Buọt Idem ye Jehovah—Kpa Ata Abasi

Nte afo emese ikpaenyọn̄ ke okoneyo emi enyọn̄ an̄wan̄ade onyụn̄ okụt ediwak ntantaọfiọn̄ ke mme itie ikie? Nte afo emekeme ndinam an̄wan̄a nte mmọ ẹkesan̄ade ẹdidu?

KE NDOBO okoneyo, mme ntantaọfiọn̄ ẹma ẹtịn̄ ikọ ẹnọ Edidem David eke Israel eset, onụkde enye ndiwet ete: “Mme heaven ke ẹbụk ubọn̄ Abasi, ikpa-enyọn̄ onyụn̄ etịn̄ se ubọk esie anamde.” (Psalm 19:1) Ih, Andibot odot “ndibọ Ubọn̄ ye ukpono ye odudu,” idịghe n̄kpọ obot.—Ediyarade 4:10b; Rome 1:25.

Bible ọdọhọ ete: “Enye emi ọkọbọpde kpukpru n̄kpọ edi Abasi.” (Mme Hebrew 3:4) Ke akpanikọ, ata Abasi emi “ekerede Jehovah, edi Ata Edikon̄ ke ofụri ererimbot.” (Psalm 83:18) Ndien enye idịghe abian̄a—mbukpọn̄. Jesus Christ ama etịn̄ aban̄a Ete esie eke heaven, Jehovah, ete: “Enye emi ọkọdọn̄de Mi edi ata Abasi.”—John 7:28.

Jehovah—Andisu Mme Uduak Esie

San̄asan̄a enyịn̄ Abasi, Jehovah, odu ekpere ndisịm utịm ike-7,000 ke N̄wed Abasi Usem Hebrew ikpọn̄. Enyịn̄ oro owụt nte ke enye edi ata Abasi. Enyịn̄ Abasi ke ata ata usụn̄ ọwọrọ “Enye Anam Akabade Edi.” Ke ntre, Jehovah Abasi anam ẹdiọn̄ọ enye nte Andisu mme uduak esie. Ke ini Moses okobụpde Abasi enyịn̄ esie, Jehovah ama etịn̄ se enyịn̄ esie ọwọrọde ke usụn̄ emi ete: “Ami nyakabade ndi se ndikabarede ndi.” (Exodus 3:14, NW) Edikabade Rotherham etịn̄ in̄wan̄-in̄wan̄ ete: “Nyakabade ndi se ededi oro mmade.” Jehovah esikabade edi se ededi oro enye emekde ndikabade ndi man osu ndinen uduak ye un̄wọn̄ọ esie. Ntem, enye enyene udịm udịm udorienyịn̄, utọ nte Andibot, Ete, Ọbọn̄ Andikara, Andibọk, Jehovah mme udịm, Andikop akam, Ebiereikpe, Akwa Anditeme, Andifak.—Judges 11:27; Psalm 23:1; 65:2, NW; 73:28, NW; 89:26; Isaiah 8:13; 30:20, NW; 40:28, NW; 41:14.

Ata Abasi kpọt enyene unen ndikere enyịn̄ oro Jehovah, koro mme owo mîkemeke ndifiọk m̀mê mme uduak mmimọ ẹyesu. (James 4:13, 14) Jehovah kpọt ekeme ndidọhọ: “Kpa nte edịm ye snow ẹtode ke enyọn̄ ẹsụhọde, ndien ifiakke ika do, tutu ẹbịt isọn̄, ẹnyụn̄ ẹnam enye afiari onyụn̄ etịbe, ẹnyụn̄ ẹda n̄kpasịp ẹnọ andisuan, ẹda udia ẹnọ andidia: kpa ntre ke ikọ mi emi ọwọrọde mi ke inua editie: idifiakke itiene mi ubọk-ubọk, tutu enye anam se mmade, onyụn̄ okụt unen ke utom emi ndọn̄de enye.”—Isaiah 55:10, 11.

Jehovah esinen̄ede anam uduak esie tutu idem n̄kpọ oro etiede mme owo nte idịghe ata idem n̄kpọ esidi ata idem n̄kpọ ke ekikere esie. Anyan ini ke Abraham, Isaac, ye Jacob ẹma ẹkekpan̄a, Jesus ama etịn̄ aban̄a mmọ onyụn̄ ọdọhọ ete: “Enye [Jehovah] idịghe Abasi mme  akpa-n̄kpa, edi edi eke mme odu-uwem: koro kpukpru owo ẹdu uwem ẹnọ Enye.” (Luke 20:37, 38) Mme anam-akpanikọ ete-ekpụk ita oro ẹma ẹkpan̄a, edi uduak Abasi ndinam mmọ ẹset ama enen̄ede ọsọn̄ọ nte mîkemeke ndikpu tutu etie enye nte mmọ ẹkesụk ẹdodu ke uwem. Ndinam mme anam-akpanikọ asan̄autom eke eset emi ẹfiak ẹdidu uwem idịghe ọkpọsọn̄ n̄kpọ inọ Jehovah, ukem nte mîkedịghe ọkpọsọn̄ n̄kpọ inọ enye ndida ntanisọn̄ mbot akpa eren.—Genesis 2:7.

Apostle Paul ọnọ uwụtn̄kpọ efen ndiwụt nte ke Abasi esinam uduak esie osu. Ke N̄wed Abasi, ẹkot Abraham “ete ediwak mme idụt.” (Rome 4:16, 17) Ke adan̄aemi Abram mîkenyeneke eyen kan̄a, Jehovah ama okpụhọde enye enyịn̄ okot Abraham, emi ọwọrọde “Ete Ediwak Owo (Udịm).” Jehovah ama anam se enyịn̄ oro ọwọrọde akabade edi ata idem n̄kpọ ebe ke ndifiak nnọ Abraham ye n̄wan esie Sarah oro ẹma ẹkesọn̄ ukeme unyene eyen ke utịbe utịbe usụn̄.—Mme Hebrew 11:11, 12.

Sia ẹma ẹkenọ enye ekese odudu, Jesus Christ ama esitịn̄ aban̄a ata idem n̄kpọ ke usụn̄ ukere n̄kpọ oro okon̄de akan eke owo. Okposụkedi n̄kpet n̄kpet ufan esie Lazarus ama akakpa, Jesus ama asian mme mbet esie ete: “Lazarus, ufan nnyịn, ke ede; edi mmọn̄ n̄ka man ndemede enye ke idap.” (John 11:11) Ntak emi Jesus ọkọdọhọde ke akpan̄kpa n̄kukụre edede?

Ke ini Jesus akade ekesịm Bethany obio emana Lazarus, enye ama aka udi onyụn̄ ọnọ uyo ete ẹkpat itiat oro ekeberede ke inua udi ẹsio. Ke ama ọkọbọn̄ akam uyo ọwọrọ, enye ama owụk ete: “Lazarus, wọrọ di.” Ndien ke iso mme andida nse oro ẹkewụkde enyịn ẹse udi oro, ‘akpa-n̄kpa ọwọrọ edi, nte ẹkedade ọfọn̄-udi ẹbọp enye ubọk ye ukot; ẹma ẹnyụn̄ ẹda ubak ọfọn̄ ẹbọp enye iso.’ Ekem Jesus ama ọdọhọ ete: “Ẹtat enye, ẹyak enye ọnyọn̄ ufọk.” (John 11:43, 44) Jesus ama anam Lazarus eset—anamde owo emi ama akakpa ke usen inan̄ afiak enyene uwem! Christ ikosụhu nsu ke ini enye ọkọdọhọde ke ufan imọ edede. Ke idaha ekikere Jehovah ye Jesus, eketie nte Lazarus oro ama akakpa akakam edede. Ih, Jesus ye Ete esie eke heaven ẹsinam ata idem n̄kpọ.

Jehovah Ekeme Ndinam Idotenyịn Nnyịn Edi Ata Idem N̄kpọ

Nso ukpụhọde idu ntem ke ufọt abian̄a abian̄a ndisọi mbiet ye ata Abasi! Mme andituak ibuot nnọ ndisọi mbiet ẹdọhọ ke ndudue ẹte ke ndisọi mbiet oro mmimọ ikponode ẹnyene odudu oro akande odudu owo. Nte ededi, idụhe udomo ukpono oro ekemede ndinam ndisọi mbiet emi ẹnam utịben̄kpọ. Ke n̄kan̄ eken, Jehovah Abasi ekeme nditịn̄ mban̄a mme asan̄autom esie oro ẹma ẹkekpan̄a ke anyan ini nte n̄kpọ eke mmọ ẹdude uwem, koro enye ekemede ndifiak nnọ mmọ uwem. “Jehovah edi Abasi akpanikọ,” ndien akananam enye ibian̄ake ikọt esie.—Jeremiah 10:10.

Edi n̄kpọ ndọn̄esịt didie ntem ndifiọk nte ke edikem ini Jehovah, mme akpan̄kpa oro ẹdude ke ibuot uti n̄kpọ esie ẹyeset—ẹfiak ẹdu uwem! (Utom 24:15) Ih, ediset ke n̄kpa abuana edifiak n̄wụk idaha uwem owo. Nditi idaha uwem mme akpan̄kpa ndinyụn̄ nnam mmọ ẹset ke n̄kpa isọn̄ke Andibot, emi ọniọn̄ ye odudu esie mînyeneke adan̄a. (Job 12:13; Isaiah 40:26) Sia  Jehovah awakde ima, enye ayada mfọnmma ukeme uti n̄kpọ esie anam mme akpan̄kpa ẹfiak ẹdidu uwem ke paradise isọn̄ ye mme edu oro mmọ ẹkenyenede mbemiso ẹkekpan̄ade.—1 John 4:8.

Nte utịt ererimbot Satan asan̄ade ekpere, ini iso mbon oro ẹbuọtde idem ye ata Abasi enen̄ede ayama. (Mme N̄ke 2:21, 22; Daniel 2:44; 1 John 5:19) Andiwet psalm ọsọn̄ọ ọnọ nnyịn ete: “Osụk esisịt idiọk owo ididụhe: . . . edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:10, 11) Ubiatibet ye afai ẹdidi n̄kpọ eset. Unenikpe oyodu, ndien nsọn̄ọn̄kpọ eyebe efep. (Psalm 37:6; 72:12, 13; Isaiah 65:21-23) Ẹyesọhi kpukpru idiọn̄ọ asari n̄kaowo, asari eke orụk, ye asari eke ekpụk ẹfep. (Utom 10:34, 35) Ekọn̄ ye mme n̄kpọekọn̄ ididụhe aba. (Psalm 46:9) Ke ini oro “andidụn̄ ididọhọke ite, Ndọdọn̄ọ.” (Isaiah 33:24) Kpukpru owo ẹyenyene mfọnmma ye eti nsọn̄idem. (Ediyarade 21:3, 4) Paradise isọn̄ ọyọsọp ndidi ata idem n̄kpọ. Jehovah aduak ndinam emi!

Ih, kpukpru idotenyịn oro ẹkọn̄ọde ke Bible ẹyesu ke mîbịghike. Ntak emi nnyịn ikpayakde se ẹtuakde ibuot ẹnọ ke ererimbot emi abian̄a nnyịn ke ini nnyịn ikemede ndinyene ọyọhọ mbuọtidem ke Jehovah? Edi uduak esie nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Timothy 2:3, 4) Utu ke ndiyak ini ye inyene nnyịn nsịn ke mme abian̄a abian̄a n̄kpọ, m̀mê mme mbukpọn̄ n̄kpọ, editịm n̄kpọ emi ye mme abasi esie, ẹyak nnyịn ikọri ke ifiọk ata Abasi inyụn̄ ibuọt idem ye enye ke ofụri esịt nnyịn.—Mme N̄ke 3:1-6; John 17:3.

[Ndise ke page 6]

Ke idaha ekikere Jehovah ye Jesus, Lazarus ekedede

[Mme ndise ke page 7]

Paradise isọn̄ ọyọsọp edi ata idem n̄kpọ