otu mmọ ẹkọn̄ọde ke mme edu eke spirit, utọ nte eti ido—ke ofụri esịt.
17. Edieke mme idaha mmọ mîyakke mmọ ẹdụk mbono esop kpukpru ini, nso ke mme Christian oro ẹdọn̄ọde n̄kpa n̄kpa ẹkpetịm ẹnịm ke akpanikọ?
17 Nso kaban̄a mme ekemmọ andinịm ke akpanikọ oro mîkemeke ndidụk mme mbono esop Christian kpukpru ini ke ntak ẹdọn̄ọde n̄kpa n̄kpa? Mmọ ẹkeme ndikop mfụhọ koro mmọ mîkemeke ndibuana ye nditọete mmọ eke spirit kpukpru ini ke ndituak ibuot nnọ Jehovah. Edi mmọ ẹkeme nditịm nnịm ke akpanikọ nte ke Jehovah ọfiọk idaha mmimọ, nte ke enye ayanam mmimọ ika iso idu ke un̄wana, ọyọnọ mmimọ edisana spirit esie, oyonyụn̄ an̄wam mmimọ ndika iso nnam se ifọnde.—Isaiah 57:15.
18. Nso idin̄wam nnyịn ndibịne usụn̄ uwem eti ido?
18 Ndibịne usụn̄ uwem eti ido oyom ete nnyịn ikpeme nsan̄a oro idụkde inyụn̄ iwọn̄ọde ikpọn̄ mbon oro ‘ẹsuade se ifọnde.’ (2 Timothy 3:2-5; 1 Corinth 15:33) Ndida utọ item oro nsịn ke edinam an̄wam nnyịn ndifep ‘ndiyat Edisana Spirit Abasi esịt’ ebe ke ndinam n̄kpọ mbiọn̄ọ ndausụn̄ esie. (Ephesus 4:30) Akan oro, ẹn̄wam nnyịn ndinam se ifọnde edieke nnyịn ikọride n̄kpet n̄kpet itie ebuana ye mbon oro uwem mmọ ọnọde uyarade nte ke mmọ ẹma se ifọnde ẹnyụn̄ ẹdi se edisana spirit Jehovah adade usụn̄.—Amos 5:15; Rome 8:14; Galatia 5:18.
Eti Ido Ada Nti Utịp Edi
19-21. Bụk mme ifiọkutom oro ẹwụtde utịp ediwụt eti ido.
19 Ndisan̄a ke un̄wana eke spirit, ndinyịme ndausụn̄ spirit Abasi, ndinyụn̄ n̄kpeme nte nnyịn isan̄ade ẹyen̄wam nnyịn ndifep se idiọkde ndinyụn̄ ‘nnam se ifọnde.’ Ke n̄kan̄ eken, emi ekeme ndinyene nti utịp. Kere ban̄a se iketịbede inọ Zongezile, kiet ke otu Mme Ntiense Jehovah ke South Africa. Ke usụn̄ nte enye akakade ufọkn̄wed usenubọk kiet, enye ama odụn̄ọde ibat ekpri okụk oro enye ekenyenede ke itie unịm okụk. Babru oro masịn udian ibatokụk ekemịn̄de ke ndudue ama owụt ke okụk esie ada R42,000 ($6,000, U.S.) awak akan se enye ekesịnde. Ekpeme itie unịm okụk oro ye mbon en̄wen ẹma ẹkpak enye ẹte osio okụk oro ekenịm ọnọ idemesie ke itie unịm okụk efen. Sụk ebe ye n̄wan ẹdide Ntiense oro enye okodụn̄de kiet ẹketoro enye ke ndiketre ndisio okụk oro ndomokiet.
20 Ke usen utom oro eketienede, Zongezile ama ọtọt itie unịm okụk aban̄a ndudue oro. Ẹma ẹdikụt ẹte ke enye ekenyene nọmba n̄wedokụk oro ekebietde eke anam-mbubehe edide imọ owo oro ke ndudue ekedide edisịn okụk ke nọmba oro mîkedịghe esie. Ke okopde n̄kpaidem nte Zongezile mîkabiatke okụk emi ndomokiet, anam-mbubehe oro ama obụp ete: “Afo aka ewe ido ukpono?” Zongezile ama anam an̄wan̄a ete ke imọ idi kiet ke otu Mme Ntiense Jehovah. Ikpọ owo itie unịm okụk oro ẹma ẹnen̄ede ẹtoro enye, ẹdọhọde ẹte: “Ọdọn̄ nnyịn nte kpukpru owo ẹkpenamde akpanikọ nte Mme Ntiense Jehovah.” Ke akpanikọ, edinam akpanikọ ye eti ido ẹkeme ndinam mbon en̄wen ẹtoro Jehovah.—Mme Hebrew 13:18, NW.
21 Mme edinam eti ido inyeneke ndidi n̄wọrọnda man ẹnyene nti utịp. Ke ndinam an̄wan̄a: Ekpri Ntiense oro anamde utom nte ọkwọrọikọ uyọhọ ini ke kiet ke otu isuo Samoa ekenyene ndika ufọkibọk n̄kann̄kụk. Mme owo ke ẹkebet ndikụt abiaibọk, ndien Ntiense oro ama okụt ete ke akanian̄wan oro akadade adiana imọ ama ọdọn̄ọ idiọk idiọk. Enye ama anam ndutịm man n̄wan emi ada itie esie man ẹkeme ndisọsọp nnọ enye ntịn̄enyịn. Ke ukperedem, Ntiense emi ama osobo ye akanian̄wan emi ke urua. Enye ama eti Ntiense emi ye eti ido esie ke ufọkibọk. Enye ama ọdọhọ ete: “Ke emi mmọfiọk nte ke Mme Ntiense Jehovah ẹnen̄ede ẹma mbọhọidụn̄ mmọ.” Ke adan̄aemi enye mîkesikpan̄ke utọn̄ inọ etop Obio Ubọn̄ ke mbemiso, eti ido oro Ntiense oro okowụtde enye ama enyene eti utịp. Enye ama enyịme ukpepn̄kpọ Bible onyụn̄ ọtọn̄ọ ndikpep ifiọk Ikọ Abasi.
22. Nso idi ata akpan usụn̄ kiet ‘ndinam se ifọnde’?
22 Eyedi afo emekeme ndibụk mme ifiọkutom oro ẹwụtde ufọn ediwụt eti ido. Ata akpan usụn̄ kiet ‘ndinam se ifọnde’ edi ndibuana kpukpru ini ke nditan̄a eti mbụk Obio Ubọn̄ Abasi. (Matthew 24:14) Nnyịn ikpakam ika iso ndibuana ifịk ifịk ke ọsọn̄urua utom emi, ifiọkde ite ke emi edi usụn̄ kiet ndinam se ifọnde, akpan akpan ye mbon oro ẹnamde n̄kpọ nte ọfọnde. Ke edide akpan n̄kpọ akan, utom ukwọrọikọ ye eti edu uwem nnyịn ẹnọ Jehovah, ata ntọn̄ọ eti ido, ubọn̄.—Matthew 19:16, 17.
Ẹka Iso ‘Ndifọn Ido’
23. Ntak emi utom ukwọrọikọ Christian edide eti utom?
23 Nte eyịghe mîdụhe, utom ukwọrọikọ nnyịn edi eti utom. Enye ekeme ndisụn̄ọ ke edinyan̄a nnyịn ye mbon oro ẹkpan̄de utọn̄ ẹnọ etop Bible ndien ke ntem ẹsan̄ade ke usụn̄ adade esịm nsinsi uwem. (Matthew 7:13, 14; 1 Timothy 4:16) Do, ke ini nnyịn isakde iso ise edinam ubiere, eyedi udọn̄ ndinam se ifọnde ayanam nnyịn ibụp idem nnyịn: ‘Didie ke ubiere emi editụk utom edikwọrọ Obio Ubọn̄? Nte se ami n̄kerede ndinam enen̄ede ọfọn? Nte enye ayanam mi n̄n̄wam mbon en̄wen ẹnyịme “nsinsi gospel” ẹnyụn̄ ẹdinyene n̄kpet n̄kpet itie ebuana ye Jehovah Abasi?’ (Ediyarade 14:6) Akamba inemesịt edito edinam ubiere oro esịnde udọn̄ ọnọ mme ufọn n̄kpọ Obio Ubọn̄.—Matthew 6:33; Utom 20:35.
24, 25. Nso idi ndusụk usụn̄ ndinam se ifọnde ke esop, ndien nso ke nnyịn ikeme nditịm nnịm ke akpanikọ edieke nnyịn ikade iso ndiwụt eti ido?
24 Ẹyak nnyịn ikûdede ida nti utịp eti ido ke ekpri n̄kpọ. Nnyịn imekeme ndika iso n̄wụt edu emi ebe ke ndinọ esop Christian ibetedem ye ke ndinam se ikemede ndise mban̄a mme udọn̄ ye mfọnọn̄kpọ esie. Ke akpanikọ nnyịn inam se ifọnde ke ini nnyịn idụkde inyụn̄ itienede ibuana ke mme mbono esop Christian kpukpru ini. Nnyịn ndidu do esidi n̄kpọ nsịnudọn̄ ọnọ mme ekemmọ andituak ibuot, ndien mme ibọrọ nnyịn oro ima iketịm idem nte ọfọnde ẹsinam mmọ ẹkọri ke n̄kan̄ eke spirit. Nnyịn n̄ko inam se ifọnde ke ini nnyịn idade inyene nnyịn ise iban̄a Ufọkmbono Obio Ubọn̄ ye ke ini nnyịn in̄wamde ke nditịm n̄kpeme enye. (2 Ndidem 22:3-7; 2 Corinth 9:6, 7) Ke akpanikọ, “adan̄a nte ikụtde ifet, ẹyak nnyịn ifọn ido ye kpukpru owo, akpan-akpan ye mmọ emi ẹtode ke ufọk mme andinịm ke akpanikọ.”—Galatia 6:10.
25 Nnyịn ikemeke ndineme kpukpru idaha oro ẹdiyomde iwụt eti ido. Do, nte nnyịn isakde iso ise mbufa n̄kpọ-ata, ẹyak nnyịn iyom un̄wana N̄wed Abasi, ibọn̄ akam iben̄e edisana spirit Jehovah, inyụn̄ inam ofụri ukeme nnyịn ndinam uduak esie oro edide eti onyụn̄ ọfọnde ama. (Rome 2:9, 10; 12:2) Nnyịn imekeme ndinyene mbuọtidem nte ke Jehovah eyenen̄ede ọdiọn̄ nnyịn nte nnyịn ikade iso ndiwụt eti ido.
Didie ke Afo Ọkpọbọrọ?
• Didie ke nnyịn ikeme ndinam mfọnn̄kan n̄kpọ?
• Ntak ẹkotde eti ido “mfri eke otode un̄wana”?
• Ntak ẹkotde eti ido “mbun̄wụm spirit”?
• Eti edu uwem nnyịn esinyene nso odudu?
[Mme Mbụme Ukpepn̄kpọ]
[Ndise ke page 17]
Ikọ Abasi ye edisana spirit esie ẹn̄wam nnyịn ndiwụt eti ido
[Mme ndise ke page 18]
Ndiwụt eti ido esida nti utịp edi